DI LESN FI STODI 35
SANG 121 Wi Niid Self-Kanchuol
Wa Wi Kyan Du So Dat Wi No Du Di Rang Sitn Dem We Wi Badi Waahn Wi Fi Du
“Unu mosn mek sin ruul uova unu badi no muor. No mek it ruul uova unu, so dat unu wudn du di sitn dem wa unu badi waahn unu fi du.”—RUO. 6:12.
A DIS WI A-GO LUK PAN
Wi a-go luk pan wa kyan elp wi fi no fiil bad bout wiself wen wi fiil laik fi du di sitn dem we Jeuova se rang, an den wi a-go luk pan wa an wa kyan elp wi fi no du dem sitn de.
1. Wa a sitn we aal a wi chogl wid?
YU EVA fiil laik yu wel waahn fi du sitn we Jeuova se yu no fi du? Ef yu fiil so no bada tingk se a yu wan dis a apm tu an se dis naa apm tu nobadi els, kaa di Baibl se: “Di siem sin dem we unu a chogl wid, evribadi els a chogl wid dem tu.” (1 Kor. 10:13) So dis miin tu se a no yu wan a fait aad fi no du wa rang, bot yu av ada breda an sista we a fait aad fi no du notn rang tu. Bot wid Jeuova elp yu kyan du di sitn dem we im waahn yu fi du an no du di sitn dem we rang.
2. Wa a som a di rang sitn dem we som a wi breda an sista dem an aal som a uu a stodi di Baibl tu afi a fait aad fi kip we fram? (Luk pan di picha dem tu.)
2 Di Baibl se tu se: “Wen sumadi fiil fi du wa rang, a siek-a di wikid sitn we iina dem aat. Di sitn dem iina dem aat presha dem fi du wa rang.” (Jmz. 1:14) Da vors ya elp wi fi si se wa mait mek wan sumadi fiil fi du wa rang mait-a difrant fram wa mek wan neda sumadi fiil fi du wa rang. Laik wan breda mait waahn gwaan wid seks sin wid wan uman we im no marid tu, an wan neda breda mait waahn gwaan wid seks sin wid wan man. Ar it kuda bi dat wan sista waahn gwaan wid seks sin wid wan man we shi no marid tu, an wan neda sista mait-a waahn gwaan wid seks sin wid wan neda uman. An yu mait-a av som breda an sista we tap wach bluu muuvi an dem ting de bot dem mait-a fiil laik dem wel waahn go bak go du dem ting de agen. An a siem so nof a di wan dem we yuus tu tek jogz ar we did lov dem lika mait-a wel waahn fi tek op dem sitn de agen. Dem ya a jos wan an tuu a di sitn dem we som a wi breda an sista dem afi a chogl wid, an aal som a uu a stodi di Baibl a chogl wid dem sitn ya tu. Bot wi fi memba se som a di taim wi a-go fiil di wie ou di apasl Paal did se im fiil wen im se: “Wen mi waahn fi du we rait, mi kyan onggl chuuz fi du wa wikid.”—Ruo. 7:21.
Yu kyan fiil fi du sitn rang enitaim an eniwe yu de (Luk iina paragraaf 2)c
3. Ou sumadi mait-a fiil wen dem si se dem afi a fait fi no du di siem bad sitn dem uova an uova agen?
3 Yu mait-a fain se yu a fait aad fi no du sitn we Jeuova no laik, an dis a sitn we yu fain se yu aalwiez afi a diil wid. An kaaz a dat, yu mait-a fiil laik se yu no av di chrent fi du di rait sitn. An yu mait-a fiil laik se Jeuova rait yu aaf an naa go mek yu liv fi eva jos kaa yu fiil fi du sitn we im se rang. Bot yu kyan nuo fi shuor se notn no go so! Fi andastan wa mek wi se so, da lesn ya a-go ansa tuu kwestiyan: (1) Uu waahn yu fi fiil laik se yu no av di chrent fi du wa rait an se Jeuova rait yu aaf? (2) Wa yu kyan du so dat yu no du di sitn dem we Jeuova no laik?
A WA SIETAN WAAHN WI FI TINGK SE?
