Wa Kyan Elp Wi Fi Api So Til Wen Wi A Priich?

1. A ou som breda an sista fiil wen dem fi go priich tu piipl? (Luk pan di picha tu.)

WI PRIICH tu piipl kaa wi lov wi Faada Jeuova, an wi waahn piipl fi nuo im tu. Wol iip a breda an sista lov fi du di priichin wok. Bot som a dem no so api fi dwi’it, kaa dem mait-a fried fi taak tu piipl an som mait-a fiil laik se dem kyaahn tiich gud. Ar som mait-a fried fi go a piipl yaad go taak tu dem kaa dem neva tel dem fi kom a dem yaad. Ar som fried se piipl a-go beks wid dem an no lisn tu dem. An som mait-a no waahn fi av no prablem wid piipl. So aalduo dem lov Jeuova, dem wan ya mait-a fain it aad fi go taak tu piipl bout di gud nyuuz. Bot dem nuo se da wok ya a wan impuotant wok fi dem du so dem a dwi’it. So Jeuova mos api wen im si dem a dwi’it stil!

2. Ef yu no so api wen yu a du di priichin wok, wa mek yu no fi fiil no wie?

² Yu mait-a fiil laik dem breda an sista ya, bot no fiil no wie. Kaa yu fried fi taak tu piipl, dis mait-a shuo se yu ombl an yu no waahn nof piipl a si yu, ar yu no waahn fi iina no prablem wid nobadi. An nobadi no waahn piipl fi ron dem, wos wen a sitn gud yu a chrai du fi dem. Yu Faada Jeuova iina evn nuo wa mek yu mait-a fiil dem wie ya an im waahn fi elp yu tu. (Aiz. 41:13) Iina da lesn ya, wi a-go luk pan faiv tingz we wi kyan du we kyan elp wi fi diil wid ou wi a fiil an we kyan elp wi fi api wen wi a priich tu piipl.

MEK GAD WOD GI YU DI CHRENT WE YU NIID

3. A wa did elp di prafit Jerimaiya fi priich tu ada piipl?

³ Fram eva sins, di mesij we de iina Gad Wod aalwiez gi im piipl dem di chrent we dem niid fi du sitn we dem mait-a fain aad fi du. Laik yu did av di prafit we niem Jerimaiya we did fried fi go du di priichin wok we Jeuova gi im fi du. So im se: “Mi a jos wan bwai, an mi fried fi taak tu piipl.” (Jer. 1:6) Wa did elp im fi no fried fi taak tu piipl a dat Gad Wod gi im di chrent we im niid. Im se: “It did fiil laik se faiya shot op iina mi buon dem, so mi kudn kip it iina mi no langga.” (Jer. 20:8, 9) Aalduo di piipl dem we Jerimaiya did afi priich tu did stoban an aad iez, di mesij we im did afi priich did gi im di chrent we im niid fi du di wok.

4. Wa it du fi wi wen wi riid Gad Wod an sidong an tingk bout it? (Koloshan 1:9, 10)

⁴ Wen di Kristiyan dem riid wa Gad Wod a se, it gi dem di chrent we dem niid. Wen di apasl Paal rait tu di Kristiyan dem iina di kanggrigieshan iina Kolasi, im mek dem nuo se ef dem get fi nuo di chuut bout Jeuova an Jiizas, it wi push dem fi “liv laik Gad piipl” wen dem a gwaan “du aal kain-a gud sitn.” (Riid Koloshan 1:9, 10.) Wan a dem gud sitn de a fi priich di gud nyuuz. So wen wi riid di Baibl an sidong an tingk bout di sitn dem we iina it, it a-go mek wi chos iina Jeuova muo an it a-go mek wi nuo se a wan big ting fi a priich bout Gad Kindom govament tu piipl.

5. Wa wi no fi du wen wi a riid an stodi Gad Wod ef wi waahn it fi elp wi?

⁵ Wen yu a riid an stodi Gad Wod an a tingk bout wa yu a riid, no ries chuu it, els it naa go elp yu. An ef yu a riid wan skripcha an yu no andastan it, no jos lef it an gwaan. Yuuz di Watch Tower Publications Index ar di Research Guide for Jehovah’s Witnesses fi fain out wa di vors riili a se. So ef yu no ries chuu di Baibl wen yu a stodi it, it a-go mek yu chos di sitn dem we yu a riid iina Gad Wod. (1 Tes. 5:21) Di muo yu chos iina Gad Wod a di muo yu a-go api fi tel ada piipl bout di sitn dem we yu a lorn.

