Iebriyam An Siera Get Wan Bwai Pikni!

A wol iip a ier Iebriyam an Siera did marid fa. Wich paat dem did liv iina Or did nais bad bot dem lef de-so an did a liv iina tent. Bot Siera neehn mek dat bada ar, kaa shi did chos iina Jeuova.

Siera did riili riili waahn wan pikni. So shi tel Iebriyam se: ‘Ef mi sorvant Iegar av wan pikni, da pikni de wuda komiin laik a fi mi uon.’ Som taim afta dat, Iegar av wan bwai pikni we niem Ishmiyel.

Wol iip a ier afta dat, wen Iebriyam a did 99 an Siera a did 89 ier uol, chrii sumadi kom a dem yaad. Iebriyam tel dem fi kom res aaf anda wan chrii an nyam som fuud. Ges uu dem chrii sumadi de did bi? No som ienjel! Dem tel Iebriyam se: ‘Neks ier dem taim ya, yu an yu waif a-go av wan bwai pikni.’ Siera did de iina di tent a lisn tu wa dem a se. An wen shi ier dat, shi laaf an se tu arself se: ‘Ku pan mi ou mi uol. Mi riili a-go av pikni ya nou?’

Di ier afta dat, Siera av wan bwai pikni, jos laik wa Jeuova ienjel did se wuda apm. Iebriyam kaal im Aizak, an da niem de miin “Laaf.”

Wen Aizak a did bout faiv ier uol, Siera si Ishmiyel a tek set pan im. Shi neehn waahn nobadi fi du notn fi ort ar pikni, so shi go tu Iebriyam an tel im se im fi sen we Iegar an Ishmiyel. Iebriyam neehn waahn fi du dat. Bot Jeuova tel im se: ‘Yu fi du wa Siera se. Mi a-go tek kier a Ishmiyel. Bot a Aizak mi a-go yuuz fi du wa mi did tel yu se mi a-go du.’