Jeuova A-Go Elp Yu Wen Yu A Go Chuu Som Rof Taim

1-2. Wa a som a di sitn dem we Jeuova piipl dem mait-a go chuu?

SOM bad sitn kyan apm iina laif we kyan chienj op tingz iina wi laif aal av a sodn. Laik wan breda we niem Luisa did get sik bad wid kyansa, an dakta tel im se im onggl av kopl mont lef fi liv. An wan sista we niem Monika an ar ozban did a du wol iip a tingz fi Jeuova. Den wan die shi fain out se ar ozban we did a wan elda did a aid an du som wol iip a bad sitn fi wol iip a ier. Wan neda sista, we niem Olivia we neehn marid, did afi lef ar ous wen shi ier se wan big orikien a kom. Wen shi go baka ar yaad, shi si se di orikien mash op ar ous. So iina no taim dem breda an sista ya laif ton opsaid dong. Notn eva apm tu yu yet we mek yu laif ton opsaid dong aal av a sodn?

² Aalduo wi a sorv Jeuova, it no miin tu se wi naa go av no prablem iina wi laif laik wa ada piipl a go chuu. Wi mait-a av piipl a fait gens wi an a mek tingz aad fi wi kaa wi a sorv Jeuova. Bot aalduo Jeuova naa go tap dem sitn ya fram apm tu wi, im pramis wi se im a-go elp wi fi go chuu dem. (Aiz. 41:10) An wen im du dat, wi kyan go stil api an du wa rait an stik tu im aal wen wi a go chuu dem rof taim de. Iina da lesn ya, wi a-go luk pan fuor sitn we Jeuova du fi elp wi wen wi a go chuu wan rof taim iina wi laif. An wi a-go luk pan wa wi niid fi du so dat im kyan elp wi.

JEUOVA A-GO GI WI PIIS IINA WI AAT AN IINA WI MAIN

3. Wen sitn bad apm iina wi laif, wa wi mait-a fain it aad fi du?

³ Wa mek it mait-a aad. Wen sitn bad apm iina wi laif, wi mait-a fain it aad fi tingk chriet an fi nuo wa fi du. Dis a kaa wi aat mait-a evi kaa wi a tingk bout wol iip a tingz we a mek wi wori an fret. It mait-a fiil laik se wi a waak somwe we av wol iip a fag so wi kyaahn si gud fi nuo wich paat fi go. Luk pan wa di tuu sista dem we wi jos taak bout did se. Olivia se: “Afta di orikien mash op mi ous, mi did fiil laik se it tu moch fi mi.” An Monika, we ar ozban did a du di wol iip a bad sitn dem, se: “It did riili ort mi, mi did fiil laik se sumadi tab mi op iina mi aat. It komiin laik se mi neehn nuo ou fi du notn agen. Mi neva tingk se sitn laka dis kuda apm tu mi.” Wa Jeuova pramis wi se im a-go du fi elp wi wen wi fiil laik se wi kyaahn manij no muor?

4. Azkaadn tu Filipiyan 4:6, 7, wa Jeuova pramis wi se im a-go du fi wi?

⁴ Wa Jeuova a-go du fi wi. Im pramis wi se im a-go gi wi “piis iina [wi] aat an main.” (Riid Filipiyan 4:6, 7.) Da piis de we im a-go mek wi fiil iina wi aat an main a wa wi a-go get kaa wi an im kluos kluos. An da piis ya a wan piis “we [wi] kyaahn iivn andastan.” Yu eva fiil da piis de “iina [yu] aat an main” afta yu prie tu Jeuova bout sitn?

5. Ou di piis we Gad gi wi mek wi na’afi wori bout notn?

⁵ Di siem vors tel wi se di piis we Gad gi wi, im a-go gi wi iina wan wie so wi “no afi wori bout notn.” Dat wuda komiin laik wen som suoja a gyaad wan siti so dat di piipl dem we liv de na’afi wori bout notn. An dis mek di piipl dem kyan sliip an no wori bout notn kaa sumadi a gyaad di siti. A siem so di piis we Gad gi wi mek wi na’afi wori bout notn, an dat mek wi fiil kaam kaa wi nuo se a Jeuova a kip wi sief. (Sa. 4:8) An aal ef tingz no chienj fi di beta iina wi laif sed taim laik wa did gwaan wid Ana, wi stil kyan fiil wan piis iina wi aat an main. (1 Sam. 1:16-18) An a wen wi fiil kaam wi fain se wi kyan tingk chriet an du wa rait.