REDI OP YUSELF FI GO PRIICH

6. Wa mek bifuo wi go du di priichin wok wi fi nuo wa wi a-go se an wa wi a-go du?

⁶ Ef yu nuo wa yu a-go se an wa yu a-go du wen yu a priich tu piipl, yu a-go fiil beta wen yu a taak tu dem. Jiizas did elp im falara dem fi du dis bifuo im sen dem out fi go priich. (Luuk 10:1-11) An kaa dem du di sitn dem we Jiizas tel dem fi du, dem fiil api fi wa dem kuda du iina di priichin wok.​—Luuk 10:17.

7. Wa wi kyan du fi redi op wiself fi go priich? (Luk pan di picha tu.)

⁷ Wan ting we wi fi du a tingk bout wa wi a-go se wen wi a priich tu piipl an wa wi kyan se fram wi aat wen wi a dwi’it. Wan neda ting we wi kyan du a tingk bout tuu ar chrii tingz we piipl mait-a se ar du iina di ieriya we wi a priich, an tingk bout ou yu wuda ansa dem. An wen wi go fi taak tu dem, wi fi chrai an iizi wiself an sumail wid dem, an taak tu dem laik a yu fren yu a taak tu.

8. A ou di Kristiyan dem komiin laik som pat we mek out klie we di apasl Paal did taak bout?

⁸ Di apasl Paal tel di breda an sista dem se: ‘Wi a laik som pat we mek outa klie an Gad gi wi di powa fi tiich piipl, dat a laik wan chrezha.’ (2 Kor. 4:7) So di chrezha a di priichin wok we Gad gi wi fi du. (2 Kor. 4:1) An di pat dem we mek outa klie a Gad piipl dem we a du di priichin wok. Iina di taim wen Paal did de bout, di piipl dem we sel tingz yuus tu kyari tingz laik fuud, wain, an moni we wot nof iina dem pat de. A siem so di mesij we Jeuova gi wi fi priich wot nof. So im a-go gi wi di chrent we wi niid fi kyari da mesij ya tu piipl.

AKS JEUOVA FI ELP YU FI NO FRIED

9. A wa kyan elp wi fi no fried a piipl? (Luk pan di picha tu.)

⁹ Som a di taim wi mait-a fried a piipl ar fried se dem naa go lisn tu wi. A ou it kyan elp wi fi no fried? Mek wi luk pan wa di apasl dem did prie an se wen som piipl did tel dem se dem no fi priich. Wa dem du a aks Jeuova fi elp dem “fi pred [im] mesij an no fried a notn.” An Jeuova ansa dem siem taim. (Aks 4:18, 29, 31) Ef yu fain se yu fried a piipl som a di taim, yu kyan prie tu Jeuova an aks im fi elp yu fi no fried a piipl bot fi mek yu lov dem.

10. Wa a som a di sitn dem we Jeuova gi wi fi elp wi du di priichin wok? (Aizaiya 43:10-12)

¹⁰ A Jeuova se wi a im Witnis, an im pramis wi se im a-go elp wi fi no fried. (Riid Aizaiya 43:10-12.) Mek wi luk pan fuor a di wie dem we im elp wi. Fos, im mek Jiizas de de wid wi wen wi a priich. (Mat. 28:18-20) Sekan ting, a dat im mek im ienjel dem elp wi tu. (Rev. 14:6) An di tord ting im du a dat im gi wi im uoli spirit fi elp wi fi memba tingz we wi lorn bout im. (Jan 14:25, 26) An di fuot ting we im gi wi a wi breda an sista dem fi priich wid wi. So wid Jeuova elp an di elp we wi get fram wi breda an sista dem, wi av evriting we wi niid fi du di priichin wok.

REDI FI CHIENJ OP DI WIE OU YU PRIICH AN FI LUK PAN TINGZ IINA DI RAIT WIE

11. Wa yu kyan du fi get muo piipl fi priich tu? (Luk pan di picha tu.)

¹¹ Yu fiil a wie kaa yu kyaahn fain nof piipl a dem yaad wen yu de a sorvis? Ef a so yu fiil, aks yuself dem kwestiyan ya: ‘A wich paat di piipl dem we liv iina da ieriya ya de ya nou?’ (Aks 16:13) ‘Dem de a wok ar dem a shap’m?’ Ef a dem plies ya dem de, yu tingk yu kuda go pan di ruod go priich tu piipl? Wan breda we niem Jashwa se, “Mi fain nof piipl fi priich tu wen mi go pan di plaaza dem an iina di kyaar paak dem we nof piipl de.” Im an im waif Bridget fain se dem get nof piipl a dem yaad wen dem go a sorvis iina di iivnin an pan Sonde iina di die.​—Ifii. 5:15, 16.

