Wa Laif Did Stie Laik Iina di Gyaadn a Iidn?

Jeuova Gad gi Adam an Iiv nof nof gud tingz. Aks 17:24, 25

Di fos uman we Jeuova mek niem Iiv. Afta im mek ar, im kyari ar tu Adam, marid dem, an a so kom dem ton ozban an waif.​—Genesis 2:21, 22.

Wen Jeuova Gad mek dem, notn neva rang wid dem main an dem badi; dem did porfek.

Di Gyaadn a Iidn we dem did liv iina a did wan Paradais. Evriting did nais an priti​—di riva, di chrii dem, dong tu di animal dem.

Jeuova yuus tu taak tu dem an tiich dem tingz. Ef dem did lisn tu im, dem wuda liv fi eva iina Paradais pan ort.

Jeuova Gad tel Adam an Iiv se dem no fi iit fram wan a di chrii dem. Genesis 2:16, 17

Jeuova shuo Adam an Iiv wan a di fruut chrii iina di gyaadn an tel dem se ef dem iit fram it, dem a-go ded.

Wan a di ienjel dem ton gens Gad, an da wikid ienjel de a Sietan di Devl.

Sietan neva waahn Adam an Iiv fi du wa Jeuova se. So im yuuz wan siniek fi tel Iiv se ef shi iit di fruut fram di chrii, shi wudn ded, bot shi wuda komiin jos laik Gad. Bot wi nuo se dat a did wan big uol lai.​—Genesis 3:1-5.