Wa mek Yu No Fi Stap Stodi?

1. A ou it a-go elp yu ef yu no stap yu Baibl stodi?

Yu wuda agrii se di tingz dem we yu lorn fram di Baibl so faar mek yu lov fi Jeuova get schrangga. Ef da lov de fi gruo, yu afi aalwiez a work pan it. (1 Piita 2:2) Di onggl wie yu wi get fi liv fi eva a ef yu kantinyu fi stodi Gad Wod so dat yu kyan get kluos tu im.​—Riid Jan 17:3; Juud 21.

Az yu get fi nuo Gad muor an muor, yu fiet iina im a-go get schrangga an schrangga. Wen yu av fiet iina Gad, it wi elp yu fi du we im se an mek im api. (Iibruu 11:1, 6) It wi kaaz yu fi fiil sari fi di wie ou yu yuus tu liv yu laif an wi mek yu waahn chienj yu laif fi di beta.​—Riid Aks 3:19.

2. A ou yu kyan yuuz we yu nuo bout Gad fi elp ada piipl?

Nou dat yu lorn dem tingz ya, yu a-go waahn fi tel ada piipl kaa aal a wi lov fi tel piipl bout di gud tingz we wi nuo. Wail yu a gwaan stodi di Baibl, yu a-go lorn ou fi yuuz it fi tel ada piipl bout yu fiet iina Jeuova an aal di gud ting dem we yu lorn bout im.​—Riid Ruoman 10:13-15.

Di fos sumadi dem nof piipl tel bout di gud nyuuz a dem fambili an dem fren dem. Bot no fuos we yu lorn pan dem, an no tel dem se dem rilijan a fuul dem op. Insted a dat, tel dem bout aal a di gud tingz we Gad a-go du fi wi. Memba se wa miin di muos tu piipl a no so moch we yu se, bot muor so a di kain wie we yu diil wid piipl.​—Riid 2 Timoti 2:24, 25.

3. Wa blesn yu kyan get ef yu gi yu laif tu Gad?

Di muor yu stodi di Baibl, likl bai likl, yu a-go staat fi tingk muor laik ou Gad waahn yu fi tingk, an yu a-go staat du di ting dem we im waahn yu fi du. An az taim go bai, yu kyan av wan kluos kluos rilieshanship wid Jeuova. Yu kyan iivn get fi bi laik wan son ar wan daata tu im.​—Riid 2 Korintiyan 6:18.

4. Wa yu fi du ef yu waahn kantinyu fi get Gad blesn?

Ef yu gwaan stodi Gad Wod, yu a-go lorn ou fi tingk iina di wie we Gad waahn yu fi tingk an du di ting dem we im waahn yu fi du. (Iibruu 5:13, 14) Aks wan a di Jeuova Witnis piipl dem fi stodi di Baibl wid yu. Di muor yu lorn fram Gad Wod, di beta yu laif a-go bi.​—Riid 1 Timoti 4:15, 16; Ruoman 12:2.

Di gud nyuuz kom fram Jeuova, an im a di api Gad. Wen yu get kluos tu im piipl dem, dat wi elp yu fi get kluosa tu Gad. (Iibruu 10:24, 25) Duohn stap work aad fi mek Jeuova fiil gud bout yu. Wen yu du dat, yu a go afta di laif we Gad did pramis. Dat miin yu a-go liv fi eva. Di bes ting yu kyan eva du a fi get kluos tu Gad.​—Riid 1 Timoti 1:11; 6:19.