Jeuova A-Go Mek Di Wan Dem We “Aat A Tier Op Insaida Dem Fiil Beta”

1. A ou Jeuova fiil bout im piipl dem?

WEN Jeuova luk pan im piipl dem pan di ort, im si di sitn dem we mek dem api an im si di sitn dem we mek dem sad tu. (Sa. 37:18) An it mek Jeuova riili api wen im si se wi a du aal a wa wi kyan du fi mek im api, aalduo wi a diil wid wol iip a sitn we mek wi fiil laik se wi aat a tier op insaida wi. An kaaz a dat, Jeuova wel waahn fi elp wi fi fiil beta.

2. Wa Jeuova a du fi di wan dem uufa aat a tier op insaida dem, an wa wi fi du ef wi waahn fi get di elp we im a gi?

² Saam 147:3 se Jeuova a-go ‘iil di wan dem we iina pien uufa aat a tier op insaida dem.’ So dis mek wi si se Jeuova a-go tek kier a di wan dem we fiil da wie de. Bot ef wi waahn Jeuova fi du dat fi wi, wi afi du wa im se wi fi du jos laik ou ef wi go a wan gud dakta, wi afi du wa dem se ef wi waahn fi get beta. Iina da lesn ya, wi a-go luk pan wa Jeuova se tu di wan dem we fiil laik se dem aat a tier op insaida dem, an ou dem kyan du wa im se dem fi du.

JEUOVA MEK WI NUO SE WI WOT NOF TU IM

3. Wa mek som piipl fiil laik se dem no wot notn?

³ Wi liv iina wan worl we no lov no de, an dem mek nof piipl fiil laik se dem no wot notn. Wan sista we niem Helena se: “No lov neehn de iina wi fambili wen mi did a gruo op. An mi faada did lov fi kos an fait, an im eva a biit it iina wi se wi na’av no yuus.” Yu mait-a did gruo laik Helen, we sumadi aalwiez a chriit yu bad an a fain faalt wid wa yu du an mek yu fiil laik se nobadi kyaahn lov yu. An ef a so yu did gruo, yu mait-a fain it aad fi fiil se nobadi kyan riili lov yu.

4. Azkaadn tu Saam 34:18, wa Jeuova mek wi nuo we kyan elp wi?

⁴ Aal ef ada piipl chriit yu bad, jos nuo se Jeuova lov yu an yu wot nof tu im. Im “de de fi di piipl dem we dem aat a tier op insaida dem.” (Riid Saam 34:18.) So ef yu fiil laik se yu “taiyad an waahn gi op,” jos memba se Jeuova si aal a di gud sitn dem we iina yu aat an a im jraa yu tu im. (Jan 6:44) So Jeuova aalwiez de de fi elp yu kaaz yu wot nof tu im.

5. Wen wi luk pan ou Jiizas did chriit di wan dem we piipl tingk se a neehn nobadi, wa wi kyan lorn fram dat?

⁵ Wen wi luk pan ou Jiizas diil wid piipl, it elp wi fi si ou Jeuova fiil bout dem. Laik wen Jiizas did de pan ort, im luk out fi di wan dem we piipl tingk se a neehn nobadi, an im du tingz fi shuo se im fiil it fi dem. (Mat. 9:9-12) Wen wan uman we did sik bad did toch Jiizas kluoz kaa shi waahn im fi iil ar, Jiizas osh ar an big ar op fi ou shi chos iina Gad. (Maak 5:25-34) So Jiizas du tingz jos laik ou im Faada wuda dwi’it. (Jan 14:9) So yu kyan nuo fi shuor se yu wot nof tu Jeuova an im a tek iin aal a di gud sitn dem we yu a du, laik ou yu lov im an a chos iina im.

6. Wa yu kyan du ef yu aalwiez a fiil laik se yu no wot notn?

⁶ Ef yu aalwiez a fiil laik se yu no wot notn, yu kyan riid difrant difrant vors iina di Baibl we mek yu si se yu wot nof tu Jeuova, an tingk bout wa yu riid.b (Sa. 94:19) An ef yu did plan fi du sopm an yu no get fi du it, no fiil no wie kaa yu neehn get fi du wa yu did waahn fi du, an no biit op yuself ef yu kyaahn du tingz gud laik ou ada piipl kyan du it, kaa Jeuova no ekspek yu fi du muo dan wa yu kyan du. (Sa. 103:13, 14) So ef dem did biit an bata bruuz yu ar moles yu wen yu did a gruo op, no bliem yuself fi wa di sumadi du. Yu neehn du notn fi dem du dat tu yu! An memba se di sumadi afi go ansa tu Jeuova fi we dem du tu yu. (1 Pii. 3:12) Sandra, we dem did bata bruuz wen shi did likl se, “A nof taim mi prie tu Jeuova an aks im fi elp mi fi luk pan miself iina wan gud wie laik ou im si mi.”

