Elp Yu Breda An Sista Dem Wen Dem A Go Chuu Dem Prablem Dem

1. Nof a di taim wen im piipl dem prie tu im, a ou Jeuova ansa dem?

YU DID nuo se Jeuova kyan yuuz yu fi ansa sumadi prieya? It no mata uu yu bi, im kyan yuuz yu ef yu a wan elda, wan ministiiriyal sorvant, wan paiyanier, ar iivn ef yu naa du no speshal wok iina di kanggrigieshan. Im kyan yuuz yu ef yu yong ar yu uol, an it no mata ef yu a wan breda ar wan sista. Wen sumadi we lov Jeuova beg im fi elp dem, nof a di taim im yuuz di elda dem an ada piipl we a sorv im fi go “elp an push” da sumadi de fi gwaan tan op chrang. (Kol. 4:11) It riili nais se wi kyan du sitn fi elp Jeuova an wi breda dem. An wi mait-a kyan get fi du sitn fi elp dem wen wan bad siknis a go roun di plies, wen orikien an dem ting de a gwaan, ar wen piipl a fait gens wi kaaz a wa wi biliiv iina.

ELP YU BREDA AN SISTA DEM WEN BAD SIKNIS A GO ROUN

2. Wa mek it mait-a aad fi elp wi breda an sista dem wen wan bad siknis a go roun?

² Wen wan bad siknis a go roun it kyan mek it aad fi wi elp wi wan aneda. Laik wi mait-a waahn fi go luk fi wi fren dem bot wi kyaahn go du dat kaaz dat mait-a mek di siknis pred muor. Ar wi mait-a waahn fi mek som breda an sista we wi nuo se tingz aad fi dem, kom a wi yaad kom nyam som fuud, bot wi kyaahn du dat niida. Ar wi mait-a fain se it aad fi go elp wi breda an sista dem wen sumadi iina fi wi fambili a go chuu prablem tu. Bot Jeuova stil waahn wi fi de de fi wi breda an sista dem, an it mek im api wen wi elp dem. (Pr. 3:27; 19:17) Wa wi kyan du fi elp dem?

3. Wa wi lorn fram wa di elda dem iina Desi kanggrigieshan did du? (Jerimaiya 23:4)

³ Wa di elda dem kyan du. Ef yu a wan elda yu fi nuo di breda an sista dem gud gud. (Riid Jerimaiya 23:4.) Wan sista we wi did taak bout iina di laas lesn we niem Desi did se, “Di elda dem we de iina mi gruup wok wid mi an som a di ada breda an sista dem iina sorvis, an dem wuda du ada tingz wid wi tu.”b Wa dem elda de did du did mek it iiziya fi dem go elp Desi wen KUOVID did a go roun an som ar fambili dem did ded siek-a KUOVID.

4. Wa mek di elda dem kuda did elp Desi, an wa yu lorn fram dat?

⁴ Desi se, “Kaa mi an di elda dem did a fren fram lang taim, it neehn aad fi mi tel dem ou mi fiil an bout di sitn dem we did a bada mi.” Wa di elda dem kyan lorn fram dis? Dem fi get fi nuo di breda an sista dem an tek kier a dem bifuo sitn bad apm. Dem fi bi dem fren. Ef wan bad siknis a go roun an yu kyaahn go luk fi dem, yu kyan fain som ada wie fi taak tu dem an fain out ou dem a du. Desi se: “Somtaim pan di siem die difrant difrant elda wuda kaal mi an teks mi fi fain out ou mi a du. Di skripcha dem we dem did riid mek mi fiil gud, aalduo mi did nuo dem vors ya gud gud.”