12. A ou wi kyan get fi nuo wa piipl waahn fi taak bout an wa dem biliiv iina?

¹² Ef yu fain se piipl no riili waahn fi lisn tu wa yu a taak bout wen yu a priich, chrai fi fain out bout wa dem waahn fi taak bout ar wa dem biliiv iina. Jashwa an Bridget yuuz di kwestiyan we de pan di front paat a wan liiflet fi staat fi taak tu piipl. Laik dem yuuz di liiflet we niem Wa Yu Tingk Bout di Baibl? an den dem se: “Som piipl tingk se di Baibl a wan buk we kom fram Gad an som no fiil so. Wa yu tingk bout it?” An muor taim dis mek dem get fi taak tu di sumadi.

13. Wa mek wi kyan stil api wen wi de a sorvis aal ef wi no get nobadi fi taak tu? (Pravorbz 27:11)

¹³ Aal ef wi no get fi taak tu nobadi wen wi go a sorvis, wi stil get fi du wa Jeuova an im Bwai Pikni waahn wi fi du​—wi stil a priich bout im. (Aks 10:42) So aal ef dem no lisn tu wi, wi stil kyan api kaaz wi nuo se wa wi a du a mek wi Faada, Jeuova api.​—Riid Pravorbz 27:11.

14. Wa mek aal a wi api wen sumadi els fain sumadi fi priich tu we waahn fi lorn muor bout Jeuova?

¹⁴ Wi kyan stil api aal ef a sumadi els fain sumadi fi taak tu we waahn fi lorn muor. Di Wachtowa taak bout di priichin wok we wi a du an se it komiin laik wen piipl a sorch fi wan pikni we laas. So wol iip a piipl a luk fi di pikni an dem a luk iina som difrant difrant ieriya fi im. Wen sumadi fain di pikni, evribadi api​—no jos di sumadi we fain im. A siem so wid di priichin wok we wi a du fi elp piipl fi ton Jiizas falara, a evribadi a wok tugeda fi dwi’it an wi a wok iina difrant difrant ieriya fi dwi’it. An wen sumadi staat fi kom a miitn an dem ting de, aal a wi api.

YU FI AALWIEZ A TINGK BOUT UMOCH YU LOV JEUOVA AN YU NIEBA DEM

15. Wen wi du wa Matyu 22:37-39 se, a ou dat kyan elp wi fi waahn fi du di priichin wok? (Luk pan di picha pan di kova tu.)

¹⁵ Wen yu tingk bout umoch yu lov Jeuova an wi nieba dem, it a-go mek yu wel waahn fi du di priichin wok. (Riid Matyu 22:37-39.) Jos tingk bout ou it mek Jeuova api wen im si wi a du di priichin wok, an ou api piipl a-go bi wen dem staat fi stodi di Baibl! An tingk bout ou piipl a-go get siev kaa dem lisn tu di mesij we wi priich an du wa it se dem fi du.​—Jan 6:40; 1 Tim. 4:16.

16. Aal ef wi kyaahn lef wi yaad fi go priich, ou wi kyan stil api fi priich tu piipl? Tel wi bout wa did apm tu wan breda an im waif.

¹⁶ Ef sopm apm tu yu we mek yu kyaahn lef yu yaad, tingk bout wa yu kyan stil du fi mek Jeuova an yu nieba dem si se yu lov dem. Laik wen KUOVID-19 did a go roun, Samwel an Dania kudn lef dem yaad. Bot wen dat did a apm dem priich pan di fuon an rait leta an dem yuuz Zoom fi stodi di Baibl wid piipl. Samwel did afi go klinik fi get chriitment fi kyansa, an wen im di de im priich tu piipl tu. Im se: “Wen sumadi a go chuu wan aad taim it kyan mek dem wori an fret, an it kyan mek dem sik an mek dem fiil laik dem no waahn sorv Jeuova no muo. Bot wi fi api wen wi a sorv Jeuova.” An wen aal a dis did a gwaan, Dania faal dong an afi tan iina ar bed fi chrii mont, an afta dat shi did iina wiil chier fi siks mont. Shi se: “Mi chrai fi du evriting we mi kuda du. So mi priich tu wan nors we kom luk bout mi an mi priich tu enibadi we kom a di ous. Mi aal get fi taak kopl taim tu wan uman we wok a wan plies we sel tingz we di dakta dem yuuz.” So Samwel an Dania kudn get fi du nof iina di priichin wok agen, bot dem du wa dem kuda du an dat mek dem api.

17. Ef yu waahn fi get di elp we yu niid fram da lesn ya, wa yu fi du?

¹⁷ Chrai fi du aal a di faiv sitn dem we da lesn ya se wi fi du. It komiin laik wen yu a kuk sitn, yu afi put iin aal a di sitn dem we yu niid fi di fuud kom out nais. A siem so wen wi du aal a di sitn dem we wi lorn iina da lesn ya, it a-go mek tingz ton out nais fi wi an it a-go elp wi wen wi fiil a wie kaaz a difrant tingz we a apm iina wi laif, an it a-go elp wi fi api wen wi a du di priichin wok.