A Wan Gud Ting Ef Yu Kluos Tu Yu Breda An Sista Dem!

1-2. Wa a wan big ting tu Jeuova, an wa im waahn wi fi du?

DI WIE ou wi chriit piipl a wan big ting tu Jeuova. Jiizas did tel wi se wi fi lov wi nieba laik ou wi lov wiself. (Mat. 22:37-39) An dis miin tu se aal di piipl dem we naa sorv Jeuova, wi a-go chriit dem gud tu. Wen wi du dat, wi a du laik Jeuova we “mek im son shain pan gud piipl an wikid piipl tu, an im mek di rien faal pan di piipl dem we du wa gud an di wan dem we du wa bad tu.”​—Mat. 5:45.

² Aalduo Jeuova lov evribadi, im av wan speshal lov fi di wan dem we a du wa im se. (Jan 14:21) An im waahn wi fi du di siem ting laik im. An a das wai im tel wi se wi fi “riili lov” wi breda an sista dem. (1 Pii. 4:8; Ruo. 12:10) So wi fi lov di breda an sista dem iina di kanggrigieshan di siem wie ou wi wuda lov wi fambili an fren dem.

3. Wen it kom aan tu ou wi fi lov wi breda an sista dem, wa Jeuova waahn wi fi du?

³ Jos laik ou ef wi av wan flowaz iina wi ous wi afi wok aad fi tek kier a it so dat it kyan gwaan gruo, a siem so fi gwaan lov wi breda an sista dem, wi afi wok aad so dat di lov kyan gruo. Di apasl Paal did tel di Kristiyan dem iina fi im taim se: “Unu mos gwaan lov di breda an sista dem we biliiv iina Gad jos laik unu.” (Iib. 13:1) So Jeuova waahn wi fi wok aad fi lov ada piipl. Iina da lesn ya, wi a-go luk pan wa mek wi fi chrai fi get kluosa an kluosa tu wi breda an sista dem we a sorv Jeuova tu, an wi a-go luk pan wa kyan elp wi fi gwaan dwi’it.

WA MEK WI FI CHRAI AN GET KLUOSA AN KLUOSA TU WI BREDA AN SISTA DEM?

4. Azkaadn tu Saam 133:1, wa wi kyan du fi mek shuor se it wot nof tu wi se wi an wi breda an sista dem a liv az wan? (Luk pan di picha dem tu.)

⁴ Riid Saam 133:1. Jos laik we di man we rait da Saamz ya se, it “riili nais” fi si wen di breda an sista dem kom tugeda an liv az wan. A siem so wi fiil tu. Bot som a di taim, kaa wi de roun wi breda an sista dem nof, wi mait-a naa sidong an tingk bout ou nais it bi fi de roun dem, jos laik ou sumadi mait-a paas wan big an nais chrii evridie bot dem naa peni it an tingk bout ou nais it bi. So aalduo wi si wi breda an sista dem kopl taim fi di wiik, wa wi kyan du fi shuo se dem wot nof tu wi? Di wie wi lov wi breda an sista dem a-go get chrangga an chrangga wen wi tingk bout umoch dem wot nof tu wi.

5. Wen ada piipl si umoch wi lov wi wan aneda, wa it mait-a mek dem waahn fi du?

⁵ Wen nof piipl kom a wi miitn fi di fos taim an si umoch wi lov wi wan aneda, it mek dem waahn fi kom worship Jeuova wid wi jos laik wa Jiizas did se, wen im se: “Wen unu lov unu wan aneda, a so piipl gweehn nuo se unu a fi mi falara.” (Jan 13:35) Laik tingk bout wa did apm tu Christinaa wen shi did a go a yuunivorsiti, we did a stodi di Baibl wid wan sista, an shi go a wan a di kanvenshan dem we di sista did invait ar fi kom. An afta shi go a di kanvenshan fi di fos die, shi tel di sista se: “Mi mada an mi faada neva og mi op yet. Bot wen mi kom a yu kanvenshan, a 52 taim piipl og mi op iina jos wan die! Dem mek mi si se Jeuova lov mi. Nou mi waahn fi bi wan a unu.” Christina gwaan du di ting dem we shi fi du fi sorv Jeuova di rait wie, an so shi baptaiz iina 2024. So wen di wan dem we a stodi di Baibl si umoch wi lov wi wan aneda, muor taim it mek dem waahn fi kom sorv Jeuova tu.​—Mat. 5:16.

