A Jeuova A-Go Fait Fi Wi

Iina 1999, di govament a Frans did se di breda dem a di branch afis we de a Frans fi pie taks pan aal a di moni dem we di breda dem gi di aaganaizieshan fram 1993 tu 1996. So wi go a di kuot dem iina Frans fi pruuv se we di govament did a du neehn rait. An yu nuo se wi did luuz aal a dem kuot kies de! An wen wi did luuz di laas kuot kies, di govament go iina di branch bangk akount an tek out muor dan $6,000,000 U.S. So di onggl kuot wi kuda go nou fi get bak di moni a fi go a di ECHR. Bot bifuo dem did luk pan di kies, di ECHR did tel wi se wi did fi av wan miitn wid di Frans govament laaya dem an sumadi we kom fram di ECHR fi si ef wi kuda saat out tingz bifuo dem chrai di kies.

Wen wi did go a di miitn, wi did fiil se di uman we kom fram di ECHR wuda presha wi fi pie som a di moni we di govament a Frans did se wi fi pie so das wi kuda sekl tingz wid dem. Bot wi did nuo se ef wi did iivn gi dem wan dala outa di moni, wi wudn de du wa Jeuova did waahn wi fi du, kaa di breda an sista dem did gi di moni fi elp wid di priichin wok we a gwaan aal uova di worl an dat de moni de a neehn fi di govament. (Mat. 22:21) Bot wi did stil go a di miitn kaa wi did waahn fi fala wa di kuot se wi fi du.

Wi did av di miitn a di kuot ous iina wan a di big nais ruum dem we dem kip miitn iina. Bot di miitn neehn staat out so gud. Di uman fram di ECHR did se shi did ekspek se di breda dem fram di branch afis we de a Frans wuda pie iivn som a di taks we di govament se dem fi pie. Bot aal av a sodn wi aks ar se, “Yu did nuo se di govament tek we uova siks miliyan U.S. dala outa wi akount aredi?”

Yu kuda si se shi did shak fi nuo se dem did du dat. An afta di govament laaya dem did tel ar se a dat dem did du fi chuu, shi did staat fi chienj op ou shi diil wid wi. Shi staat fi rof dem op an mek dem nuo se dem neehn fi du dat, an shi don di miitn sed taim. Dat mek wi si se a Jeuova did a elp wi fi win da kies ya iina wan wie we wi neva tingk im wuda dwi’it. Bwai, mi a tel yu se wen di miitn did don wi did api so til, aalduo wi kudn biliiv wa did riili apm.

Pan Juun 30, 2011, di joj dem a di ECHR did mek di govament a Frans nuo se it neehn rait fi dem taks di moni we di breda an sista dem did gi tu di aaganaizieshan. An dem aada di govament fi pie bak aal a di moni we dem did tek we, an dem did fi pie it bak wid inchres tu! Wa di ECHR did se dat de die de stil a elp di breda dem iina Frans til tide die fi worship Jeuova widout no prablem. Di kwestiyan we wi did aks di uman fram di ECHR we wi nat iivn did nuo se wi wuda aks, did komiin laik di stuon we Dievid did yuuz fi kil Golaiyat, kaaz a da kwestiyan de did mek tingz wok out difrant iina di kuot kies. So di riizn wa mek wi did win da kuot kies de a kaaz a di sed ting we Dievid did tel Golaiyat wen im did se a Jeuova a fait fi wi.​—1 Sam. 17:45-47.

Bot dat a no di onggl kuot kies we wi win. Aalduo nof govament an choch liida a fait gens wi wok, fram wi staat go a kuot til nou wi win 1,225 difrant difrant kuot kies iina di tap-a-tap kuot dem iina 70 difrant konchri, an iina di big kuot dem we difrant difrant konchri go fi chrai dem kies dem. Kaaz wi win dem kuot kies ya, it mek wi kyan get piepaz fram di govament fi shuo se wi a wan rilijan fi chuu, an dat mek wi kyan priich an tiich di gud nyuuz widout no prablem, an it mek wi kyan se wi naa saluut di flag an dem ting de, an se wi naa tek blod niida.

Bot yu mait-a a wanda, a ou komz mi de a Yuurop a fait kuot kies wen mi did a wok a di Worl Ed Afis Fi Di Jeuova Witnis dem we de iina Nyuu Yaak iina Merika?

