Adam An Iiv Neehn Lisn Tu Gad

Wan die wan siniek kom taak tu Iiv wen shi did de bai arself. It se tu ar se: ‘A chuu se Gad se unu no fi nyam fram aal a di chrii dem we de iina di gyaadn?’ Bot Iiv se: ‘Gad se wi kyan nyam fram aal a di chrii dem. Bot yu si da chrii ya, im se ef wi nyam di fruut we de pan it, wi a-go ded.’ Den di siniek se tu ar se: ‘Yu naa go ded. An yu waahn nuo se ef yu nyam fram aafa it, yu a-go komiin laik Gad.’ Yu tingk dat a did chuu? Nuo sa, a did wan big uol lai. Bot Iiv did biliiv it. Shi staat luk pan di fruut, an di muor shi du dat, a di muor shi fiil fi nyam it. So shi go nyam it an gi Adam som. Adam did nuo se ef dem du dat, dem wuda ded. Bot im stil go dwi’it.

Lietaraan, Jeuova aks Adam an Iiv wa mek dem du sitn we im did tel dem se dem neehn fi du. Iiv se a di siniek mek shi dwi’it, an Adam se a Iiv mek im dwi’it. Kaa Adam an Iiv neehn lisn tu Jeuova, im ron dem outa di gyaadn a Iidn. An so dat dem kudn go bak iin de, im put wan suod we a bliez wid faiya an ienjel infronta di gyaadn.

Jeuova did se di sumadi we chrik op Iiv wuda get ponish tu. Jeuova neva mek siniek fi chat, so a neehn riili di siniek did a chat tu Iiv. A wan wikid ienjel did mek di siniek taak. Da ienjel de niem Sietan. Wan taim a-go kom wen Jeuova a-go get rid a Sietan an im naa go kyan chrik op nobadi no muo.