1922​—Onjrid Ier Ago

“IM DID KOM OP WID SITN GUD”

Kaa wi did a priich iina nof muor plies, dem did niid uol iip muor buk an pamplet. Aalduo di breda dem a Bruklin Betel did a mek dem uona magaziin dem, dem stil did afi mek som ada fakchri print di buk dem. Bot stil fi kopl mont wel dem neehn av inof buk fi du di priichin wok. So Breda Rutherford aks Breda Martin, we did a di manija fi di fakchri, bout wa dem kuda du so dat dem kuda print muor buk.

Wen Breda Martin did ier Breda Rutherford se so, im se: “Im did kom op wid sitn gud kaa dis did miin tu se wi wuda afi get di sitn dem we wi niid an set dem op so dat wi kuda print wi buk dem wiself nou.” So di breda dem rent wan plies a 18 Kankyaad Schriit iina Bruklin an get di tingz dem we dem niid fi du di wok.

Bot a no evribadi did api bout dis. Di man we did inchaaj a di fakchri we did a print di buk dem fi wi, kom a wich paat wi did mek op nou fi print fi wi uona buk dem. Im se: “Unu mashiin dem big an nais bot nobadi we wok ya no nuo a ting bout ou fi yuuz dem. Mi a gi unu siks mont an si ef afta dat evri wan a dem mashiin ya we unu av no mash op.”

Bot Breda Martin did se: “Dat did soun laik it mek sens bot im neehn memba bout Jeuova, se a Im aalwiez a elp wi fi du di wok.” Breda Martin did rait, kaa likl afta dat di fakchri did a print bout 2,000 buk evridie.

YUUZ DI RIEDIYO FI PRIICH TU UOL IIP A TOUZN A PIIPL

So a neehn did jos dem uona buk dem did a print nou, bot Jeuova piipl did a yuuz di riediyo fi priich di gud nyuuz tu. A did pan Sonde aftanuun, Febiweri 26, 1922, Breda Rutherford did gi im fos taak pan di riediyo stieshan. Di taak we im did gi pan di KOG riediyo stieshan iina Las Anjeliis, Kalifuoniya we de iina Merika, did niem “Uol Iip A Piipl We A Liv Nou Naa Go Ded.”

A did bout 25,000 piipl did ier da taak de. An nof a dem did rait leta sen iin fi mek di breda dem nuo se dem did tangk dem fi dat. Wan a di leta dem did kom fram Willard Ashford we did liv iina Santa Ana iina Kalifuoniya. Im big op Breda Rutherford fi di “nais nais” taak we im did gi we evribadi did lov. An im did se: “A chrii sumadi a fi mi yaad did sik, so dem wudn kyan get fi ier di taak aal ef a did dong di ruod fram dem yu did de.”

Fi kopl wiik afta dat dem gi muor taak pan di riediyo. So bai di en a di ier Di Wach Towa did mek wi nuo se “bout 300,000 piipl did get fi ier di Baibl mesij pan di riediyo.”

So wen di breda dem did si umoch piipl did get fi ier di Baibl mesij kaaz a dis, dem se ye, it mek sens fi dem mek dem uona riediyo stieshan. So dem mek op dem uona riediyo stieshan pan piis a lan we dem did av iina Statn Ailan, no tuu faar fram di Betel we de iina Bruklin. So fi di neks kopl a ier dem, dem wuda yuuz da riediyo stieshan ya we niem WBBR fi mek nof nof piipl ier bout di gud nyuuz bout Gad Kindom.

“ADV”

Di Wach Towa fi Juun 15, 1922, did mek wi nuo se dem did a-go kip wan big kanvenshan iina Siida Paint we iina Owaiyo, fram Septemba 5 tu Septemba 13 iina 1922. Di Jeuova Witnis dem did api so til fi da kanvenshan ya.

Iina di taak we Breda Rutherford did gi fi welkom evribadi, im se: “Mi nuo fi shuor se Gad a-go bles wa gwaan a da kanvenshan ya an piipl a-go get fi nuo di chuut bout im muor dan eva bifuo.” Aal a di breda dem we did gi taak a da kanvenshan ya did mek evribadi nuo se fi priich bout Gad Kindom, a dat a di big ting.

An pan Fraide Septemba 8, a bout 8,000 piipl kom fi ier di taak we Breda Rutherford did a-go gi. Aal a dem did waahn fi nuo wa “ADV” did miin we did de pan di invitieshan we dem did get. Nof a di piipl dem did si wan big sitn we luk laik wan big piis a ruol op shiit eng op uova di stiej. Wan breda we niem Arthur Claus we did kom a di kanvenshan fram Tolsa Oklawuoma, we de iina Merika, did fain wan gud siit we wuda mek im si an ier evriting we a gwaan gud. Dis a did wan nais siit fi im fain kaa dem neehn av no maik dem diez de.

