Wach Out Fi Tingz We Kyan Kaaz Wi Fi Sin

1-2. (a) A wa Jiizas did waan im falara dem se? (b) Wa mek Jiizas falara dem did du wa dem se dem wuda neva du? (Luk pan di picha dem tu.)

“IINA unu aat unu waahn du wa rait, bot unu a jos piipl an dat a mek unu wiik.” (Mat. 26:41b) Wen Jiizas se dem wod de, im did a shuo se kaa wi no porfek it naa go iizi fi wi du wa rait. Bot im did a mek wi nuo tu se wi no fi fiil se wi so chrang dat notn kyaahn apm fi mek wi du wa rang. Da sed nait de, Jiizas falara dem did se dem wuda stik tu im no mata wa. (Mat. 26:35) Aalduo dem did waahn fi du wa rait, dem neehn nuo se iina no taim sitn wuda apm we wuda presha dem fi du wa rang. An a das wai Jiizas tel dem se: “Kip wach an prie so unu no fies notn we wi kaaz unu fi sin.”​—Mat. 26:41a.

² Bot wi nuo se Jiizas falara dem neehn kip wach. Kaa wen dem ares Jiizas, di wol a dem ron lef im. So wi si se kaa dem neehn nuo se dis wuda apm, aal a dem du wa dem se dem wuda neva du​—dem go we lef Jiizas.​—Mat. 26:56.

3. (a) Wa mek wi no fi fiil se wi so chrang dat notn kyaahn kaaz wi fi ton gens Jeuova? (b) Wa wi a-go luk pan iina da lesn ya?

³ Wi fi mek shuor se wi no fiil se wi so chrang dat notn kyaahn kaaz wi fi sin. Ye, wi fi mek op wi main se wi naa go mek notn mek wi tap sorv Jeuova. Bot wi fi memba se wi no porfek, so tingz kyan apm we kyan kaaz wi fi sin. (Ruo. 5:12; 7:21-23) An memba ino, som a di taim wi kyan fain wiself somwe ar tingz mait-a a gwaan we mek it luk laik se di ting dem we Jeuova se wi no fi du nais an a dem wi fi du. Bot ef wi a-go stik tu Jeuova an im Bwai Pikni, wi afi du di sitn dem we Jiizas se wi fi du an kip wach an no mek notn kaaz wi fi sin. Iina da lesn ya, wi a-go luk pan som a di sitn dem we wi fi luk out fa we kyan kaaz wi fi sin. Den wi a-go luk pan wa kyan elp wi fi no du wa rang. An afta dat, wi a-go luk pan ou wi kyan gwaan kip wach.

WA A SOM SITN WE WI FI LUK OUT FA WE KYAN KAAZ WI FI SIN?

4-5. Wa mek wi fi wach out so dat wi no du som tingz we mait-a no luk so bad?

⁴ Aal som sitn we no luk so bad kyan mek wi an Jeuova no so kluos agen. An ef wi no main shaap dem kyan mek wi sin bad tu.

⁵ Tingz kyan apm we kyan mek aal a wi sin bad, ar mek wi du som ada tingz we no kliin iina Gad yai, ar we mek wi tingk bout tingz di wie ou piipl we naa sorv Gad tingk bout tingz. Laik som piipl mait-a fain it aad fi no get miks op iina seks sin an dem ting de, an som piipl mait-a fain it aad fi no du tingz laik fi wach bluu muuvi ar fi no fiil op fiil op demself fi fiil laik se dem a av seks. An som piipl fain it aad fi no fried a ada piipl, an som mait-a waahn fi du dem uona ting, an som ada piipl mait-a kwik fi get beks, ar dem mait-a a chogl wid sopm els. Bot jos laik wa Jiemz se, “wen sumadi fiil fi du wa rang, a siek-a di wikid sitn we iina dem aat. Di sitn dem iina dem aat presha dem fi du wa rang.”​—Jmz. 1:14.

6. Wa mek wi no fi fuul wiself an fiil se notn kyaahn mek wi sin bad?

⁶ Yu nuo di sitn dem we yu a chogl wid we yu fi wach out fa so dat yu no sin? It no mek no sens wi fuul wiself an fiil se notn kyaahn mek wi sin bad. (1 Jan 1:8) Kaa Paal did mek wi nuo se aal di wan dem ‘we a liv ou Gad spirit se dem fi liv,’ ef dem no wach out, dem mait-a aal sin bad tu. (Gya. 6:1) Wi fi luk pan wiself an si di sitn dem we wi a chogl wid.​—2 Kor. 13:5.

