“Sumadi Aalwiez Di De Fi Mi”

DI TING DEM WE MI MADA AN FAADA YUUS TU DU

Mi mada an faada did a kyatalik, bot wen dem fain out se Gad niem Jeuova di tuu a dem ton Jeuova Witnis. Mi faada tap mek di stachu dem we luk laik Jiizas we piipl yuus tu worship, so insted-a fi yuuz im skil fi du dat im yuuz it fi ton di dongstiez paat a wi ous iina wan Kindom Aal iina San Wan Del Mante, wan plies iina Manila we a di kyapital fi di Filipiinz.

Afta mi baan iina 1952, mi mada an faada gwaan tiich mi di ting dem bout Jeuova jos laik wa dem did a tiich mi fuor big breda dem an mi chrii big sista dem. An di biga mi get mi faada wuda tel mi fi riid wan chapta iina di Baibl evridie an im wuda yuuz nof a di buk an pamplet dem fi stodi wid mi. An dem wuda invait di sorkit uovasiya an ada breda an sista we wok a di branch afis fi kom a wi yaad kom stie wid wi. An wi yuus tu lov wen dem kom stie wid wi kaa dem wuda tel wi bout som a di ting dem we dem go chuu, an it wuda push wi fi mek wa Jeuova waahn bi di big ting iina wi laif.

Mi mada an faada elp mi fi si ou fi sorv Jeuova di rait wie. Afta mi mada get sik an ded, mi an mi faada staat paiyanier iina 1971. Bot mi faada ded iina 1973 wen mi did a jos 20. Kaa mi mada an faada ded, dat did mek mi fiil laik mi na’av nobadi. Bot mi did nuo fi shuor se di sitn dem we di Baibl se wuda apm a-go apm, so it wuda elp mi tan op chrang, an it wuda elp mi fi kip kaam beta dan eniting mi kuda tek. (Iib. 6:19) An so likl bit afta mi faada ded mi get fi ton wan speshal paiyanier pan wan ailan we likl bit a piipl liv pan we niem Kuoran iina wan plies iina Palawan.

MI NEEHN AV NOBADI WID MI WEN MI DID A GO CHUU SOM ROF TAIM

Mi did a 21 wen mi go a Kuoran. Mi did fraitn wen mi si se dem aadli av no lait ar waata a ron iina di paip ar no kyaar an dem ting de. A likl bit a breda did di de so mi neehn av nobadi fi wok wid mi iina sorvis nof a di taim, so a mi aluon did en op a priich nof a di taim. Fi di fos mont mi did mis mi fambili an fren dem bad. Iina di nait dem mi wuda luk op iina di skai an luk pan di staar dem an jos baal. Mi did fiil laik se mi fi jos tap wa mi a du an go baka mi yaad.

Dem taim de wen mi did fiil laik mi neehn av nobadi, mi wuda prie tu Jeuova an tel im evriting we a gwaan wid mi. Som a di taim mi wuda memba tingz we mi riid iina di Baibl an iina wi buk an pamplet dem laik wa Saam 19:14 se. Wen mi get fi tingk bout di ting dem we Jeuova waahn mi fi du an di ting dem we im du an im wiez dem, mi get fi si se im komiin laik wan rak we wuda aalwiez di de fi mi. Wan Wachtowa lesn we did niem “You Are Never Alone”a did elp mi tu. An mi riid it uova an uova. Iina wan wie it wuda komiin laik se a mi an Jeuova wan did di de dem taim de an dat mek mi kuda prie tu im, an du mi uona Baibl stodi, an tingk bout di ting dem we mi a lorn.

Likl afta mi riich a Kuoran, dem mek mi ton wan elda an mi a did di onggl elda we di de. A mi did afi du aal a di miitn dem iina di wiik an pan di wiiken. An a mi did afi gi di taak evri wiik tu. Wan ting mi nuo fi shuor a se mi neehn av no taim fi fiil laik se a mi wan did di de!

Di priichin wok did a gwaan gud wen mi de iina Kuoran. Som a uu mi did a stodi di Baibl wid en op get baptaiz. Bot mi did av som rof taim duo. Som a di taim mi did afi waak aaf die fi riich a som plies fi go priich, an wen mi go mi nat iivn did nuo we mi a-go sliip. Mi did afi priich pan nof ada likl ailan an a injin buot mi did afi yuuz fi riich dem. An som a di taim sii did rof, an a no laik se mi did nuo ou fi swim ino. Bot wid aal a dat, mi kuda si se Jeuova did a kip mi sief. An yu nuo se a afta dat mi did si se Jeuova did a elp mi fi get redi fi som muor wok we mi wuda tek aan an fi som ada prablem we wuda kom wen mi lef de-so.

PAPUWA NYUU GINI

Iina 1978 dem sen mi go a Papuwa Nyuu Gini, an a wol iip a mountn di de. Mi did shak fi fain out se di plies jos av bout chrii miliyan piipl an di piipl dem chat uova 800 difrant difrant langwij. Di gud ting duo a dat nof a di piipl dem we liv de chat Melaniisiyan Pijin we dem kaal Tak Pisin.

