Lorn Fram Di Laas Ting We Dem Man Ya Weehn A Sorv Jeuova Did Se

1. A wa mek wi kyan lorn fram di breda an sista dem we op iina iej?

AAL a wi niid elp fi nuo wa fi du wen wi av som big impuotant tingz fi du iina wi laif. Wi kyan mek di elda dem ar wan neda breda ar sista we chrang iina wa dem biliiv iina elp wi. An ef di sumadi we a elp wi op iina iej, wi no fi fiil laik se kaa dem op iina iej we dem a se no av no yuus tu wi ya nou. Jeuova waahn aal a wi fi lorn fram di wan dem we op iina iej kaa dem de bout langga dan wi so dem nuo muo bout laif dan wi.​—Juob 12:12.

2. A wa wi a-go luk pan iina da lesn ya?

² Iina di taim wen di Baibl did a rait, Jeuova yuuz som man we op iina iej fi liid im piipl dem an fi push dem fi gwaan sorv im​—man laik Muoziz, Dievid, an di apasl Jan. Dem did liv iina difrant taim, an di ting dem we dem did av fi diil wid did difrant tu. Wen dem did nier fi ded, dem tel di wan dem we yongga dan dem di bes ting we dem fi du. Di chrii a dem mek wi si se di bes ting a fi du di sitn dem we Jeuova tel wi fi du. An Jeuova mek wi av wa dem man ya did se iina di Baibl. It no mata ef wi yong ar wi uol, it a-go elp wi ef wi luk pan som a di sitn dem we dem man ya did se. (Ruo. 15:4; 2 Tim. 3:16) Iina da lesn ya, wi a-go luk pan di laas ting we dem chrii man ya did se an wa wi kyan lorn fram wa dem did se.

“IM A-GO MEK UNU LIV LANG”

3. A wa a som a di sitn dem we Muoziz yuus tu du?

³ Muoziz did yuuz di wol a im laif fi du Jeuova wok. Im a did wan prafit, wan joj, wan liida, an im did rait som a di buk dem we de iina di Baibl. Im did nuo ou fi du nof tingz iina laif. A im did tek di Izrel piipl dem outa Iijip so dat dem a neehn sliev agen, an im get fi si di wol iip a mirikl dem we Jeuova wok. Jeuova did yuuz im fi rait di fos faiv buk dem iina di Baibl, an im did yuuz im fi rait Saam 90, an a im mait-a did rait Saam 91 tu. An it luk laik se a im did rait di buk a Juob tu.

4. A uu Muoziz did elp fi gwaan sorv Jeuova, an wa mek im did du dat?

⁴ Likl bifuo Muoziz ded wen im a did 120 ier uol, im kaal aal a di piipl dem iina Izrel fi mek dem memba di sitn dem we dem go chuu, kaa wen som a dem did yong, dem did si nof a di mirikl dem we Jeuova did wok an di sitn dem we Im did du tu di Ijipshan dem. (Ek. 7:3, 4) Dem did waak chuu di waata a di Red Sii an dem did si wen Jeuova did kil aaf Fiero an im aami dem. (Ek. 14:29-31) An wen dem did iina di wildanes, dem si ou Jeuova did protek dem an tek kier a dem. (Dyuu. 8:3, 4) So nou dat dem did redi fi go iina di Lan we Gad pramis dem, Muoziz yuuz da laas chaans ya fi push dem fi gwaan sorv Jeuova.a

5. Di laas ting we Muoziz did tel di Izrel piipl dem a Dyuutaranami 30:19, 20 did mek dem nuo se wa wuda apm fi chuu?

⁵ Wa Muoziz did se? (Riid Dyuutaranami 30:19, 20.) Di Izrel piipl dem did av wol iip a gud tingz fi luk faawod fi get. An ef dem did du di sitn dem we Jeuova se dem fi du, dem wuda get fi liv lang iina di Lan we Jeuova did pramis dem. An da lan de did nais bad an nof tingz did a gruo an bier de. Muoziz did tel dem se: “[A] wan lan we av som big an nais siti we unu neva mek unuself, ous we ful op a aal kain-a gud sitn we unu neva did wok fa niida, an som sistorn we ada piipl did dig out iina rak fi uol waata, an griep vain an aliv chrii we unu neva plaant.”​—Dyuu. 6:10, 11.

6. Wa mek Jeuova did mek piipl kom mash op wich paat di Izrelait dem did liv an tek dem we?

⁶ Muoziz did waan di Izrelait dem tu an mek dem nuo se ef dem waahn fi liv lang iina di lan we Jeuova did gi dem we did av wol iip a nais tingz, dem wuda afi du wa Jeuova se dem fi du. An im tel dem se dem fi chuuz fi liv so dat dem no ded, an dem kuda du dat wen dem du wa Jeuova tel dem fi du an wen dem stik tu im no mata wa. Bot di Izrelait dem neehn du dat. An siek-a dat, Jeuova mek di Asiriyan piipl dem an afta dat di piipl dem fram Babilan kom mash op wich paat dem liv an tek dem we.​—2 Ki. 17:6-8, 13, 14; 2 Kr. 36:15-17, 20.

