1924​—Onjrid Ier Ago

DEM STAAT FI YUUZ DI RIEDIYO FI PRIICH

Fi muor dan wan ier, di breda dem we de a Betel did a mek wan riediyo stieshan we niem WBBR pan Statn Ailan iina Nyuu Yaak Siti. Afta dem don kliin op di lan, dem bil wan big ous fi di wan dem we a wok pan di riediyo stieshan. An dem mek wan likl plies fi put aal a di sitn dem we dem did a wok wid. Wen dem don di wok, di breda dem staat fi put di difrant difrant paat dem a di ting dem tugeda so dat dem kyan staat priich pan di riediyo. Bot dem did av som uol iip a prablem fi saat out.

Di breda dem neehn fain it iizi fi put op di 300-fut-lang antena. An dem did fi put it op bitwiin 2 wudn puos, an wan a dem puos de a did 200-fut-lang. Di fos taim dem chrai fi put it op dem kudn dwi’it, bot dem gwaan chos iina Jeuova til dem get fi du it. Wan a di breda dem we niem Calvin Prosser, we did a wok pan it, se wen im did a luk pan tingz, “ef wi did get fi put it op di fos taim wi wuda big op wi ches an se, ‘Ye, luk ou wi gud!’” Bot kaaz it neehn wok out di fos taim, a Jeuova dem gi di big op fi wa dem du. Bot di prablem dem neehn don de-so.

Di riediyo ting did nyuu dem taim de, so it neva iizi fi dem get di ting dem we dem niid fi staat op di riediyo stieshan. So di breda dem fain wan 500-wat chranzmita we sumadi did av an a yuuz aredi. An dem neva bada bai wan maik, dem yuuz di maik fram wan telifuon. So fi tes out evriting we dem mek, wan nait iina Febiweri di breda dem aks som breda fi sing som a wi sang dem fram wi sang buk. Ernest Lowe memba da nait de wen di breda dem did a sing an dem get wan kaal fram Joj Rutherfordb we ier dem a sing pan di riediyo iina Bruklin bout 15 mail fram dem.

So Breda Rutherford tel dem se: “Tap di naiz we unu a mek! Unu soun laik som uol iip a kyat we a mek naiz!” So di breda dem ori op an lakdong di chranzmita kaa dem did fiil shiem, bot dem nuo se dem wuda aarait kaa dem did redi fi staat op di riediyo stieshan.

Pan Febiweri 24, 1924, wen dem fos go pan di riediyo Breda Rutherford se “di mien ting bout da riediyo stieshan ya a dat wi a-go yuuz it fi du di wok we Jiizas Krais, di King, gi wi fi du.” An im se: “Da riediyo stieshan ya a-go elp evribadi fi andastan di Baibl an di taim we wi a liv iina no mata wa dem biliiv iina ar wich choch dem a go.”

Evriting did gwaan gud di fos taim dem did kom uova di riediyo, an so fi di neks 33 ier, a di WBBR riediyo stieshan a di mien riediyo stieshan we dem yuus tu yuuz.

DEM NEVA FRIED FI MEK DI CHOCH LIIDA DEM NUO SE DEM RANG

Iina Julai 1924, di breda an sista dem did kom tugeda fi wan kanvenshan iina Kolombos we de iina Owaiyo. Dem did kom fram aal uova di worl fi ier di taak dem iina Arabik, Ingglish, French, Jorman, Griik, Ongariyan, Italiyan, Lituwieniyan, Puolish, Roshan, an iina di Skyandinievian langwij dem, an Yuukrieniyan langwij. An som a wa did gwaan did kom uova di riediyo stieshan, an dem did saat out tingz so dat wan a dem nyuuzpiepa kuda rait bout wa gwaan evridie a di kanvenshan.

Pan Julai 24, wan Torzde, uova 5,000 breda an sista we go a di kanvenshan go iina sorvis da die de, an dem gi out bout 30,000 buk an staat uol iip a Baibl stodi. Di Watch Tower did kaal da die de “di bes paat a di kanvenshan.”