7. Ou di sitn dem we wi go chuu iina laif kyan elp wi fi elp ada piipl?

⁷ Aalwiez memba se Jeuova kyan yuuz yu fi elp ada piipl. An im gi yu di blesn fi wok wid im iina di priichin wok. (1 Kor. 3:9) An kaaz a wa yu go chuu iina laif, it kyan elp yu fi fiil it fi ada piipl wen dem a go chuu sitn laka wa yu did go chuu. Helen, we wi taak bout aredi, did get di elp we shi niid an nou shi a elp ada piipl. Shi se: “Jeuova mek mi, we piipl did fiil se a no nobadi, ton sumadi we fiil laik piipl lov dem an we av yuus.” An Helen a sorv Jeuova az wan regila paiyanier nou an shi api.

WEN JEUOVA PAADN WI, IM WAAHN WI FI NUO SE IM PAADN WI FI CHUU

8. Wa Aizaiya 1:18 se we kyan elp wi?

⁸ Som a Jeuova piipl dem a wori an a fret kaaz a tingz we dem du bifuo dem baptaiz, an som a wori bout tingz we dem du afta dem baptaiz. Bot wi fi memba se Jeuova did sen im Bwai Pikni fi kom ded fi wi kaa im lov wi. So im waahn wi fi tek da gif de we im gi wi. Jeuova mek wi nuo se wans wi did “taak so tingz kyan aarait”c wid wi an im, im naa go av wi op fi di sin dem we wi du. (Riid Aizaiya 1:18.) It mek wi fiil gud fi nuo se Jeuova naa go av wi op fi di bad sitn dem we wi did du aredi. An wi fi memba se im naa go figet aal a di gud sitn dem we wi du aredi tu.​—Sa. 103:9, 12; Iib. 6:10.

9. Wa mek wi fi chrai aad fi tingk bout di sitn dem we wi a du nou an wa wi a-go du iina di fyuucha dan pan di sitn dem we wi did du aredi?

⁹ Ef yu a wori an a fret bout di bad sitn dem we yu did du aredi, chrai aad fi no tingk bout dem. Bot tingk bout di sitn dem we yu a du nou an di sitn dem we yu a-go du iina di fyuucha. Laik luk pan wa di apasl Paal did du. Im did sari se im did du aal kain-a bad sitn an mek tingz aad fi di Kristiyan dem, bot im did nuo se Jeuova paadn im. (1 Tim. 1:12-15) So im neehn sidong an a tingk bout aal a di bad sitn dem we im did du aredi jos laik ou im neehn sidong an a tingk bout aal a di sitn dem we im did du fi mek di ada piipl dem big im op kaa im a wan tap-a-tap Farisii. (Fil. 3:4-8, 13-15) Bot wa im du a dat im gwaan wok aad iina di priichin wok an tingk bout di ting dem we a-go apm iina di fyuucha. So jos laik Paal, yu kyaahn chienj di sitn dem we apm aredi. Bot wa yu kyan du a du wa kyan du fi big op Jeuova rait nou an tingk bout aal a di nais sitn dem we im pramis se im a-go gi yu iina di fyuucha.

10. Wa wi kyan du ef wi did du sitn we did ort ada piipl?

¹⁰ Yu mait-a fret an a wori bout som a di ting dem we yu did du we ort ada piipl. Ef dat a apm tu yu, yu fi du wa yu kyan du fi saat out tingz. Laik yu kyan mek di sumadi nuo se yu riili sari fi wa yu did du. (2 Kor. 7:11) An aks Jeuova fi elp di wan dem we did get ort kaaz a wa yu du, kaa Jeuova kyan elp yu an di wan dem we did get ort fi go chuu an elp unu fi av piis iina unu aat an main.