Fi mek shuor se di plies did kwaiyat wen Breda Rutherford a gi’im taak, di breda we did inchaaj fi mek wi nuo wa a-go gwaan pan di pruogram fi da paat de, did mek di breda an sista dem nuo se afta Breda Rutherford staat fi gi’im taak nobadi naa go get fi komiin. 9:30 pan di dat da sed maanin de Breda Rutherford staat fi riid wa Jiizas se iina Matyu 4:17, we se: “Di die suun kom wen evn a-go ruul uova di worl iina evri wie!” Wen im did a taak bout ou piipl wuda ier bout Gad Kindom, im se: “Jiizas did se wen im a ruul im a-go gyada di piipl dem we a stik tu im an a du wa im se no mata wa.”

Breda Claus did memba ou im did fiil wen Breda Rutherford did a gi’im taak. Im se: “Evribadi did a tek iin evri wod we Breda Rutherford did a se.” Bot den aal av a sodn Breda Claus fiil sik bad an did afi go kom out, bot im did fried se ef im kom out im wudn kyaahn kom bak iin. Bot im kom out aalduo im neehn waahn fi kom out.

Bot likl afta dat, im staat fi fiil beta. Im se wen im chrai fi go bak iin im staat fi ier wan uol iip a klapin. It mek im kin kech a faiya an mek im wel waahn fi go bak iin. So im se ef im iivn afi go klaim op pan di ruuf fi ier di res a di taak im a-go dwi’it. Breda Claus did a 23 dem taim de. Di winda dem we did op iina di siilin did uopm op so im se “dis did mek mi kuda ier gud.”

Bot a neehn im wan op de, som a im fren dem did op de wid im tu. Wan a dem did a Frank Johnson, an Frank aks im se: “Yu av wan shaap naif pan yu?”

Arthur se: “Ye man.”

An Frank se: “Yu ansa wi prieya man. Yu si da big shiit ya we tai op pan dem niel ya? It av sitn rait pan it ino. Lisn gud tu di Joj, a an wen yu ier im se, ‘gwaan go priich, gwaan go priich,’ yu fi kot di fuo piis a ruop we uol it op.”

So Arthur sidong wid di res a breda dem wid im naif iina im an a wiet so til Breda Rutherford riich da paat de a im taak. An Breda Rutherford kudn wiet fi riich da paat de iina di taak tu. So im mosi shout out loud an se: “Aal a unu we a du wa Jeuova waahn unu fi du, unu fi gwaan chos iina Gad an stik tu im no mata wa. So unu gwaan go du evriting we unu kyan du fi mek evribadi nuo bout di lai dem we di choch dem a tiich til yu na’av no muor choch we naa du wa Jeuova waahn dem fi du. Evribadi fi nuo se a Jeuova a Gad an Jiizas Krais a King uova aal a di king dem an Laad uova aal di laad dem. Dis a wan big die fi Jeuova piipl dem kaa di King a ruul ya nou. An a unu fi mek ada piipl nuo bout dis. So unu fi gwaan go priich, gwaan go priich, gwaan go priich, bout di King an im Kindom!”

Breda Arthur se im an di ada breda dem jos kot di ruop dem we uol op di shiit an di shiit jos uopm op. Yu did av dem wod ya rait dong pan di shiit: “Advertise the King and Kingdom.” So di “ADV” we did de pan di invitieshan did miin advataiz. So dis did a mek di breda an sista dem nuo se dem fi gwaan go priich.

WAN WOK WE WI API FI DU

Di kanvenshan we dem did kip a Siida Paint, Owaiyo, did mek di breda an sista dem si se di priichin wok we dem did afi du a wan impuotant wok. So di wan dem we did waahn fi du da wok de did api fi dwi’it. Wan kolpuota (we wi kaal paiyanier nou) we kom fram Oklawuoma iina Merika, rait se, “Wich paat dem yuus tu du di priichin wok a kuol di piipl dem yuus tu bon fi mek a livin. So dem did puor bad.” Wen dem ier wa Gad a-go du fi dem iina di magaziin we did niem Golden Age dem taim de, “dem dis staat fi baal so.” Dis a wa im se bout evriting, im se, “It a wan blesn fi mek di piipl dem fiil beta.”

Dem breda an sista de did si se dem fi du kwik kwik wa Jiizas se iina Luuk 10:2, wen im se: “Nof fuud de out de iina di fiil fi pik bot nof piipl no de fi gyada dem.” So bai di taim di ier fi don, dem did mek op dem main se dem naa go mek notn tap dem fram priich di gud nyuuz bout Gad Kindom tu piipl no mata wich paat dem de.