A Ou Jeuova A Ansa Wi Wen Wi Prie?

1-2. Wa a som tingz wi mait-a wanda bout wen it kom aan tu wi prieya dem?

YU EVA wanda somtaim ef Jeuova riili a ansa yu wen yu prie? Ef a so yu fiil a no yu wan fiil so. Wol iip a ada breda an sista we a sorv Jeuova fiil so tu, wos wen dem a go chuu som rof taim. So ef yu a go chuu wan rof taim nou yu mait-a fain it aad fi biliiv se Jeuova a ansa yu wen yu prie tu im.

² Wi a-go luk pan wa mek wi nuo se Jeuova a ansa di prieya dem a di piipl dem we a sorv im. (1 Jan 5:15) An wi a-go luk pan wa mek it mait-a luk laik Jeuova naa ansa wi prieya dem somtaim. Wi a-go fain out ou wi nuo se Jeuova a ansa wi prieya dem.

JEUOVA MAIT NO ANSA WI PRIEYA DEM DI WIE OU WI TINGK IM FI ANSA DEM

3. Wa mek Jeuova waahn wi fi prie tu im?

³ Di Baibl mek wi nuo se Jeuova lov wi bad bad an se wi wot nof tu im tu. (Agai 2:7; 1 Jan 4:10) An a dat mek im tel wi se wi fi prie tu im an aks im fi elp wi. (1 Pii. 5:6, 7) Im waahn wi an im fi bi fren an im waahn fi elp wi fi diil wid wi prablem dem.

4. Ou wi nuo se Jeuova ansa di prieya dem a di wan dem we a worship im? (Luk pan di picha tu.)

⁴ Wen wi riid di Baibl, wi si ou Jeuova ansa di prieya dem a di piipl dem we sorv im. Laik wan king we did niem Dievid, im did av uol iip a enimi we did a chrai fi kil im, an im aalwiez prie tu Jeuova fi elp im. Wan a di taim dem im beg Jeuova se: “Jeuova, mi a beg yu fi ier mi wen mi prie, an wen mi beg yu fi elp mi, du lisn tu mi. Ansa mi, kaa yu aalwiez du wa yu se yu a-go du an yu aalwiez du wa rait.” (Sa. 143:1) Jeuova ansa Dievid wen im prie tu im an im siev im. (1 Sam. 19:10, 18-20; 2 Sam. 5:17-25) Dievid kuda se: “Jeuova de nier tu aal a di wan dem we a beg im fi elp dem.” A siem so Jeuova a-go elp wi tu.​—Sa. 145:18.

5. Wen di piipl dem we did liv iina Baibl taim prie tu Jeuova, yu tingk im aalwiez ansa dem laik ou dem tingk se im wuda ansa dem? Tel wi bout wan a dem. (Luk pan di picha tu.)

⁵ Wen wi prie tu Jeuova, im mait-a no ansa wi di wie ou wi tingk im fi ansa wi. An wi si dat wid di apasl Paal. Im did aks Jeuova fi muuv sitn we a bada im we “komiin laik maka iina [im] said.” A bout chrii taim im aks Jeuova fi dwi’it. Wi si se Jeuova did ansa im bot a no di wie ou im did tingk Jeuova wuda ansa im Im ansa im, kaa Jeuova neva muuv di sitn we a bada im outa im laif, wa Im du a gi im di chrent we im niid fi gwaan worship Im di rait wie.​—2 Kor. 12:7-10.

6. Wa mek som a di taim it mait-a luk laik se Jeuova naa ansa wi prieya dem?

⁶ A siem so som a di taim Jeuova mait-a ansa wi prieya dem iina wan wie we wi no tingk im wuda ansa it. An wi nuo se Jeuova nuo wa a di bes ting fi wi. Im kyan “du nof nof muor dan wa wi kyan tingk bout an nof muo dan wa wi kyan aks im fa.” (Ifii. 3:20) An kaaz a dat, di wie ou im ansa wi mait-a bi difrant fram di wie ou wi tingk im wuda ansa wi, an im a-go ansa wi di bes taim.

7. Wa mek wi mait-a afi chienj wa wi a prie fa? Tel wi wa Breda Poetzinger did afi du.

⁷ Wen wi get fi si wa Jeuova riili waahn fi apm, wi mait-a afi prie fi sitn els. Luk pan wa did apm tu Martin Poetzinger. Likl afta im marid, dem put im iina wan Natsi prizn kyamp. Fi di fos, im did a prie tu Jeuova fi mek im kom outa prizn so dat im kuda go tek kier a im waif an gwaan du di priichin wok. Bot afta tuu wiik paas an im si se im stil de de, im staat fi prie tu Jeuova an se: “Jeuova, mek mi si wa yu waahn mi fi du.” An den im staat fi tingk bout di ada breda dem we did de de tu, an im si se nof a dem a fret bout fi dem uona waif an pikni tu. Den Breda Poetzinger prie tu Jeuova an se: “Jeuova, tangk yu fi da nyuu wok ya we yu gi mi fi du. Elp mi fi du sopm fi mek di breda dem fiil chrang laik dem kyan go aan.” An a dat im spen di neks nain ier a im laif a du.

