Sitn We Di Baibl Did Taak Bout We Av Fi Du Wid Wi

1. Wa Jeuova did du likl afta Adam an Iiv did sin? (Jenisiz 3:15)

LIKL afta Adam an Iiv did sin Jeuova se sitn wuda apm we mek dem pikni dem nuo se tingz a-go beta fi dem. An dis iina Jenisiz 3:15.​—Riid.

2. Wa so speshal bout wa Jenisiz 3:15 se?

² Wa Jeuova tel wi se wuda apm de iina di fos buk a di Baibl. An aal a di ada buk dem a di Baibl av sitn fi du wid it. Jos laka ou dem mait-a stiepl op wan buk fi kip di liif dem tugeda, a siem so di wod dem we rait dong iina Jenisiz 3:15 komiin laik it stiepl op di ada buk dem a di Baibl, kaa we dem se kanek bak tu it. Di mien ting we dem a taak bout a se Jeuova a-go sen sumadi kom we a-go get rid a Sietan an aal a uu a fala im.b Dis a-go bi wan nais taim fi aal a di wan dem we lov Jeuova!

3. Wa wi a-go luk pan iina da lesn ya?

³ Iina da lesn ya, wi a-go taak bout dem kwestiyan ya we av fi du wid wa Jenisiz 3:15 se wuda apm. A uu an uu it did a taak bout? An ou wa Jeuova se wuda apm did apm fi chuu? An ou dat a elp wi ya nou?

WA JEUOVA TEL WI SE WUDA APM AN UU AN UU IT DID A TAAK BOUT?

4. Uu a “di siniek,” an ou wi nuo dat?

⁴ Di wan dem we Jenisiz 3:14, 15 taak bout a “di siniek”, ‘di siniek pikni’, wan “uman”, an ‘di uman pikni’, an di Baibl mek wi nuo uu dem bi.c Fi wan ting wi nuo se a no wan riil siniek, kaa wan riil siniek kudn andastan wa Jeuova a taak bout iina di gyaadn a Iidn. So di sumadi we Jeuova a joj a mos wan riil sumadi we av sens. A uu a da sumadi de? Revilieshan 12:9 mek wi nuo a uu kaa it mek wi nuo se “di uol siniek” a Sietan di Devl. Bot a uu a di siniek pikni?

5. A uu an uu a di siniek pikni?

⁵ Somtaim wen di Baibl taak bout pikni it a taak bout di wan dem uu gwaan di wie ou wan neda sumadi wuda gwaan. So kaa dem a fala da sumadi de, di sumadi wuda komiin laka dem a dem faada. So di siniek pikni a enibadi we a fait gens Jeuova an im piipl dem laik dem pupa Sietan. An dat av fi du wid enibadi weda dem a ienjel ar piipl. Som a dem a di ienjel dem we did lef di wok we Gad did gi dem fi du iina evn an kom dong pan di ort iina Nowa taim, an som a im ada pikni dem a di wikid piipl dem we a gwaan laik dem pupa Sietan di Devl.​—Jen. 6:1, 2; Jan 8:44; 1 Jan 5:19; Juud 6.

6. Wa mek wi nuo se a neehn Iiv a di uman?

⁶ Nou, a uu a di uman? Da uman de kyaahn bi Iiv. Wa mek? Wi nuo se a no Iiv kaa wa di Baibl se wuda apm a das di uman pikni wuda gi di siniek wan “big lik” iina im ed we a-go mek it mash out. Memba se wi jos si se di siniek a Sietan di Devl an im a wan ienjel. So non a Iiv pikni dem wudn kyaahn dwi’it kaa dem no porfek. So wi si se a sumadi els wuda afi dwi’it.

7. Bies pan wa Revilieshan 12:1, 2, 5, an 10 se, a uu a di uman we Jenisiz 3:15 taak bout?

⁷ Di laas buk a di Baibl mek wi si a uu a di uman we Jenisiz 3:15 taak bout. (Riid Revilieshan 12:1, 2, 5, 10.) Da uman ya a no wan naamal uman! Kaa di Baibl mek wi nuo se di muun de anda da uman ya fut, an shi av wan kroun pan ar ed an it av 12 staar. An di pikni we shi av a neehn wan riil pikni: a Gad Kindom we de iina evn. So di uman did de iina evn tu. Di uman a di paat a Gad aaganaizieshan we de iina evn, an di ienjel dem we a du wa Gad waahn dem fi du a dem mek op di paat a Jeuova aaganaizieshan we de iina evn.​—Gya. 4:26.

