Wa Kyan Elp Wi Fi No If-An-Bot An Wanda-Wanda?

1-2. (a) Wa a som a di sitn dem we kyan kaaz di piipl dem we a sorv Jeuova fi a if-an-bot an wanda-wanda? (b) A wa wi a-go luk pan iina da lesn ya?

NO MATA uu yu bi, yu mait-a a if-an-bot an wanda bouta sortn tingz. Laik, yu mait av wan yong sumadi we a wanda ef Jeuova riili kier bout dem, an ef dem fi riili gi dem laif tu Jeuova an baptaiz. Ar yu mait-a av wan breda we no so yong agen we did yuuz muos a im laif fi du Jeuova wok an neehn go afta no big wok we kuda mek im mek wol iip a moni. Bot nou im a fain it aad fi tek kier a im fambili, so im mait-a a wanda ef im did du di rait ting wid im laif. Ar tingk bout wan sista we op iina iej we no so chrang agen an mait-a fiil a wie kaa shi kyaahn du tingz laik wa shi yuus tu du. Yu eva aks yuself dem kwestiyan ya: ‘Jeuova riili a si mi? Di ting dem we mi gi op fi du tingz fi Jeuova wot it? Jeuova stil av yuus fi mi?’

² Ef wi no get di ansa fi dem kwestiyan ya, dem kyan mek wi no chos iina Jeuova no muor an mait-a aal mek wi tap worship im tu. Iina da lesn ya, wi a-go luk pan som sopm iina di Baibl we wi kyan riizn pan we kyan elp wi ef wi a if-an-bot an a wanda-wanda, laik (1) ef Jeuova kier bout wi, (2) ef wi did du di rait ting wid wi laif, an (3) ef Jeuova stil av yuus fi wi.

WA KYAN ELP WI WEN WI A IF-AN-BOT AN WANDA-WANDA

3. A wa a wan a di ting dem we kyan elp wi ef wi a if-an-bot an wanda-wanda?

³ Wan a di ting dem we kyan elp wi ef wi a if-an-bot an wanda-wanda a wen wi yuuz Gad Wod fi fain di ansa dem tu wi kwestiyan dem. Yu si wen wi du dat, it a-go bil wi op an mek wi get chrang iina wa wi biliiv iina an wi a-go kyan ‘tan op chrang fi wa wi biliiv.’​—1 Kor. 16:13.

4. A ou wi kyan “tes evriting”? (1 Tesaluoniyan 5:21)

⁴ Riid 1 Tesaluoniyan 5:21. Di Baibl tel wi se wi fi “tes evriting.” Wi kyan du dat ef wi luk pan wa wi biliiv an mach it op tu wa di Baibl se. Laik, tingk bout wan yong sumadi we a wanda ef im wot notn tu Jeuova. Yu tingk se kaa im a tingk bout dis Jeuova no kier bout im? Nuo sa! Im fi “tes evriting” an mek shuor se im a tingk bout tingz di wie ou Jeuova tingk bout tingz.

5. Wa wi kyan du fi get di ansa fram Jeuova fi wi kwestiyan dem?

⁵ A wen wi riid Gad Wod wi “ier” Jeuova a taak tu wi. Bot fi nuo wa im tingk bout sitn we wi a wanda bout wi afi du muor fi get di ansa. Wa wi fi du a wen wi a riid di Baibl wi fi riid bout di sitn dem we wi a tingk bout. An wi kyan yuuz di buk an pamplet dem an ada tingz we Jeuova aaganaizieshan gi wi, fi luk op som muor tingz pan di sitn we wi a tingk bout. (Pr. 2:3-6) An ef wi waahn fi fain di ansa fi wan kwestiyan, wi kyan prie tu Jeuova an aks im fi elp wi fi fain tingz pan it, an aks im fi mek wi nuo ou im fiil bout it. An den wi kyan luk pan som tingz iina di Baibl we wi kyan riizn pan an som ada tingz we kyan elp wi wid di sitn we wi a tingk bout. An it wuda du wi gud tu ef wi luk pan som piipl we iina di Baibl we did go chuu som sitn laik wa wi a go chuu.

6. A ou di miitn dem kyan elp wi fi no if-an-bot an wanda-wanda?

⁶ Wi kyan “ier” Jeuova a taak tu wi tu wen wi go a wi miitn dem. Wen wi go a wi miitn dem aafn, wi guda ier wan taak ar sumadi mait-a ansa wan kwestiyan we elp wi fi no if-an-bot an wanda-wanda. (Pr. 27:17) Mek wi luk pan som sitn we kyan elp wi ef wi a wanda-wanda bout sortn tingz.

