Mi Si Breda An Sista We A Chos Iina Jeuova No Mata Wa

Mi laaf, kaa mi fren neehn komiin laka sumadi we go a choch tu mi. So mi aks im se: “Wa yu nuo bout di Baibl?” Im neehn ansa mi siem taim. Den im tel mi se im mada a wan Jeuova Witnis an a shi mek im nuo som a di tingz dem we im nuo. So mi beg im fi tel mi som muor tingz.

Di tuu a wi chat til wie dong iina di nait. Mi fren tel mi se a Sietan a ruul di worl. (Jan 14:30) Uol iip a unu mait-a did nuo dis aredi, bot dis a did wan big ting fi mi kaa mi neehn nuo dis. Mi aalwiez ier se Gad chriit piipl fier an im kier bout piipl. Bot wen mi luk an si aal wa a gwaan iina di worl, dis neehn mek sens tu mi. Aalduo mi a did jos 26, a uol iip a wikid sitn mi did si iina di worl aredi we did a bada mi.

Mi faada did a wan pailat iina di aami iina Merika. So fram mi did yong mi nuo se dem did redi fi yuuz som bum we dem did av we kuda kil uol iip a piipl wan taim, dem did jos a wiet fi dwi’it. A wen mi did a go a kalij iina Kalifuoniya di waar iina Vietnaam did staat. An wen di pikni dem we mi did a go kalij wid staat fi demanschriet, mi staat fi dwi’it tu. So di poliis dem staat fi ron wi dong wid batn an dem sprie tier gyas pan wi, an wen dem dwi’it, somtaim wi kyaahn si gud an wi fiil laik se wi a chuok. Dem taim de it komiin laik se di plies did ton opsaid dong kaa piipl did a kil aaf di difrant liida dem fi di difrant paati dem, an dem did a demanschriet an blak ruod an dem ting de. Piipl did jos a fait an a mash op di plies so dat dem kyan get fi du dem uona ting. A laik yu neehn nuo wa fi du.

Iina 1970, mi get wan big jab we mek mi staat fi mek uol iip a moni iina Alaska. Den mi flai out go a Landan an bai wan baik, an mi neehn av no speshal plies a go, mi jos staat fi raid go a di sout paat a di konchri. Som mont afta dat mi riich a Afrika, an wen mi did a go de, mi bok op pan uol iip a piipl we wish dem kuda dis ron we fram dem prablem dem tu.

So kaaz a aal a dem bad sitn ya we mi did si a gwaan iina di worl, wen mi did lorn se di Baibl tiich se a wan wikid spirit a ron tingz iina di worl, dis did mek sens tu mi. So mi did waahn fi nuo a wa Gad a du den.

An kopl mont afta mi get di ansa. An mi get fi nuo som breda an sista, uu no mata wa dem a go chuu, dem stik tu Jeuova Gad. Dis mek mi lov dem.

NADAN AIYALAN​—“DI PLIES WE DEM AV NOF BUM AN BULIT”

Wen mi go bak a Landan, mi go luk fi mi fren mada an shi gi mi wan Baibl. An afta dat, mi go a Amstadam we de iina di Nedalanz, an wan Jeuova Witnis si mi a riid di Baibl anda wan lait pan di ruod, an im elp mi fi andastan wa mi did a riid. An afta dat, mi go a Doblin we de iina Aiyalan. An mi go a di Jeuova Witnis branch afis we de a Aiyalan an mi go nak pan di duor. A so mi miit wan breda we niem Arthur Matthews, an im did chrang iina di chuut, an so mi aks im fi stodi di Baibl wid mi, an im se yes im wuda dwi’it.

Wen mi staat fi stodi, mi put evriting we mi av iina it. Mi staat fi riid di Jeuova Witnis dem buk dem, aal som a di buk dem we dem put som a di difrant difrant magaziin dem iina it fi mek wan buk. Bot a neehn onggl dat mi did a du, mi did a riid di Baibl tu. Mi did lov fi riid it. An wen mi go a di miitn dem, mi si se aal di likl pikni dem we de de a ansa kwestiyan bout som sitn we som man we stodi nof no nuo di ansa fa, laik: ‘Wa mek so moch wikidnis de iina di worl? A uu Gad bi? Wa apm tu wi wen wi ded?’ An kaa mi neehn nuo nobadi els iina di konchri, di onggl piipl mi did a spen taim wid a di Jeuova Witnis dem, so it mek mi get fi lov Jeuova an waahn fi du evriting we im se mi fi du.

