Iebriyam Did Afi Shuo Se Im Riili Chos Iina Gad

Iebriyam did tiich im bwai pikni we niem Aizak se im fi lov Jeuova an chos iina Im. An im did mek im nuo se eniting we Jeuova se im a-go du, im a-go du it fi chuu. Bot yu si wen Aizak did bout 25 ier uol, Jeuova aks Iebriyam fi du sitn we wuda aad fi im du. A wa dat?

Gad tel Iebriyam se: ‘Mi waahn yu fi tek yu wan bwai pikni an kya im go pan wan mountn we de a di plies kaal Moraiya an gi im op az wan sakrifais.’ Iebriyam neehn nuo wa mek Jeuova did a aks im fi du dat. Bot im stil du wa Jeuova se im fi du.

Iebriyam git op orli orli di neks maanin, an im an Aizak an tuu a im sorvant dem lef out fi go a Moraiya. Afta dem waak fi chrii die, dem kuda si di mountn we dem did a go. Iebriyam tel im sorvant dem fi tan wich paat dem de an im an Aizak wuda go op pan di mountn go gi di sakrifais. Iebriyam gi Aizak som faiya wud fi waak wid, an im waak wid wan naif. Aizak aks im faada se: ‘A wich paat di animal we wi a-go sakrifais de?’ Iebriyam ansa im se: ‘No wori mi bwai, Jeuova a-go gi wi it.’

Wen dem kech a di mountn, dem mek wan alta. Afta dat, Iebriyam tai op Aizak an an im fut dem an put im pan di alta.

Den Iebriyam tek op di naif. Sed taim im ier Jeuova ienjel a se tu im fram evn se: ‘Iebriyam! No du notn fi ort yu bwai! Nou mi nuo se yu riili chos iina Gad fi chuu, kaa yu did redi fi gi op yu son tu im az wan sakrifais.’ Den Iebriyam si wan shiip wid im aan dem tai op iina som bush. Sed taim Iebriyam tek aaf di sitn dem we im did yuuz tai op Aizak an im sakrifais di shiip insted-a Aizak.

Yu si fram da die de, Jeuova se Iebriyam a im fren. Yu nuo wa mek? A kaa Iebriyam did redi fi du eniting we Jeuova se im fi du, aal wen im neehn nuo wa mek im fi dwi’it.

Jeuova tel Iebriyam wa im did pramis im se agen. Im se: ‘Mi a-go bles yu an mi a-go gi yu pikni pan tap a pikni.’ Wa Jeuova did a se a dat im wuda bles wol iip a gud piipl pan di ort kaaz a Iebriyam fambili.