5. Ou di elda dem kyan get fi nuo wa di breda an sista dem niid, an wa dem kyan du fi elp dem?

⁵ Wan a di wie yu kyan nuo wa yu breda an sista dem niid a fi aks dem wa a gwaan wid dem, bot wen yu aks dem no mek dem fiil no wie. (Pr. 20:5) Dem av inof fuud fi nyam an medikieshan fi tek an ada tingz we dem niid? Dem kuda en op luuz dem wok ar na’av no we fi liv? Dem niid wi fi elp dem fi get som a di sitn dem we di govament a gi we? Di breda an sista dem did gi Desi moni an som ada tingz we shi did niid. Bot a di sitn dem we di elda dem yuuz fram Gad Wod an ou dem shuo ar se dem riili lov ar, a dat did elp ar fi tan op chrang an go chuu ar prablem dem. Shi se: “Di elda dem prie wid mi. Mi kyaahn tel yu se mi memba wa dem se, bot mi memba ou mi did fiil. It komiin laka se Jeuova did a se, ‘Mi de ya wid yu.’”​—Aiz. 41:10, 13.

6. Wa di ada breda an sista dem iina di kanggrigieshan kyan du fi elp dem wan aneda? (Luk pan di picha.)

⁶ Wa di ada breda an sista dem kyan du. Wi nuo se di elda dem fi luk out fi di breda dem iina di kanggrigieshan. Bot Jeuova waahn di uol a wi fi elp wi wan aneda an push wi wan aneda fi gwaan tan op chrang. (Gya. 6:10) Iivn ef wi du wan likl sitn we shuo sumadi we sik se wi lov dem, it kyan du wan big ting fi dem. Wan likl pikni kyan sen wan kyaad ar jraa picha we kyan mek wan breda fiil gud. Wan yong sumadi mait-a kyan go du sitn ar go a shap fi wan sista. Ar sumadi mait-a kyan kuk som fuud an kyari go lef it a sumadi we sik yaad. Wi nuo se wen wan big siknis a go roun, aal a di breda an sista dem gweehn niid elp fi gwaan tan op chrang. So wi mait-a kyan stie bak likl langga afta di miitn don so dat wi kyan taak tu dem, an wi kyan du dis ef wi de a di Kindom Aal ar ef wi a yuuz vidiyo kaal fi kom iin pan di miitn dem. An memba se di elda dem niid elp fi eng aan an gwaan kip chrang tu. So som breda an sista wi sen wan likl kyaad fi tangk di elda dem kaaz wi afi memba se wen wan bad siknis a go roun a nof wok dem av fi du. It riili nais wen aal a wi du wa wi fi du ‘fi taak di sitn dem fi elp wi wan aneda get chrang an gwaan bil op wi wan aneda.’​—1 Tes. 5:11.

ELP YU BREDA AN SISTA DEM WEN ORIKIEN AN DEM TINGZ DE A GWAAN

7. Wa mek it mait-a aad fi piipl afta orikien an dem ting de gwaan?

⁷ Wen wan orikien an dem sitn de apm, it kyan mash op sumadi laif faas faas. Piipl mait-a en op luuz evriting​—dem tingz, dem ous, ar piipl fi dem mait-a ded. An dem sitn ya apm tu wi breda an sista dem tu. Wa wi kyan du fi elp dem?

8. Wa di elda dem an di wan dem we a ed fi dem fambili fi du bifuo orikien an dem ting de kom?

⁸ Wa di elda dem kyan du. Di wan dem we a elda, unu fi mek shuor se di breda an sista dem nuo wa fi du bifuo orikien an dem ting de apm. Mek shuor se evribadi nuo wa dem fi du fi kip sief an ou dem kyan mek di elda dem nuo wa a gwaan wid dem. Margaret, we wi did taak bout iina di laas lesn se: “Wi elda dem did taak tu wi iina di paat we dem taak bout tingz we av fi du wid wi kanggrigieshan, an mek wi nuo se di taim a ier wen di wail faiya wuda bon out di plies neehn don. So dem tel wi se ef di govament tel wi fi ron we lef di plies, ar ef wi si se tingz a get wos, wi no fi ich fi lef.” Dat did kom a di rait taim kaaz jos faiv wiik afta dat wan big faiya did staat bon dong di plies. Iina dem fambili Baibl stodi, di wan dem we a di ed fi di fambili kyan taak bout wa evribadi fi du wen tingz laik dem ya apm. Ef yu an yu pikni dem nuo wa fi du, den wen dem sitn de gwaan, it a-go iiziya fi unu kip kaam an no fret an wori wori op unuself.