6. Wen wi get kluosa an kluosa tu wi breda an sista dem, a ou it kyan elp wi?

⁶ Wen wi get kluosa an kluosa tu wi breda an sista dem, it a-go elp wi. Paal did tel di ada breda an sista dem se: “Elp unu wan aneda evridie . . . so sin no ful op non a unu aat, an mek it tof op.” (Iib. 3:13) So ef wi fain it aad fi du di sitn dem we Jeuova se wi fi du, ar laik se wi kyaahn go aan no muor, Jeuova mait-a yuuz wan a wi breda ar sista dem we si wa wi a go chuu fi elp wi. (Sa. 73:2, 17, 23) A wan gud sitn wen wi breda an sista dem kyan push wi fi gwaan sorv Jeuova.

7. Wen wi lov wi wan aneda, a ou dat mek wi liv az wan? (Koloshan 3:13, 14)

⁷ Wi a paat a wan gruup a piipl we a wok aad fi du tingz fi shuo se wi lov wi wan aneda, an kaaz a dat wi a get uol iip a blesn. (1 Jan 4:11) Laik kaa wi lov wi wan aneda, it mek wi gwaan “bier wid [wi] wan aneda” tu, an dis mek wi liv az wan. (Riid Koloshan 3:13, 14; Ifii. 4:2-6) So wen wi go a wi miitn dem we evribadi api fi de mongks dem wan aneda, it mek wi api, an no ada gruup a piipl no stie so.

PUT UNU BREDA AN SISTA BIFUO UNUSELF

8. Wa Jeuova du so dat wi an wi breda an sista dem kyan liv az wan?

⁸ A Jeuova mek it so dat no mata wich paat wi liv, aal a wi kyan liv az wan aalduo wi no porfek. (1 Kor. 12:25) Di Baibl mek wi nuo se a ‘Gad tiich wi ou fi lov wi wan aneda.’ (1 Tes. 4:9) So Jeuova tel wi wa wi fi du so dat wi kyan get kluosa an kluosa tu wi wan aneda. So wen wi stodi di Baibl an du di ting dem we wi lorn, a so wi a mek ‘Jeuova tiich wi.’ (Iib. 4:12; Jmz. 1:25) An a dat di Jeuova Witnis dem a wok aad fi du.

9. A ou Ruoman 12:9-13 elp wi fi si ou wi kyan put wi breda an sista bifuo wiself?

⁹ Iina Ruoman 12:9-13 (riid), Jeuova mek wi si wa wi fi du so dat wi kyan get kluosa an kluosa tu wi wan aneda. De-so Paal tel wi se wi fi put “[wi] breda an sista bifuo [wiself].” Dat miin tu se a wi a-go du sopm fos fi shuo se wi ‘lov wi wan aneda laik breda an sista.’ An wi kyan du dat wen wi redi fi paadn wi wan aneda, an tek iin wi wan aneda iina wi ous, an wen wi chriit wi breda an sista dem kain, an wi av ada tingz we wi kyan du fi dem tu. (Ifii. 4:32) An wi na’afi wiet fi wi breda an sista dem du dem sitn ya fi wi. Wi fos kyan du it fi dem, kaa memba se Jiizas did se: “Ef yu gi sumadi sopm, it mek yu muo api dan ef sumadi gi yu sopm.”​—Aks 20:35.

