Wa Yu Kyan Du Fi Memba Som Baibl Vors?

Yu eva fain it aad fi chrai memba wan Baibl vors we yu laik? It kuda bi wan a dem Baibl vors de we mek yu fiil beta wen yu a go chuu sitn, ar wan we elp yu fi du wa rait wen yu a tingk bout sitn we Jeuova se rang, ar it kuda jos bi wan vors we yu jos waahn fi tel sumadi bout fi mek dem tingk bout it. (Sa. 119:11, 111) Mek wi luk pan som tingz we kyan elp yu fi memba dem Baibl vors de.

• Yuuz di tag sitn fi maak di vors dem iina di JW Library^® ap. Mek wan tag an kaal it “Di Vors Dem We Mi Laik,” an siev eni vors we yu waahn fi memba iina da paat ya.

• Rait dong di vors an put it we yu kyan si it. Yu kyan rait dong di vors we yu waahn fi memba pan wan piis a piepa an put it somwe we yu kyan si it aafn. Som piipl put it pan dem lukin glaas an ada piipl put it pan dem frij duor. An yu av som ada piipl we tek wan picha a di vors an put it pan dem kompyuuta skriin ar pan dem fuon skriin fi memba it.

• Rait dem dong pan som kyaad. Rait dong di Baibl buk, di chapta an di vors pan di said a wan kyaad, an den pan di ada said rait dong we di vors se. Den yuuz di kyaad an luk pan we yu kyan fain di vors iina di Baibl an chrai fi se wa da vors de se outa yu ed. Ar yu kyan luk pan di ada said a di kyaad fi si wa di vors se an chrai fi memba we iina di Baibl yu kyan fain da vors de.