9. Wa di elda dem fi du bifuo wan orikien an dem ting de apm, an ou dem kyan wok tugeda afta?

⁹ Ef yu inchaaj a wan a di fiil sorvis gruup dem, no bada wiet til afta wan orikien an dem ting de kom fi mek shuor se yu nuo wich paat evribadi liv an yu av di rait fuon nomba dem fi evribadi iina yu fiil sorvis gruup. So wa yu fi du a mek wan lis an ef eniting chienj, yu chienj it. So yu si wen wan orikien an dem ting de gwaan, yu a-go kyan kaal ar go luk fi di breda an sista dem fi si ou yu kyan elp dem. An wen yu fain out wa di breda an sista dem niid, sed taim yu fi mek di kaadinieta a di badi a elda nuo an im wi mek di sorkit uovasiya tu. Wen dem breda ya wok tugeda dem kyan du nof fi elp di breda an sista dem. Afta di faiya don, di sorkit uovasiya fi Margaret kanggrigieshan neehn sliip fi 36 owa kaa im did a elp di elda dem nuo wa fi du so dat dem kuda tek kier a bout 450 breda an sista we did afi lef dem yaad. (2 Kor. 11:27) So aal a dem breda an sista de kuda did get somwe we dem kuda go stie.

10. Wa mek di elda dem nuo se fi gwaan tek kier a di breda an sista dem a wan big ting? (Jan 21:15)

¹⁰ Wan a di ting dem we di elda dem du fi di breda an sista dem a fi yuuz di Baibl fi elp dem eng aan an tan op chrang, an dem elp dem fi fiil beta wen dem a go chuu dem prablem dem. (1 Pii. 5:2) Wen wan orikien ar sitn laka dat apm, di fos ting di elda dem fi du a dat dem fi mek shuor se di breda an sista dem aarait an av fuud, kluoz, an somwe fi tan. Bot kopl mont wel afta dat, di breda an sista dem we go chuu dem sitn ya a-go niid di elda dem fi yuuz di Baibl fi elp dem fi gwaan eng aan an tan op chrang an fi elp dem fiil beta. (Riid Jan 21:15.) Harold we de pan wan Branch Komitii did taak wid som breda an sista we did go chuu orikien an dem ting de, an im se: “It tek likl taim fi dem laif saat out agen. Dem mait-a staat get bak som a di sitn dem we dem did luuz. Bot dem mait-a stil tingk bout sumadi fi dem we ded, ar sitn we dem lov bad we dem luuz, ar ou dem nieli ded. An wen dem tingk bout dem sitn ya, it kyan mek dem fiil sad agen laik it did jos apm. It no miin tu se dem no chos iina Gad, bot a jos so piipl a-go fiil wen dem tingz de gwaan.”

11. Wa a som sitn we di fambili dem gweehn stil niid elp wid?

¹¹ Di elda dem du wa di Baibl se, wen it se: “Ef dem a baal unu fi baal wid dem tu.” (Ruo. 12:15) Di wan dem we go chuu orikien an dem ting de mait-a niid elp fi memba se Jeuova stil lov dem an dat dem breda an sista dem lov dem tu. Di elda dem fi gwaan elp di fambili dem fi mek shuor se dem a du di tingz dem we kip dem kluos tu Jeuova, laik dem a prie tu im, dem a stodi dem Baibl, dem a go a miitn, an dem a go a fiil sorvis tu. An dem fi elp di mada an faada dem fi elp dem pikni dem fi gwaan tingk bout tingz we orikien an dem sitn de kyaahn mash op. Di mada an faada dem, unu fi elp unu pikni dem fi memba se Jeuova a-go aalwiez de de fi dem an im neva eva a-go tap bi dem Fren. An mek shuor se unu tel dem se dem breda an sista dem we de aal uova di worl a-go aalwiez de de fi dem tu.​—1 Pii. 2:17.

