Wa Gad Kindom A-Go Du Fi Wi?

WA A SOM A DI SITN DEM WE GAD KINDOM DU FI WI AREDI?

Wi jos tel yu bout di sain we Jiizas did tel im falara dem fi luk out fa, we wuda shuo se Gad Kindom staat fi ruul. Wen wi luk pan da sain de, wi kyan si klier klier se Gad set op im Kindom iina evn aredi an Jiizas a di King we a ruul iina da Kindom de.

Di Baibl tel wi se wan a di fos ting Jiizas du wen im staat fi ruul a fi fling Sietan an di bad ienjel dem we did a fala im outa evn dong pan di ort. An a das wai tingz get so bad sins 1914, kaaz Sietan an im diiman dem dong ya an dem kyaahn go no we els.​—Revilieshan 12:7, 9.

Wid aal a di bad sitn dem we a gwaan, yu tingk se dat miin fi se Jiizas naa du notn fi wi nou? Nuo sa! Gad Kindom govament a du wol iip a sitn fi elp piipl aal uova di worl. Wol iip a piipl a lorn tingz fram di Baibl we a elp dem iina dem laif. (Aizaiya 2:2-4) Dem a lorn ou fi wok an tek kier a dem fambili, an ou fi du tingz wid dem fambili so dat evribadi kyan api. An dem lorn se dem no afi ron dong moni an tingz fi liv wan api laif. Aal a dem sitn ya a wa Jiizas se wuda apm. Im did se piipl aal uova di worl wuda lorn ou fi du tingz di wie ou Jeuova waahn dem fi du it. A dem piipl de a-go liv pan di ort wen Gad Kindom a ruul uova it.

WA A SOM ADA TINGZ WE GAD KINDOM A-GO DU?

Wi did si aredi se Jiizas a ruul iina evn, bot rait ya nou a man a ruul pan di ort. A dat wuda apm kaaz a dat Gad did tel Jiizas se. Im tel im se: “Gwaan go ruul sed taim wen yu enimi dem a ruul.” (Saam 110:2) Bot suun suun Jiizas a-go get rid a aal a di govament dem pan di ort an dis a-go mek laif nais fi aal a di piipl dem we du wa Jeuova se dem fi du.

Dis a som a di sitn dem we Gad Kindom gweehn du

• It a-go get rid a aal a di rilijan dem we naa du wa Jeuova se dem fi du. Iina Revilieshan 17:15, 16, di Baibl tel wi se di rilijan dem we naa du wa Jeuova se dem fi du komiin laik wan uor. Dem rilijan de a tiich piipl wol iip a lai bout Gad an dem mek laif aad fi piipl. An das wai Gad a-go don dem, an piipl a-go fraitn fi si ou Gad a-go get rid a aal a dem rilijan de.

• Gad Kindom gweehn get rid a aal a di govament dem we a ruul. Revilieshan 19:15, 17, 18 mek wi si som a di sitn dem we Gad Kindom a-go du tu aal a dem govament ya.

• Gad Kindom gweehn get rid a aal a di wikid piipl dem. Yu si di piipl dem we no waahn chienj an du wa Gad se dem fi du, Pravorbz 2:22 mek wi nuo se ‘di wikid piipl dem naa go de pan di ort no muor kaa Gad a-go get rid a dem.’

• Gad Kindom gweehn get rid a Sietan an aal a im diiman dem. Iina Revilieshan 20:3, 10 wi si se Sietan an im diiman dem naa go get fi chrik op di piipl dem iina di worl no muo.

Wa Gad gweehn du fi aal a di piipl dem we waahn fi liv anda fi im Kindom?

WA GAD KINDOM GWEEHN DU FI WI

Wen Jiizas a ruul di ort fram evn, im a-go du muor fi wi dan we eni ada govament eva du. An 144,000 piipl we Gad pik fram di ort a-go ruul wid Jiizas. (Revilieshan 5:9, 10; 14:1, 3) Jiizas a-go mek shuor se wa Jeuova waahn fi apm pan di ort apm. So wa a som a di sitn dem we Gad Kindom gweehn du fi di piipl dem we a-go liv pan di ort?

• Nobadi naa go get sik an nobadi naa go ded agen. Iina Aizaiya 33:24 di Baibl se: “Nobadi we liv de naa go se: ‘Mi sik.’ ” An iina Revilieshan 21:4 it se: “Nobadi naa go ded agen.”

• Gad Kindom a-go mek shuor se evribadi sief an liv iina piis. Aizaiya 54:13 tel wi se: “Yu pikni dem a-go aalwiez liv iina piis.” An Maika 4:4 shuo wi se “Dem a-go sidong anda dem uona vain an anda dem uona fig chrii, an nobadi naa go mek dem fiil fried.”

• Dem a-go enjai di wok we Jeuova gi dem fi du. “Di piipl dem we mi pik, aal a di wok we dem get fi du, dem gweehn lov it. Dem naa go a wok aad fi notn.”​—Aizaiya 65:22, 23.

• Di ort a-go get fiks op an kliin op. Aizaiya 35:1 se: “Di plies we ful op a bier bush an di lan we jrai bad, tingz a-go staat gruo de, aal som priti flowaz. An iina di dezot, flowaz a-go gruo an blasom de.”

• Gad Kindom a-go tiich piipl wa dem niid fi du fi liv fi eva. Jan 17:3 se: “Fi liv fi eva miin se dem nuo yu, di onggl wan we a riili Gad, an dat dem nuo Jiizas Krais, di wan yu sen kom.”

Yu si aal a dem gud sitn de we yu jos ier bout? Gad waahn yu fi enjai aal a dem. (Aizaiya 48:18) Di neks paat a-go shuo yu wa yu fi du so yu kyan get dem blesn de.