Di Izrelait Dem Mek Wan Pramis Tu Jeuova

A roun tuu mont nou sins di Izrelait dem lef Iijip an dem a kyamp out a Mount Sainai. Jeuova kaal Muoziz an im go op pan di mountn. Jeuova tel im se: ‘A mi siev di Izrel piipl dem. Yu si ef dem du wa mi se dem fi du, dem a-go bi fi mi speshal piipl.’ Afta dat, Muoziz go bak go tel di Izrelait dem wa Jeuova se. Ier wa dem se wen dem ier dat. Dem se: ‘Wi a-go du evriting we Jeuova tel wi fi du.’

Muoziz go bak op pan di mountn agen. Wen im op de, Jeuova tel im se: ‘Mi a-go taak tu yu chrii die fram nou. Tel di Izrelait dem se dem no fi chrai fi kom op pan da mountn ya.’ So Muoziz go tel di Izrelait dem fi redi op demself fi ier wa Jeuova a-go se tu dem.

So chrii die afta dat, di Izrelait dem si laitnin a flash an wan big blak kloud kom dong pan di mountn. An dem ier tonda a ruol an wan loud aan a bluo. Afta dat, wan faiya kom dong pan di mountn an Jeuova did iina it. Di Izrelait dem kech dem fried an staat fi shiek. Di mountn did ful a sumuok an it staat fi shiek laik wan big ortkwiek did a gwaan. An wen aal a dis did a apm, di aan did a get louda an louda. Den Gad se: ‘A mi niem Jeuova. Unu no fi worship no ada gad.’

Muoziz go bak op pan di mountn, an Jeuova gi’im di laa dem we wuda mek dem nuo ou dem fi liv an ou dem fi worship Jeuova. So Muoziz rait dong di laa dem an riid it tu di Izrelait dem, an dem se: ‘Wi a-go du evriting we Jeuova tel wi fi du.’ So wi si se dem did pramis Gad se dem wuda du sitn. Bot yu tingk dem wuda dwi’it fi chuu?