Mi baptaiz iina 1972. An wan ier afta dat, mi staat fi paiyanier an mi staat fi go a wan likl kanggrigieshan iina Nyuuri we de iina Nadan Aiyalan. Mi rent wan likl plies, we mek outa stuon, we de pan wan mountn. Yu did av uol iip a kou nier mi, so wen mi did av mi taak fi du mi wuda go out de go du mi taak infronta dem. Dem did luk laik se dem did a lisn tu wa mi a se an a chuu dem kod. Bot a no laik se dem kuda taak fi tel mi wa mi kyan du beta, bot dem elp mi fi kyan luk pan di breda an sista dem wen mi a du mi taak. Iina 1974, dem mek mi ton wan speshal paiyanier, an wan breda we niem Nigel Pitt did staat fi work wid mi tu, an di tuu a wi ton gud gud fren.

A uol iip a waar did a gwaan iina Nadan Aiyalan dem taim de. Som piipl kaal it “di plies we dem av nof bum an bulit.” Uol iip a faitin an shuutin did a gwaan. Piipl did aal a tan fram faar an shuut ada piipl, an dem did a bum op uol iip a kyaar an dem sitn de tu. An rilijan an palitiks did miks op miks op, an kaa a dat, a bie prablem dem did a av. Bot di difrant difrant choch piipl dem, laik di wan dem we go a di Protestant choch dem an di wan dem we go a di Kyatalik choch, nuo se Jeuova Witnis no tek no said iina palitiks, so di Jeuova Witnis dem kuda did priich widout nobadi chobl dem. An di piipl dem we liv iina di ieriya wuda nuo wen waar wuda brok out, so dem wuda tel di Jeuova Witnis dem no fi kom da taim de.

Som a di taim wi did stil fiil fried bad. Laik wan a di taim wen mi an Denis Carrigan did a paiyanier, an wi go priich somwe we de nier wich paat wi liv we no Jeuova Witnis neehn liv, an dis a did di sekan taim wi a go bak de. Wan uman se wi a suoja we a wok fi Britn anda di kwaiyat. An shi se dis kaaz wen wi taak wi no soun laik wi kom fram Aiyalan. An wen shi se dis, man, it did mek wi fraitn bad kaa ef yu an wan suoja a dis fren, dem wuda kil yu ar shat yu iina yu nii. An mi a tel yu, wen wi tan op outa ruod an a wiet pan di bos, wi did fiil kuol an laik se wi naa nobadi. Den mi si wan kyaar tek taim jraiv op a di shap, we yu kyan get kafi fi jrink, we di uman did de. Shi kom out an dis a paint pan wi wen shi a taak tu di tuu man dem. An den di tuu man dem jraiv kom wich paat wi de an staat fi aks wi som kwestiyan bout wen di bos a kom. An wen di bos kom, dem taak tu di bos jraiva. Wi kudn ier wa dem did a se, an kaa nobadi els neehn iina di bos wi did fiil se, ye, a plan dem a plan fi don wi. Bot a neehn dat apm. Wen wi a kom outa di bos, mi aks di jraiva se: “A wi dem tuu man de did a aks yu bout?” An im tel wi se: “Mi tel dem se mi nuo unu man. Unu na’afi wori. Mi tel dem se unu gud.”

Iina 1976 mi did de a wan kanvenshan iina Doblin, an mi a tel yu, mi miit wan nais sista we niem Pauline Lomax. Shi did ombl an shi did lov Jeuova. An shi a did wan speshal paiyanier tu fram Ingglan. Shi an ar breda we niem Ray did nuo di chuut fram dem a pikni. Wan ier afta dat, mi an Pauline get marid an di tuu a wi gwaan paiyanier iina Balimiina we de iina Nadan Aiyalan.