4. (a) Wa mek Sietan waahn wi fi biliiv se wi kyaahn fait gens di bad sitn dem we wi fiil laik wi waahn fi du? (b) Wa mek wi kyan nuo fi shuor se wi kyan fait gens di bad sitn dem we wi fiil laik wi waahn fi du?
4 Sietan waahn wi fi fiil laik se wen wi waahn fi du di sitn dem we rang wi kyaahn du no beta dan fi dis du dem. A dat Jiizas did mek im falara dem nuo wen im tiich dem fi prie se: “No mek notn kom iina wi wie we a-go mek wi waahn fi du notn rang. Bot no onggl dat, wi a beg yu fi protek wi fram di Devl.” (Mat. 6:13) Sietan av it fi se nobadi naa go du wa Jeuova se wen dem fiil fi du sitn we rang. (Juob 2:4, 5) Bot wa mek Sietan se so? Kaa im a did di fos wan we mek di bad sitn dem we im waahn fi du mek im en op ton im bak pan Jeuova. An kaaz a dat, im fiil se wi tan siem laka im, an se wi a-go redi fi ton wi bak pan Jeuova tu ef wi waahn fi du di sitn dem we rang. Sietan did iivn tingk se im kuda mek Gad porfek Bwai Pikni du di bad sitn dem we im, Sietan, did waahn im fi du. (Mat. 4:8, 9) Bot tingk bout dis: Yu tingk wi riili no av di chrent fi fait gens di bad sitn dem we wi fiil laik wi waahn fi du? Notn no go so! Wi fiil di siem wie laik ou di apasl Paal did fiil wen im rait se: “Mi kyan du eniting, kaaz Krais Jiizas gi mi di powa fi du it.”—Fil. 4:13.
5. Ou wi nuo se Jeuova nuo fi shuor se wi kyan fait gens di bad sitn dem we wi fiil laik wi waahn fi du an du wa rait?
5 Jeuova no tan laik Sietan we fiil laik se wi afi du di bad sitn dem we wi fiil laik wi waahn fi du, bot Jeuova nuo fi shuor se wi no afi du dem sitn de. An wi nuo dis kaa Jeuova mek it rait dong iina di Baibl se wan big kroud a piipl we stik tu im an du wa im se wuda mek it chuu di torbl torbl sofarieshan. Sidong an tingk bout wa dat miin. Jeuova, we kyaahn tel lai, a mek wi nuo se a no jos likl bit a piipl a-go mek it iina di nyuu worl, bot a wol iip a piipl a-go mek it chuu. An so Jeuova wuda si dem wan ya az wan kliin set a piipl we “wash dem kluoz wait wait iina di Biebi Shiip blod.” (Rev. 7:9, 13, 14) So wi kyan si klier klier se Jeuova no tingk se wi kyaahn fait gens di bad sitn dem we wi fiil laik wi waahn fi du, bot im nuo se wi kyan fain di chrent fi du wa rait.
6-7. Wa a sitn els we Sietan waahn wi fi biliiv?
6 Sietan waahn wi fi biliiv se kaa wi fiil laik fi du di bad sitn dem we wi badi waahn wi fi du, Jeuova naa go waahn fi av notn fi du wid wi agen an so im naa go mek wi liv fi eva. Bot tingk bout wa mek Sietan wuda waahn wi fi tingk da wie ya. A im Jeuova no waahn fi av notn fi du wid an a im naa go get di chaans fi liv fi eva. (Jen. 3:15; Rev. 20:10) So a bad main Sietan bad main kaa wi kyan get fi liv fi eva. Matarafak, di Baibl mek wi nuo se Jeuova wel waahn fi elp wi, im “no waahn fi kil aaf nobadi. Bot wa im riili waahn a fi evribadi ton we fram dem sin an staat du wa rait.”—2 Pii. 3:9.
7 A tingk wi a tingk laik ou Sietan waahn wi fi tingk ef wi biliiv se wi no av no chrent fi fait gens di bad sitn dem we wi badi waahn wi fi du. Wen wi andastan se a dat a gwaan wid wi, it a-go push wi fi fait gens di bad sitn dem we wi badi waahn wi fi du.—1 Pii. 5:8, 9.
KAA WI NO PORFEK, OU DAT MAIT-A MEK WI FIIL?
