LESN 02

Di Baibl Gi Wi Uol Iip A Nais Sitn Fi Luk Faawod Tu

Di Wan We Print

Evriwe yu ton, piipl av uol iip a prablem we mek dem a wori an fret. Som piipl fiil laik se dem kaana daak. Yu fiil so som a di taim tu? Yu mait-a fiil so kaaz yu sik ar sumadi fi yu ded, an yu mait-a a wanda ef tingz riili a-go tan so fi eva. Bot di Baibl mek wi nuo se tingz suun get beta wan die.

1. Wa di Baibl se a-go apm iina di fyuucha?

Aal a di bad sitn dem we wi a go chuu nou, di Baibl mek wi nuo wa mek wi a go chuu dem, an it mek wi nuo se wi naa go a go chuu dem fi eva. Aal a di gud sitn dem we di Baibl se a-go apm “mek yu nuo se tingz a-go get beta.” (Riid Jerimaiya 29:11, 12.) Aal a dem gud sitn de we di Baibl se a-go apm elp wi fi gwaan eng aan nou no mata wa a gwaan, an it mek wi nuo bout wan taim wen wi a-go kyan enjai aal a di gud sitn dem we di Baibl tel wi bout fi eva.

2. Wa a som a di gud sitn dem we di Baibl se a-go apm iina di fyuucha?

Nowadiez, piipl av uol iip a prablem. Dem kyaahn fain fuud fi nyam, dem waahn jostis, an nof piipl a ded. Bot di Baibl mek wi nuo se suun suun non a dem sitn de naa go de bout no muo. Iina Revilieshan 21:4, it se, “Nobadi naa go ded agen, so nobadi naa go ala ar baal.” (Riid Revilieshan 21:4.) Di Baibl mek wi nuo se suun suun di ort a-go ton iina wan paradais, an di piipl dem we liv de a-go api fi eva.

3. Ou yu kyan nuo se di sitn dem we di Baibl se a-go apm, a-go apm fi chuu?

Uol iip a piipl waahn gud sitn outa laif, bot dem no fiil laik se tingz a-go riili get beta iina laif. Bot wen it kom aan tu di sitn dem we di Baibl tel wi se a-go apm, wi kyan nuo fi shuor se dem a-go apm fi chuu wen wi “luk aad aad iina Gad wod.” (Aks 17:11) Az yu gwaan stodi di Baibl, yu kyan go mek op yu main fi yuself fi si ef yu riili biliiv se wa it se a-go apm iina di fyuucha, a-go apm fi chuu.

LORN SOM MUO

Wi a-go luk pan som a di gud sitn dem we di Baibl se a-go apm. An wi a-go si ou dem sitn ya a elp uol iip a piipl fi eng aan rait ya nou.

Som picha: Som picha a shuo som a di prablem dem we piipl av nou, an som ada picha a shuo ou dem naa go av non a dem prablem de agen iina di fyuucha. Di picha dem de de agen dong a di batam.

4. Di Baibl mek wi nuo se di taim a-go kom wen wi naa go av no muo prablem an wi a-go kyan liv fi eva

Luk pan aal a dem gud sitn ya we di Baibl se a-go apm. Wen yu a go chuu, tel wi, wich wan a dem sitn ya yu wel waahn fi si apm, an wa mek?

Riid di skripcha dem we tel wi bout aal a di gud sitn dem we a-go apm, an den wi a-go taak bout dem kwestiyan ya:

Yu tingk di sitn dem we yu riid bout iina dem skripcha ya a gi yu sitn gud fi luk faawod tu? Yu tingk dem skripcha ya kyan elp yu fambili an yu fren dem?

Tingk bout wa it wuda komiin laik ef yu de iina wan worl we

NOBADI NAA GO . . .	EVRIBADI A-GO . . .
fiil no pien, get uol, ar ded.—Aizaiya 25:8.	si di piipl dem we dem lov kom bak alaiv pan di ort.—Jan 5:28, 29.
sik agen, an nobadi naa go def, blain, ar notn laik dat.—Aizaiya 33:24; 35:5, 6.	aati an oul piipl a-go get bak yong an fresh an chrang agen.—Juob 33:25.
fiil se piipl naa chriit dem rait.—Aizaiya 32:16, 17.	av uol iip a fuud fi nyam, av somwe nais fi liv, an wok we dem lov fi du.—Saam 72:16; Aizaiya 65:21, 22.
sofa kaaz a waar.—Saam 46:9.	av piis iina evri kain-a wie, an nobadi naa go fried.—Saam 37:11.
memba di bad sitn dem we did apm tu dem, an dem naa go fiil no pien iina dem aat kaaz a it.—Aizaiya 65:17.	liv fi eva, an notn naa go de de fi bada dem ar ort dem.—Saam 37:29.