10. A ou wi kyan shuo se wi a wok aad wen wi “aalwiez put [wi] breda an sista bifuo [wiself]”? (Luk pan di picha tu.)

¹⁰ Afta Paal tel wi se wi fi put wi breda an sista bifuo wiself, im tel wi se “[wi] fi wok aad an no liezi.” Kaa memba ino, wen sumadi a wok aad an no liezi, eniting dem get fi du, dem a-go chrai fi dwi’it siem taim, di bes wie we dem kyan dwi’it. Pravorbz 3:27, 28 tel wi se: “Enibadi we niid yu elp, yu fi elp dem, no mek notn tap yu fram dwi’it. So langks yu kyan du sitn fi elp dem, yu fi dwi’it.” So wen wi si se sumadi niid sopm, so langks wi kyan du sopm fi elp dem, wi fi elp dem. Wi no fi se wi a-go dwi’it wan neda taim ar fiil se sumadi els fi dwi’it.​—1 Jan 3:17, 18.

11. Wa kyan elp wi fi get kluosa an kluosa tu wi wan aneda?

¹¹ Wan neda ting wi kyan du fi shuo se wi a put wi breda an sista bifuo wiself a wen wi redi fi paadn dem wen dem du sitn we ort wi. An Ifiijan 4:26 tel wi se: “No mek di die don an unu stil beks wid wan aneda.” An vors 27 se: ‘Unu no fi gi di Devl no chaans niida. No mek im mek unu sin.’ So ef wen wi go a wi bed wi beks wid sumadi, wi wuda a gi di Devl a chaans fi mek wi sin. An a kopl taim iina di Baibl Jeuova tel wi se wi fi paadn wi wan aneda. Iina Koloshan 3:13, Jeuova mek wi nuo se ‘no mata wa apm, wi fi gwaan paadn wi wan aneda.’ Wan a di bigis ting we elp wi fi get kluosa an kluosa tu wi breda an sista dem a wen wi paadn dem wen dem du sitn we ort wi. Wen wi du dat, di Baibl se: ‘Di uoli spirit mek di uol a unu ton wan. So du unu bes an mek shuor se unu liv gud wid unu wan aneda.’ (Ifii. 4:3) So dis mek wi si se wen wi paadn wi wan aneda, it elp wi fi liv az wan an fi liv iina piis wid wi wan aneda.

12. A ou Jeuova a elp wi fi paadn wi wan aneda?

¹² Wi nuo se wi mait-a fain it aad fi paadn sumadi we du sitn fi ort wi. Bot Jeuova spirit kyan elp wi fi dwi’it. Kaa afta di Baibl tel wi se wi fi “lov [wi] wan aneda” an se “[wi] fi wok aad,” it se: “Unu mos eva waahn fi sorv di Laad wid aal a unu aat.” So a Gad uoli spirit a-go elp wi fi du dat. (Ruoman 12:11) So a Gad spirit a-go elp wi fi wok aad fi lov wi wan aneda an fi paadn wi wan aneda. So wi fi beg Jeuova fi elp wi fi dwi’it.​—Luuk 11:13.

‘UNU NO FI PLIT OP PLIT OP IINA GRUUP’

13. Wa a som a di sitn dem we mait-a kaaz di breda an sista dem fi plit plit op?

¹³ Jeuova waahn “evribadi fi get siev.” An a das wai im mek difrant difrant kain-a piipl get fi kom iina di kanggrigieshan. (1 Tim. 2:3, 4) Kaa ef wi no main shaap, wi mait-a mek di kain-a kluoz we wi breda ar sista wier an ou dem fiks op demself, an di kain-a ting dem we dem du fi enjai demself, an di kain-a dakta chriitment we dem tek mek wi plit plit op. (Ruo. 14:4; 1 Kor. 1:10) Jeuova mek wi nuo se wi fi lov wi wan aneda, so wi no fi go roun iina wi kanggrigieshan an a mek di breda an sista dem fiil se di wie ou wi du dem sopm ya beta dan ou dem du dem.​—Fil. 2:3.

