Wa Wi Fi Du So Dat Wi Kyan Gwaan Lov Wi Wan Aneda?

1-2. (a) Wa mek di apasl Paal kuda se lov a “di muos impuotant” wiez we wi fi av? (b) Wa a di kwestiyan dem we wi a-go get di ansa fa iina da lesn ya?

WEN di apasl Paal a taak bout ou fi chos iina Gad, an se wi fi gwaan biliiv se Gad a-go gi wi di sitn dem we im se im a-go gi wi, an se wi fi lov wi wan aneda, im se “outa aal a dem di muos impuotant wan a lov.” (1 Kor. 13:13) Paal did se dis kaa wen wi a liv iina di nyuu worl, wi naa go niid fi biliiv se Jeuova a-go gi wi aal a di sitn dem we im pramis se im a-go gi wi kaa wi wuda don get dem aredi. Bot wi stil afi go mek shuor se wi lov Jeuova an piipl tu. An wi afi go gwaan lov dem muor an muor.

² Sins wi afi go aalwiez lov Jeuova an wi wan aneda, mek wi luk pan dem chrii kwestiyan ya we wi a-go get di ansa fa. Di fos wan a: Wa mek wi fi lov wi wan aneda? Di sekan wan a: Wa wi kyan du fi shuo se wi lov wi wan aneda? An di tord wan a: Wa wi kyan gwaan du fi mek shuor se wi no tap lov wi wan aneda?

WA MEK WI FI LOV WI WAN ANEDA?

3. Wa a som riizn wa mek wi fi lov wi wan aneda?

³ A wan big ting se wi lov wi wan aneda, kaaz a so piipl a-go nuo se wi riili a fala Jiizas. Kaa Jiizas did tel im falara dem se: “Wen unu lov unu wan aneda, a so piipl gweehn nuo se unu a fi mi falara.” (Jan 13:35) An wan neda ting a das wen wi lov wi wan aneda it a-go mek wi wok tugeda az wan. A dat Paal did a se wen im se ‘a lov bring di uol a di gud wiez dem we wi fi av tugeda laik se dem a wan sitn.’ (Kol. 3:14) An wa di apasl Jan did tel di Kristiyan dem se a wan neda big riizn wa mek wi fi lov wi wan aneda wen im se: “Enibadi we lov [Gad] mos lov dem breda an sista tu.” (1 Jan 4:21) So wen wi du tingz fi mek wi wan aneda si se wi lov wi wan aneda, wi a shuo se wi lov Gad tu.

4-5. Tel wi wa di lov we wi av fi Jeuova an di lov we wi av fi wi wan aneda komiin laik.

⁴ Wa mek wi se di lov we wi av fi Gad av sitn fi du wid di lov we wi av fi wi breda an sista dem? It wuda komiin laik wa wi aat av fi du wid di ada paat dem iina wi badi. Laik wen wan dakta uol aan pan wi an an a chrai fi fiil wi pols fi si ef it wiik ar it chrang. Bies pan wa im fiil it mait-a tel im bout wa a gwaan wid wi aat. Bot a wa aal a dis av fi du wid lov?

⁵ Jos laik ou wan dakta kyan nuo wa a gwaan wid wi aat wen dem chek wi pols, a siem so wi kyan nuo umoch wi lov Gad bies pan umoch wi lov wi breda an sista dem. So ef wi fain se wi no lov wi breda an sista dem so moch agen, dis mait-a shuo se wi no riili lov Gad so moch agen tu. Bot wen wi aalwiez a du tingz fi mek wi breda an sista dem si se wi lov dem, dis shuo se wi lov Gad nof tu.