7. Wa wi fi wach out fa? Tel wi wa dat mait-a komiin laik.

⁷ Wen yu nuo di sitn dem we yu fi wach out fa so dat yu no sin, it a-go elp yu so dat yu no en op a du di rang sitn dem. Laik iina di taim wen di Baibl did a rait, dem did nuo se di iiziyis paat fi sumadi brok iina wan siti a chuu di giet dem. So dem wuda afi mek shuor se dem av nof gyaad fi wach di giet dem gud. A siem so wen wi nuo di ting dem we mait-a kaaz wi fi sin, a dem ting de wi afi wach out fa.​—1 Kor. 9:27.

WA KYAN ELP WI FI NO DU NOTN WE KYAN KAAZ WI FI SIN?

8-9. Wa di yong bwai iina Pravorbz chapta 7 neehn fi du so im no en op sin? (Pravorbz 7:8, 9, 13, 14, 21)

⁸ Wen wi luk pan wa did apm tu da yong bwai ya we Pravorbz chapta 7 tel wi bout we did go sliip wid wan uor, it kyan elp wi fi no du wa rang. Vors 22 tel wi se “aal av a sodn im staat fi go afta ar.” Bot di vors dem bifuo dat mek wi si som likl sopm we im did a du we kaaz im fi sin.

⁹ Di fos ting we did mek di yong bwai en op a sin a dat “im gu dong di ruod, dong pan di kaana we [di uman] de.” Den im waak go a ar yaad. (Riid Pravorbz 7:8, 9.) Den afta dat wen im si di uman, im neehn tek we imself, bot im mek shi kis im, an im lisn tu ar wen shi did a taak bout aal a di sakrifais dem we shi gi op, kaa shi mait-a did a chrai fi mek im fiil se shi a no wan bad sumadi. (Riid Pravorbz 7:13, 14, 21.) Ef im did wach out an no du di sitn dem we im did du, im wudn en op sin.

10. Wa mait-a mek sumadi en op sin bad laik di yong bwai we Salaman did rait bout?

¹⁰ Di yong bwai we Salaman did rait bout mek wi nuo wa kyan apm tu sumadi we a worship Jeuova. Laik sumadi kyan en op sin bad an fiil laik se it dis apm “aal av a sodn.” Bot ef im riili sidong an tingk bout wa apm, im a-go riyalaiz se im did du som likl sopm we kaaz im fi sin. Laik im mait-a did a kip bad kompni, luk pan an du tingz fi enjai imself we im no fi du, ar go wich paat im no fi go, ar go pan som websait pan di intanet we im no fi go pan. An im mait-a did tap prie an riid im Baibl, an tap go a miitn an fiil sorvis tu. Jos laik da bwai ya we Pravorbz taak bout, a no “aal av a sodn” sumadi a-go staat du sitn rang, dem a-go a du som likl likl tingz bifuo dem sin bad.

11. Ef wi no waahn fi en op a sin, wa a som a di sitn dem we wi fi kip we fram?

¹¹ Aal a dis a elp wi fi si se a no onggl sin wi no fi sin bad, bot wi fi kip we fram di sitn dem we mait-a kaaz wi fi sin tu. An a dat Salaman did a mek wi nuo se, kaa afta im did taak bout di yong bwai we did sin wid di uman, wen im a taak bout di uman im se, “No schrie gu dong wich paat yu mait go bok ar op.” (Pr. 7:25) An wen im taak bout da uman ya we Pravorbz taak bout, im mek dem nuo se dem did fi tan faar fram ar an no go no we nier ar yaad. (Pr. 5:3, 8) Aal a dis mek wi si se wen wi kip we fram di sitn dem we kyan kaaz wi fi sin, a dat a-go elp wi fi no sin.a So sitn mait-a no rang fi wan Kristiyan du, bot ef sumadi nuo se it kyan kaaz dem fi sin dem fi kip we fram it tu.​—Mat. 5:29, 30.

