LESN 7
Di Kindom a Gad—A Wa?
1. Wa a riili di Kindom a Gad?
Wa mek Jiizas a di bes King?—MAAK 1:40-42.
Gad Kindom a wan govament we a ruul fram evn. It a-go get rid a di difrant difrant govament dem we a ruul aal uova di worl, an Gad govament a-go ruul insted. It a-go mek wa Gad waahn fi apm iina evn an pan di ort apm. Di nyuuz bout Gad Kindom a gud nyuuz. Suun suun, anda Gad Kindom, wi a-go av di gud govament we evribadi waahn, an it a-go mek evribadi liv iina piis an yuuniti pan di uol ort.—Riid Matyu 6:9, 10; 24:14; Luuk 1:33.
Wan kindom a wan govament we wan king ruul uova it. Jeuova put Jiizas inchaaj a fi im govament an mek im King, so Jiizas a di King a Gad Kindom.—Riid Revilieshan 11:15.
Wach da vidiyo ya Di Kindom a Gad—a Wa?
2. A wai Jiizas a di bes King fi ruul?
Jiizas a di bes King bikaa im kain, an im tan op fi wa rait. (Matyu 11:28-30) Di fak se Jiizas a-go ruul di ort fram evn miin se im av di powa fi elp piipl. Afta Jeuova did riez op Jiizas bak tu evn, im go sidong saida Gad pan im rait-an-said an wiet. (Iibruu 10:12, 13) Den afta dat, Gad gi im di powa fi staat ruul.—Riid Luuk 1:32, 33.
3. Uu a-go ruul wid Jiizas?
Jiizas a-go ruul iina evn wid som ada uoli wan. (Daniel 7:27) Jiizas apasl dem we did stik wid im a di fos uoli wan dem we get pik. An jos laik Jiizas, Gad mek dem kom bak alaiv wid wan spirit badi.—Riid Jan 14:1-3; 1 Korintiyan 15:42-44.
Di Baibl tel wi se 144,000 piipl a go a evn. Jiizas kaal dem wan ‘likl flak,’ an dem a-go ruul wid Jiizas uova di uol ort.—Luuk 12:32, NW.—Riid Revilieshan 14:1.
4. Wa did apm wen Jiizas staat fi ruul?
Gad Kindom did staat ruul iina 1914.a Afta Jiizas ton King, di fos ting we im did du a kik Sietan an im diiman dem dong a ort. Sietan did beks til im tempa staat bwail uova, an im staat kaaz nof chobl pan di ort. (Revilieshan 12:7-10, 12) So dat a wai wi av aal kain-a siknis we a kil aaf piipl, so moch waar, piipl a staav, an ortkwiek aal uova di worl. Dem ya a paat a di sain we mek wi nuo se Gad Kindom suun tek ful kanchuol a di uol ort.—Riid Luuk 21:7, 10, 11, 31.
5. Wa Gad Kindom a du nou, an we it a-go du iina di fyuucha?
Gad Kindom a elp wan uol iip a piipl fram aal uova di worl fi liv tugeda iina piis. Dis a bikaaz wan priichin work a gwaan aal uova di ort we a mek miliyanz a ombl piipl chuuz fi du an fala we Jiizas se. Gad Kindom a-go protek dem wen it dischrai da wikid worl ya roun wi. So aal a uu waahn get di blesn dem fram Gad Kindom afi lorn fi lisn tu Jiizas an du we im se fram nou.—Riid Revilieshan 7:9, 14, 16, 17.
Gad gweehn yuuz 1,000 ier an mek fi im Kindom bring bak di worl a mankain tu ou im did waahn it fi stie. Di uol ort a-go ton iina wan paradais. Afta aal a dat, Jiizas a-go gi bak di Kindom tu im Faada. (1 Korintiyan 15:24-26) Uu yu wuda laik fi tel bout aal a di gud sitn dem we Gad Kindom a-go du fi wi?—Riid 2 Piita 3:13.