Iebriyam An Siera Du Wa Gad Se Dem Fi Du

Yu did av wan siti we neehn tuu faar fram Biebl we niem Or, an di piipl we liv de did worship wol iip a faalz gad. Bot yu did av wan man we liv a Or we niem Iebriyam, an a onggl Jeuova im did worship.

Jeuova se tu Iebriyam se: ‘Mi waahn yu lef yu yaad an yu fambili dem an go iina di lan we mi a-go shuo yu.’ Den Gad tel im se: ‘Mi a-go mek yu av wol iip a pikni an evribadi aal uova di ort a-go get wol iip a blesn kaaz a yu.’

Bot iivn duo Iebriyam neehn nuo we Jeuova did a sen im, im stil chos iina Jeuova. So im an im waif Siera, im faada we niem Tiira, an im nevyu we niem Lat pak op dem sitn dem an du wa Jeuova se dem fi du.

Iebriyam a did 75 wen im an im fambili kech a di plies we Jeuova did tel dem fi go. Da plies de did niem Kienan. A de-so Gad tel Iebriyam se: ‘Mi a-go gi yu pikni dem di wol a da lan ya we yu a luk pan.’ Bot Iebriyam an Siera did uol an dem neehn av no pikni. So ou Jeuova wuda du wa im se im a-go du?