6. Ef wi waahn di piis we kom fram Gad, a wa wi fi du? (Luk pan di picha tu.)

⁶ Dis a wa wi fi du. Wen chobl tek wi, wi fi prie tu Jeuova an aks im fi elp wi. An den im a-go gi wi di piis we kom fram im. (Luuk 11:9; 1 Tes. 5:17) Luis, we wi did taak bout aredi, tel wi bout wa im an im waif Ana did du wen dem did fain out se im sik bad an suun ded. Im se: “Wen sitn laka dis apm, it no iizi fi sumadi mek op dem main bout wa dem a-go du an di kain-a dakta chriitment we dem a-go tek. Bot wa did elp wi a dat wi prie tu Jeuova an im mek wi fiil di kain-a piis we kom fram im.” Luis an im waif se dem prie aad tu Jeuova uova an uova an aks im fi gi dem piis iina dem aat an main, an fi mek dem nuo di bes ting fi du. An dem kuda si se Jeuova did elp dem. A siem so ef chobl tek yu, no tap prie tu Jeuova an aks im fi elp yu an den yu a-go fiil di piis iina yu aat an main we kom fram im.​—Ruo. 12:12.

A JEUOVA A-GO MEK YU TAN OP CHRANG

7. Ou wi mait-a fiil wen wi a go chuu som rof taim?

⁷ Wa mek it mait-a aad. Wen wi a go chuu wan rof taim, wi mait no fiil an du tingz laik ou wi wuda naamali du it wen wi aarait. Wi mait-a fiil laik se wi ed de aal uova di plies. Ana, we wi jos taak bout, se afta Luis ded, ar fiilinz did de aal uova di plies. Shi se: “Wen mi fiil laik notn no lef iina mi fi go aan no muor, den mi wuda staat fi fiil sari fi miself. An mi wuda iivn staat fi fiil beks se im ded.” An pan tap a dat, Ana wuda fiil laik shi na’av nobadi an fiil laik shi no nuo wa fi du, speshali wen shi wuda afi du som a di ting dem we Luis wuda naamali du. Som a di taim shi wuda fiil laik se shi de iina wan staam outa sii. Bot a ou Jeuova elp wi wen wi fiil laik wi a baks bout aal uova di plies?

8. Bies pan wa 1 Piita 5:10 se, wa Jeuova mek wi nuo se im a-go du fi wi?

⁸ Wa Jeuova a-go du fi wi. Jeuova mek wi nuo se im a-go mek wi tan op chrang. (Riid 1 Piita 5:10.) Wen wan ship de outa sii an staam a gwaan, di ship mait-a staat fi shiek op shiek op. So fi diil wid dis an no mek it shiek op shiek op so, dem av sitn pan di tuu said a di ship we komiin laka fin we kyan uopm op anda di waata fi mek it no muuv op muuv op tu moch an so dat di piipl dem pan di ship kyan fiil sief. An muor taim dis wok beta wen di ship a muuv. A siem so Jeuova kyan elp wi fi tan op chrang an no gi op ef wi no tap sorv im wen wi a go chuu wi chraiyal dem.

