Ahwo Ẹfisọs 3:20—“[Ọghẹnẹ O re] Ru Eware Buobu Gbidi Gbidi kẹ Omai Vi Eware Kpobi nọ Ma Yare Hayo nọ Ma Roro”

“Whaọ jọ ọnọ ọ rẹ sae rehọ ogaga riẹ nọ u bi ru iruo evaọ oma mai ru eware buobu gbidi gbidi kẹ omai vi eware kpobi nọ ma yare hayo nọ ma roro na, o wo oruaro na.”—Ahwo Ẹfisọs 3:20, 21, Efafa Akpọ Ọkpokpọ.

“Enẹna, ọ ye nọ o re ruẹ eware ilogbo buobu vi enọ ma [yare], hayo eroro, wọhọ epanọ ogaga nọ o rọ eva mai ru iruo o rọ, oro u tei.”—Ahwo Ẹfisọs 3:20, 21, Ebaibol Ẹri Na.

Otofa Eme nọ E Rrọ Ahwo Ẹfisọs 3:20

Eme nọ Pọl ukọ na ọ ta evaọ oria nana i dhesẹ nọ o fievahọ Ọghẹnẹ inọ ọ rẹ sae kuyo elẹ idibo riẹ, je ru eware nọ a yare kẹ ae evaọ edhere nọ a roro nọ o sae lọhọ họ. Ọ sae tubẹ kuyo elẹ rai evaọ oghẹrẹ nọ a roro ho.

“Whaọ jọ ọnọ ọ rẹ sae rehọ ogaga riẹ nọ u bi ru iruo evaọ oma mai.” Owọ avọ 21 o dhesẹ nọ ẹme na “ọnọ,” nọ a fodẹ evaọ oria ikere nana yọ Jihova Ọghẹnẹ.a Pọl ukọ na o kere nọ: “O wo oruaro na ẹkwoma ukoko na gbe Kristi Jesu.” Ofariẹ, Ọghẹnẹ ọ rẹ sae kẹ omai ẹgba, hayo ogaga nọ ma gwọlọ re ma sai ru oreva riẹ.—Ahwo Filipai 4:13.

Evaọ owọ avọ 20, Pọl ukọ na ọ ta oware jọ nọ u wuzou gaga kpahe Jihova, inọ o wo ogaga nọ o re ro fiobọhọ kẹ idibo riẹ. Obe jọ nọ a kere kpahe oria Ebaibol nana ọ ta kpahe eme na “ọnọ ọ rẹ sae rehọ ogaga riẹ,” inọ: “Orọnikọ etenẹ na o be ta ha inọ Ọghẹnẹ ọ rẹ sai ru oware hayo ẹsejọhọ o ti ru oware. Rekọ o be ta nọ Ọghẹnẹ o wo ogaga nọ o re ro ru oware nọ ọ gwọlọ.” Ẹsejọ ohwo nọ ọ gwọlọ fiobọhọ kẹ omai o re wo ogaga nọ o re ro ru oware nọ o wo họ iroro ho. Rekọ Jihova o wo ogaga nọ o re ro ru oware kpobi nọ ọ gwọlọ re ọ sae kuyo elẹ idibo riẹ. Ọye ọvo họ ọnọ o wo ẹgba ologbo gbe ogaga nọ u re mu ọwhewhe.—Aizaya 40:26.

“[Ọghẹnẹ] ọ rẹ sae . . . ru eware buobu gbidi gbidi kẹ omai vi eware kpobi nọ ma yare hayo nọ ma roro.” Jihova ọ rẹ sai ru eware buobu “gbidi gbidi” kẹ idibo riẹ. Jihova ọ rẹ sai fiobọhọ kẹ idibo riẹ vi epanọ a roro hayo nọ a rẹro riẹ.

Eme na “vi eware kpobi nọ ma yare hayo nọ ma roro,” i wuhrẹ omai oware jọ nọ u wuzou gaga. Nọ Pọl ukọ na ọ ta nọ, “vi eware kpobi nọ ma yare hayo nọ ma roro,” ọ gwọlọ nọ Ileleikristi a riẹ nọ Ọghẹnẹ ọ rẹ sai fiobọhọ kẹ ae evaọ idhere nọ a roro ho, hayo nọ a rẹro riẹ hẹ. A jọ Ebaibol Ẹri Na fa abọ ọsosuọ owọ avọ 20 na inọ: “Enẹna, ọ ye nọ o re ruẹ eware ilogbo buobu vi enọ ma [yare], hayo eroro.” Evaọ ẹsejọ, Ileleikristi a sai roro nọ ebẹbẹ rai e rro ga hrọ, hayo e ga vi eware nọ a rẹ sai kuhọ. Ẹsejọ a rẹ tubẹ riẹ oware nọ a rẹ lẹ kpahe dede he. Rekọ Jihova o re wo otoriẹ oware kpobi, yọ o wo ogaga nọ ọ sai ro fiobọhọ. Ọghẹnẹ o re ku ẹbẹbẹ kpobi họ evaọ edhere nọ ma roro ho, hayo nọ ma rẹro riẹ hẹ evaọ okenọ o mai kiehọ. (Job 42:2; Jerimaya 32:17) Bọwo oke nọ o re ku ẹbẹbẹ na họ, ọ rẹ kẹ idibo riẹ ogaga nọ a re ro thihakọ jẹ wereva!—Jemis 1:2, 3.

Eme nọ E Wariẹ Ahwo Ẹfisọs 3:20 Họ

Obe Ahwo Ẹfisọs yọ ileta nọ Pọl ukọ na o kere se Ileleikristi nọ e jẹ rria okpẹwho Ẹfisọs evaọ Esia Minor, onọ o rrọ abọjọ orẹwho Turkey enẹna. Evaọ ileta na, Pọl ukọ na ọ ta kpahe olẹ nọ ọ lẹ se Ọghẹnẹ rọkẹ ae. (Ahwo Ẹfisọs 3:14-21) Ọ lẹ nọ jọ Ileleikristi nọ e jọ Ẹfisọs, te Ileleikristi kpobi, a riẹ uyoyou Jesu Kristi ziezi, re a daoma rọ aro kele oriruo riẹ evaọ uruemu rai gbe oghẹrẹ nọ a re rri eware. Nọ Pọl o je ku olẹ na họ, o te jiri Ọghẹnẹ jẹ ta eme nọ e rrọ Ahwo Ẹfisọs 3:20, 21 na.

Rri ividio ọkpẹkpẹe nana re whọ ruẹ eware nọ e rrọ obe Ahwo Ẹfisọs.