Wan neda ting bout di kanvenshan a dat pan Fraide, Julai 25, iina wan a im taak dem, Breda Rutherford riid wan sitn fi mek di piipl dem nuo se wa di choch liida dem a du rang. Im se di palitishan dem, di choch liida dem, an di biznizman dem “no tap kip piipl iina di daak bout Gad Kindom we Gad a-go yuuz fi elp piipl an gi dem laif.” An im neehn tap de-so. Im se dem man ya “a sopuot di Liig a Nieshan an a mek it luk laik se ‘a Gad a yuuz dem fi ruul im piipl dem.” So di breda an sista dem wuda afi briev op demself fi go priich tu piipl bout dis.

Som taim afta dat, The Watch Tower rait sitn bout da kanvenshan ya we did gwaan a Kolombos wen it se: “It did elp di breda an sista dem fi chos iina Jeuova muor, . . . an it did elp dem fi tan op chrang tu an fi gwaan priich aalduo piipl did a fait gens dem kaa a wa dem biliiv iina.” Leo Claus, we did go a di kanvenshan did se: “Wi did wel api fi kya da mesij ya go gi piipl iina di ieriya we wi liv.”

Iina Aktuoba, di breda an sista dem staat gi out uol iip a di liiflet dem we niem Ecclesiastics Indicted, an dis did av iin wa Breda Rutherford did taak bout a di kanvenshan. Iina wan likl toun we niem Kliivlan we de iina Oklauoma, Frank Johnson gi out aal a di liiflet dem we im did av 20 minit bifuo di ada breda an sista dem kom pik im op. Im did afi gi out di liiflet dem anda di kwaiyat kaa som man iina di toun neva laik wa im did a du an dem did a luk fi im. So Breda Johnson did mek op im main se im a-go aid iina wan choch. Wen im si se di choch emti, im put som a im liiflet dem iina di paasta Baibl an pan aal a di siit dem, an den im lef di choch kwik kwik. Bot im did stil av som muor taim fi wiet pan di breda an sista dem, so im go a tuu muor choch an du di siem ting.

Frank ron go baka di plies we di breda an sista dem did fi pik im op an im aid baka wan gyas stieshan, an im did a luk out fi di man dem we did a luk fi im. Di man dem jos jraiv paas im kaa dem neehn si im. Wen dem gaan, di breda an sista dem we neehn a priich tuu faar fram we im did de, kom pik im op an di uol a dem jraiv aaf tugeda.

Wan a di breda dem se: “Wen wi did a lef di toun, wi paas di chrii choch dem, an a bout 50 piipl wi si tan op infronta evri wan a dem choch de. Som a di piipl dem did av di liiflet iina dem an an a riid it. An som ada wan did a uol it op fi di paasta si’it. Bwai, wi nieli get kech, bot wi tangk Jeuova fi protek wi an fi elp wi fi nuo wa fi du fi get we fram di wan dem we did a fait gens wi.”

IINA SOM ADA KONCHRI DI BREDA AN SISTA DEM BRIEV OP DEMSELF AN PRIICH

Iina som ada konchri, di breda an sista dem did briev op demself an staat priich tu. Iina di naat paat a Frans, Józef Krett priich tu som piipl we kom fram Puolan we did a wok iina di main. Im did fi gi wan taak we niem “Di Wan Dem We Ded Suun Kom Bak Alaiv.” Wen di piipl dem iina di toun get di invitieshan fi kom a da taak de, wan paasta waan im choch memba dem se dem no fi go. Bot a da taim de di piipl dem kom! Kaa muor dan 5,000 a dem kom a di taak, an iivn di paasta kom tu! Breda Krett tel di paasta se im fi tan op an taak bout wa mek im biliiv wa im biliiv, bot im se im naa dwi’it. Breda Krett get fi gi out aal a im buk an pamplet dem tu di piipl dem we kom kaa im si se di piipl dem did wel waahn fi nuo wa iina Gad Wod.​—Iemos 8:11.

