DI LESN FI STODI 8
“Wach Out! Wiek Op. Unu Fi Get Unu Main Redi Fi Akshan. Klier Unu Ed An Staat Tingk Chriet”
“Wach out! Wiek op. Unu fi get unu main redi fi akshan. Klier unu ed an staat tingk chriet.”—1 PII. 5:8.
SANG 144 Kip Yu Main Pan Paradais
DIS A WA WI A-GO LUK PANa
1. Wa Jiizas did tel im falara dem bout fi wi taim, an wa im did tel dem se dem fi du?
SOM diez bifuo Jiizas ded, fuor a im falara dem did aks im: “A wa kain-a sain a-go shuo se . . . di worl suun don?” (Mat. 24:3) Jiizas falara dem did riili waahn fi nuo a wen Jeruusilem an Gad ous wuda mash op. Bot Jiizas no onggl tel dem wen dat wuda apm, bot im tel dem bout di taim we wi a liv iina ya nou wen “di worl suun don.” Wen it kom aan tu fi wi taim, im tel dem se: “Nobadi no nuo di die ar di taim wen aal a dem sitn de a-go apm, no iivn di ienjel dem iina evn ar di Faada Bwai Pikni nuo, a onggl Faada Gad wan nuo dat.” Den im tel im falara dem se dem fi mek shuor se dem “kip gyaad” an “kip wach.”—Maak 13:32-37.
2. Wa mek di Kristiyan dem we did a liv iina Jeruusilem did afi kip wach?
2 Jiizas did tel im falara dem di sitn dem we dem did fi luk out fa fi nuo wen Gad ous an Jeruusilem wuda get mash op. Im tel dem se: “Wen taim unu si se suoja soroun Jeruusilem, unu fi nuo se dischrokshan de nier.” Wen dem si se a dis a gwaan, dem fi lisn tu wa Jiizas se an “ron go op iina di mountn dem.” (Luuk 21:20, 21) So di Kristiyan dem we did a liv iina Jeruusilem, ef dem neehn waahn fi ded dem wuda afi mek shuor se dem a kip wach. An wi si se wen di Ruoman suoja dem kom iin an mash op Jeruusilem, a onggl di wan dem we did a kip wach an du wa Jiizas se dem fi du neehn ded aaf.
3. Wa wi a-go luk pan iina da lesn ya?
3 Rait ya nou ya, wi a liv iina di laas die dem, so aal a wi fi kip wach an gwaan luk pan wiself so dat wi kyan tingk chriet. Iina da lesn ya, wi a-go luk pan ou aalduo wi a wach wa a gwaan iina di worl wi naa go a tek it aan pan wiself fi fain out wen di worl a-go don, an wi a-go luk pan wa kyan elp wi fi luk pan wiself an tingk chriet, an wi a-go a luk pan wa wi kyan du so dat wi no wies no taim.
AALDUO WI A WACH WA A GWAAN IINA DI WORL WI NAA GO A TEK IT AAN PAN WISELF FI FAIN OUT WEN DI WORL A-GO DON
4. Wa mek wi fi waahn fi si wa di sitn dem we a gwaan iina di worl ya nou av fi du wid wa di Baibl se wuda apm?
4 Ye man, notn no rang fi wi chrai fi si wa di sitn dem we a gwaan iina di worl ya nou av fi du wid di sitn dem we di Baibl se wuda apm iina fi wi taim kaa Jiizas did tel wi som sitn fi luk out fa fi nuo wen da worl ya suun don. (Mat. 24:3-14) Di apasl Piita did mek wi nuo se wi fi lisn tu wa di prafit dem se. An wen wi du dat an si ou wa dem se riili apm fi chuu, den it a-go du wi gud. (2 Pii. 1:19-21) Di fos set a wod dem we de iina di laas buk a di Baibl se: “Di sitn dem we rait dong iina da buk ya, a di sitn dem we Gad shuo Jiizas Krais. Gad shuo im dem sitn ya, so im kuda tel im sorvant dem bout di sitn dem we suun apm.” (Rev. 1:1) A das wai wi luk fi si wa di sitn dem we a gwaan iina di worl av fi du wid wa di Baibl se wuda apm, an dat a-go mek wi api fi taak bout dem sitn ya wid wi wan aneda.
Wen wi a taak bout di sitn dem we di Baibl se a-go apm, wa wi no fi du an wa wi fi du? (Luk iina paragraaf 5)b
5. Wa wi fi mek shuor se wi no du, an wa wi fi du? (Luk pan di picha dem tu.)
5 Wen wi a taak bout tingz we di Baibl se a-go apm, an wi si wa a gwaan iina di worl, wi no fi tek it op pan wiself fi se wa it miin kaa dat kyan mek di kanggrigieshan plit op plit op. Laik wi mait ier som ruula a som a di big konchri dem se dem a-go mek evribadi fiil sief an mek dem liv iina piis, so wi mait-a jomp an se ye, a dis 1 Tesaluoniyan 5:3 se wuda apm. Bot wa wi fi du a kip op wid di sitn dem we Jeuova aaganaizieshan a gi wi, an a dem sitn de wi fi taak bout. An wen wi du dat, wi a-go elp evribadi iina di kanggrigieshan fi “tingk di siem wie.”—1 Kor. 1:10; 4:6.