14. Wa wi fi chrai aad fi du, an wa mek?

¹⁴ Wen wi chrai aad fi se tingz fi push wi wan aneda fi go aan an fi bil op wi wan aneda, it a-go elp wi fi no plit plit op. (1 Tes. 5:11) An memba se wi av uol iip a breda an sista we did tap kom a miitn ar we did get put outa di kanggrigieshan we staat kom bak a miitn nou. So wen dem kom, wi fi du tingz fi mek dem si se wi api se dem kom bak. (2 Kor. 2:8) Mek wi luk pan wa did apm tu wan sista we did staat fi kom bak a miitn afta shi did tap kom a miitn an go a fiil sorvis fi bout 10 ier. Shi se: “Di breda an sista dem tel mi oudi, an dem sumail wid mi, an shiek mi an.” (Aks 3:19) An kaaz a wa di breda an sista dem du, shi se: “Wa dem du mek mi fiil laik se a Jeuova did a elp mi fi bi api agen.” So wen wi du tingz fi bil op wi wan aneda, wi a mek Jiizas Krais yuuz wi fi mek wi breda an sista dem we fiil “taiyad an bordn dong” fiil gud.​—Mat. 11:28, 29.

15. Wa a wan neda ting we wi fi mek shuor se wi a du we kyan elp wi fi liv az wan wid wi breda an sista dem? (Luk pan di picha tu.)

¹⁵ Wan neda ting we kyan elp wi fi wok tugeda az wan wid wi breda an sista dem a di ting dem we wi se. Laik tingk bout it da wie ya: Jos laik ou sumadi we kyan kuk gud aalwiez afi ties di fuud fi mek shuor se it ties nais bifuo dem gi ada piipl fi iit, a siem so wi fi tingk gud bout wa wi a-go se bifuo wi se it tu ada piipl. (Sa. 141:3) Kaa wi fi aalwiez waahn fi mek shuor se eniting we wi a-go se, a sopm we ‘a-go bil op di wan dem we wi a taak tu.’​—Ifii. 4:29.

16. Muor dan enibadi els, uu a uu fi mek shuor se wa dem a se a sopm we a-go mek di ada sumadi fiil gud?

¹⁶ Muor dan enibadi els, di ozban dem an di mada an faada dem fi mek shuor se wa dem a se a-go bil op di ada sumadi. (Kol. 3:19, 21; Taitos 2:4) An sins di elda dem a di shepad fi Jeuova shiip dem, dem fi mek shuor se wa dem se tu di breda an sista dem a-go mek dem fiil gud wen dem don taak tu dem. (Aiz. 32:1, 2; Gya. 6:1) An di Baibl se: “It riili nais wen sumadi se sitn wen a di rait taim fi dem se it!”​—Pr. 15:23.

WI FI SHUO IINA WA WI DU SE “WI RIILI LOV FI CHUU”

17. Wa wi kyan du fi mek shuor se wi riili lov wi breda an sista dem?

¹⁷ Di apasl Jan mek wi nuo se wi fi mek shuor se wen wi se wi lov, “wi riili lov fi chuu, an dat it shuo iina we wi du an a no jos suo-so wod.” (1 Jan 3:18) Wi waahn fi mek shuor se wi lov wi breda an sista dem fram iina wi aat, an wi kyan du dat wen wi spen taim wid dem, kaa di kluosa wi get tu dem a di muor wi a-go lov dem. So wen yu go a miitn an fiil sorvis, chrai fi spen taim wid di breda an sista dem an go luk fi dem tu. Kaa wen wi du dat, wi a shuo se a ‘Gad a tiich wi ou fi lov wi wan aneda.’ (1 Tes. 4:9) An wi a-go gwaan si fi wiself se “it riili nais fi si wen di breda dem kom tugeda an liv az wan!”​—Sa. 133:1.