6. Wa mek a wan siiros sitn ef wi fain se wi no lov wi breda an sista dem so moch agen? (1 Jan 4:7-9, 11)

⁶ Ef wi fain se wi no lov wi breda an sista dem so moch agen, dat miin tu se sitn rang wid di wie ou wi a sorv Jeuova. Di apasl Jan mek wi nuo dis wen im tel wi se: “Sumadi kyaahn lov Gad we dem kyaahn si, an no lov dem breda an sista we dem kyan si.” (1 Jan 4:20) So dis mek wi nuo se Jeuova a-go api wid wi onggl ef wi “lov wan aneda.”​—Riid 1 Jan 4:7-9, 11.

WA WI KYAN DU FI SHUO SE WI LOV WI WAN ANEDA?

7-8. Wa a som sitn we wi kyan du fi mek wi breda an sista dem si se wi lov dem?

⁷ A wol iip a taim di Baibl se “lov unu wan aneda.” (Jan 15:12, 17; Ruo. 13:8; 1 Tes. 4:9; 1 Pii. 1:22; 1 Jan 4:11) Bot lov a sitn we kom fram outa wi aat an nobadi kyaahn si wa iina wi aat. So wa a-go mek piipl si se wi lov dem a di ting dem we wi du an di ting dem we wi se.

⁸ A wol iip a tingz wi kyan du fi mek wi breda an sista dem si se wi lov dem. Laik wi fi aalwiez “taak chuut tu [wi] wan aneda.” (Zak. 8:16) An wi fi “liv iina piis wid wan aneda.” (Maak 9:50) Wi “fi aalwiez put [wi] breda an sista bifuo [wiself].” (Ruo. 12:10) An wi fi “tek [wi] wan aneda siem laik ou Krais Jiizas did tek [wi].” (Ruo. 15:7) “No mata wa apm . . . paadn unu wan aneda no mata wa dem du.” (Kol. 3:13) “Wen sumadi av prablem [wi] fi elp dem. [Wi] fi elp [wi] wan aneda.” (Gya. 6:2) An wi fi taak tingz we a-go “elp [wi] wan aneda, so [wi] aat wi no evi dong.” (1 Tes. 4:18) An wi fi “gwaan bil op [wi] wan aneda.” (1 Tes. 5:11) “Prie fi wan aneda.”​—Jmz. 5:16.

9. Wa mek wen wi taak tingz fi elp sumadi a wan big ting wi du fi mek dem si se wi lov dem? (Luk pan di picha tu.)

⁹ Wan a di ting dem we di paragraaf bifuo se wi kyan du fi shuo ada piipl se wi lov dem, a wa Paal did se wen im se: wi fi gwaan taak tingz we a-go “elp [wi] wan aneda, so [wi] aat wi no evi dong.” So wen wi taak tingz we a-go elp wi breda an sista dem wen dem a go chuu dem prablem dem, wi a elp dem fi gwaan sorv Jeuova an no tap. So evritaim wi mek dem kom tu wi kom baal pan wi, wi a mek dem si se wi lov dem.​—2 Kor. 7:6, 7, 13.

10. Wen wi fiil it fi sumadi an wen wi taak tingz fi mek dem fiil beta, wa dem tuu sitn ya av fi du wid dem wan aneda?

¹⁰ Wa dem sitn tuu ya av fi du wid dem wan aneda​—wen wi fiil it fi sumadi an wen wi taak tingz fi mek dem fiil beta? Wel sumadi we fiil it fi sumadi a-go chrai fi taak tu dem so dat dem fiil beta. An a dat Paal did se bout Jeuova tu. Im se, “Im a di Faada we gud an kain tu evribadi. Im a di Gad we elp piipl wen dem niid it an we osh dem wen dem sad.” (2 Kor. 1:3) So Paal did a se Jeuova a di Faada we gud an kain tu evribadi we fiil it fi wi wen wi a go chuu wi prablem dem. So a dat mek Jeuova elp wi “wen wi a go chuu aal kain-a . . . sofarieshan.” (2 Kor. 1:4) So jos laik ou yu kyan get kliin waata fram wan spring ed we mek yu fiil gud wen yu chuot jrai an yu jringk it, a siem so it a-go mek wi fiil gud wen Jeuova osh wi wen wi a go chuu sofarieshan. So ou wi kyan du laik Jeuova an mek piipl si se wi fiil it fi dem an se wi waahn fi mek dem fiil beta? Wi kyan du dis wen wi chrai fi av som gud wiez we a-go elp wi fi fiil it fi piipl an we a-go elp wi fi elp dem fi fiil beta. So wa a som a dem gud wiez ya we wi fi av so dat wi kyan nuo ou fi elp piipl?