6. Wa wi kyan get fram wa 2 Piita 3:11-13 se?
6 Riid 2 Piita 3:11-13. Wa di apasl Piita se elp wi fi si ou wi fi tingk bout di sitn dem we di Baibl se wuda apm iina fi wi taim. Im mek wi nuo se wi fi a ‘luk faawod fi jojment die kom, an wi fi du wi bes fi tel wiself se it a-go kom kwik.’ Wi naa du dis kaa wi waahn fi nuo “di die an di taim” wen Aamagedan a-go kom, bot wi a du it kaa wi waahn fi yuuz di taim we wi av ‘fi liv wi laif fi Gad an liv wan kliin kliin laif.’ (Mat. 24:36; Luuk 12:40) Dat miin tu se wi fi du di sitn dem we Gad waahn wi fi du an wi a dwi’it kaa wi lov im. An fi wi du dat, wi afi wach di wie ou wi a liv wi laif.
WA IT MIIN FI WACH DI WIE OU WI A LIV WI LAIF?
7. Ef wi a wach di wie ou wi a liv wi laif, wa wi fi du? (Luuk 21:34)
7 Jiizas did mek im falara dem nuo se dem no fi onggl a wach wa a gwaan iina di worl bot dem fi wach wa dem a du tu. Wi si dis klier klier iina wa Jiizas did tel dem se iina Luuk 21:34. (Riid.) Im tel dem se dem fi: “Wach out.” Sumadi we a wach out a luk out fi eniting we a-go mek im an Jeuova no fren agen. An im a-go du wa im fi du so dat dat no apm. An a so wi a-go kyan tan iina Gad lov.—Pr. 22:3; Juud 20, 21.
8. Wa Paal did tel di breda an sista dem iina Efisos se?
8 Paal did tel di breda an sista dem iina Efisos se: “Wach ou unu liv. No gwaan laik unu a fuul. Ak laik se unu av sens.” (Ifii. 5:15, 16) Tingz a-go aalwiez a kom op we a-go mek it aad fi wi sorv Jeuova, so das wai wi fi aalwiez “fain out we di Laad riili waahn [wi] fi du” so dat wi kyan dwi’it.—Ifii. 5:17.
9. Ou wi kyan nuo wa Jeuova riili waahn wi fi du?
9 Di Baibl no tel wi evriting we kyan mek wi an Jeuova no fren agen. So fi nuo wa fi du wen wi fi mek op wi main bout wa an wa di Baibl no tel wi bout, wi afi yuuz wi main fi tingk bout ‘wa Jeuova riili waahn wi fi du’ so dat wi no du notn fi ort im. An fi mek shuor se wi no du notn fi ort im, wi afi mek shuor se wi gwaan du wi uona Baibl stodi an tingk aad aad bout wa wi riid. So di muor wi nuo wa Gad waahn wi fi du a so wi a-go “tingk laik ou Krais Jiizas tingk” an dat wi mek wi “ak laik [wi] av sens” aal wen di Baibl no tel wi wa an wa fi du. (1 Kor. 2:14-16) Som a di taim it mait-a iizi fi yu si di sitn dem we a-go mek yu an Jeuova no fren agen, bot som a di taim it mait no so iizi fi yu si dem.
10. Wa a som sitn we wi no fi du?
10 Som a di sitn dem we wi no fi du a jringk tu moch lika, an a spen wol iip a taim a nyam an a jringk, ar du tingz fi mek sumadi we wi no plan fi marid tu fiil se wi a luk dem, ar se tingz fi ort ada piipl, an wi no fi wach no bluu muuvi ar notn we av no uol iip a faitin an kilin iina it. (Sa. 101:3) Wi afi wach out kaaz Sietan, wi enimi, naa tap luk fi ou im kyan mek wi an Jeuova no fren agen. (1 Pii. 5:8) Ef wi no main shaap, Sietan kyan mek wi staat fi bad main ada piipl, ar mek wi no anis, ar mek wi waahnti-waahnti, ar ful a wiself, ar av op piipl iina wi aat. (Gya. 5:19-21) A no laik se wi wel waahn fi du dem sitn ya, bot ef wi no du sitn fi chrai an get rid a dem doti wiez ya, dem onggl a-go de de a get chrangga an chrangga, an wi nuo se wen dat apm tingz naa go wok out gud fi wi.—Jmz. 1:14, 15.