Mi an Pauline did iina di sorkit wok fi likl bit iina Belfaas, Landanderi, an som ada plies we dem av uol iip a kilin an ting. Bot wen wi si ou di breda an sista dem tan op chrang fi wa dem biliiv iina, an wi si ou dem tap biliiv iina aal a di sitn dem we dem yuus tu biliiv wen dem fain out se a no dat di Baibl tiich, it mek wi fiil gud. Kaa yu si dem breda an sista ya, bifuo dem lorn di chuut, som a dem neehn laik piipl kaaz a ou dem luk ar wich paat dem kom fram, ar kaaz a wa dem biliiv iina, bot dem chienj dem doti wiez dem an staat fi sorv Jeuova, an mi get fi si ou Jeuova bles dem an tek kier a dem.

A ten ier wi did liv iina Aiyalan fa. An iina 1981 wi get fi go a Giliyad iina klaas nomba 72. An wen wi gradiyiet dem sen wi go a Siera Liyuon iina Wes Afrika.

SIERA LIYUON​—PUOR BAD BOT STIL A CHOS IINA GAD

A did 13 a wi we did a mishaneri did liv iina wan ous. A wan kichin did de de, chrii tailit, tuu showa, an wan telifuon, an wan washin mashiin, an wan jraiya. An evri minit lait go we. An uol iip a rat did iina di ruuf, an som a di taim, kuobra siniek wuda kom iina di biesment tu.

Aalduo tingz did rof wich paat wi did a liv, wi did stil lov di wok we wi did a du. An di piipl dem wuda lisn tu wi wen wi go a sorvis kaa dem lov di Baibl, an so uol iip a dem wuda stodi wid wi an tek di chuut. Di piipl dem iina sorvis wuda kaal mi “Misa Robert” an kaal Pauline “Misis Robert.” Bot kaa mi did staat fi wok so moch a di branch afis, dem neehn did a si mi aafn iina di sorvis agen, so dem staat fi kaal Pauline “Misis Pauline” an kaal mi “Misa Pauline.” Mi de tel yu, Pauline did lov dat.

Uol iip a di breda an sista dem did puor, bot wi si se Jeuova aalwiez tek kier a dem, an gi dem di sitn dem we dem niid. (Mat. 6:33) Mi memba wan a di taim wan sista, we did onggl av moni fi bai fuud fi shi an ar pikni dem fi jos wan die, did fain se wan breda did sik wid malieriya, an shi gi im di moni fi bai im medikieshan kaa im neehn av no moni. An da siem die de, wan uman we shi neehn did a ekspek kom tu ar fi shi du ar ier so shi kuda get moni. A nof taim dem sitn de did gwaan.

NAIJIIRIYA​—WI LORN FI LIV LAIK ADA PIIPL

Wi did de a Siera Liyuon fi nain ier an den dem sen wi go a Betel iina Naijiiriya. Da wan ya did biga dan wa wi yuus tu. Mi did a du di siem kain-a wok we mi did a du a di ada branch, bot tingz a neehn di siem fi Pauline kaa shi yuus tu spen 130 owa iina sorvis a mont taim, an shi did av uol iip a gud Baibl stodi. Bot nou shi did a wok iina di suoin ruum we dem fiks piipl kluoz, so dis neehn iizi fi ar nou. Bot den shi get fi si se di breda an sista dem de api fi di work we shi a du. An shi chrai fi wok aad nou fi du an se tingz fi mek di ada breda an sista dem we a wok a Betel fiil gud bout demself.

A nof sitn wi did afi lorn bout ou di breda an sista dem du tingz iina Naijiiriya. Laik wan a di taim wan breda kyari wan sista kom a mi afis we did jos a kom a Betel, an wen mi chrech out mi an fi shiek di sista an, di sista bou dong a mi fut! Dis did fraitn mi. An siem taim tuu skripcha kom iina mi main, wan a Aks 10:25, 26 an di neda wan a Revilieshan 19:10. An den mi wanda ef mi did fi tel ar no fi bou dong tu mi. Bot den mi se dem a tek ar a Betel, so dat miin tu se shi nuo wa di Baibl tiich se.

So fi di res a di taim wi de de a taak, mi did jos a bok-shofl so. Bot afta dat, mi go luk op an fain out bout ou di piipl iina Naijiiriya du tingz, an mi get fi fain out se wa mi sista did du a sopm we did naamal fi di piipl dem de du. Aal wan man wuda du di siem ting tu. Wen dem du dis dem did jos a mek yu si se dem riet yu, a neehn worship dem a worship yu. An dis a sitn we wi si se apm iina di Baibl aredi. (1 Sam. 24:8) So mi did api se mi neehn se notn we kuda mek di sista fiil shiem jos kaaz a mi neehn nuo wa mek shi a du wa shi du.