11. Azkaadn tu Koloshan 3:12 an 1 Piita 3:8, wa a som ada tingz we wi kyan du we a-go push wi fi shuo wi breda an sista dem se wi lov dem an gwaan taak tingz we a-go elp dem fi fiil beta?

¹¹ Wa kyan elp wi evridie fi no tap lov wi wan aneda so dat wi kyan gwaan taak tingz we a-go “elp [wi] wan aneda, so [wi] aat wi no evi dong”? Wa kyan elp wi a wen wi lov wi wan aneda laik ou breda an sista lov dem wan aneda, an wen wi fi kip wi wan aneda neks tu wi aat an du tingz fi shuo umoch wi kier bout wi wan aneda. (Riid Koloshan 3:12; 1 Piita 3:8.) Wen wi av dem gud wiez ya, dem a-go push wi fi elp di wan dem we a go chuu sofarieshan. Kaa jos laik wa Jiizas se, “Wa kom outa yu mout, a wa de iina yu aat. Di gud man du gud sitn siek-a di gud we stuor op iina im aat.” (Mat. 12:34, 35) So wi si se wen wi taak tu wi breda an sista dem an mek dem fiil beta, dis a wan big ting we wi du fi mek dem si se wi lov dem.

WA WI KYAN GWAAN DU FI MEK SHUOR SE WI NO TAP LOV WI WAN ANEDA?

12. (a) Ef wi no main shaap, wa kyan apm tu wi? (b) Wa wi a-go luk pan ya nou?

¹² Aal a wi waahn fi gwaan ‘lov wi wan aneda.’ (1 Jan 4:7) Bot memba se Jiizas se: “Muos piipl aat a-go ton kuol an dem naa bada lov piipl laik wan taim.” (Mat. 24:12) Jiizas neva did a se dis a-go apm nof mongks im falara dem, bot kaa wi liv iina da worl ya sitn laka dat kyan apm tu wi tu. So wi a-go luk pan ou wi kyan nuo ef wi riili lov di breda an sista dem.

13. Wa mait-a apm we a-go mek wi si ef wi riili lov wi breda an sista dem?

¹³ Bies pan ou wi diil wid tingz we kom op iina wi laif, wi kyan nuo ef wi riili lov wi breda an sista dem. (2 Kor. 8:8) Sitn we mait-a apm a wa di apasl Piita did taak bout. Im se: “An muo dan notn els unu fi riili lov unu wan aneda aal di taim an wid aal a unu aat. Kaa lov kova op sin, no mata ou it mait-a uol iip.” (1 Pii. 4:8) Wen wi si som a di likl wiez dem we wi breda an sista dem av an wi si se dem no porfek, di wie ou wi diil wid dem kyan mek wi si ef wi riili lov dem.

14. Azkaadn tu 1 Piita 4:8, a ou wi fi lov wi breda an sista dem? Tel wi wa it komiin laik.

¹⁴ Mek wi luk pan wa Piita riili did a se. Iina di fos paat a vors 8 im se: “[Wi] fi riili lov [wi] wan aneda aal di taim an wid aal a [wi] aat.” An di sekan paat a di vors tel wi se wen wi av da kain-a lov de it a-go mek wi kova op di likl sitn dem we wi breda an sista dem mait-a du. Tingk bout wan tiebl we maak op maak op, an sumadi yuuz wan tiebl klaat fi kova it op. A siem so wen wi lov wi breda an sista dem wid aal a wi aat wi a-go yuuz dat fi kova op di likl sitn dem we dem du, no mata ou dem wol iip.

