PAAT 5

Di Flod Iina Nowa Die—Uu Did Lisn, an Uu Neva Lisn?

Iina Nowa taim, muos a di piipl dem did a du badnis. Genesis 6:5

Di wikid ienjel dem put aan man badi so dem kuda get kluos tu di uman dem.

Adam an Iiv staat av pikni, an piipl staat moltiplai iina di ort. Afta a wail, som a di ienjel dem fala Sietan an ton gens Gad.

Dem de ienjel de kom dong pan di ort an chienj fi dem badi tu man badi so dat dem kuda marid tu uman. Di uman dem staat av pikni, an evri wan a dem pikni de we baan ton a chrang, chraptin jaiant ava man we buli evribadi els.

Wan uman a uol wan biebi an wan bwai a lik afta ar; Di Nefilim dem, di son dem we di wikid ienjel dem did av, a du som vailent tingz

Wikid piipl staat ful op di ort, an a bie bad tingz dem staat du. Di Baibl se di wikidnis a man did so moch pan di ort dat evriting we kom op iina im aat a bie iivl.

Nowa lisn tu Gad an bil wan aak. Genesis 6:13, 14, 18, 19, 22

Nowa a did wan gud man. Jeuova tel Nowa se im a-go yuuz wan flod fi get rid a di wikid piipl dem.

So Gad tel Nowa fi bil wan aak. Di aak a did wan masiv buot, an Gad tel im fi kyari im fambili an evri kain-a animal go iina it.

Nowa a waan piipl bout di Flod bot dem a laaf aafa im

Nowa waan di piipl dem bout di flod we did a-go kom, bot dem neehn lisn. Som piipl laaf afta im, bot som ada piipl did iet im laik a duos a paizn.

Nowa an im fambili a bring iin di animal dem iina di aak

Wen Nowa don mek di aak, im bring iin di animal dem.