“Fi Get Kluosa An Kluosa Tu Gad, Dat A Sitn Gud” Fi Wi!

1-2. (a) Ef wi an sumadi fi ton gud fren, wa wi niid fi du? (b) Wa wi a-go luk pan iina da lesn ya?

EF YU av wan gud fren, a mait-a kaa yu did spen nof taim wid im, an kaaz a dat yu get fi si di sitn dem we dem go chuu iina laif. An di kain-a wiez dem we dem av mek yu waahn fi chrai fi du laik dem, an yu get fi nuo di sitn dem we dem laik an we dem no laik tu. A dem sitn de mek unu ton gud fren an mek yu lov dem, no chuu?

² It tek uol iip fi yu an sumadi ton gud fren. An a siem so it go ef wi an Jeuova a-go ton gud fren. Iina da lesn ya, wi a-go luk pan ou wi an Jeuova kyan get kluos kluos an di blesn dem we wi get wen wi du dat. Bot di fos ting we wi a-go luk pan a wa mek it gud fi wi get kluos tu Jeuova, wi bes fren.

3. Wa mek wi fi tingk bout di blesn dem we wi get wen wi jraa kluos tu Jeuova? Tel wi wa it komiin laik.

³ Wi nuo se a sitn gud wen wi an Jeuova kluos. Bot a wen wi tingk bout ou gud it bi fi jraa kluos tu Jeuova, a dat a-go elp wi fi gwaan jraa kluos tu im. (Sa. 63:6-8) Laik wi nuo se ef wi nyam gud fuud, eksasaiz aafn, an go a wi bed wen wi fi go a wi bed, an jringk nof waata, a dem sitn ya gud fi wi. Bot nof piipl no tingk bout di gud sitn dem we dem sitn ya kyan du fi dem, an kaaz a dat, dem naa tek kier a demself. Bot di muor wi tingk bout di gud sitn dem we kom fram dem sitn de, a di muor wi a-go chrai fi du dem. A siem so wi mait-a nuo se wen wi jraa kluos tu Jeuova a sitn gud dat fi wi, bot di muor wi tingk bout di blesn dem we wi get wen wi du dat, a dat a-go push wi fi jraa kluosa an kluosa tu wi Fren.​—Sa. 119:27-30.

4. Wa di man we rait Saam 73:28 did se?

⁴ Riid Saam 73:28. Di man we rait Saam 73 a did a wan Liivait we dem did pik fi plie myuuzik iina Jeuova ous. An im mait-a did a sorv Jeuova fi wan lang taim. Bot im stil did fiil se im fi memba an elp ada piipl fi memba se “fi get kluosa an kluosa tu Gad” a sitn gud fi im an dem du. Wa a som a di blesn dem we wi get wen wi du dat?

WEN WI “GET KLUOSA AN KLUOSA TU GAD,” IT A-GO MEK WI API

5. (a) Wa mek it a-go mek wi api wen wi jraa kluos tu Jeuova? (b) Azkaadn tu Pravorbz 2:6-16, tel wi som sitn we Jeuova se we ef yu du it, it a-go elp yu.

⁵ Di kluosa wi get tu Jeuova a di muor api wi a-go bi. (Sa. 65:4) An wi av wol iip a riizn we mek wi kyan se dat. Wan a di riizn a dat wi get uol iip a blesn wen wi du di sitn dem we wi lorn iina di Baibl. Laik it elp wi fi no get miks op iina bad kompni an fi no en op a du som bad sitn we wi sari bout. (Riid Pravorbz 2:6-16.) An a das wai di Baibl se: “Di sumadi we waiz a-go api, an di sumadi we andastan wa a gwaan a-go api tu.”​—Pr. 3:13.

6. Wa mek di man we rait Saam 73 did fiil sad?

⁶ Aalduo wi se wen wi jraa kluosa an kluosa tu Jeuova it a-go mek wi api, dat no miin tu se wi naa go fiil sad som a di taim. Di man we rait Saam 73 did fiil sad wan a di taim wen im neehn de tingk bout tingz di rait wie kaa im did fiil se tingz a gwaan fi di piipl dem we naa du wa Jeuova Gad waahn dem fi du. Im did staat fi bad main dem an dat did mek im sad. Im did biliiv se dem piipl de we a fait an kil aaf ada piipl an we ful-a demself did aalwiez av uol iip a moni an aati, an se notn kudn mek dem sofa. (Sa. 73:3-7, 12) Wan a di taim, im aal staat fi tingk se aal a we im a du fi Jeuova no wot notn. An kaaz a dat, im se: “It komiin laik se it neehn mek no sens fi mi kip mi aat kliin an no du notn fi sin gens Gad.”​—Sa. 73:13.