MI MADA AN FAADA A DID MISHINERI

Mi mada an faada niem George an Lucille, an dem did gradiyiet fram di Gilead skuul, dat a klaas nomba 12. Dem did sen dem go a Iitiyuopiya, an a de-so mi did baan iina 1956, an dem niem mi aafa Filip we de iina di Baibl we did priich di gud nyuuz. (Aks 21:8) Bot di ier afta dat, di govament did put di wok anda lakdong. Aalduo mi did a wan likl pikni, mi did memba ou mi fambili did stil a sorv Jeuova iivn duo di wok did anda lakdong. Bot mi did tingk se a did wan nais taim dat. Bot sad fi se, di govament fuos wi fi lef Iitiyuopiya iina 1960.

Wi fambili did muuv go a Wichitaa iina Kyanzas we de iina Merika, bot dem did lov fi priich siem wie. An kaa dem did riili lov Jeuova, dem tiich mi an mi big sista, Judy, an mi likl breda, Leslie, fi lov Jeuova tu, an di tuu a dem did baan iina Iitiyuopiya tu. Wen mi baptaiz, mi did a 13 ier uol. An chrii ier afta dat, wi fambili did muuv go a Arekiipa iina Peruu fi elp out we dem niid muor piipl fi priich.

Iina 1974 wen mi did a 18, di branch we de a Peruu pik mi an fuor ada breda fi ton speshal paiyanier. Dem aks wi fi priich iina som ieriya we nobadi neva priich bifuo, an dem plies de did wie op iina di Senchral Andiiz Mountn Dem. An wen wi de op iina dem mountn de, wi did get fi priich tu di piipl dem we chat di Kechuwa an Aimaara langwij dem. Wi did liv iina wan big bos we set op fi bi wan ous, an chuu it did luk laik wan big baks, wi did kaal it Di Aak. Mi naa lai yu, it riili mek mi fiil gud wen mi memba ou wi yuus tu taak tu dem piipl de an mek dem nuo se wan taim a-go kom wen Jeuova a-go mek shuor se nobadi naa go puor agen, an nobadi naa go sik, an nobadi naa go ded agen. (Rev. 21:3, 4) An yu waahn nuo se nof a dem piipl de staat fi worship Jeuova wid wi.

MI GET FI STAAT WOK A DI WORL ED AFIS

Iina 1977, Breda Albert Schroeder, we did de pan di Govanin Badi, did kom a Peruu. An im did tel mi se mi kuda sain op fi wok a Betel a di worl ed afis, so mi did dwi’it. An likl afta dat, pan Juun 17, 1977, mi staat fi wok a di Bruklin BeteI. An fi di neks fuor ier, mi get fi wok iina di kliinin dipaatment an iina di dipaatment dem we dem fiks op di bildin dem an di ada sitn dem a Betel.

Iina Juun 1978, mi miit wan nais likl sista we niem Elizabeth Avallone a wan kanvenshan we som breda an sista fram difrant difrant konchri did kom, we dem did kip a Nyuu Aaliinz iina Luiiziana. Fi ar mada an faada did stie laik fi mi mada an faada we dem lov Jeuova wid aal a dem aat. Dem taim de, Elizabeth did a wan regila paiyanier fi fuor ier aredi, an shi did waahn fi yuuz muos a ar taim fi sorv Jeuova fi di res a ar laif. So wi staat fi get fi nuo wi wan aneda beta, an no tuu lang afta dat, wi get fi riili lov wi wan aneda. So wi did get marid pan Aktuoba 20, 1979, an di tuu a wi staat fi wok a Betel tugeda.

Di fos kanggrigieshan we wi did go a di Bruklin Spanish kanggrigieshan an dem breda an sista de did riili lov wi an tek kier a wi. Fram dem de taim de til nou wi get fi bi paat a chrii ada kanggrigieshan, an di uol a dem tek wi iin an elp wi fi gwaan wok a Betel. Mi a tel yu se wi riili api fi di elp we dem breda an sista de gi wi an we wi fren an fambili dem gi wi tu wen wi mada an faada dem did a get op iina iej.