8. Wa a wan sitn wi fi memba wen wi a prie?

⁸ Wi fi memba se Jeuova set im taim aredi fi du wa im se im a-go du. An wan a di sitn dem we im a-go du a get rid a aal a di prablem dem we wi av ya nou. Laik, im a-go get rid a orikien an ortkwiek an dem ting de, an im a-go mek shuor se nobadi no sik ar ded agen. Jeuova a-go yuuz im Kindom fi get rid a aal a dem sopm ya. (Dan. 2:44; Rev. 21:3, 4) Bot rait ya nou Jeuova a lou Sietan fi ruul da worl ya.b (Jan 12:31; Rev. 12:9) Ef Jeuova fi get rid a wi prablem dem ya nou, it a-go komiin laik se Sietan nuo ou fi ron tingz ya nou ya. So aalduo wi a wiet pan Jeuova ya nou ya, it no miin tu se im naa du notn fi elp wi. Mek wi luk pan som a di wie dem ou Jeuova a elp wi rait ya nou.

SOM A DI WIE DEM JEUOVA ANSA WI PRIEYA DEM

9. Wen wi afi mek op wi main bout wa fi du, ou Jeuova elp wi?

⁹ Im mek wi waiz. Jeuova tel wi se im a-go mek wi waiz so dat wi kyan nuo di bes ting fi du. An wen it kom aan tu tingz we av fi du wid wi laif, laik ef wi fi go marid ar wi naa go marid, dem taim de wi riili niid Jeuova fi elp wi. (Jmz. 1:5) Luk pan wa did apm tu wan sista we niem Maria we neehn marid.c Shi did api a du ar paiyanier wok, an den shi an wan breda ton fren. Shi se: “Wi get kluosa an kluosa, an den wi staat fi av fiilinz fi wi wan aneda. Mi prie tu Jeuova aad bout it kaa mi nuo se im wuda elp mi fi nuo wa fi du.” An shi fiil laik se Jeuova did mek ar nuo wa fi du. Bot a ou Jeuova did mek ar nuo wa fi du? Shi did fain som tingz iina wi buk an pamplet dem we did ansa som a di kwestiyan dem we shi did av, an shi lisn tu wa ar mada di av fi se tu. A so Jeuova did mek ar nuo wa fi du, an so shi kuda du di rait ting.

10. Azkaadn tu 2 Korintiyan 4:7, wa Jeuova a du fi elp di piipl dem we a worship im? Tel wi ou Jeuova did elp Benjamin. (Luk pan di picha tu.)

¹⁰ Im gi wi di chrent fi eng aan. An a di siem ting im did du fi di apasl Paal. (Riid 2 Korintiyan 4:7.) Luk pan ou Jeuova elp da breda ya we niem Benjamin fi go chuu im prablem dem. Wen im did a likl bwai, im an im fambili did liv iina Afrika iina wan kyamp wich paat piipl we ron we fram dem konchri liv kaaz a waar an ada tingz we a gwaan de. Benjamin se: “Mi no tap prie tu Jeuova an aks im fi gi mi di chrent fi du wa im waahn mi fi du. An Jeuova ansa mi prieya dem. Im mek mi av piis iina mi aat an main, an mek mi no fried fi priich, an im gi mi di buk an pamplet dem we elp mi fi tan op chrang iina wa mi biliiv iina.” An Benjamin se tu se: “Wen mi riid bout wa ada Jeuova Witnis go chuu an mi si ou Jeuova elp dem fi tan op chrang an go chuu, it mek mi si se ye, mi fi du wa Jeuova waahn mi fi du no mata wa.”

11-12. Ou Jeuova mait-a yuuz wi breda an wi sista dem fi ansa wi prieya dem? (Luk pan di picha tu.)

¹¹ Jeuova yuuz di breda an sista dem fi elp wi. Di nait bifuo Jiizas gi op im laif fi wi, im prie aad aad. Im beg Jeuova no fi mek im ded iina wan wie we mek piipl fiil laik se im naa no rispek fi Gad. Bot wa Jeuova du, a sen wan ienjel fi go elp Jiizas an mek im chrang. (Luuk 22:42, 43) A siem so Jeuova mait-a mek wan a di breda ar sista dem kaal wi ar kom luk fi wi an elp wi fi tan op chrang. Aal a wi kyan se ar du sitn fi mek wi breda an sista dem fiil beta.​—Pr. 12:25.

¹² Luk pan wa did gwaan wid wan sista we niem Miriyam. Kopl wiik afta ar ozban ded, shi wan did de a ar yaad an shi staat fi fiil sad an laik se shi naa nobadi an laik se shi kyaahn go aan no muor. So shi did a baal nof an shi did waahn fi taak tu sumadi. Shi se: “Iivn duo mi did waahn taak tu sumadi, mi neva av di chrent fi kaal nobadi, so mi prie tu Jeuova. Wen mi de de a baal an a prie, mi fuon staat fi ring. Wan a mi gud fren we a elda kaal mi.” Di elda an im waif osh Miriyam an mek ar fiil beta, so shi nuo se a Jeuova did mek im kaal ar.

