A Iet Piipl Neva Ded Iina Di Flod

Nowa, im fambili, an di animal dem did go iina di aak. Den Jeuova lak di duor an rien staat fi faal. Kaaz a di iip a rien we bos, di aak staat fi fluot an a bier waata ful op di wol ort. Aal a di bad piipl dem we neehn iina di aak ded aaf. Bot Nowa an im fambili did aarait. Dem mos did glad se dem did du wa Jeuova se dem fi du, no chuu?

A 40 die an 40 nait rien faal fa. Afta it tap an di waata staat go dong, di fos ting we sumadi kuda si a di mountn dem. An a pan som mountn di aak en op. Bot wol iip a waata did stil de pan di ort, so Nowa an im fambili kudn kom outa di aak yet.

Di waata tek taim jrai op. A muo dan wan ier Nowa an im fambili did iina di aak fa, an den Jeuova tel dem se dem kuda kom out. An dem taim de, no wikid piipl neva de bout. Nowa an im fambili did wel api se Jeuova siev dem, so dem gi op sakrifais fi shuo se dem tangk im.

Di sakrifais we dem gi Jeuova mek im api. An Jeuova mek wan pramis se im naa go yuuz wan flod agen fi get rid a evriting pan di ort. So Jeuova mek di fos rienbuo shuo iina di skai fi mek dem memba da pramis de. Yu eva si wan rienbuo yet?

Afta dat, Jeuova tel Nowa an im fambili fi av nof pikni an ful op di ort.