Wan bwai we did sik an get beta a og op im mada.

Wan man we did uol get bak yong, an im a push wan wiilbaro we ful op a vejitebl.

5. Di gud sitn dem we di Baibl tel wi se a-go apm kyan elp wi nou

Kaaz a di uol iip a prablem dem we a gwaan iina di worl, som piipl fiil fed op, an som staat fait fi mek tingz beta. Mek wi luk pan ou di gud sitn dem we di Baibl se a-go apm a mek piipl fiil beta rait ya nou. Plie di VIDIYO, an den wi a-go taak bout dem kwestiyan ya:

VIDIYO: Mi Did Waahn Fait Fi Jostis (4:07)

Som picha: Som paat fram di vidiyo ‘Mi Did Waahn Fait Fi Jostis.’ 1. Rafika a pik katn wid di ada Blak piipl dem wen shi did a likl pikni. 2. Rafika api fi si piipl fram aal uova a enjai demself wid dem wan aneda wen shi go a ar fos Jeuova Witnis kanvenshan.

Wa did a gwaan we mek Rafika fiil laik se no jostis no de iina di worl?
Iivn duo tingz neva did get beta, ou di Baibl did elp ar fi tap fait fi jostis?

Wen wi tingk bout aal a di gud sitn dem we di Baibl se a-go apm, it elp wi fi diil wid wi prablem dem. Riid Pravorbz 17:22 an Ruoman 12:12, an den wi a-go taak bout dem kwestiyan ya:

Yu tingk di sopm dem we di Baibl se a-go apm iina di fyuucha kyan mek yu laif beta nou, an wa mek yu se so?

SUMADI MAIT-A SE: “Di gud sitn dem we di Baibl se a-go apm, notn kyaahn go so; a bie mek-op tuori.”

Wa mek yu tingk it gud fi fain out fi yuself wa di Baibl a se?

DIS A WA YU FI MEMBA

Di Baibl gi wi som gud sitn fi luk faawod tu, an dis kyan mek wi api no mata wa wi a go chuu.

Wa yu did lorn iina da lesn ya?

Wa mek piipl niid sitn fi luk faawod tu?
Wa a som a di sitn dem we di Baibl se a-go apm iina di fyuucha?
Wen yu tingk bout di gud sitn dem we di Baibl se a-go apm iina di fyuucha, ou dat kyan elp yu nou?

Rait dong di diet wen yu don da lesn ya:

Du Dis

Riid di Baibl vors dem we de iina da lesn ya so yu kyan get fi nuo muo bout di gud sitn dem we di Baibl se a-go apm.

Sitn els we yu fi du:

Sitn Els We Yu Fi Du

CHEK OUT SOM MUO SITN

Wen yu av sitn gud fi luk faawod tu, ou dat kyan elp yu?

“We Yu Kyan Get Elp Fram Wen Yu Fiil Fi Gi Op?” (Wiek Op!, Iepril 22, 2004)

Fain out ou sumadi we sik bad kyan fiil beta nou kaa dem nuo bout aal a di gud sitn dem we di Baibl se a-go apm.

“Yu Tingk Di Baibl Kyan Elp Yu Fi Diil Wid Siiros Siknis?” (Sitn we yu kyan get pan di websait)

Wen yu a wach da vidiyo ya, tingk bout ou yu an yu fambili kyan go enjai laif iina di Paradais we di Baibl se a-go kom.

Jos Tingk Bout Di Taim (3:37)

Fain out bout ou sumadi we weehn a fait fi wa rait, tap kaaz dem lorn bout di gud sitn dem we di Baibl se a-go apm iina di fyuucha.

“Mi Tap Fiil Laik Se Mi Afi Chienj Di Worl” (Di Wachtowa, Julai 1, 2013)