11. Wa a sitn we kyan kech wi we wi no fi mek kech wi, an wa mek?
11 Wan a di ting dem we kyan kech wi an wi nat iivn si se it a kech wi a bad kompni. Tingk bout dis: Yu a wok wid sumadi we a no wan Jeuova Witnis, an chuu yu waahn dem fi tingk gud bout di Jeuova Witnis dem, yu staat fi chriit dem gud an yu kain tu dem. So wan an tuu taim yu staat fi nyam yu lonch wid dem. An bifuo yu nuo it, yu staat fi iit wid dem evridie. An wan an tuu taim wen dem kom op wid dem seks aagiment yu chrai fi fain wan wie fi go roun it. Bot afta a wail, yu fain se it naa bada yu so moch agen. Den wan a di taim dem aks yu fi spen som taim wid dem afta wok an yu go. An iina no taim, yu a-go fain se yu staat fi gwaan laik dem. Ye, wi fi chriit piipl gud ino, bot memba se di piipl dem we wi spen nof taim wid, wi a-go komiin laka dem.(1 Kor. 15:33) Ef wi du laik wa Jiizas se an wach di wie ou wi a liv wi laif, wi wi mek shuor se di fren dem we wi kip a piipl we lov Jeuova an a du wa im waahn dem fi du. (2 Kor. 6:15) So wi a-go wach an si di sitn dem we kyan ort wi so dat wi no galang galang so til wi en op iina prablem.
NO WIES NO TAIM
12. Wen Jiizas falara dem did a wiet pan di worl fi don, wa dem did fi a du?
12 Jiizas falara dem neehn fi a wies no taim wen dem a wiet pan di worl fi don. Jiizas tel dem se dem fi go priich bout di gud nyuuz “iina Jeruusilem, Judiya, Samieriya an aal uova di worl.” (Aks 1:6-8) A wan big wok dis Jiizas did gi dem fi du ino. So dem did a wok aad so dat dem no wies no taim.
13. Wa mek wi fi mek shuor se wi naa wies wi taim? (Koloshan 4:5)
13 Riid Koloshan 4:5. Wi fi luk pan wiself fi si ef wi a wies taim kaa ‘tingz we wi no tingk wuda apm’ kyan apm tu wi. (Iik. 9:11) Wi kyan dis git op an ded so.
Wa wi fi du fi mek shuor se wi naa wies no taim? (Luk iina paragraaf 14-15)
14-15. Wa wi fi a du fi mek shuor se wi naa wies no taim? (Iibruu 6:11, 12) (Luk pan di picha tu.)
14 Wen wi du wa Jeuova waahn wi fi du an wi du evriting fi mek wi an im get kluosa an kluosa, a so wi nuo se wi naa wies no taim. (Jan 14:21) Wi fi ‘tan op chrang an no mek notn mek wi tap biliiv. Wi fi mek shuor se wi eva a du di Laad wok.’ (1 Kor. 15:58) Ef wi du dis, wi a-go api wid ou wi liv wi laif, aal ef wi ded bifuo da worl ya don.—Mat. 24:13; Ruo. 14:8.
15 Jiizas stil a mek im falara dem nuo ou dem fi du di priichin wok no mata wich paat iina di worl dem de. An im a yuuz Jeuova aaganaizieshan fi tiich wi ou fi du di priichin wok, an im a gi wi evriting we wi niid fi priich. (Mat. 28:18-20) Wi shuo se wi a du wa wi fi du wen wi wok aad an wi siiros bout di priichin wok we wi a du an wen wi a gwaan wach fi si ou Jeuova a-go don da worl ya. Wen wi du wa Iibruu 6:11, 12 se wi fi du, “[wi] wi en op get di sitn dem we [wi] a luk faawod tu; di sitn dem we Gad av fi [wi].”—Riid.
16. Wa wi mek op wi main fi du?
16 Jeuova set im taim aredi fi wen im a-go don dis a worl ya we Sietan a ron tingz iina. Bot somtaim it mait-a komiin tu wi laik da taim de a tek lang fi kom. Bot evriting we Jeuova mek rait dong iina im Wod bout wa a-go apm a-go apm fi chuu kaa Jeuova die naa go liet. (Aba. 2:3) So wi fi mek op wi main fi no “tap luk out fi Jeuova,” an wi “a-go wiet pan [wi] Gad di wie ou im waahn [wi] fi wiet pan im kaaz a im a-go siev [wi].”—Mai. 7:7.
SANG 139 Imajin Yuself Iina Paradais
a Iina da lesn ya, wi a-go luk pan ou aalduo wi a wach an si wa a gwaan iina di worl, wi kyan gwaan luk pan wiself an tingk chriet, an wi a-go si wa wi fi a du so dat wi naa wies wi taim.
b DIS A WA DI PICHA A SHUO WI: (Fos set a picha) Wan man an im waif a wach nyuuz. An wen dem go a miitn, dem staat fi tel ada piipl bout wa dem fiil se it av fi du wid wi. (Sekan set a picha) Wan man an im waif a wach wan ripuot fram di Govanin Badi fi si wa di sitn dem we a gwaan iina di worl ya nou av fi du wid di sitn dem we di Baibl se wuda apm. Dem a gi out som pamplet an ada tingz we dem get fram di waiz sorvant.