13. Tel wi bout sitn we did apm we mek wi nuo se Jeuova kyan yuuz piipl we naa worship im fi ansa wi prieya dem.

¹³ Jeuova kyan yuuz piipl we naa worship im fi elp wi. (Pr. 21:1) Som a di taim, Jeuova yuuz piipl we naa worship im fi ansa wi prieya dem. Laik wen Niimaiya did waahn fi go bak a Jeruusilem go elp fi bil op bak di siti, Jeuova did mek Aatazorksiiz lou Niimaiya fi du dat. (Nii. 2:3-6) A siem so Jeuova kyan yuuz piipl we naa worship im fi elp wi.

14. Wa yu laik bout wa did apm tu Soo Hing? (Luk pan di picha tu.)

¹⁴ Wan sista we niem Soo Hing fiil se Jeuova yuuz ar dakta fi elp ar. Shi av wan bwai pikni we did sik bad bad iina im ed. An den im did de iina wan bad aksident, so shi an ar ozban did afi lef dem wok fi tek kier a im. Kaaz a dis, dem did av nof moni prablem. Shi se shi did fiil laik wan roba ban we chrech out an kyaahn go no muor. So shi prie tu Jeuova aad aad an aks im fi elp dem. Di dakta si wa did a gwaan wid dem an im staat fi elp dem. So im mek dem get elp fram di govament an wan ous we dem kuda did pie di rent. Afta dat Soo Hing se: “Wi si ou Jeuova elp wi. Im a ‘di Wan we ier wi wen wi prie.’”​—Sa. 65:2.

YU AFI CHOS JEUOVA AN LUK TU IM FI ELP YU, AN DEN TEK DI ELP WE IM GI YU

15. Wa did elp wan sista fi si se Jeuova a ansa ar prieya dem?

¹⁵ A no laik se muor taim wen Jeuova a ansa wi prieya a notn big im du fi mek wi si se im a ansa wi. Bot di wie ou im ansa wi a-go mek wi kyan sorv im di rait wie. So jos chrai an si di likl wie dem ou Jeuova a ansa yu wen yu prie. Wan sista we niem Yoko did fiil laik se Jeuova naa ansa ar prieya dem. Bot wen shi staat fi rait dong di sitn dem we shi aks Jeuova fa an den afta dat shi luk pan di sitn dem we shi aks im fa, shi get fi si se Jeuova did a ansa ar prieya dem, aal som sitn we shi neehn memba se shi prie bout. So a di siem ting wi niid fi du, wi fi luk an chrai an si ou Jeuova a ansa wi prieya dem.​—Sa. 66:19, 20.

16. Wen wi prie, ou wi kyan shuo se wi chos iina Gad? (Iibruu 11:6)

¹⁶ Wi shuo Jeuova se wi chos iina im wen wi prie tu im an tek di elp we im gi wi. (Riid Iibruu 11:6.) Tingk bout wa did gwaan wid Mike an im waif Chrissy, dem did waahn fi go a Betel. Mike se: “A uol iip a ier nou wi sain op fi go a Betel an a uol iip a taim wi prie tu Jeuova bout it bot wi neva get fi go.” Mike an Chrissy did nuo fi shuor se iivn duo dem neva get fi go a Betel, Jeuova nuo di bes wie fi yuuz dem. So dem gwaan yuuz muos a dem taim fi gwaan du Jeuova wok, laik fi regila paiyanier wich paat dem niid muor elp fi du di priichin wok an fi bil Kindom Aal an dem ting de. Nou dem de iina di sorkit wok. Mike se: “Jeuova no aalwiez ansa wi wen wi prie di wie ou wi waahn im fi ansa wi, bot dat no miin se im naa ansa wi prieya dem. Di wie ou im ansa dem beta dan ou wi kuda iivn tingk.”

17-18. Azkaadn tu Saam 86:6, 7, a wa wi nuo se Jeuova a-go du?

¹⁷ Riid Saam 86:6, 7. Jeuova ier wi wen wi prie tu im an im ansa wi tu. Dievid did shuor bout dat an wi kyan shuor bout dat tu. Di piipl dem we wi luk pan an si wa did apm tu dem iina da lesn ya, mek wi si se Jeuova kyan mek wi waiz an im kyan gi wi di powa we wi niid fi eng aan an no gi op. Im mait yuuz wi breda an sista dem fi elp wi an im mait aal yuuz piipl we naa worship im fi elp wi tu.

¹⁸ A no aal di taim Jeuova a-go ansa wi wen wi prie di wie ou wi tingk im wuda ansa wi. Bot wi nuo se im a-go ansa wi. An im a-go gi wi wa wi niid di taim wen wi fi get it. So no tap prie tu im, an jos nuo se im a-go “gi evriting we a liv wa dem waahn” iina di nyuu worl.​—Sa. 145:16.