WEN YU A WANDA EF JEUOVA KIER BOUT YU

7. Wa som piipl mait-a aks se?

⁷ Yu eva a wanda, ‘Jeuova kier bout mi?’ Kaa Jeuova big an powaful an a im mek evriting, yu mait-a fiil se yu an im kyaahn ton fren. Bot a no yu aluon fiil so. Aal King Dievid did fiil so tu. Im did fraitn fi nuo se Jeuova kier bout wi we a jos piipl. An a das wai im did a wanda wan a di taim wa mek Jeuova wuda luk pan sumadi laka im an kier bout im. (Sa. 144:3) So ou wi kyan nuo ef Jeuova riili kier bout wi?

8. Azkaadn tu 1 Samwel 16:6, 7, 10-12, a wa Jeuova si iina piipl?

⁸ Iina di Baibl, wi si se Jeuova kier bout piipl we ada piipl mait-a tingk se no wot notn. Laik Jeuova did tel Samwel fi go a Jesi yaad fi go pik wan a im bwai pikni dem fi ton king iina Izrel wen di taim kom. So Jesi kaal sevn outa im iet bwai pikni dem fi go miit Samwel, bot im neehn kaal Dievid, we a did di liklis wan.b Bot yu no nuo wa, a Dievid Jeuova did pik. (Riid 1 Samwel 16:6, 7, 10-12.) Jeuova kuda riid Dievid aat an si se im a wan yong man we lov im nof nof.

9. Wa mek yu kyan nuo fi shuor se Jeuova kier bout yu? (Luk pan di picha tu.)

⁹ Tingk bout wa Jeuova du aredi fi shuo se im kier bout yu. Im tel yu di bes wie ou fi liv yu laif. (Sa. 32:8) Im kudn du dat ef im neehn nuo yu gud gud. (Sa. 139:1) Wen yu du di sitn dem we Gad se yu fi du an yu si ou it a elp yu iina yu laif, yu a-go nuo fi shuor se im kier bout yu. (1 Kr. 28:9; Aks 17:26, 27) Jeuova a si aal a wa yu a du fi sorv im. Im si aal a yu gud wiez dem an im waahn fi bi yu fren. (Jer. 17:10) An im wuda wel api ef yu waahn fi bi fi im fren tu.​—1 Jan 4:19.

WEN WI A WANDA EF WI DID DU DI RAIT TING WID WI LAIF

10. Wen wi tingk bout di ting dem we wi did du, wa wi mait-a aks wiself se?

¹⁰ Wen dem yongga, som a di breda an sista dem mait-a gi op uol iip fi du muor fi Jeuova. Bot wen dem get uolda dem mait-a a wanda ef dem did du di rait ting wid dem laif. Laik som a dem did lef dem big wok, ar dem neehn du notn fi mek uol iip a moni so dat dem kuda du muor fi Jeuova. Bot afta som uol iip a ier, dem mait-a si som a di piipl dem we dem yuus tu go a skuul wid ar wok wid iina dem big wok, an dem luk laik dem laif saat out an dem a mek som uol iip a moni. So dem mait staat fi wanda tu demself se: ‘It did riili wot it se mi gi op aal a we mi gi op fi Jeuova? Ar it jos mek mi mis out pan som tingz iina laif?’

11. A wa did a bada di man we rait Saam 73?

¹¹ Ef yu a wanda bout dis tu, tingk bout ou di man we rait Saam 73 did fiil. Im did si ada piipl we luk laik dem a enjai laif an dem neehn siki-siki an dem did luk laik notn neehn a bada dem an a schres dem out. (Sa. 73:3-5, 12) Wen im luk pan dem piipl ya, im did fiil laik se aal we im did a du fi Jeuova neehn wot notn. Evritaim im tingk bout it, it did a bada im. (Sa. 73:13, 14) Bot a ou im diil wid aal we im did a go chuu?

12. Ou di man we rait Saam 73:16-18, did diil wid di prablem we im did av?

¹² Riid Saam 73:16-18. Di man we rait da Saamz ya did go mongks di piipl dem we a worship Jeuova, an a de-so im kuda tingk bout wa a bada im. An im si se iivn duo it did luk laik se tingz a gwaan fi som a dem piipl de we im did a luk pan, dem kaana did daak. Wen im staat fi luk pan tingz di rait wie, im neva fiil sad agen. An im get fi si se fi mek wa Jeuova waahn im fi du bi di big ting iina im laif, a di bes ting dat im kuda eva du. An kaa a dat, im mek op im main se notn naa go tap im fram sorv Jeuova.​—Sa. 73:23-28.

13. Ef yu waahn fi fiil gud wen yu a wanda bout di sitn dem we yu did mek op yu main fi du, wa yu kyan du?(Luk pan di picha tu.)

