Ou Fi Yuuz Di Baibl Stodi Vidiyo Dem

Wi av fuor Baibl stodi vidiyo fi yuuz wen wi a priich an tiich. A wen an wen wi fi yuuz dem?

• 

  Wai It Gud fi Stodi di Baibl?​—Langga Wan. Da vidiyo ya a fi mek piipl waahn fi stodi di Baibl no mata wa dem rilijan bi ar wa dem biliiv iina. It kyan push dem fi luk iina di Baibl fi fain di ansa tu di impuotant kwestiyan dem bout laif we a bada piipl. An it gi dem a likl prips a di ansa dem we dem kyan fain iina it. It tel dem ou dem kyan sain op fi wan Baibl stodi panlain tu.

• 

  Wai It Gud fi Stodi di Baibl? (Di Shaata Wan). Da vidiyo ya kyan yuuz fi du di sed ting we di langga wan mek fi du. Bot it mait-a beta fi yuuz iina som ieriya we piipl naa no wol iip a taim fi taak.

• 

  Wa Apm Pan Wan Baibl Stodi? Da vidiyo ya a fi mek dem nuo bout di frii Baibl stodi we wi du wid piipl an fi mek dem waahn fi dwi’it. It mek dem nuo wa gwaan pan wan Baibl stodi an ou dem kyan get wan.

• 

  Wi Api Fi Du Da Baibl Stodi Ya Wid Yu. Da vidiyo ya mek fi shuo di sumadi we yu a stodi di Baibl wid. Iivn duo da vidiyo ya de pan piej 2 a di Yu Kyan Bi Api Nou An Fi Eva! buk, yu kyan shuo it wen unu a du di Yu Kyan Bi Api Nou An Fi Eva! pamplet. Di vidiyo shuo dem ou di buk set op an wa dem kyan ekspek fi get outa it wen dem a stodi it.

Iivn duo di vidiyo dem did mek fi shuo sortn an sortn taim, yu kyan sen it tu piipl ar shuo dem ef yu tingk a wan gud taim fi dwi’it. Evri wan a wi we a priich an tiich fi mek shuor se wi get fi nuo dem vidiyo ya gud gud an yuuz dem op iina fiil sorvis.