15. Wa wi a-go kyan du ef wi riili lov wi breda an sista dem? (Koloshan 3:13)

¹⁵ Ef wi riili lov wi breda an sista dem wi a-go redi fi paadn dem aal wen dem du som likl sitn we bon wi. Dis mait no so iizi fi wi du. (Riid Koloshan 3:13.) So wen wi fain se wi a paadn piipl dis a shuo se wi a du wa Jeuova waahn wi fi du. So wa a som ada sitn we wi kyan du fi elp wi fi paadn wi breda an sista dem wen dem du som likl sitn we mek wi fiil laik se wi kyaahn bada wid dem no muor?

16-17. Wa els kyan elp wi fi no memba di likl sitn dem we wi breda an sista dem du, an wa yu wuda se it komiin laik? (Luk pan di picha tu.)

¹⁶ Tingk bout di gud wiez dem we yu breda an sista dem av, no tingk tu moch bout di bad wiez dem we dem av. Luk pan it da wie ya: Se yu de a wan paati wid yu breda an sista dem, an wen it don unu se unu a-go tek wan picha. Matarafak, yu tek tuu muor picha in kies di fos wan no luk gud. So yu av chrii picha ya nou. Bot iina wan a dem yu si se wan a di breda mek op im fies. Yu a-go get rid a da wan de, no chuu? Kaa yu av tuu muor picha we evribadi a sumail an luk gud iina it.

¹⁷ Mek wi se dem picha de komiin laik di tingz dem we wi memba bout wi breda an sista dem. Se wan a di taim wi breda ar wi sista du sitn ar se sitn we bon wi. Jos laik ou wi wuda get rid a di picha we no luk gud, a siem so wi fi chrai an no memba di bad sitn dem we dem se ar du. (Pr. 19:11; Ifii. 4:32) An wi kyan du dat kaa wi av nof gud sitn we wi kyan memba bout dem. So a di gud ting dem we wi breda an sista dem du wi fi chrai an memba bout dem.

WA MEK WI FI RIILI LOV WI WAN ANEDA IINA DEM TAIM YA

18. Wa a di mien ting dem we wi lorn bout lov iina da lesn ya?

¹⁸ So jos laik wa wi did luk pan, wi waahn fi mek shuor se wi gwaan lov wi breda an sista dem. Kaa di wie ou wi lov wi breda an sista dem shuo umoch wi lov Jeuova. So wan ting wi kyan du fi mek wi breda an sista dem si se wi lov dem a fi taak tu dem iina wan wie we mek dem fiil beta. So ef wi riili fiil it fi wi breda an sista dem, wi a-go gwaan taak tingz we a-go ‘elp wi wan aneda, so wi aat wi no evi dong.’ So wa kyan elp wi fi gwaan lov wi breda an sista dem a wen wi du aal a wa wi kyan du fi paadn dem wen dem du di likl sitn dem we bon wi.

19. Wa mek wi fi a du tingz fi shuo se wi lov wi wan aneda iina dem taim ya?

¹⁹ Piita mek wi si wa mek wi fi riili lov wi wan aneda iina dem taim ya wen im se: “Di taim wen aal a dis a-go don suun kom. So . . . unu fi riili lov unu wan aneda aal di taim an wid aal a unu aat.” (1 Pii. 4:7, 8) Kaa da wikid worl ya suun don, wi fi luk out fi di sitn dem we Jiizas did tel im falara dem se wuda apm iina dem taim ya. Im se: “Kaa unu a fala mi, piipl fram aal bout a-go iet unu.” (Mat. 24:9) So di onggl wie wi kyan go chuu da taim ya a ef wi wok tugeda az wan. So Sietan naa go get fi plit plit wi op, kaaz a lov a bring di uol a wi gud wiez dem tugeda “laik se dem a onggl wan sitn.”​—Kol. 3:14; Fil. 2:1, 2.