Dem did sen mi go wok likl bit iina wan Ingglish kanggrigieshan iina di kyapital we niem Puot Maabzbi. Bot den afta dat, mi muuv go a wan Tak Pisin kanggrigieshan an staat du som lesn iina di langwij. Mi yuuz di sitn dem we mi lorn iina klaas fi priich tu piipl, an dis did elp mi fi lorn di langwij kwik kwik. So likl afta dat mi staat fi gi taak pan di wiiken iina di Tak Pisin langwij. Mi did fraitn fi nuo se it neehn kech wan ier yet afta mi go a Papuwa Nyuu Gini bifuo dem mek mi ton wan sorkit uovasiya iina di Tak Pisin langwij we av wol iip a kanggrigieshan an dem spred out iina wan big ieriya.

Kaa di kanggrigieshan dem neehn de nier dem wan aneda mi did afi chravl aal uova di plies an plan difrant difrant sorkit miitn an dem ting de. Wen mi did jos staat, mi did fiil laik a mi wan iina wan nyuu konchri, a chat wan nyuu langwij, an a lorn fi du nyuu tingz. Kaa a ou di plies did ful a mountn an dem ting de, mi kudn jos chravl pan lan an go a di kanggrigieshan dem, so mi did afi tek plien aalmuos evri wiik. Som a di taim a mi a di onggl pasinja iina di likl uol plien. Mi did fried jos laik wen mi did a chravl iina di buot!

A onggl likl bit a piipl did av fuon, so mi did afi rait leta fi sen go a di kanggrigieshan dem. Bot muos a di taim mi riich iina di ieriya bifuo dem get di leta. Di gud ting duo a dat mi kuda fain di breda an sista dem an dem did api fi si mi. An dat did mek mi fiil gud fi nuo se mi a du wa mi a du. Mi kuda si se Jeuova di de wid mi a elp mi. An kaa a dat, mi did a get kluosa an kluosa tu im.

Di fos miitn we mi go pan di ailan we niem Buoganvil, wan man an im waif kom tu mi, an a sumail, an dem aks mi se, “Yu memba wi?” Mi memba se mi did priich tu dem wen mi did de a Puot Maabzbi, an mi did staat fi stodi di Baibl wid dem an mi gi it tu wan breda we liv iina di ieriya. An nou di tuu a dem baptaiz! Dis did a wan a di wol iip a blesn dem we mi get fi di chrii ier we mi de a Papuwa Nyuu Gini fa.

MI LIKL FAMBILI DID AV NOF TINGZ A DU

Bifuo mi lef Kuoran iina 1978, mi get fi nuo wan nais nais sista we niem Adel. Shi did a regila paiyanier an shi did av tuu pikni, Samuel an Shirley. An shi did afi a tek kier a ar mada we op iina iej tu. Iina Mie 1981, mi go baka di Filipiinz go marid tu Adel. Afta wi marid, di tuu a wi staat fi regila paiyanier an tek kier a wi fambili.

Aalduo mi did av wan fambili nou, iina 1983 dem mek mi get fi ton wan speshal paiyanier agen an den dem sen mi go a di Linapakan Ailan we a wan plies we a paat a Palawan. An aal a wi muuv go de, an no Jeuova Witnis neehn liv de. Mi fiil it fi se Adel mada ded wan ier afta dat. Dat neehn tap wi duo, wi stil du wol iip iina di priichin wok an a dat elp wi fi diil wid wa did apm tu Adel mada. An so wi get fi stodi di Baibl wid nof piipl we did a gwaan gud, an so kaaz a dat wi si se wi niid wan likl Kindom Aal. So wi mek wan wiself. An chrii ier afta wi go de, wi api fi se 110 piipl did de a di Laad Sopa. Afta wi muuv fram de, nof a dem en op get baptaiz.

Iina 1986, dem did sen mi go a wan ailan we niem Kuliyan we did av som piipl we av wan siknis we mek dem skin fasi-fasi we ada piipl kuda kech, so dem mek aal a dem liv wan plies. Likl afta dat, Adel get fi ton wan speshal paiyanier tu. Mi naa lai, mi did fried fi priich tu dem piipl de we luk so, bot di breda an sista dem fram di ieriya mek wi nuo se wi no afi fried. Kaaz a di dakta chriitment we dem piipl de a get, wi kyaahn go kech it fram dem so iizi. Som a dem piipl ya did staat fi go a miitn we kip a wan sista yaad. Wi fain se wi did lov fi priich tu dem piipl ya we did fiil laik se Gad ar nobadi no waahn av notn fi du wid dem. Dem did api fi ier se di taim a-go kom wen nobadi naa go get sik agen.​—Luuk 5:12, 13.

Mi an Adel invait tuu yong sista fram Kuoran fi kom liv a Kuliyan tu so dat wi pikni dem kuda av som gud kompni fi de roun. Samuel an Shirley an dem tuu yong sista ya did a enjai dem sorvis kaa dem did a stodi wid nof a di pikni dem we liv iina di ieriya, an wi wuda stodi wid di mada an faada dem. Matarafak, wan a di taim wi did a stodi wid 11 fambili, an nof a di piipl dem we wi stodi di Baibl wid did a gwaan gud so wi kuda av wan neda kanggrigieshan!

