Yuuz Di Yu Kyan Bi Api Nou An Fi Eva! Buk An Pamplet Wen Yu A Priich An Tiich

Wi riili api se wi get wan nyuu buk an pamplet fi stodi di Baibl wid piipl! Wi prie fi Jeuova bles di wok we wi a du fi elp muor piipl fi kom staat sorv im. (Mt 28:18-20; 1Kor 3:6-9) Ou wi kyan yuuz dem nyuu sitn ya we wi get?

Di buk we niem Yu Kyan Bi Api Nou An Fi Eva! mek wi si wan nyuu wie fi tiich piipl, so du dem sitn ya wen yu a get redi fi go du wan Baibl stodi an wen yu de a di Baibl stodi.a

• Riid di lesn an den unu taak bout di kwestiyan dem

• Di skripcha dem we se yu fi “riid” dem, mek shuor yu riid dem, an elp di sumadi fi si wa dem afi du wid wa dem a lorn an ou it kyan elp dem

• Plie di vidiyo dem, an yuuz di kwestiyan dem we de de fi taak bout wa yu lorn fram it

• Evritaim yu du di Baibl stodi chrai fi don wan a di lesn dem

Wen yu de a sorvis, gi di sumadi di pamplet fos fi si ef dem riili waahn di Baibl stodi. (Luk pan di paat we niem “Ou Wi Kyan Gi Sumadi di Yu Kyan Bi Api Nou An Fi Eva! Pamplet Di Fos Taim Wi Taak Tu Dem?”) Afta yu don stodi di pamplet wid dem an yu si se dem waahn lorn muor, gi dem di buk an staat wid lesn 04. Ef yu a yuuz di Teach Us buk ar di Remain In God’s Love buk fi du wan Baibl stodi, tap yuuz dem buk de an staat fi yuuz di Yu Kyan Bi Api Nou an Fi Eva! buk, an luk an si wich paat iina it yu fi staat di stodi fram.

WACH DI VIDIYO WI API FI DU DA BAIBL STODI YA WID YU, AN DEN ANSA DEM KWESTIYAN YA:

• Di sumadi we yu a stodi wid, wa dem a-go lorn wen dem stodi da nyuu buk ya?

• Wen yu jos staat stodi wid sumadi, wa mek yu fi shuo dem da vidiyo ya?

• Wa’a som a di sitn dem we yu fi elp di sumadi we yu a stodi wid fi du?​—Luk pan di paat we niem “Tingz We Wi Fi Luk Out Fa An Tingz We Dem Fi Du Iina Di Difrant Paat Dem”