A uol iip a breda an sista wi nuo iina Naijiiriya we tan op fi wa rait no mata wa laik wan we did niem Isaiah Adagbona.a Im a did wan yong man wen im get di chuut, bot den im fain out se im av wan siknis we mek im skin fasi-fasi we ada piipl kuda kech fram im. So dem sen im go somwe go liv wich paat ada piipl we av di siem siknis liv, an a im did a di onggl Jeuova Witnis we liv de. Bot iivn duo dem did a fait gens im kaaz a wa im biliiv iina, im stil did get fi elp muor dan 30 piipl we liv de fi kom iina di chuut. An im elp fi set op wan kanggrigieshan de tu.

KENYA​—DI BREDA DEM TEK DEM TAIM WID MI

Iina 1996 dem sen wi go a di branch iina Kenya. Bot dis a neehn di fos taim mi go a Kenya, memba mi did tel unu wen mi an mi fren did de de. Bot nou wi did liv a Betel. An mi a tel yu, wi did av som mongki de we niem vervet mongki we lov fi kom pan di Betel prapati an “tiif” di fruut dem we di sista dem av. An wan die wan a di sista go lef ar winda uopm. Wen shi kom bak uom shi fain wan mongki fambili a nyam out ar fuud. Shi skriim an ron out, an di mongki dem fraitn an skriim an jomp chuu di winda.

Mi an Pauline staat fi go a wan Swaiili kanggrigieshan. An den iina no taim di breda dem aks mi fi du di Kanggrigieshan Buk Stodi (we wi kaal di Baibl Stodi Fi Wi Miitn nou). Bot wen it kom aan tu da langwij de, mi did komiin laik wan pikni. So wa mi did afi du a bifuo mi go a miitn mi mek shuor se mi go chuu wa mi did a-go du so dat mi kuda riid di kwestiyan dem gud. Bot wen mi go a miitn an di breda an sista dem ansa kwestiyan, ef dem se eniting we difrant fram wa de iina di paragraaf mi wudn get wa dem a se. Bwai, mi did fiil a wie. An dis did mek mi fiil laik se di breda an sista dem naa get evriting we dem fi get outa di miitn, so mi did fiil sari fi dem. Bot di breda an sista dem stil tek dem taim wid mi kaa dem did ombl, an mi riet dem fi dat.

MERIKA​—RICH BOT STIL A CHOS IINA GAD

Iina 1997 dem sen wi go a Betel we de a Bruklin iina Nyuu Yaak. So a les dan wan ier wi did de a Kenya fa. Iina da konchri ya piipl did av uol iip a moni an tingz an dis kyan kaaz som difrant kain-a prablem. (Pr. 30:8, 9) Bot iivn duo piipl did rich, dem did stil a sorv Jeuova. Di breda an sista dem no yuuz dem taim an we dem av fi big op demself an mek demself get rich, bot dem yuuz it fi elp out wid di wok we di aaganaizieshan a du.

Iina aal a di konchri dem we wi go, wi get fi si se di breda an sista dem lov Jeuova. Iina Aiyalan, piipl did a fait gens dem wan aneda, bot di breda an sista dem stil did a tan op chrang. Iina Afrika, di breda an sista dem did puor bad an som a dem did liv iina som plies we dem neehn av no breda an sista nier dem, bot dem did stil a chos iina Jeuova. An iina Merika, dem did av moni bot dem did stil a chos iina Jeuova tu. Jeuova mos api wen im si im piipl dem a du tingz fi mek im si se dem lov im no mata wa dem a go chuu.

Mi a tel yu, taim flai faas. It komiin laik se wi no nuo wich paat di ier dem go. (Juob 7:6) Rait ya nou ya, wi de a di worl ed afis we de iina Waarwik a wok, an wi api fi stil a wok wid piipl we riili lov dem wan aneda. Wi aarait wid wa wi a du, an wi api se wi a du tingz fi big op Jiizas Krais wi King uu a-go gi aal a uu a chos iina Jeuova nou uol iip a blesn.​—Mat. 25:34.