8. A uu a di mien pikni fi di uman, an a wen im did ton di mien pikni? (Jenisiz 22:15-18)

⁸ Di Baibl mek wi nuo se di mien pikni we kom fram da uman ya wuda kom fram Iebriyam pikni dem. (Riid Jenisiz 22:15-18.) An jos laik we di Baibl se wuda apm, Jiizas did kom fram Iebriyam pikni pikni dem. (Luuk 3:23, 34) Wi si se da pikni ya did fi lik Sietan iina im ed mek im don fa, so wi nuo se a neehn jos wan naamal sumadi dis. So wen Jiizas did bout 30 ier uol a dat taim de Gad yuuz Im spirit fi pik im fi bi di mien pikni fi di uman. (Gya. 3:16) Afta Jiizas ded an kom bak alaiv Gad “riez im op ai ai laik a kroun im put aan pan im ed,” an Im gi im “powa uova evriting we a liv iina evn an pan ort,” an paat a di wok we im get fi du a ‘fi mash op di Devl wok.’​—Iib. 2:7; Mat. 28:18; 1 Jan 3:8.

9-10. (a) A uu els a di uman pikni, an wen dem ton di uman pikni? (b) Wa a di neda ting wi gweehn luk pan?

⁹ Bot a no onggl di mien pikni da uman ya wuda av, shi wuda av som ada pikni tu. Di apasl Paal mek wi nuo uu dem pikni ya wuda bi wen im tel di Kristiyan dem we a Juu an we a no Juu we get pik fi go a evn se: “Ef unu bilang tu Krais Jiizas, den unu a Iebriyam pikni an aal a di sitn dem we Gad pramis fi gi Iebriyam, unu wi get tu.” (Gya. 3:28, 29) Wen Jeuova yuuz im uoli spirit fi pik wan Kristiyan fi go evn da sumadi de ton wan a di uman pikni tu. So di uman pikni dem wuda bi Jiizas an di 144,000 piipl dem we a-go ruul wid im. (Rev. 14:1) Aal a dem chrai fi tingk bout tingz di wie ou Jeuova tingk bout tingz an gwaan di wie ou Jeuova wuda gwaan kaa a im a dem Faada.

¹⁰ Nou dat wi nuo uu an uu Jenisiz 3:15 did a taak bout, wi a-go luk pan ou Jeuova mek dem sitn ya kom chuu likl bai likl, an ou it a elp wi rait ya nou.

OU WA JEUOVA SE WUDA APM DID APM FI CHUU?

11. Wa it miin wen di Baibl se di uman pikni wuda get wan lik pan im futbak?

¹¹ Azkaadn tu wa Jenisiz 3:15 se wuda apm, di siniek wuda lik di uman pikni pan im futbak. Dat did apm wen Sietan rail op di Juu dem an di Ruoman piipl dem fi kil Jiizas. (Luuk 23:13, 20-24) Jos laka wen sumadi lik yu pan yu futbak it mait-a kaaz yu fi kripl ar kyaahn waak fi likl taim, a siem so wen Jiizas did ded fi chrii die im kudn du notn.​—Mat. 16:21.

12. Ou di siniek ed a-go get mash out, an wen dat a-go apm?

¹² Ef wa Jenisiz 3:15 se wuda apm fi apm fi chuu, Jiizas wuda afi kom bak alaiv. Wa mek wi se so? Wi se so kaa azkaadn tu wa di Baibl se wuda apm, di pikni wuda lik di siniek iina im ed an mash it out. An Jiizas wudn kuda du dis ya ef im neehn kom bak alaiv. So chrii die afta im ded Jiizas did kom bak alaiv az wan ienjel we a-go liv iina evn we kyaahn go ded agen. Wen Gad redi im a-go mek Jiizas lik Sietan iina im ed an don im fi eva. (Iib. 2:14) An di wan dem we a-go ruul wid Jiizas a-go elp im fi get rid a aal a Sietan pikni dem we a fait gens Gad.​—Rev. 17:14; 20:4, 10.d

OU WA DI BAIBL SE WUDA APM A ELP WI YA NOU?

13. Ou wa di Baibl se wuda apm a elp wi ya nou?

¹³ Ef yu gi yu laif tu Gad aredi an a sorv im, wa di Baibl se wuda apm a elp yu aredi. Wen Jiizas did kom pan ort im du tingz jos laka ou im Faada wuda du it. (Jan 14:9) An kaa a wa Jiizas did du, it mek wi nuo Jeuova so dat wi kyan lov im. An chuu a Jiizas a liid di kanggrigieshan an a tel wi wa fi du, it a du wi gud ya nou. An Jiizas mek wi nuo wa fi du fi mek Jeuova api wid wi. Wen Jiizas did get lik pan im futbak dat did apm wen im ded. So a wen Jiizas did ded an Jeuova mek im kom bak alaiv, a da taim de im did go pie fi wi sin dem so “Gad wash we aal a wi sin dem wid im Bwai Pikni blod.”​—1 Jan 1:7.