8. Wa els di Baibl miin wen it taak bout sin? (Saam 51:5) (Luk pan di paat we niem “Dis Miin Se.”)
8 A no Sietan aluon kyan mek wi fiil laik se wi no av no chrent fi fait gens di bad sitn dem we wi waahn fi du. Di sin we aal a wi get fram Adam an Iiv kyan mek wi fiil da wie de tu.a—Juob 14:4; riid Saam 51:5.
9-10. (a) A ou Adam an Iiv did fiil afta dem sin? (Luk pan di picha tu.) (b) Kaa wi a sina ou dat mek wi fiil?
9 Tingk bout ou sin did mek Adam an Iiv fiil. Afta dem ton dem bak pan Jeuova, dem chrai fi aid demself fram im an yuuz sitn fi kova op dem badi. Bies pan wa dem du di Insight on the Scriptures se: “Sin did kaaz dem fi fiil fried, shiem, an gilti.” So no mata wa dem du, Adam an Iiv wuda neva bi kluos tu Jeuova agen an dem wuda aalwiez fiil fried, shiem, an gilti kaaz dem neehn porfek agen.
10 Wi an Adam an Iiv no de iina di siem buot kaa Jiizas did kom ded fi wi bot im neehn ded fi dem. An dat kyan mek wi get frii fram wi sin dem an mek wi kanchens no bada wi. (1 Kor. 6:11) Bot kaa wi get sin fram Adam an Iiv, som a di taim dis mek wi fiil fried, shiem, an gilti. Plos di Baibl mek wi nuo se sin ruul uova di uol a wi, an dis apm tu evribadi “iivn duo dem neva sin laik ou Adam did sin.” (Ruo. 5:14) Bot kaa wi baan iina sin dat no miin se wi kyaahn go du wa rait an wi no av notn a luk faawod tu iina di fyuucha. Bot ou wi kyan fait gens dem fiilinz de an win?
Sin did kaaz Adam an Iiv fi fiil shiem, fried, an gilti (Luk iina paragraaf 9)
11. Wa wi fi du ef wi fiil laik se wi kyaahn fait gens di bad sitn dem we wi badi waahn wi fi du an win, an wa mek? (Ruoman 6:12)
11 Wen wi fiil laik se wi no av no chrent fi fait gens di bad sitn dem we wi waahn fi du, wi kyan luk pan it laik se a sin “a chrai fi uol wi dong,” bot wi no fi mek it uol wi dong. Wa mek? Kaa di Baibl tiich wi se wi no afi mek sin “ruul uova” wi no muor. (Riid Ruoman 6:12.) Dis miin se wi kyan mek op wi main fi no du di sitn dem we rang. (Gya. 5:16) Jeuova nuo fi shuor se wi kyan fait gens di bad sitn dem an win ar els im wudn tel wi no fi du dem. (Dyuu. 30:11-14; Ruo. 6:6; 1 Tes. 4:3) So wi kyan si klier klier se wi no afi du di bad sitn dem we wi badi waahn wi fi du.
12. Wa yu fi du ef yu fiil laik se Jeuova rait yu aaf, an wa mek?
12 An a siem wie so ef wi fiil laik se Jeuova rait wi aaf kaa wi fiil fi du di bad sitn dem we wi badi a tel wi fi du, wi kyan luk pan it laik se a sin “a chrai fi uol wi dong,” bot no mek it uol yu dong. Wa mek? Kaa di Baibl tiich wi se Jeuova don nuo ou wi kom bout an nuo se wi a sina. (Sa. 103:13, 14) Im “nuo evriting” bout wi an im nuo se wi get sin fram Adam an Iiv. An a das wai som a di taim wi fiil laik fi du di sitn dem we rang. (1 Jan 3:19, 20) So langks wi no du di bad sitn dem we wi badi a tel wi fi du, wi an Jeuova kyan aalwiez bi gud fren. Wa mek wi shuor bout dat?
13-14. Yu tingk se kaa yu fiil fi du sitn we rang Jeuova naa go api wid yu agen? Tel wi wa mek yu se so.