12. Wa Juob did mek op im main se im naa go du, an ou dat did elp im fi no sin? (Juob 31:1)

¹² So dat wi no en op a du notn we kyan kaaz wi fi sin, wi fi mek op wi main bifuo se wi naa go dwi’it. A dat Juob did du. Im ‘did pramis imself’ se im naa go luk pan wan neda uman laik se im waahn fi av seks wid dem. (Riid Juob 31:1.) So wen im du wa im pramis imself se, im naa go en op sliip wid sumadi we im no marid tu. A di siem wie wi fi mek op wi main se wi naa go du notn we a-go kaaz wi fi sin.

13. Wa mek wi fi chrai fi no tingk bout tingz we no rait? (Luk pan di picha dem tu.)

¹³ Wi fi mek shuor se wi naa tingk bout tingz we no rait. (Ek. 20:17) Som piipl biliiv se notn no rang ef dem tingk bout sortn tingz so langks dem naa dwi’it. Bot dat a no chuu, kaa sumadi we sidong an a tingk bout sitn we rang onggl a-go mek demself waahn fi du wa dem a tingk bout. So im onggl a mek it aad fi imself fi du wa rait. A no laik se wi a se notn rang naa go kom op iina wi main som a di taim, bot wi fi mek shuor se wi tap tingk bout it siem taim an staat tingk bout sitn gud. Dat a-go elp wi fi no tingk bout tingz we mait-a kaaz wi fi sin bad.​—Fil. 4:8; Kol. 3:2; Jmz. 1:13-15.

14. A wa a wan neda ting we kyan elp wi so dat wi no du notn we kyan kaaz wi fi sin?

¹⁴ Wan neda ting we kyan elp wi fi no du notn we a-go kaaz wi fi sin a wen wi nuo fi shuor se it a-go du wi gud wen wi du di sitn dem we Jeuova se wi fi du. Som a di taim wi mait-a fain it aad fi tingk bout di ting dem we Jeuova waahn wi fi tingk bout, an fi waahn di sitn dem we Jeuova se gud fi wi. Bot wen wi du dem sitn de, wi a-go fiil wan piis iina wi aat an main we a-go mek wi fiil gud.

15. Wen wi waahn di sitn dem we Jeuova se gud fi wi, ou it kyan elp wi fi no du notn we kyan kaaz wi fi sin?

¹⁵ Wi fi waahn di sitn dem we Jeuova se gud fi wi. Di Baibl mek wi nuo se wi fi “iet di sitn dem we bad, an lov di sitn dem we gud.” An ef wi du dat, it a-go elp wi fi mek op wi main fi du di rait sitn dem an kip we fram di ting dem we kyan mek wi sin. (Iemos 5:15) Wen wi waahn fi du di sitn dem we rait, it a-go elp wi fi tan op chrang ef aal av a sodn sitn kom op we kuda mek wi du sitn we rang.

16. Wen wi du di sitn dem we kip wi kluos tu Jeuova, ou it kyan elp wi fi gwaan kip wach? (Luk pan di picha dem tu.)

¹⁶ Wen wi yuuz nof a wi taim a du di sitn dem we a-go kip wi kluos tu Jeuova, dat a-go elp wi fi waahn di sitn dem we Jeuova se gud fi wi. Kaa wen wi de a di miitn dem ar wi de a fiil sorvis, it naa go so iizi fi waahn fi du di sitn dem we kyan kaaz wi fi sin. Bot dem a-go mek wi waahn fi du di sitn dem we a-go mek Jeuova api. (Mat. 28:19, 20; Iib. 10:24, 25) Wen wi riid Gad Wod an tingk bout wa it a se, it a-go mek wi lov di sitn dem we gud an iet di sitn dem we bad. (Jash. 1:8; Sa. 1:2, 3; 119:97, 101) An memba se Jiizas did tel im falara dem se dem fi ‘prie so dem no fies notn we wi kaaz dem fi sin.’ (Mat. 26:41) Wen wi spen taim a prie tu wi Faada, Jeuova, a so wi get di elp we im a-go gi wi. An it a-go elp wi fi gwaan du di sitn dem we a-go mek im api.​—Jmz. 4:8.