12. Wa di ada breda an sista dem kyan du fi elp out wen orikien an dem ting de apm? (Luk pan di picha.)

¹² Wa di ada breda an sista dem kyan du. Ef wan orikien an dem ting de apm nier wich paat yu liv, aks di elda dem wa yu kyan du fi elp out. Yu mait-a kyan put op som a di wan dem we afi lef dem yaad ar yu kyan put op di wan dem we kom fi elp piipl bil bak dem ous. Ar yu mait-a kyan kyari fuud an ada tingz we di breda an sista dem niid go gi dem. An yu kyan stil elp iivn ef di orikien ar sitn laka dat gwaan faar fram we yu liv. Yu kyan prie fi di wan dem we a go chuu it. (2 Kor. 1:8-11) An wen yu gi moni fi elp out wid di wok we wi a du aal uova di worl, dat a wan neda wie ou yu kyan elp dem breda an sista de tu. (2 Kor. 8:2-5) Ef yu kyan go wich paat wan orikien ar sitn laka dat apm yu kyan aks di elda dem bout ou yu kyan sain op fi go. Ef di breda dem we a diil wid dem tingz de tel yu se yu kyan kom, dem a-go chrien yu so dat dem kyan sen yu go a di plies dem we dem niid yu elp. An dem wi mek yu nuo wen a taim fi yu go.

ELP YU BREDA AN SISTA DEM FI ENG AAN AN TAN OP CHRANG WEN PIIPL A FAIT GENS WI

13. Wa a som a di sitn dem we mek it aad fi wi breda an sista dem we de iina di konchri dem we wi wok anda lakdong?

¹³ Iina di konchri dem we dem put wi wok anda lakdong, laif aada fi di breda an sista dem. Dem stil afi diil wid moni prablem, dem stil get sik, an piipl fi dem stil ded. Bot kaa di wok anda lakdong, dat mait-a mek it aad fi di elda dem si wa a gwaan wid di breda an sista dem ar fi taak tu dem so dat dem kyan elp dem fi eng aan an tan op chrang. An a dat did gwaan wid Andrei we wi did taak bout iina di laas lesn. Wan sista iina im sorvis gruup did puor bad. Den shi did iina wan kyaar aksident. An shi did niid fi du kopl aparieshan an so shi kudn du no wok. Iivn duo di wok anda lakdong an KUOVID did a go roun, di breda dem stil du wa dem kuda du fi elp ar, an Jeuova did a si wa dem did a du.

14. Ou di elda dem kyan shuo se dem a chos iina Jeuova fi elp dem?

¹⁴ Wa di elda dem kyan du. Andrei prie tu Jeuova an du wa im kuda du. Bot a ou Jeuova ansa im prieya dem? Jeuova mek di ada breda an sista dem we kuda du tingz fi elp out elp di sista. Laik som a dem wuda kyari ar wen shi a go a dakta an som ada wan gi ar moni. Jeuova mek dem did wel waahn fi elp. An im mek shuor se dem kuda du evriting we di sista did niid elp wid. (Iib. 13:16) So unu we a elda, wen di wok anda lakdong, aks ada piipl fi elp unu. (Jer. 36:5, 6) Pan tap a dat, gwaan chos iina Jeuova fi elp unu. Im a-go elp unu fi du evriting we unu kyan du fi elp di breda an sista dem.