¹³ Jos laik di man we rait da Saam de, wen yu riid Gad Wod, it kyan mek yu fiil gud wen yu fiil a wie bout di sitn dem we yu did mek op yu main fi du. Tingk bout wa yu av ya nou we wot nof, laik fi nuo se Jeuova api wid wa yu a du. An memba se Jeuova naa go elp di piipl dem we naa sorv im. An yu si di piipl dem we a ron dong dem big wok an moni an ting, dem a du dat kaa dem no av notn els fi liv fa. Bot Jeuova a gi yu uol iip a blesn nou an im pramis fi gi yu uol iip muor blesn iina di fyuucha. (Sa. 145:16) An tingk bout dis: Yu tingk wi nuo ou wi laif wuda ton out ef wi did mek op wi main fi du sitn els? Wan ting wi nuo fi shuor a dat di wan dem we mek op dem main fi du wa Gad se dem fi du, a-go aalwiez av di ting dem we dem niid fi mek dem api kaa dem lov Gad an dem lov ada piipl tu.

WEN YU A WANDA SE EF JEUOVA STIL AV YUUS FI YU

14. Wa mek som a wi breda an sista dem mait-a fiil se Jeuova no av no yuus fi dem, an wa dem mait-a aks demself?

¹⁴ Som a Jeuova piipl kyaahn du aal a wa dem waahn fi du fi Jeuova kaa dem op iina iej, ar dem no so aati, ar sitn els mait-a rang wid dem. An kaaz a dat, dem mait-a a wanda ef dem wot notn tu Jeuova. So dem mait-a aks demself se, ‘Jeuova stil av yuus fi mi?’

15. Wa di sumadi we rait Saam 71 did nuo fi shuor se?

¹⁵ Di man we rait Saam 71 did fiil di siem wie. Im prie an se: “Wen mi no chrang no muo, du, no lef mi.” (Sa. 71:9, 18) Bot iivn duo im did fiil so, im did nuo fi shuor se ef im stik tu Jeuova, Jeuova wuda tek kier a im an aalwiez di de fi’im. Da man ya did lorn se Jeuova api wid di wan dem we kyaahn du uol iip bot dem chrai dem bes fi du wa im waahn dem fi du.​—Sa. 37:23-25.

16. A ou Jeuova kyan yuuz di wan dem we op iina iej? (Saam 92:12-15)

¹⁶ Unu we op iina iej, unu fi luk pan tingz di wie ou Jeuova luk pan tingz. Im mek unu chrang iina di sitn dem we unu biliiv iina iivn duo unu mait-a no so chrang iina unu badi. (Riid Saam 92:12-15.) So no bada tingk bout di sitn dem we yu kyaahn du, bot tingk bout wa yu kyan du. Laik yu kyan elp di ada breda an sista dem fi tan op chrang wen yu mek dem si umoch yu kier bout dem an wen dem si ou yu a gwaan chos Jeuova. Yu kyan tel dem bout ou Jeuova elp yu fram wen yu did yong til nou an yu kyan tel dem bout som a di sitn dem we Jeuova pramis wi we yu a luk faawod fi get. An jos nuo se wen yu prie fram yu aat fi yu breda an sista dem, it kyan du wol iip a gud sitn fi dem. (1 Pii. 3:12) No mata wa wi a go chuu, aal a wi kyan du sitn fi Jeuova an ada piipl tu.

17. Wa mek wi no fi wach wa sumadi els a du?

¹⁷ Ef yu fiil a wie kaa yu kyaahn du wol iip fi Jeuova, nuo fi shuor se im api wid wa yu kyan du. Yu mait-a a luk pan wa sumadi els a du an staat fi fiil laik se dem a du muor dan yu fi Jeuova. Bot no wach dat! Kaa Jeuova naa mach op wa yu a du wid wa nobadi els a du. (Gya. 6:4) Laik, Mieri did gi Jiizas wan dier porfyuum ail az wan prezent. (Jan 12:3-5) Bot yu did av wan puor uman we ar ozban ded, an wen shi go a Gad ous shi put iin tuu sent iina di aafrin baks. (Luuk 21:1-4) Bot Jiizas luk pan di tuu sitn dem we dem tuu uman ya gi an se di tuu a dem shuo se dem chos iina Gad. So no mata wa yu a du fi Jeuova, kaa yu waahn fi worship im an yu lov im, it wot nof tu im, aal ef yu tingk se a wan likl sitn yu a du.

18. Wa kyan elp wi fi no if-an-bot an wanda-wanda? (Luk pan di paat tu we niem “Jeuova Wod Kyan Elp Yu Fi No If-An-Bot An Wanda-Wanda.”)

¹⁸ Aal a wi if-an-bot an wanda-wanda som a di taim. Bot jos laik we wi si, Gad Wod kyan elp wi fi no tingk dem wie de. So wa wi fi du a du aal a wa wi kyan du fi fain di ansa tu wi kwestiyan dem ar diil wid eniting we a bada wi. An dat a-go elp wi fi no fiil sad agen. Jeuova si aal a wa yu a du fi’im an im api fi di sitn dem we yu gi op fi’im an im a-go bles yu fi dat. Jos memba se Jeuova lov di wan dem we stik tu im an im kier bout evri wan a dem.