Iina Afrika, Claude Brown kya di gud nyuuz go a di Guol Kuos we dem kaal Gaana nou. Di taak dem we im gi an di buk an pamplet dem we im gi out elp nof piipl fi nuo di chuut iina da konchri de iina no taim. John Blankson, we did a stodi a wan skuul fi ton wan faamasis, did go a wan a Breda Brown taak dem, an kwik a klak im si se a di chuut dis. Im se: “Wen mi did a lorn di chuut, it did mek mi fiil api, an mi kudn tap taak bout it wen mi did a go a di skuul.”

Wan die John go a wan Anglikan choch fi aks di paasta bout di Chriniti, kaa im did nuo se a neva sopm we di Baibl tiich. Bot di paasta ron im we an baal aafa im an se: “Yu a no wan Kristiyan; a di devl yu kom fram! Gwe fram ya-so!”

Wen im riich uom, John rait wan leta tu di paasta a aks im fi kom taak bout wa mek im biliiv wa im biliiv bout di Chriniti infronta som uol iip a piipl. Di paasta man no du notn muor dan mek di ed tiicha nuo wa John du, so di tiicha man kaal op John iina wan miitn. So im aks John ef im did rait tu di paasta fi chuu.

John se: “Yes sar, mi did dwi’it fi chuu.”

Di tiicha man tel John se im fi rait wan leta tu di paasta an tel im se im sari. So John rait se:

“Sar, Mi tiicha tel mi se mi fi rait fi tel yu se mi sari, bot mi onggl a-go rait dis ef yu taak di chuut se di sitn dem we yu a tiich iina yu choch a no wa di Baibl tiich.”

Di tiicha did fraitn, so im aks John se, “Blankson, a dis yu waahn fi rait?”

John se: “Yes, Sar. A onggl dat mi kyan rait.”

“Yu a-go get kik outa skuul. Ou yu fi taak gens di paasta fi di govament choch an stie iina govament skuul, iihn?”

“Bot, Sar, . . . wen yu a tiich wi an wi no andastan sopm, duohn wi aks yu kwestiyan?”

“Ye man, unu aks mi kwestiyan.”

“Wel, Sar, a dat did gwaan. Di paasta weehn a tiich wi bout di Baibl an mi aks im wan kwestiyan. Nou ef im kyaahn ansa di kwestiyan, wa mek mi fi rait an tel im se mi sari?”

Blankson neehn get kik outa skuul, an im neehn afi rait se im sari tu di paasta man niida.

DI BREDA AN SISTA DEM DID API FI DU MUOR WOK

Wen wi luk pan evriting we did gwaan iina da ier ya, The Watch Tower se: “Wi kyan se laik we Dievid se wen im taak bout ou Jeuova gi im di chrent fi win di waar. (Saam 18:39) Da ier ya a did wan big ier fi wi kaa wi si se Jeuova elp wi fi du im wok . . . An wi si se di wan dem we a sorv im . . . api fi priich di gud nyuuz.”

Lieta iina di ier di breda dem plan op fi av wan neda riediyo stieshan nier Chikaago. Da riediyo stieshan ya did niem WORD. Da nyuu riediyo stieshan ya did a yuuz wan 5,000-wat chranzmita, an dis did mek piipl we liv faar faar, aal wie op iina Kyanada, kuda ier wa a gwaan pan it.

Iina di ier 1925, Jeuova elp di breda an sista dem fi andastan som nyuu tingz bout Revilieshan chapta 12. An kaaz a dis, som piipl did en op tap sorv Jeuova. Bot nof a di breda an sista dem did glad fi nuo dem nyuu tingz ya bout Jeuova aaganaizieshan we de a evn, an fi andastan wa dis did av fi du wid Gad piipl we de pan ort.