9. Wen wi yuuz di sitn dem we Jeuova gi wi, ou it kyan elp wi fi kanchuol ou wi fiil? (Luk pan di picha tu.)

⁹ Dis a wa wi fi du. Wen yu a go chuu wan rof taim we komiin laik wan staam, no tap prie tu Jeuova an go a miitn an dem ting de. Aalduo yu mait-a naa du di mount a tingz we yu yuus tu du fi Jeuova, no fiil no wie, kaa Jeuova nuo wa yu a go chuu. (Luk pan Luuk 21:1-4.) Mek shuor se yu mek taim fi du yu uona Baibl stodi an fi tingk bout wa yu a riid, kaa Jeuova a yuuz im aaganaizieshan fi gi wi wol iip a tingz we wi niid fi elp wi fi go chuu wi prablem dem. Fi fain som a di sitn dem we kyan elp yu, go pan di JW Library^® ap, ar Wachtowa LAIBRI PANLAIN, an yu kyan yuuz ada tingz laik di Sitn We Di Jeuova Witnis Dem Kyan Yuuz Fi Luk Op Tingz tu. Monika, we wi taak bout aredi, se shi yuuz dem sitn ya wen shi fiil laik se shi a go chuu wan rof taim. Shi wuda luk op tingz laik “beks,” an som ada taim shi wuda luk fi tingz we av fi du wid wen sumadi ton dem bak pan sumadi, ar tingz we av fi du wid ou wi kyan stik tu sumadi. An den shi wuda riid dem sopm ya til shi fiil beta. Shi se: “Wen mi did staat fi luk op dem sitn ya, mi did a wori an fret. Den it jos komiin laik se Jeuova gi mi wan big og. An di muor mi riid mi get fi si se Jeuova andastan di wie ou mi fiil an im did a elp mi.” So wen yu du dem sitn ya, Jeuova a-go elp yu fi tan op chrang an go chuu til tingz get beta.​—Sa. 119:143, 144.

JEUOVA A-GO DE DE FI YU

10. A ou wi mait-a fiil afta sitn bad apm tu wi?

¹⁰ Wa mek it mait-a aad. Afta sitn bad apm tu wi, som a di taim wi mait-a fiil laik se wi no chrang inof fi du notn ar wi mait no fiil laik se wi kyan du notn. Wi mait-a komiin laik sumadi we yuus tu ron faas an aal av a sodn dem en op a ap. So som tingz we wi mait-a did fain iizi fi du, wi mait-a fain it aad fi du ya nou. Ar tingz we wi yuus tu lov fi du, wi mait-a fain se wi no lov fi du dem so moch agen. Wi mait-a fain it aad fi du kaa aal wi waahn fi du a jos sliip. (1 Ki. 19:5-7) Bot wa Jeuova se im a-go du fi wi wen wi fiil dem wie ya?

11. Wa els Jeuova a-go du fi elp wi? (Saam 94:18)

¹¹ Wa Jeuova a-go du fi wi. Jeuova pramis wi se im a-go de de fi wi. (Riid Saam 94:18.) Jos laik di sumadi we yuus tu ron faas, ef dem get ort dem a-go niid elp. A siem so wen sopm apm we ort wi, wi a-go niid elp tu fi gwaan sorv Jeuova. An a dem taim de Jeuova tel wi se: “Mi, Jeuova yu Gad, mi a uol aan pan yu rait an. Mi a di Wan we a tel yu se, ‘Yu no fi wori an fret bout notn kaa mi a-go elp yu.’” (Aiz. 41:13) A da kain-a elp ya Dievid did get tu. Wen im did a go chuu wol iip a chraiyal an im enimi dem did a mek tingz aad fi im, im mek Jeuova nuo se im nuo se Im a-go yuuz Im rait an fi elp im. (Sa. 18:35) Bot a ou Jeuova a elp wi?

12. A uu an uu Jeuova mait-a yuuz fi elp wi wen wi fiil laik wi kyaahn go aan no muor?

¹² Som a di taim wen sitn apm tu wi, Jeuova yuuz ada piipl fi elp wi. Laik wan a di taim wen Dievid did fiil laik im kyaahn go aan no muor, im fren Janatan go luk fi im an taak tu im an mek im fiil beta. (1 Sam. 23:16, 17) An a siem wie Jeuova did mek Ilaisha go du tingz fi elp Ilaija. (1 Ki. 19:16, 21; 2 Ki. 2:2) A siem so Jeuova mait-a yuuz wi fambili dem an wi fren dem, ar di elda dem iina di kanggrigieshan fi elp wi. Bot som a di taim wen sitn apm we ort wi bad, wi mait-a fiil laik se wi waahn fi kip we fram piipl. An muo taim a so piipl fiil wen sitn apm tu dem. Bot wa wi fi du ef wi waahn Jeuova fi elp wi?