MI GET FI WOK WID DI LAAYA DEM WE WOK A BETEL

Iina Janiweri 1982, mi did shak wen dem aks mi fi wok iina di Liigal Dipaatment afis a Betel we dem saat out tingz we afi du wid laaya bizniz fi di branch afis. An chrii ier afta dat, dem aks mi fi go a yuunivorsiti fi ton wan laaya. Wen mi did di de, it did swiit mi fi lorn se nof a di sitn dem we it aarait fi piipl iina Merika an ada konchri du a kaaz a nof a di kuot kies dem we di Jeuova Witnis dem win. An wi did taak bout dem kuot kies ya uol iip wen wi did de a skuul.

Iina 1986 wen mi did a 30, dem pik mi fi bi di uovasiya fi di Liigal Dipaatment. Mi did api se iivn duo mi did yong, dem did chos mi fi du da wok ya. Bot kaa mi did av nof tingz fi lorn, mi did nuo se da wok ya neehn did a-go iizi fi mi.

Iina 1988, mi did don yuunivorsiti an ton wan laaya, bot mi neehn riyalaiz umoch mi did mek di skuulin we mi did get mash op ou kluos mi an Jeuova bi. Wen yu go a yuunivorsiti an dem skuul de, yu get fi nuo tingz we ada piipl no nuo, an kaaz a dat, it kyan mek yu fiil laik se yu beta dan ada piipl. Bot no onggl dat. It kyan mek yu fiil laik se a yu fi get di tap-a-tap pozishan dem. An kaa dem sitn ya did a apm tu mi, mi waif, Elizabeth, did elp mi fi si se mi niid fi chienj. Wan a di ting dem we shi did elp mi fi du a fi staat fi du di ting dem agen we did kip mi kluos tu Jeuova we mi did a du bifuo mi go a yuunivorsiti. Bot dis neehn apm jos so, bot likl bai likl mi an Jeuova did get kluos kluos agen. Mi kyan tel yu se di big ting iina laif a no fi nuo nof tingz bout di wok we yu a du, bot a wen yu lov Jeuova an im piipl dem an yu an im a gud gud fren.

MI DID A ELP FI DIFEN DI GUD NYUUZ

Afta mi don yuunivorsiti, mi did staat fi elp di breda dem fi saat out tingz we did av fi du wid di laaya bizniz a Betel. An mi did elp out iina di kuot kies dem we di breda dem di a fait so das wi kuda gwaan priich di gud nyuuz. An kaaz tingz did a chienj op faas faas iina di aaganaizieshan, mi a tel yu se mi wok did nais. Bot kaaz wi did av nof wok fi du, it did aad tu. Laik fos taim wi yuus tu aks piipl fi gi moni fi wi buk an pamplet dem. Bot iina 1991, dem did aks fi wi dipaatment fi tek di liid fi si ou wi kuda tap du dis. An afta aal a dis did wok out, wi neehn chaaj piipl fi wi buk an pamplet dem agen. An kaa di aaganaizieshan did mek da chienj ya, it did mek di wok a Betel an iina fiil sorvis iiziya. Pan tap a dat, kaa wi naa aks piipl fi moni fi wi buk an pamplet dem, di govament dem iina nof a di konchri dem kudn presha wi fi pie no taks. Bot kaa wi did mek da chienj ya, som piipl did fiil se wi wudn av inof moni fi mek di buk an pamplet dem we wi yuuz iina fiil sorvis an so nof piipl wudn get fi lorn bout Jeuova. Bot a neehn dat did apm. Di mount a piipl we a sorv Jeuova nou muor dan dobl di mount a piipl dem we did a sorv im iina 1990. An tide, uol iip a piipl a get di buk an pamplet dem we dem niid an dem na’afi pie a sent. Mi get fi si wid mi uona tuu yai dem se di riizn wa mek nof a di big sitn dem we chienj op iina Jeuova aaganaizieshan wok out gud a kaaz Jeuova a elp wi an kaaz wi a fala wa di waiz sorvant tel wi fi du.​—Ek. 15:2; Mat. 24:45.