13 Di Baibl mek wi nuo se it difrant wen sumadi a du sitn we rang (dis a sitn we dem kyan mek op dem main no fi du) fram wen dem fiil laik fi du sitn we rang (dis a sitn we kuda jos kom op iina dem main jos so). Laik som a di breda an sista dem we did liv iina Korint yuus tu du tingz we Jeuova no laik, laik man a sliip wid man an uman a sliip wid uman. Paal rait se: “A dem de kain-a piipl som a unu yuus tu bi.” So yu tingk dis did miin dem neva fiil laik fi du dem sitn de agen? No riili, kaa miebi dem did a du dem sitn ya fi wan lang taim an so it wuda aad fi dem tap tingk bout dem sitn de. Bot di Kristiyan dem we wok aad fi kanchuol dem badi an neehn du di sitn dem we dem badi a tel dem fi du did mek Jeuova api. Tu im dem kliin kaa im ‘wash dem an mek dem kliin.’ (1 Kor. 6:9-11) An wi kyan se di siem ting bout yu tu.
14 No mata wa kain-a bad sitn yu mait-a fiil laik fi du somtaim, jos nuo se yu no afi du dem. An yu si iivn ef yu fain it aad fi tap tingk bout dem sitn de, yu kyan kanchuol yuself an no ‘liv onggl fi wa yu badi waahn an fi di rang sitn dem we yu main tel yu fi du.’ (Ifii. 2:3) So wa a som a di sitn dem yu kyan du we kyan elp yu fi fait aad fi no du dem rang sitn de?
A WA KYAN ELP YU FI NO DU DI BAD SITN DEM WE YU FIIL LAIK FI DU?
15. Ef wi no waahn fi du di bad sitn dem we wi fiil laik fi du, wa mek wi fi bi riil wid wiself?
15 Ef yu no waahn fi du di bad sitn dem we yu fiil fi du, yu afi bi riil wid yuself an nuo se yu av sitn fi wok pan. Mek shuor se yu naa ‘fuul yuself.’ (Jmz. 1:22) Laik sumadi mait-a av wan prablem kaa dem laik fi jringk wol iip a lika, bot dem mait-a se tu demself se dem no riili av no prablem kaa ada piipl lov fi jringk muor lika dan dem. Ar sumadi mait-a laik wach bluu muuvi an dem ting de, bot dem se tu demself se dem wudn waahn fi wach bluu muuvi ef dem waif did a shuo dem likl muor lov. Ef yu staat fi tingk dem wie de, it a-go mek it iiziya fi yu du di bad sitn dem we yu fiil laik fi du. So no chrai fi kom op wid notn we wuda mek it luk aarait fi yu du dem bad sitn ya. An yu fi uon op tu eniting we yu mek op yu main fi du.—Gya. 6:7.
16. Wa yu kyan du fi mek shuor se yu du di rait ting?
16 Bot a no jos fi nuo yuself an we yu a wok pan, yu afi mek op yu main fi no du we yu fiil laik fi du tu. (1 Kor. 9:26, 27; 1 Tes. 4:4; 1 Pii. 1:15, 16) Tingk bout wa an wa kuda kaaz yu fi waahn fi du dem bad sitn de an wen an wen yu fiil laik fi du dem sopm de. Laik yu fiil laik fi du dem bad sitn de wen yu taiyad ar yu fiil laik fi du dem muor liet a nait? Tingk bout wa yu a fait wid an tingk bout wa yu kyan du fi win da fait de. Di bes taim fi du dat a bifuo yu staat fiil laik yu waahn du dem bad sitn de.—Pr. 22:3.
17. Wa wi kyan lorn fram wa Juozif did du? (Jenisiz 39:7-9) (Luk pan di picha dem tu.)
17 Tingk bout wa Juozif did du wen Patifa waif did a chrai fi get im fi sliip wid ar. Im neehn ich fi mek ar nuo se im naa du dat. (Riid Jenisiz 39:7-9.) Wa dat a tel wi se? Juozif did nuo se it rang fi sliip wid wan man waif iivn bifuo Patifa waif did a chrai get im fi sliip wid ar. An a di siem ting wi niid fi du. Wi niid fi mek op wi main fi du di rait ting bifuo sitn apm we kyan mek wi fiil fi du di sitn dem we bad. An a so it a-go iiziya fi yu du wa rait kaa yu don mek op yu main bout wa yu a-go du aredi.