14. Ou wi nuo se wa Jeuova se wuda apm iina di gyaadn a Iidn neva apm siem taim?

¹⁴ Di ting dem we Jeuova did se wuda apm iina di gyaadn a Iidn mek wi si se it a-go tek a wail bifuo aal a dem sitn ya apm, kaa it a-go tek a wail fi di uman av pikni an fi di Devl get fi im falara dem tu. An it wuda tek a taim tu fi di uman pikni dem an di Devl pikni dem kyaahn grii tu. So kaa wi nuo se dem sitn ya wuda apm wi no shak se da worl ya we Sietan kanchuol iet Jeuova piipl dem. A sitn laik dis Jiizas did tel im falara dem se wuda apm. (Maak 13:13; Jan 17:14) Fi bout 100 ier nou wi si se da paat ya we di Baibl tel wi se wuda apm a apm. Ou wi nuo se it a apm?

15. Wa mek di worl iet wi wol iip muor ya nou, bot wa mek wi no afi fried a Sietan?

¹⁵ Likl afta Jiizas ton King iina evn iina 1914 Sietan get fling out a evn. Rait nou im de pan ort a wiet pan di taim wen Jiizas a-go get rid a im. (Rev. 12:9, 12) Bot yu tingk im jos sidong an a wiet so? Nuo sa, Sietan beks til im tempa a bwail. So im a wok aad fi kaaz prablem fi Gad piipl dem. (Rev. 12:13, 17) An kaa a dat, di worl we im kanchuol iet Gad piipl dem wol iip muor ya nou. Bot wi no fried a Sietan an im falara dem. Insted-a dat wi kyan tan op a se di siem ting we di apasl Paal did se: “Ef Gad de wid wi, uu kyan kom gens wi?” (Ruo. 8:31) Wi kyan tan op chrang an chos iina Jeuova kaa wi don si se nof a di ting dem we Jenisiz 3:15 did se wuda apm, apm aredi.

16-18. Wen Curtis, Ursula, an Jessica get fi andastan wa Jenisiz 3:15 a se, ou it did elp dem?

¹⁶ Wa Jeuova se wuda apm iina Jenisiz 3:15 kyan elp wi diil wid eni prablem we wi afi go chuu. Wan breda we niem Curtis we dem sen fi go priich iina wan konchri niem Gwaam, im se: “Som a di taim mi afi go chuu som rof taim, an som taim wa mi did waahn fi apm a no dat apm. An wen mi a go chuu dem rof taim de dem elp mi fi si ef mi riili a chos iina Jeuova. Bot wen mi tingk bout wa Jenisiz 3:15 se, it elp mi fi si se mi fi gwaan chos iina mi Faada Jeuova, we de iina evn”. Curtis kyaahn wiet til Jeuova get rid a aal a di prablem dem we wi a go chuu.

¹⁷ Wan sista we niem Ursula we liv iina Bavieriya se wen shi get fi andastan wa Jenisiz 3:15 a se, it mek ar nuo fi shuor se di Baibl a Gad Wod. Shi get fi si se aal a di ada sitn dem we di Baibl pramis se wuda apm av sitn fi du wid da skripcha ya. Wen shi si ou aal a di Baibl kanek op dat did mek shi riet di Baibl muor. An shi se: “Wen mi si se a rait afta Adam an Iiv did sin Jeuova did du sitn siem taim so dat piipl kuda av sitn gud fi luk faawod tu, dat did mek mi fiil gud.”

¹⁸ Wan neda sista niem Jessica we kom fram Maikroniizha se: “Mi stil memba ou mi did fiil wen mi si se, yes, dis a di chuut! Wa Jenisiz 3:15 se wuda apm a apm rait ya nou. It elp mi fi memba se di ting dem we wi a go chuu ya nou, a no dat Gad did waahn wi fi a go chuu. An it mek mi si se fi sorv Jeuova nou a di bes ting mi kuda eva du wid mi laif ya nou. An kaa mi a sorv Jeuova nou it a-go mek mi liv wan beta laif iina di fyuucha tu.”

19. Wa mek wi kyan shuor se di laas paat a wa Jenisiz 3:15 se wuda apm, a-go apm fi chuu?

¹⁹ Da lesn ya mek wi si se wa Jenisiz 3:15 se wuda apm staat apm aredi. Wi si klier klier a uu a di uman pikni an uu a di siniek pikni. Jiizas a di mien pikni fi di uman, an afta im did get lik pan im futbak an it iil op, im ton wan powaful King we kyaahn ded. Di res a di pikni dem we di uman av, som a dem get pik aredi an som a dem no get pik yet, bot a onggl likl bit a dem lef fi get pik. Kaa di fos paat a wa di Baibl se wuda apm apm aredi, wi shuor se di paat we se di siniek ed a-go get mash out a dat a-go apm fi chuu. Wat a nais taim it a-go bi fi aal a di wan dem we a du wa Jeuova waahn dem fi du wen Sietan get mash dong! So til dem taim de, gwaan chos iina Gad, no tap. Kaa wi kyan aalwiez chos fi wi Gad. Jeuova a-go yuuz di uman pikni fi gi piipl we kom fram “aal a di difrant konchri dem we de pan di ort” wol iip a blesn.​—Jen. 22:18.