OU WI KYAN GWAAN KIP WACH

17. Wa Piita did fain it aad fi no du?

¹⁷ Wi kyan get rid a som a di bad wiez dem we wi av, bot wi a-go fain se som a dem no so iizi fi wi get rid a. Laik luk pan wa did apm wid di apasl Piita. Kaa im did fried a piipl, a chrii taim im did en op se im no nuo Jiizas. (Mat. 26:69-75) An afta dat, wen im priich bout Jiizas a di Aiyis Kuot fi di Juu piipl dem, it wuda komiin laik se im no fried a piipl agen, no chuu? (Aks 5:27-29) Bot kopl ier afta dat, im did “fried a wa di Juu dem we fiil se yu afi sorkomsaiz wuda se,” so fi a taim im tap nyam wid di breda an sista dem we a neehn Juu. (Gya. 2:11, 12) So Piita neehn riili get rid a sitn we im did tingk im get rid a aredi. An im mait-a did aalwiez afi chrai aad fi no fried a piipl.

18. Wa kyan apm afta wi fiil laik se wi tap du sopm we wi no fi du?

¹⁸ Wa did apm tu Piita kyan kech wi tu. Laik wi mait-a fiil se wi get rid a sitn we wi a chogl wid, bot tingz mait-a apm we mek wi si se wi no riili get rid a it. Luk pan wa da breda ya did se. Im se: “A ten ier nou mi no wach no bluu muuvi. An mi did fiil se mi gud. Bot a neehn so it go, mi did onggl a fuul miself, kaa som a di taim, bies pan wa a gwaan, mi did fiil fi go wach it agen.” Bot im neehn gi op. Im get fi si se im wuda afi chrai aad evridie, miebi fi di res a im laif, fi no dwi’it. So im mek im waif an di elda dem iina im kanggrigieshan elp im.

19. Wa kyan elp wi fi no du di sitn dem we wi a chogl wid?

¹⁹ Wen wi a “kip wach” laik wa Jiizas se wi fi du, it a-go elp wi fi no du di sitn dem we wi a chogl wid. Aal wen wi fiil laik se wi chrang, wi fi stil kip we fram di sitn dem we kyan kaaz wi fi sin. (1 Kor. 10:12) No tap du di sitn dem we yu a du we a elp yu fi gwaan du wa rait. So wi fi mek shuor se wi du evriting we wi kyan du fi gwaan kip wach.​—2 Pii. 3:14.

DI BLESN DEM WE WI A-GO GET WEN WI GWAAN KIP WACH

20-21. (a) Wa a som a di blesn dem we wi a-go get ef wi kip we fram di sitn dem we kyan kaaz wi fi sin? (b) Ef wi du wa wi fi du, wa Jeuova a-go du fi wi? (2 Korintiyan 4:7)

²⁰ Wi kyan nuo fi shuor se wen wi du evriting we wi kyan du fi kip we fram tingz we kyan kaaz wi fi sin, wi laif a-go betaraaf. An wen wi du di sitn dem we Jeuova se wi fi du, wi a-go muor api dan ef wi go miks op iina sin, jos fi go av “fon fi wan likl wail.” (Iib. 11:25; Sa. 19:8) An dat a kaa Jeuova did mek wi iina wan wie fi du di sitn dem we im se wi fi du. (Jen. 1:27) An wen wi du dat, wi kanchens naa go bada wi an wi a-go kyan get fi liv fi eva.​—1 Tim. 6:12; 2 Tim. 1:3; Juud 20, 21.

²¹ Iivn duo wi a ‘jos piipl an dat mek wi wiik,’ dat no miin tu se wi kyaahn du di sitn dem we Jeuova waahn wi fi du. An Jeuova di de fi elp wi an fi gi wi di chrent we wi niid fi go aan. (Riid 2 Korintiyan 4:7.) Bot memba se a di sitn dem we wi kyaahn manij pan wi uon Jeuova a-go gi wi di powa fi du. Bot wi stil afi go wok aad evridie fi kip we fram di sitn dem we kyan kaaz wi fi sin​—a wi afi du dat fi wiself. An ef wi du wa wi fi du, wi kyan nuo fi shuor se Jeuova a-go ansa wi wen wi prie tu im an gi wi di ekschra chrent we wi niid fi gwaan du wa rait. (1 Kor. 10:13) So Jeuova kyan elp wi fi wach out fi tingz we kyan kaaz wi fi sin.