Yu Did Nuo Dis?
Wa di priis dem a Gad ous iina Jeruusilem did du wid di blod afta dem kil di animal dem pan di alta?
EVRI ier di priis dem wuda sakrifais uol iip a animal pan di alta a Gad ous. Wan man we a Juu we did liv an rait nof bout wa did gwaan dem taim de, we niem Josiifos, did se pan di Paasuova alidie a muor dan 250,000 shiip dem did sakrifais, so a uol iip a blod dem did afi kliin op wen taim dem don. (Liv. 1:10, 11; Nom. 28:16, 19) So a ou dem did get rid a aal a da blod de?
Iina di templ we Erad did mek we di Juu piipl dem did yuuz fi worship Gad til it did get mash dong iina 70 C.E., som man we dig op an fain uol taim tingz did fain som uol iip a paip we dem yuuz fi kya we doti waata an dem ting de fram outa Gad ous. An dem did yuuz dem paip ya fi kya we di blod fram di templ tu.
Luk pan tuu sitn we dem did av so das dem kuda kip di alta kliin:
Som uol did de iina di grong saida di alta: Wan buk we av uol iip a di laa dem an di ting dem we di Juu piipl dem did fala we dem did rait roun 200 C.E. we niem Mishna, tel wi bout dem paip ya anda di grong. Di buk mek wi nuo se “yu did av tuu uol iina di grong nier wan a di kaana dem saida di alta. So di blod we kom fram di animal dem we dem kil an di waata we dem yuuz fi wash we di blod wuda ron chuu dem uol ya an go iina di paip dem we de anda di grong an kya we di waata an di blod go dong iina di Kijran Vali.”
An yu av wan neda buk we rait iina fi wi taim we taak bout tingz we did gwaan wid di Juu piipl dem. Da buk de tel wi bout som uol iip a paip anda di grong we som man we dig op an fain uol taim tingz, fain nier wich paat Gad ous did de. Kaa dem fain dem ting ya, dis mek dem man ya biliiv se dem uol ya did yuuz fi kya we di blod fram di alta.
Dem did av nof waata: Fi kip di alta kliin an fi mek shuor se di paip dem we kya we di blod an di doti waata fram di alta no blak op, di priis dem did niid uol iip a waata. An tingz did set op so das dem kuda get uol iip a kliin waata fram di siti. Laik yu did av som chrench we kya di waata fram di siti go a Gad ous. An den dem did av som puul an dem ting de we wuda kip di waata til dem redi fi yuuz it. Wan a di man dem we dig op an fain uol taim tingz, we niem Joseph Patrich, did se: “No ada plies we dem did yuuz fi worship dem taim de neehn av aal a dem sitn ya fi kya kliin waata go de an fi get rid a doti waata.”