13. Wa wi no fi du ef wi waahn fi get di elp we Jeuova a gi wi? (Luk pan di picha tu.)

¹³ Dis a wa wi fi du. Chrai aad fi no kip we fram ada piipl. Kaa ef wi du dat, wi mait-a staat fi tingk onggl bout wiself an wa wi a go chuu. An ef a dat wi a du, ef wi afi mek op wi main bout sitn wi mait-a en op no du di rait ting. (Pr. 18:1) Ye, wi afi tan bai wiself som a di taim, wos wen wi a go chuu wan rof taim. Bot ef wi fi kip we fram ada piipl fi wan lang taim, dis mait-a mek wi no get di elp we Jeuova a gi wi. So iivn duo it mait-a aad, tek di elp we yu a get fram yu fambili, yu fren dem, an di elda dem kaa Jeuova a yuuz dem fi elp wi.​—Pr. 17:17; Aiz. 32:1, 2.

JEUOVA A-GO OSH YU

14. Wa an wa kuda apm we mait-a mek wi fiil fried?

¹⁴ Wa mek it mait-a aad. Yu mait-a av som taim wen yu fiil fried. Di Baibl tel wi bout som piipl we did fiil fried kaaz a wa dem did a go chuu. (Sa. 18:4; 55:1, 5) A siem so wi mait-a fiil fried kaa piipl a fait gens wi wen wi de a skuul ar wen wi de a wok. An wi fambili ar di govament mait-a a fait gens wi tu. Wi mait-a aal fried kaaz wi en op sik bad an wi fiil laik se wi a-go ded. Wen dem sitn ya apm, wi mait-a fiil laik wan pikni we kyaahn du notn fi demself. Bot a ou Jeuova a-go elp wi wen wi a go chuu dem sitn ya?

15. Wa Saam 94:19 se Jeuova a-go du fi wi?

¹⁵ Wa Jeuova a-go du fi wi. Jeuova osh wi an kaam wi aat. (Riid Saam 94:19.) Dis mait-a mek wi tingk bout wan likl pikni we fried bad an kyaahn sliip kaa rien a faal aad an tonda a ruol. Wi kyan jos si ar faada a go fi ar, an pik ar op, an uol ar iina im an dem til shi jrap bak asliip agen. So iivn duo di rien stil a faal an tonda stil a ruol, kaa shi iina ar faada an an im a osh ar, it mek ar fiil beta. A sed ting wid wi tu, wen wi a go chuu wan rof taim, a siem so wi waahn Jeuova fi osh wi an mek wi fiil sief. A ou Jeuova a-go du dat?

16. Wa wi fi du ef wi waahn Jeuova fi osh wi? (Luk pan di picha tu.)

¹⁶ Dis a wa wi fi du. Yu fi prie tu Jeuova an riid im wod aafn. (Sa. 77:1, 12-14) So wen tingz a apm iina yu laif we mek yu schres out, di fos ting we yu a-go du a prie tu Jeuova. Mek im nuo aal a wa a gwaan wid yu an wa mek yu fried. An den mek im yuuz im Wod di Baibl fi osh yu. (Sa. 119:28) Yu mait-a fain se wen yu riid sortn paat a di Baibl, it mait-a osh yu an mek yu fiil beta. Laik wen yu riid di buk a Juob, Saam, an Pravorbz, ar wa Jiizas se iina Matyu chapta 6. Wen yu du dat, yu a-go si se Jeuova de de fi osh yu an fi mek yu fiil beta.

17. Wa wi kyan nuo fi shuor se?

¹⁷ Wi kyan nuo fi shuor se Jeuova aalwiez a-go de de fi wi wen wi a go chuu wan rof taim. Im naa go lef wi. (Sa. 23:4; 94:14) Jeuova pramis wi se im a-go gi wi piis iina wi aat an main, im a-go mek wi tan op chrang, im a-go de de fi wi an im a-go osh wi. Aizaiya 26:3 se dis bout Jeuova: “Di wan dem we aalwiez a dipen pan yu, yu a-go kip dem sief; an dem a-go aalwiez av piis iina dem aat an main, kaaz a yu dem chos iina.” So gwaan chos iina Jeuova an du aal a di sitn dem we yu fi du so dat im kyan elp yu. Wen yu dat, yu a-go get di chrent we yu niid fi tan op chrang an no gi op wen yu a go chuu yu prablem dem.