Nof a di taim di riizn wa mek wi win di kuot kies dem a no jos kaa wi av som gud laaya, bot a kaa Jeuova piipl dem wok aad aad fi liv gud wid piipl. An mi did si dis iina 1998 wen chrii a di breda dem we did de pan di Govanin Badi an dem waif dem did go a Kyuuba a wan speshal kanvenshan. Wa did apm a dat di govament iina Kyuuba neehn andastan uol iip a tingz bout di Jeuova Witnis dem, bot wa did elp dem fi andastan wi beta, a neehn riili di miitn dem we wi did av wid dem, bot a wen dem si ou di Govanin Badi breda dem did kain an shuo piipl nof rispek, it did mek dem nuo fi shuor se nof a di sitn we dem did biliiv bout wi neehn riili go so.

Bot somtaim di onggl wie wi kyan get jostis a fi ‘difen di gud nyuuz’ an fi go a kuot. (Fil. 1:7) Laik fi uol iip a ier, di govament iina Sout Koriya an iina som a di konchri dem iina Yuurop wuda lak op wi breda dem kaa dem neehn waahn fi go a waar go fait. So 18,000 a wi breda dem iina Yuurop an uova 19,000 a wi breda dem iina Sout Koriya did go a jiel kaaz dem did mek op dem main se dem naa go a waar.

Den pan Julai 7, 2011, wi did av wan kuot kies iina di ECHR we niem Bayatyan v. Armenia. An iina da kuot kies de, di ECHR did mek aal a di konchri dem iina Yuurop nuo se wen sumadi no waahn go a waar kaaz a we dem biliiv iina, di govament fi set op wok we dem kyan du insted-a fi fuos dem fi go a waar. Afta dat, pan Juun 28, 2018, di South Korean Constitutional Court did se di siem ting laik we di ECHR did se. Bot wi kudn win non a dem kuot kies ya ef iivn wan outa aal a dem breda ya neehn tan op chrang fi wa dem biliiv iina.

Di breda dem a di worl ed afis we diil wid laaya bizniz an di wan dem we de a di branch dem aal uova di worl wok aad aad fi difen wi rait fi worship Jeuova an fi priich di gud nyuuz. Wi riili api se wi kyan elp wi breda an sista dem wen taim di govament dem a fait gens dem. Bot aal wen wi no win wan kuot kies, wi get di chaans fi priich tu di king dem, an di ruula dem, an tu evribadi we ier bout di kuot kies. Wen wi go a kuot, iina di piepa dem we wi gi dem an iina di sitn dem we wi se iina kuot, wi aalwiez yuuz di skripcha dem fi bak op wa wi a se. (Mat. 10:18) So dat mek di joj dem, an di govament piipl dem, an di wan dem we mek nyuuz, an di piipl dem we a lisn an a ier bout di kies nuo wa mek wi biliiv wa wi biliiv. An di wan dem we riili waahn lorn bout Jeuova get fi nuo uu wi riili bi an get fi si se wa wi biliiv kom fram di Baibl. An nof a dem piipl ya ton Jeuova Witnis tu.

TANGK YU, JEUOVA!

Mi so api dat fi 40 ier nou mi get fi wok pan kuot kies an so wid di breda dem a di difrant difrant branch afis dem. An mi api se mi kuda get fi difen di breda an sista dem infronta nof impuotant piipl an fi tek paat iina uol iip a kuot kies iina nof a di big kuot dem aal uova di worl. Mi kyaahn tel yu umoch mi lov di breda dem we wok wid mi iina di Liigal Dipaatment a di worl ed afis an iina di difrant difrant branch afis dem aal uova di worl. An mi riet dem nof nof tu. Wen mi tingk bout aal a dem sitn ya, mi kyan si se Jeuova gi mi nof blesn an dat mek mi fiil riili gud.

Fi 45 ier nou mi waif, Elizabeth, aalwiez di de fi mi an a elp mi, an shi du dat wen tingz a gwaan gud an aal wen tingz rof tu. An mi riet ar fi dat, kaa shi a du dis aalduo shi afi a diil wid wan siknis we mek shi no so chrang laik fos taim.

Wi get fi si fi wiself se di chrent we wi av an di kuot kies dem we wi fait an win, a no kaa wi kyan du sortn an sortn tingz gud. Bot jos laik we Dievid did se, Jeuova a-go yuuz im chrent fi protek im piipl dem. (Sa. 28:8) Ye man! Wi nuo fi shuor se a Jeuova a-go fait fi wi.