15. Ou wi kyan mek shuor se wi stil a liv gud wid wi breda an sista dem wen di wok anda lakdong?

¹⁵ Wa di ada breda an sista dem kyan du. Wen di wok anda lakdong, wi mait-a afi miit op wid wi breda an sista dem iina likl likl gruup. So wi afi mek shuor se wi a liv gud wid wi wan aneda. A Sietan wi fi fait, wi no fi a fait wi wan aneda. So no bada tingk bout di sitn dem we yu breda an sista mait-a du we mek yu beks. An ef yu an sumadi av sitn, no bada ich fi go saat it out. (Pr. 19:11; Ifii. 4:26) Wi fi eva redi fi go elp wi wan aneda. (Taitos 3:14) Wen di breda an sista dem did go elp out di ada sista we did niid dem elp, dem get fi si se aal a dem iina da fiil sorvis gruup de did get kluos kluos an it did komiin laka se dem a fambili.​—Sa. 133:1.

16. Wen wi luk pan wa Koloshan 4:3, 18 se, ou wi kyan elp wi breda an sista dem wen dem a fait gens dem kaaz a wa dem biliiv iina?

¹⁶ Iivn duo di govament put di wok anda lakdong wich paat dem liv, uol iip a wi breda an sista dem stil a gwaan sorv Jeuova. Dem aal lak op som a dem iina prizn tu. So wi kyan prie fi dem an dem fambili, an wi kyan prie fi di wan dem we iivn duo dem mait-a lak dem op tu, dem stil go elp di breda an sista dem fi get di sitn dem we dem niid fi get kluos tu Jeuova, di sitn dem we dem niid fi liv, an dem taak op fi dem a kuot. c (Riid Koloshan 4:3, 18.) Memba se yu prieya dem kyan du nof fi elp yu breda an sista dem.​—2 Tes. 3:1, 2; 1 Tim. 2:1, 2.

17. Wa yu fi du nou fi get yuself redi fi wen piipl staat fait gens yu kaaz a wa yu biliiv iina?

¹⁷ Yu an yu fambili kyan du tingz rait ya nou fi get unuself redi fi wen piipl staat fait gens unu kaaz a wa unu biliiv iina. (Aks 14:22) No bada spen di taim a tingk bout aal di bad sitn dem we kuda apm. Jos gwaan du di sitn dem we a-go mek yu a Jeuova kluos kluos an elp yu pikni dem fi du dat tu. Ef som a di taim yu fiil fried an a wori wori op yuself, prie tu Jeuova an tel im ou yu riili fiil. (Sa. 62:7, 8) Sidong wid yu fambili an taak bout aal a di riizn dem wa mek yu kyan chos Jeuova.d Wen wan orikien ar sitn laka dat gwaan, a di tingz we yu did du fi get yu fambili redi bifuo it apm an umoch yu chos iina Jeuova, a-go elp yu an yu pikni dem fi no fried an fi av piis iina unu aat an main.

18. A wa wi a luk faawod fi get?

¹⁸ Di piis we Gad gi wi iina wi aat an main, a dat elp wi fi fiil api an aarait. (Fil. 4:6, 7) An a da piis de Jeuova yuuz fi elp wi fi no fret an wori wori op wiself iivn duo bad siknis a go roun, orikien an dem ting de a gwaan, an piipl a fait gens wi kaaz a wa wi biliiv iina. An Jeuova gi wi som elda we wok aad fi tek kier a wi. An a wan nais ting se im mek wi kyan elp wi wan aneda. Di piis we Gad gi wi a-go elp wi fi go chuu som iivn biga tingz we suun riich wi, laik di wos “sofarieshan” we suun kom. (Mat. 24:21) Dem taim de wi afi go gwaan iizi wiself an elp wi breda an sista dem fi du dat tu. Bot wen di wos sofarieshan don, wi naa go av no muor prablem we a-go mek wi fret an wori wori op wiself. Afta dat, wi a-go get we Jeuova did aalwiez waahn wi fi get​—piis kyaahn don.​—Aiz. 26:3, 4.