7. Wa kyan elp yu wen yu sad bad? (Luk pan di picha tu.)

⁷ Di man we rait Saam 73 neva jos mek kaa im did sad mek im tap sorv Jeuova, im du sitn bout it. Im “go iina Gad ous we big an nais” so dat Jeuova kuda elp im fi staat tingk bout tingz di rait wie. (Sa. 73:17-19) An jos nuo se wen yu sad bad, Jeuova nuo ou yu fiil. An ef yu prie tu im an aks im fi elp yu an yu tek di elp we im gi yu fram di Baibl an di breda an sista dem, yu a-go si se yu naa go so sad an yu a-go kyan go aan. An aal wen yu a wori an fret bad, memba se Jeuova kyan osh yu an kaam yu aat.​—Sa. 94:19.a

WEN WI “GET KLUOSA AN KLUOSA TU GAD,” IT GI WI SITN FI LIV FA NOU AN IINA DI FYUUCHA

8. Wa a tuu ada wie it kyan elp wi wen wi jraa kluosa an kluosa tu Jeuova?

⁸ It kyan elp wi iina tuu ada wie wen wi jraa kluosa an kluosa tu Jeuova: (1) It gi wi sitn fi liv fa nou, an (2) it gi wi sitn fi liv fa iina di fyuucha. (Jer. 29:11) Mek wi luk som muor pan wa dem tuu sitn ya kyan du fi wi.

9. Wen wi jraa kluosa an kluosa tu Jeuova, wa mek dat gi wi sitn fi liv fa?

⁹ Wen wi get kluosa an kluosa tu Jeuova, dat gi wi sitn fi liv fa. Nof piipl tide we no biliiv se no Gad no de no tingk se dem av notn a liv fa. An it mek dem fiil se di taim a-go kom wen nobadi naa go de bout. Bot wen wi stodi Gad Wod, it mek wi nuo fi shuor se Gad “de fi chuu, an dat im a-go du som uol iip a gud sitn fi di wan dem we luk fi im aad aad.” (Iib. 11:6) Bot aal rait ya nou ya, kaa Jeuova mek wi fi sorv im, it mek wi api wen wi dwi’it.​—Dyuu. 10:12, 13.

10. Wa Saam 37:29 se a-go apm fi di wan dem we a worship Jeuova?

¹⁰ Fi wol iip a piipl we naa worship Gad, di onggl ting dem en op du a jos wok, av pikni, an siev op fi wen dem get uol. Bot wi we a sorv Jeuova, a no so wi liv wi laif. (Sa. 25:3-5; 1 Tim. 6:17) Kaa wi jraa nier tu Jeuova, wi chos im an wi nuo fi shuor se im a-go gi wi di sitn dem we im pramis fi gi wi. An wan a di sitn dem we wi a-go get fi du a fi worship im fi eva iina Paradais.​—Riid Saam 37:29.

11. A ou it mek wi an Jeuova fiil kaa wi a get kluosa an kluosa tu im?

¹¹ Wen wi jraa nier tu Jeuova, wi get som wol iip a ada blesn. Laik im pramis se im a-go paadn di wan dem we jraa kluosa an kluosa tu im an we sari fi di rang sitn dem we dem du an tap du dem. (Aiz. 1:18) An kaaz a dat, wi kanchens naa bada wi bout di sitn dem we wi du aredi. (Sa. 32:1-5) An wi kyan fiil gud fi nuo se wi kyan mek Jeuova api. (Pr. 23:15) An wi nuo se yu kyan tingk bout som wol iip a ada blesn we yu get kaa yu a get kluosa an kluosa tu Jeuova. Bot wa a som tingz wi kyan du fi jraa kluosa an kluosa tu Jeuova?

WA WI AFI DU FI GWAAN “GET KLUOSA AN KLUOSA TU GAD”

12. Wa a som a di sitn dem we yu du aredi fi get kluosa an kluosa tu Jeuova?

¹² Ef yu a sumadi we baptaiz aredi dat miin tu se yu du nof sopm fi jraa kluos tu Jeuova aredi. Laik yu lorn nof tingz bout Jeuova an Jiizas, an yu sari bout di rang sitn dem we yu du an tap du dem. An yu a du tingz fi shuo se yu chos iina Jeuova, an yu a wok aad fi du di sitn dem we im waahn yu fi du. Bot ef yu a-go get kluosa an kluosa tu Jeuova, yu afi gwaan du dem sitn ya tu.​—Kol. 2:6.

13. Wa a chrii sitn wi kyan du fi get kluosa an kluosa tu Jeuova?

¹³ Ef wi a-go gwaan get kluosa an kluosa tu Jeuova, wi afi du chrii tingz. (1) Wi afi gwaan riid an stodi di Baibl. An wen wi a du dat, wi no onggl a-go chrai fi lorn som tingz we iizi fi lorn bout Jeuova, bot wi a-go chrai fi lorn wa im riili waahn wi fi du, an wi a-go chrai fi lorn di ting dem we wi kyan riizn pan we kyan mek wi nuo ou fi liv wi laif. (Ifii. 5:15-17) An (2) wi fi tek di taim fi tingk bout umoch Jeuova lov wi kaa dat a-go elp wi fi chos iina im muor. An (3) wi afi gwaan iet di ting dem we Jeuova iet an no kip kompni wid di piipl dem we a du dem sitn ya.​—Sa. 1:1; 101:3.