Du laik Juozif an ron we fram eniting we wi kaaz yu fi sin gens Jeuova! (Luk iina paragraaf 17)
‘YU FI EVA A CHEK YUSELF’
18. Wa yu kyan du fi no du di bad sitn dem we yu fiil laik yu waahn fi du? (2 Korintiyan 13:5)
18 Ef yu waahn fi du wa rait an fait gens di bad sitn dem we yu fiil laik yu waahn fi du, yu afi ‘aalwiez a chek’ yuself fi mek shuor se yu a liv rait. (Riid 2 Korintiyan 13:5.) So evri nou an den, tap an tingk bout di sitn dem we yu tingk bout, an we yu du, an si wa yu niid fi chienj. Laik se yu did fiil fi du sopm bad bot yu neva dwi’it, yu kyan aks yuself: ‘A ou lang it did tek mi fi se mi naa dwi’it?’ An ef yu si se yu neehn kwik fi se no, no bada biit op yuself. Chrai du di sitn dem we yu niid fi du fi du beta neks taim. An aks yuself dem kwestiyan ya: ‘Wen mi a tingk bout sitn bad we mi no fi a tingk bout, mi kyan du sitn fi tap tingk bout it kwik? Di sitn dem we mi du fi enjai miself a mek it aad fi mi du wa rait? Wen mi si tingz we av fi du wid seks sin, mi tap luk pan it sed taim? Aalduo mi afi wok aad fi no du di bad sitn dem we mi waahn fi du, mi biliiv se wa Jeuova se mi fi du a di bes ting fi mi?’—Sa. 101:3.
19. Ou di likl sitn dem we yu mek op yu main fi du kyan mek it aada fi yu du wa rait?
19 An wen yu a chek yuself no bada riizn se it aarait fi yu tingk bout di bad sitn dem. Di Baibl se: “Yu na’av notn els we muor wikid an chrikifai dan wi aat, an it eva a presha yu fi du wa wikid.” (Jer. 17:9) An Jiizas se: “A outa di aat aal kain-a wikidnis we piipl tingk op kom fram.” (Mat. 15:19) Laik yu kuda av sumadi we tap wach bluu muuvi an tingk se it wuda “aarait” fi luk pan som picha wid aaf niekid piipl. Ar im mait-a se tu imself se, ‘Notn no rang ef mi a tingk bout seks sin an dem ting de, so langks mi naa dwi’it.’ Yu si wen sumadi riizn dem wie de it wuda komiin laik se ‘im aat a plan fi si ou im kyan du dem sitn de.’ (Ruo. 13:14) So ou wi kyan mek shuor se wi no du dat? Yu fi mek shuor se di likl sitn dem we yu mek op yu main fi du a no sitn we a-go get yu iina big prablem.b No tingk bout notn we kuda mek yu fiil laik se di bad sitn dem we yu fiil laik yu waahn fi du aarait.
20. Wa a-go apm iina di fyuucha, an uu a elp wi rait ya nou?
20 Jos laik wa wi lorn bout aredi, a Jeuova a elp wi fi no du di rang sitn dem we wi mait-a fiil laik fi du. An a kaa im gud an kain mek im a-go gi wi di chaans fi liv fi eva iina di nyuu worl. Bwai it a-go nais fi a sorv Jeuova wen wi aat kliin an wi naa tingk bout notn bad. Bot til da taim de kom wi a-go kyan fait gens di rang sitn dem we wi waahn fi du an win! An Jeuova a-go bles wi tu.
SANG 122 Wi Fi Stie Schrang
a DIS MIIN SE: Wen di Baibl taak bout di wod “sin”, nof taim it a taak bout sitn bad we sumadi du, laik fi tiif sitn, fi sliip wid sumadi we dem no marid tu, an fi kil sumadi. (Ek. 20:13-15; 1 Kor. 6:18) Bot iina som a di vors dem, “sin” a taak bout sitn we wi get fram wi baan aalduo wi no du notn bad yet.
b Memba se di yong yuut we Pravorbz 7:7-23 taak bout did du som likl sitn we did mek im en op a get miks op iina seks sin.
c DIS A WA DI PICHA A SHUO WI: Pan di lef-an-said: Wan yong breda sidong iina wan kaafi shap an im si tuu man a shuo se dem laik dem wan aneda. Pan di rait-an-said: Wan sista si tuu piipl a sumuok.