Wen mi go de mi a di onggl elda we di de, so di breda dem a di branch afis aks mi fi kip di miitn dem iina di wiik wid di iet breda an sista dem we de iina Kuliyan, an den afta dat mi wuda du di siem ting wid di nain breda an sista dem we liv iina wan plies we niem Marili. Mi did afi tek buot go de, an it wuda tek mi bout chrii owa fi riich de. Afta miitn don, mi an mi fambili wuda go op iina di mountn dem go priich fi wol iip a owaz an du som Baibl stodi iina wan plies we niem Alsi.

Afta a wail nof piipl did staat fi kom iina di chuut iina Marili an Alsi, so wi did afi bil Kindom Aal iina dem tuu plies de tu. Jos laik wa did apm iina Linakapan, di breda an sista dem an di wan dem we did a stodi iina Marili an Alsi, dem gi wi di ting dem fi mek di Kindom Aal an dem elp fi mek it tu. An a 200 piipl kuda uol iina di Kindom Aal we wi mek a Marili, an dem kuda set it op fi kip di sorkit miitn dem de tu.

MI DID SAD BAD, BOT MI DID GET API AGEN

Iina 1993 wen di pikni dem did ton big, mi an Adel did staat du sorkit wok iina di Filipiinz. Den iina 2000, mi did go a di skuul we niem Ministerial Training School fi dem tiich mi fi ton wan tiicha fi da siem skuul de. Mi neehn fiil laik mi kuda dwi’it, bot Adel aalwiez a se sopm we mek mi fiil gud an mek mi nuo se mi kyan dwi’it. Shi elp mi fi memba se Jeuova a-go gi mi di chrent fi du di wok we mi get fi du. (Fil. 4:13) Adel kuda taak kaa shi si ou Jeuova did a elp ar fi diil wid ar siknis.

Wen mi did a tiich wan a di klaas dem iina 2006, mi did fraitn wen Adel fain out se shi av wan siknis we dem kaal Paakinsn diziiz. Wen mi tel ar se mek wi tap du di wok we wi a du, Adel se, “Mi a beg yu fi fain mi wan dakta we kyan elp mi wid mi siknis, an mi nuo se Jeuova a-go elp wi so wi kyan gwaan du di wok.” So Adel an mi gwaan du di priichin wok we wi a du fi di neks siks ier an shi neehn komplien. Afta shi kudn waak so gud agen, shi wuda stil sidong iina ar wiilchier an priich. Wen shi kudn taak so gud, shi wuda stil se wan ar tuu sitn fi ansa kwestiyan a di miitn dem. Adel no tap get mesij fram di breda an sista dem fi mek ar nuo umoch dem tangk ar fi aal a wa shi du rait op til shi ded iina 2013. A 30 ier mi did liv wid Adel fa an shi did a wan nais waif we did di de fi mi, so wen shi ded mi did fiil agen laik se mi neehn av nobadi an mi kudn tap baal. Adel neehn waahn mi fi tap du di wok we mi a du, so mi neehn tap, an dat did elp mi fi no fiil laik se mi neehn av nobadi.

Fram 2014 tu 2017, mi get fi go luk fi di breda an sista dem we taak Tagaalag iina som konchri we di wok did anda lakdong. Afta dat, mi get fi go luk fi di breda an sista dem we iina di Tagaalag kanggrigieshan we de iina Taiwan an iina Merika an Kyanada. Iina 2019, mi tiich wan Ingglish klaas fi di skuul we niem School for Kingdom Evangelizers iina Indiya an iina Tailan. Mi did wel api wen mi a du dem wok ya we Jeuova gi mi fi du.

JEUOVA AN DI BREDA AN SISTA DEM AALWIEZ DI DE FI ELP MI

Evriting we mi get fi du fi Jeuova mek mi get fi lov di breda an sista dem muor, so it no aalwiez iizi fi go we lef dem go somwe els. So ef mi afi muuv mi get a chaans fi chos Jeuova muor. Mi aalwiez si Jeuova a elp mi, an dis elp mi fi diil wid eniting we chienj op iina mi laif. Mi a wan speshal paiyanier nou iina di Filipiinz so mi api nou iina di kanggrigieshan we mi de, an di breda an sista dem aalwiez di de a elp mi laik mi uona fambili. Mi glad fi si se Samuel an Shirley a gwaan gud iina di sitn dem we dem biliiv iina jos laik dem mada.​—3 Jan 4.

A wol iip a sopm mi go chuu iina mi laif. Mi si mi waif we mi lov so moch sofa an ded. An mi get wol iip a difrant difrant tingz fi du fi Jeuova we mi afi lorn ou fi du, bot mi aalwiez si se Jeuova “no de faar fram non a wi.” (Aks 17:27) Jeuova aalwiez di de fi elp wi aal wen wi fiil laik se a wi wan de somwe. (Aiz. 59:1) Jeuova we komiin laik wan rak aalwiez di de fi mi, an so mi tangk im fi evriting we im du fi mi. Dis mek mi si se sumadi aalwiez di de fi mi.