11. Wa wi kyan lorn fram Juona? (Luk pan di picha pan di kova tu.)

¹¹ Lorn fram di bad sitn dem we yu did du, an mek Jeuova yuuz yu fi du di sitn dem we im waahn yu fi du. Laik luk pan wa did apm wid di prafit Juona. Im neehn go a Ninive we Gad did tel im fi go, bot Juona pik op imself an ron go di ada wie. Kaaz a dat, Jeuova karek im an Juona lorn fram wa im did du. (Juona 1:1-4, 15-17; 2:7-10) Jeuova neehn gi op pan im kaaz a wa im du, bot im gi im wan neda chaans fi go a Ninive, an Juona du wa Jeuova tel im fi du siem taim. Juona neehn mek kaaz a wa im did du aredi mek im no du di wok we Jeuova did gi im fi du.​—Juona 3:1-3.

JEUOVA YUUZ IM UOLI SPIRIT FI OSH WI

12. A ou Jeuova gi wi piis iina wi aat an main wen sitn torbl apm tu wi? (Filipiyan 4:6, 7)

¹² Jeuova gi wi im uoli spirit fi elp wi wen som torbl sitn apm tu wi. Laik luk pan wa did apm wid Ron an Carol wen dem bwai pikni did kil imself. Dem se: “Wi go chuu som rof taim bifuo ino, bot dis a di wos sitn we eva apm tu wi. A nof nait wi kudn sliip, an wi prie tu Jeuova. An wi kuda si ou im gi wi piis iina wi aat an main jos laik Filipiyan 4:6, 7 se.” (Riid.) So ef sitn apm tu yu we mek yu fiil laik se yu aat a tier op insaida yu, yu kyan prie tu Jeuova an tel im evriting we a gwaan iina yu aat. An it no mata umoch taim yu prie tu im bout di sed ting ar ou lang yu prie tu im fa, jos nuo se im a-go ier yu. (Sa. 86:3; 88:1) No tap aks Jeuova fi gi yu im uoli spirit fi elp yu an im a-go dwi’it.​—Luuk 11:9-13.

13. A ou Jeuova yuuz im uoli spirit fi elp wi fi gwaan sorv im di rait wie? (Ifiijan 3:16)

¹³ Ef sopm eva apm iina yu laif we mek yu fiil laik se yu na’av di chrent fi go aan, jos nuo se Jeuova kyan yuuz im uoli spirit fi elp yu fi gwaan worship im di rait wie. (Riid Ifiijan 3:16.) Luk pan wa did apm wid wan sista we niem Flora. Shi an ar ozban did a du nof fi Jeuova iina di mishineri wok. Bot ar ozban gi ar bon an afta dat dem get piepa fi shuo se dem no marid tu dem wan aneda agen. Shi se: “Di pien we mi did a fiil kaaz a wa im did du komiin laik it tek mi uova. So mi prie tu Jeuova an aks im fi im uoli spirit so dat mi kuda gwaan eng aan. An Jeuova gi it tu mi so dat mi kuda fiil beta an fi diil wid it wen mi fiil laik se mi kyaahn go aan no muor.” Flora fiil se kaa Jeuova did elp ar a dat mek shi get chrang agen an kuda gwaan chos Jeuova muor se im a-go elp ar wid ar prablem dem. An shi se: “Di sitn dem we Saam 119:32 se, a mi it did a taak bout. It se: “Mi wel waahn du aal a wa yu se mi fi du kaaz a yu gi mi di chaans fi nuo muor bout yu iina mi aat.’”

14. Wa wi afi du so dat Gad uoli spirit kyan elp wi?

¹⁴ Ef yu prie fi uoli spirit yu afi du di sitn dem we a-go mek yu get Gad uoli spirit. Laik fi go a di miitn dem, an fi priich tu piipl an tiich dem, an fi riid yu Baibl evri die so dat yu kyan tingk bout tingz di wie ou Jeuova waahn yu fi tingk bout tingz. (Fil. 4:8, 9) Wen yu a riid di Baibl, tingk bout di piipl dem we yu a riid bout an wa dem go chuu an ou Jeuova elp dem fi go chuu. Sandra, we wi taak bout aredi, did go chuu som wol iip a bad sitn iina ar laif. Shi se: “Di tuori bout Juozif did riili elp mi kaaz im neehn mek di sitn dem we im go chuu mek im an Jeuova no so kluos agen.”​—Jen. 39:21-23.

