Oghẹrẹ nọ Ẹmo gbe Ozighi I ti ro Kuhọ

ỌGHẸNẸ Ọ TE RAHA EGỌMETI AHWO-AKPỌ NO

Ọghẹnẹ ọ te rọ ẹmo Amagidọna raha egọmeti ahwo-akpọ no. (Eviavia 16:16) Evaọ oke yena, a ti koko “ivie otọakpọ na soso” họ kẹ “ẹmo ẹdẹ ologbo Ọghẹnẹ Erumeru na.” (Eviavia 16:14) Amagidọn họ ẹmo nọ Ọghẹnẹ o ti ro ku emo kpobi họ.

Ọghẹnẹ ọ te rọ Uvie riẹ nwene egọmeti ahwo-akpọ. Uvie Ọghẹnẹ yọ egọmeti nọ u ti su no obọ odhiwu ze, yọ a te raha iẹe vievie he. (Daniẹl 2:44) Ọghẹnẹ ọ salọ Jesu nọ ọ rrọ Ọmọ riẹ re ọ jọ Ovie Uvie na. (Aizaya 9:6, 7; Matiu 28:18) Egọmeti nana họ Uvieb nọ Jesu o wuhrẹ ilele riẹ inọ a lẹ kpahe na. (Matiu 6:9, 10) Ahwo-akpọ kpobi a te jọ otọ egọmeti ọvuọvo yọ Jesu họ Osu egọmeti na.

Jesu o wo ohẹriẹ no isu ahwo-akpọ. Ọ te rọ udu nọ Ọghẹnẹ ọ kẹ riẹ ru eware oriobọ họ. Fikinọ Jesu o kiẹrẹe yọ ọ kare ọriẹwẹ, o ti kienyẹ ohwo ọvo ho ghelọ orẹwho nọ ohwo o no ze kẹhẹ, uyẹ riẹ hayo ovioma riẹ. (Aizaya 11:3, 4) Yọ ahwo a te họre fikinọ a bi kienyẹ ae he. Ẹvẹ ma rọ ta ere? Keme Jesu o ti ru oware nọ u ti kiehọ kẹ ohwo kpobi. Jesu “o ti siwi oyogbe nọ o bi bo kẹ obufihọ na, te oruori na avọ ohwo kpobi nọ o wo ofiobọhọ họ. . . . O ti siwi ai no okienyẹ gbe ozighi.”—Olezi 72:12-14.

Ọghẹnẹ ọ te rọ Uvie riẹ si ekwakwa ẹmo kpobi no otọakpọ na no. (Maeka 4:3) Ọ te jẹ raha ahwo omuomu kpobi no, enọ e rọwo siọ ohọre ba ha, gbe ahwo nọ a be nwa amọfa oma. (Olezi 37:9, 10) Te ezae, te eyae, te emaha na, a te rria dhedhẹ evaọ oria kpobi nọ a rrọ evaọ otọakpọ na, ozọ u gbe ti mu ai hi.—Izikiẹl 34:28.

Nọ Uvie Ọghẹnẹ u te mu otọakpọ na họ esu no, ahwo a te reakpọ kuoma. Ẹbẹbẹ uwou, uvuhu, ohọo, gbe eware itieye na nọ e be wha ohọre ze nẹnẹ na i ti notọ. Emamọ emu ọ te vọ oria kpobi nọ ahwo a te re, yọ ohwo kpobi o ti wo emamọ uwou nọ ọ rẹ rria.—Olezi 72:16; Aizaya 65:21-23.

Uvie Ọghẹnẹ u ti si ebẹbẹ kpobi nọ ẹmo ọ wha ze no. Ahwo kpobi nọ a nwoma fiki ẹmo a ti wo omokpokpọ, yọ ahwo nọ a be mọ ẹyao iroro fiki eware edada nọ a rọ ẹro ruẹ evaọ ẹmo, a ti siwi ai. Makọ ahwo nọ a whu no dede a te kpare ae zihe ziọ uzuazọ. (Aizaya 25:8; 26:19; 35:5, 6) Ahwo uviuwou nọ ẹmo o le kpohọ eria sa-sa a te wariẹ jọ kugbe. A gbẹ te kareghẹhọ eware iyoma nọ e via kẹ ae he keme “eware anwae na e vrẹ no.”—Eviavia 21:4.

ỌGHẸNẸ O TI SI UZIORAHA NO

Uvie Ọghẹnẹ u ti ru nọ ahwo kpobi a te rọ gọ Jihovac, Ọghẹnẹ uzẹme na, ọnọ ọ rrọ “Ọghẹnẹ uyoyou gbe ọrọ udhedhẹ na.” (2 Ahwo Kọrint 13:11) A ti wuhrẹ ahwo kpobi re a rria dhedhẹ kugbe ohwohwo. (Aizaya 2:3, 4; 11:9) Ahwo kpobi nọ a yoẹme kẹ Ọghẹnẹ a ti no igbo uzioraha, a vẹ te jọ gbagba.—Ahwo Rom 8:20, 21.

ỌGHẸNẸ Ọ TE RAHA SETAN AVỌ IZI IMUOMU NA NO

Ọghẹnẹ ọ te rọ Uvie riẹ raha Setan avọ idhivẹri na no keme ae a bi ru nọ ahwo a bi ro fi ẹmo. (Eviavia 20:1-3, 10) A gbe ti fi ekpehre iroro họ ahwo udu hu, fikiere “udhedhẹ o te dafia.”—Olezi 72:7.

Eyaa kpobi nọ Ọghẹnẹ ọ ya inọ o ti ku ẹmo gbe ozighi họ i ti rugba. Ọghẹnẹ ọ gwọlọ nọ o re si ẹmo notọ yọ o wo ogaga nọ ọ sai ro ru ei.

• Ọghẹnẹ o wo areghẹ gbe ogaga ulogbo nọ ọ sai ro ku ẹmo gbe ozighi họ. (Job 9:4) Oware ovo nọ o rẹ bẹ Ọghẹnẹ eru o rrọ họ.—Job 42:2.

• O rẹ kẹ Ọghẹnẹ uye nọ ahwo a tẹ be reoja. (Aizaya 63:9) U te no ere no, o “mukpahe ohwo kpobi nọ ozighi ọ rẹ were.”—Olezi 11:5.

• Ọghẹnẹ o re ru ẹme riẹ gba ẹsikpobi; ọ rẹ sae ta ọrue he.—Aizaya 55:10, 11; Taitọs 1:2.