Ou Di Sista Dem Kyan Get Fi Du Muor Tingz Fi Jeuova?

Di sista dem du wol iip fi elp out wid di wok we Gad Kindom a du. (Sa 68:11) A dem du nof a di Baibl stodi dem, an muos a di regila paiyanier dem, a di sista dem. Wol iip a di sista dem a wok aad a Betel, dem a mishineri, dem a wok iina kanschrokshan, an dem a du chransilieshan wok. Di sista dem elp dem fambili an ada piipl iina di kanggrigieshan fi sorv Jeuova beta. (Pr 14:1) Iivn duo di sista dem kyaahn ton elda ar ministiiriyal sorvant, dem kyan stil chrai fi du muor iina di kanggrigieshan. Ef yu a wan sista, wa’a som ada tingz we yu kyan du fi chrai fi du muor fi Jeuova?

• Wok aad fi bi di kain-a sumadi we Jeuova waahn yu fi bi.​—1Ti 3:11; 1Pii 3:3-6

• Ef yu nuo ou fi du sitn, chrai an elp out di ada sista dem we mait-a no nuo ou fi dwi’it.​—Tai 2:3-5

• Chrai fi go out iina sorvis muor an si ou yu kyan priich tu piipl an tiich dem beta

• Lorn ou fi taak wan neda langwij

• Muuv go wich paat dem niid muor piipl fi priich

• Sain op fi go wok a Betel ar fi go bil op di difrant difrant plies dem we wi worship Jeuova

• Sain op fi di School for Kingdom Evangelizers

WACH DI VIDIYO ‘DI UMAN DEM WE A WOK AAD FI DI LAAD,’ AN DEN ANSA DA KWESTIYAN YA:

• Di sitn dem we di sista dem iina da vidiyo ya se, ou dem mek yu fiil?