14. Azkaadn tu 1 Korintiyan 10:31, wa a som sitn wi kyan du evridie fi mek Jeuova api? (Luk pan di picha dem tu.)

¹⁴ Riid 1 Korintiyan 10:31. Wi fi mek shuor se wi a du di ting dem we mek Jeuova api, no onggl wen wi de a sorvis an wen wi de a miitn, bot wi afi du dem evridie iina wi laif tu. Laik wen wi anis an kain tu piipl it mek Jeuova api. (2 Kor. 8:21; 9:7) An Jeuova waahn wi fi api fi di laif we im gi wi. So wen wi iit an jringk di sitn dem we gud fi wi an wi a du ada tingz fi mek shuor se wi a tek kier a wiself, wi a shuo se wi api fi di laif we Jeuova gi wi. Evriting we wi du fi mek Jeuova api, aal wen it luk laik a no wan big ting, it jraa wi kluosa an kluosa tu Jeuova.​—Luuk 16:10.

15. A ou Jeuova waahn wi fi chriit ada piipl?

¹⁵ Jeuova kain tu di piipl dem we du gud an di wan dem we du bad tu. (Mat. 5:45) An im waahn wi fi du di sed ting tu. Das wai im tel wi se wi ‘no fi taak bad bout nobadi an wi no fi kwaril-kwaril. Insted-a dat, wi fi tek taim wid piipl.’ (Taitos 3:2) So dat miin se wi naa go gwaan laik se wi beta dan ada piipl we no biliiv di siem ting wa wi biliiv. (2 Tim. 2:23-25) Wen wi aalwiez kain tu piipl an shuo se wi kier bout dem, dat a-go mek wi get kluosa an kluosa tu Jeuova.

AAL WEN WI DU SITN RANG, WI KYAN STIL “GET KLUOSA AN KLUOSA TU GAD”

16. A ou di man we rait Saam 73 did staat fi fiil afta a wail?

¹⁶ Wen wi du sitn rang, wi mait-a fiil laik se Jeuova naa go lov wi agen. An a siem wie so di man we rait Saam 73 did fiil. Im se: “Mi aalmuos ton we an tap du di sitn dem we rait. It wuda komiin laik se mi nieli slaid an jrap.” (Sa. 73:2) An im aal se wa im du did “bon [im] tu [im] aat” an im se im “na’av no sens” an se im did “komiin laik wan wail animal” infronta Jeuova. (Sa. 73:21, 22) Yu tingk se im did fiil se kaa im du sitn rang Jeuova neehn lov im no muor an wudn paadn im?

17. (a) Wen di man we rait di Saam did fiil laik se a it dat fi im, wa im did du? (b) Wa wi kyan lorn fram wa did apm tu da man de? (Luk pan di picha dem tu.)

¹⁷ Bot a did onggl fi wan likl bit a taim di man we rait da Saamz ya did fiil se Jeuova no waahn av notn fi du wid im, kaa wen im did fiil se a it dat fi im, im si se a kluosa im fi get kluosa tu Jeuova. An wi nuo dat kaa im did se: “Bot nou mi eva a-go chos iina yu [Jeuova]; yu uol aan tait pan mi rait an, an yu naa go lego aafa it. Yu mek mi nuo wa fi du an wa mi no fi du. An wen mi du wa yu se, mi nuo se yu a-go bles mi an gi mi uol iip a gud sitn.” (Sa. 73:23, 24) A siem so wen wi sad bad an wi fiil laik se wi kyaahn go aan no muor, a Jeuova wi fi luk tu fi elp wi. (Sa. 73:26; 94:18) An iivn ef wi du sitn rang wan a di taim, wi kyan ton tu Jeuova an nuo se im “redi fi paadn piipl.” (Sa. 86:5) Wos wen wi fiil laik se a it dat fi wi, a da taim de wi fi du tingz fi get kluos tu Jeuova.​—Sa. 103:13, 14.

WI A-GO KYAN “GET KLUOSA AN KLUOSA TU GAD” FI EVA

18. Wa mek wi a-go kyan aalwiez get kluosa an kluosa tu Jeuova?

¹⁸ Wi a-go aalwiez kyan get kluosa an kluosa tu Jeuova an get fi nuo im beta. Di Baibl mek wi nuo bout di kain-a wiez dem we Jeuova av, laik ou waiz im bi, an it mek wi nuo se nobadi “kyan andastan di wie im du tingz.”​—Ruo. 11:33.

19. Wa Saam 73 mek wi nuo bout di fyuucha?

¹⁹ Saam 79:13 se: “An wi, yu piipl we komiin laik shiip we yu kya go we nof griin graas de, a-go tangk yu fi eva; an wi a-go mek wi pikni pikni dem nuo bout yu so dat dem kyan priez yu tu.” Wen yu gwaan get kluos tu Gad, yu kyan nuo fi shuor se im a-go bles yu an den yu kyan go se: “Gad a mi rak, an im a-go aalwiez gi mi wa mi fi get.”​—Sa. 73:26.