JEUOVA YUUZ WI BREDA AN SISTA DEM FI OSH WI

15. A uu Jeuova mait-a yuuz fi elp wi fi go chuu wi prablem dem, an wa a som a di sopm dem we dem mait-a du fi elp wi? (Luk pan di picha tu.)

¹⁵ Wen wi a go chuu wol iip a prablem, di breda an sista dem kyan “elp an push [wi] uol iip.” (Kol. 4:11) Jeuova a yuuz wi breda an sista dem fi mek wi si umoch im lov wi. Som a di taim dem du dis wen dem lisn tu wi an shuo se dem fiil it fi wi, an wen dem kom luk fi wi wen taim wi a go chuu wi prablem dem. An dem du dis tu wen dem yuuz Gad Wod fi elp wi an wen dem prie fi wi.d (Ruo. 15:4) An som a di taim wan breda ar wan sista mait-a elp wi fi si ou Jeuova fiil bout tingz, an dat mait-a elp wi fi go chuu an fiil beta. An som a di taim di breda an sista dem mait-a du som ada likl tingz fi elp wi, laik fi kuk som fuud fi wi an dem ting de, wen wi a go chuu wi prablem dem.

16. Wa yu mait-a afi du fi get elp fram ada piipl?

¹⁶ Muo taim fi get elp fram di ada breda an sista dem wi afi aks dem fi it. An wi fi memba se wi breda an sista dem lov wi an dem waahn fi elp wi. (Pr. 17:17) Bot dem mait-a no nuo ou wi a fiil ar wa wi niid. (Pr. 14:10) So ef yu fiil laik se yu aat a tier op insaida yu, no fried fi mek ada piipl nuo ou yu fiil. Laik yu mait taak tu wan a yu fren we chrang iina di sitn dem we wi biliiv iina. Mek dem nuo wa dem kyan du fi elp yu, an yu mait-a taak tu wan ar tuu a di elda dem we yu fain it iizi fi taak tu. An som sista mait-a fiil beta fi taak tu wan neda sista we chrang iina wa dem biliiv iina.

17. Wa a som sitn we mait-a mek wi no get di elp we wi breda an sista dem kyan gi wi, an wa an wa wi kyan du fi get da elp de?

¹⁷ Kaaz a sortn tingz we yu mait-a go chuu iina laif, yu mait-a fiil laik se yu fi kip we fram yu breda an sista dem. Bot yu no fi du dat. Ye, a chuu se som taim di breda an sista dem mait-a no andastan wa yu a go chuu an mait-a se sitn we ort yu. (Jmz. 3:2) Bot no mek dem ting de kip yu we fram yu breda an sista dem an mek yu no get di elp we yu kyan get fram dem. Wan elda we niem Gavin, we av wan siknis we mek im sad bad, se: “Muo taim mi no fiil laik mi waahn fi spen no taim wid mi fren dem.” Bot Gavin no mek ou im fiil mek im kip we fram im fren dem an no get di elp we im kuda get fram dem. Wan neda sista we niem Amy se: “Kaaz a som a di sitn dem we mi go chuu iina mi laif, mi fain it aad fi chos piipl. Bot mi a lorn evridie fi lov mi breda an sista dem an chos dem di siem wie laik ou Jeuova chos dem. An mi nuo se dat mek Jeuova api an it mek mi api tu.”

JEUOVA PRAMIS SE IM A-GO IIL WI AN DAT WI MEK WI FIIL BETA

18. Wa a som a di ting dem we wi kyan luk faawod tu we a-go apm iina di fyuucha, an wa wi kyan du ya nou?

¹⁸ Wi kyan nuo fi shuor se suun suun Jeuova a-go get rid a aal a di sitn dem we a kaaz wi fi fiil pien. (Rev. 21:3, 4) Dem taim de, di wikid sitn dem we wi go chuu nou ‘naa go mek wi fiil no pien iina wi aat’ an wi naa go memba dem niida. (Aiz. 65:17) An rait ya nou ya, wi si se Jeuova a ‘iil di wan dem we iina pien.’ So du aal a we yu kyan du fi tek di elp we Jeuova a gi wi. No eva eva tingk se Jeuova no ‘kier bout yu.’​—1 Pii. 5:7.