PAAT 9

A Wen Paradais A-go Kom?

Aal a di prablem dem pan di ort pruuv se Gad Kindom suun tek uova. Luuk 21:10, 11; 2 Timoti 3:1-5

Prablemz we de aal bout iina di laas diez dem—gyamblin, waar, siknis, fuud skiers, pikni naa lisn tu dem mada an faada, vailens iina di fambili

Nof a di tingz we wi si a gwaan nou a wa di Baibl did tel wi se wuda did apm. It did se piipl wuda lov moni, wuda onggl bizniz wid demself, an wudn fala wa dem mada an dem faada se.

An fordamuor, di Baibl se fuud wuda skiers, an wi wuda av masiv ortkwiek, uol iip a waar, an aal kain-a siknis. A dem siem sitn de a apm rait ya nou.

Wan Jeuova Witnis a priich di gud nyuuz bout di Kindom tu wan man

Bot Jiizas did se iina di mids a aal a dat, di gud nyuuz bout Gad Kindom wudana priich aal uova di worl.—Matyu 24:14.

Di Kindom a-go get rid a aal wikidnis. 2 Piita 3:13

Di wikid get dischrai iina di Aamagedan waar, den Sietan an im diiman dem get dem ponishment

Likl fram dis, Jeuova a-go dischrai aal a di wikid piipl dem.

Sietan an di wikid ienjel dem a-go get dischrai tu.

Jiizas a sidong pan im chuon iina evn an piipl fram aal uova di worl wel api

Bot aal a uu lisn tu Gad a-go go uova iina di Paradais ort. Nobadi naa go fried fi notn agen, an evribadi a-go chos an lov dem wan aneda.