Elp Yu Baibl Stodi Dem Fi Get Rid A Naasi Doti Wiez

Onggl di piipl dem we a du wa Jeuova se rait kyan get fi bi gud gud fren wid im. (1Pii 1:14-16) Wen wi Baibl stodi dem wok aad fi tap du di bad sitn dem we dem a du, it a-go elp dem iina dem fambili laif, elp dem fi tek kier a demself gud, an iivn elp dem fi siev moni tu.

Elp dem fi nuo di sitn dem we Jeuova se rait an di sitn dem we im se rang. Mek dem nuo wa mek im se so, an wa mek it gud fi dem du di sitn dem we im se dem fi du. Elp dem fi si ou dem kyan chienj di wie ou dem tingk bout tingz, an dat wi elp dem fi du di tingz we Jeuova waahn dem fi du. (Ifii 4:22-24) Mek dem nuo se iivn ef a sitn we dem a du fram lang taim an dem fain it aad fi tap dwi’it, Jeuova kyan elp dem fi tap dwi’it. (Fil 4:13) Shuo dem ou dem kyan beg Jeuova fi elp dem wen dem fiil fi du sitn we dem nuo se rang. Elp dem fi si di sitn dem we dem fi kip we fram, we wuda mek it aad fi dem du wa rait. Elp dem fi si ou dem kyan du gud tingz we a-go elp dem insted-a du di bad sitn dem. Wen yu si ou Jeuova a elp yu Baibl stodi dem fi chienj op dem laif fi di beta, dat a-go mek yu api.

WACH DI VIDIYO ELP DI PIIPL DEM WE YU A STODI DI BAIBL WID FI GET RID A NAASI DOTI WIEZ, AN DEN ANSA DEM KWESTIYAN YA:

• 

  Ou Niita an di elda dem did shuo se dem biliiv se Juuli kuda tap du di bad sitn we shi did a du?

• 

  Wa els Niita did du fi elp Juuli?

• 

  Ou Juuli did shuo se shi waahn Jeuova fi elp ar?