7. Wa wi kyan lorn fram wa Muoziz did tel di Izrel piipl dem? (Luk pan di picha tu.)

⁷ Wa wi kyan lorn fram dis a dat ef wi du wa Jeuova se, it kyan mek wi liv fi eva. Jos laik di Izrelait dem we did suun fi go uova iina di Lan we Jeuova did pramis dem, a siem so wi suun go uova iina di nyuu worl we Jeuova pramis wi. An da taim de di ort a-go bi wan paradais. (Aiz. 35:1; Luuk 23:43) Wi naa go av Sietan an im diiman dem bout di plies. (Rev. 20:2, 3) An wi naa go av no choch we a mek piipl du di sitn dem we Gad no waahn dem fi du. (Rev. 17:16) An yu naa go av no govament we a mek tingz aad fi di piipl dem we dem a ruul uova. (Rev. 19:19, 20) An no wikid piipl naa go de iina di Paradais niida. (Sa. 37:10, 11) Evribadi we de pan di ort dem taim de a-go a du di ting dem we Jeuova se rait we mek piipl liv iina piis an liv tugeda az wan. So wi a-go lov an chos wi wan aneda. (Aiz. 11:9) Dat a sopm nais we a-go apm, no chuu? An pan tap a dat, ef wi du di sitn dem we Jeuova se wi fi du, wi no jos a-go liv til wi a onjrid an nof bot wi a-go get fi liv fi eva.​—Sa. 37:29; Jan 3:16.

8. Kaa Jeuova pramis wi se wi kyan liv fi eva, a ou dat did elp wan breda we a mishineri? (Juud 20, 21)

⁸ Wi fi chrai an aalwiez memba se Jeuova pramis wi se im a-go mek wi liv fi eva, kaa wen wi memba dat it a-go mek wi du evriting we wi kyan du fi stik tu im no mata wa wi a chogl wid. (Riid Juud 20, 21.) An wen wi memba dat, it kyan elp wi wen wi a chogl wid notn fi du wa rait. Wan mishineri we de iina Afrika we a sorv Jeuova fram lang taim did av sopm we im aalwiez a chogl wid fi du wa rait. Im se: “Wen mi memba se it a-go kyaahn mek mi liv fi eva, it gi mi di chrent fi chrai aad fi du wa rait. Mi prie tu Jeuova wol iip so dat im kyan elp mi fi du wa rait. An kaa Jeuova elp mi, mi na’av dat a chogl wid agen.”

EVRITING WE YU DU A-GO WOK OUT GUD

9. Wa a som a di sitn dem Dievid did go chuu iina laif?

⁹ Dievid did a wan king we du wa Jeuova waahn im fi du. Im kuda plie myuuzik gud, im kuda rait paim, an im kuda fait gud, an im a did wan prafit tu. A nof sitn Dievid did go chuu iina laif. Laik fi wol iip a ier im did afi a ron fram King Saal fi im laif, we did bad main gens im. An afta im ton king, im did afi ron we agen kaaz im bwai pikni Absalam did a chrai fi tek uova fram im. Aalduo Dievid did go chuu aal a dem sitn ya, im did stil stik tu Jeuova an du di sitn dem we Jeuova waahn im fi du til im ded. Jeuova se Dievid “a wan man we wi tingk ou [im] wuda tingk an we wi du evriting we [im] waahn im fi du.” So it mek sens fi du di sitn dem we Dievid se wi fi du.​—Aks 13:22; 1 Ki. 15:5.

10. Wa mek Dievid did afi taak tu Salaman bifuo Salaman ton king?

¹⁰ Mek wi luk pan wa Dievid did tel im bwai pikni, Salaman, we Jeuova did pik fi ruul afta im. A im Jeuova did pik fi elp di piipl dem fi gwaan worship Im iina di rait wie an fi bil wan ous fi Im tu. (1 Kr. 22:5) Bot fi du dis, Salaman wuda afi go chuu som wol iip a tingz. So mek wi luk pan wa Dievid did se tu im.

11. Azkaadn tu 1 Kingz 2:2, 3, wa Dievid did tel Salaman se wuda apm ef im no du wa Jeuova se im fi du, an wa did apm fi chuu? (Luk pan di picha tu.)

¹¹ A wa Dievid did se? (Riid 1 Kingz 2:2, 3.) Dievid did tel im bwai pikni, Salaman, se ef im du wa Jeuova se, tingz wuda wok out fi im. An wol iip a ier afta dat, tingz did a gwaan gud fi Salaman kaa Jeuova did a bles im. (1 Kr. 29:23-25) Im get fi mek wan big nais ous fi Gad an fi rait som a di buk dem iina di Baibl. An nof piipl did nuo im kaa im did waiz an av wol iip a moni an ting. (1 Ki. 4:34) Bot wi si se wol iip a ier afta dat, Salaman staat fi sorv som ada gad an so Jeuova tap bles im jos laik wa Dievid did se. An afta dat, im neehn so waiz agen wen im did a ruul Gad piipl, an im kudn elp dem fi du wa rait agen niida, an im kudn ruul dem iina wan fier wie agen.​—1 Ki. 11:9, 10; 12:4.

12. Wa wi kyan lorn fram wa Dievid did tel Salaman se?

¹² Wa wi kyan lorn fram dis a dat ef wi du wa Jeuova se, it a-go mek tingz wok out gud fi wi. (Sa. 1:1-3) Ye, Jeuova neva tel wi se im a-go mek wi rich an mek evribadi nuo wi laik Salaman. Bot im pramis wi se ef wi du wa im se, im a-go mek wi waiz so dat wi kyan du di rait ting wid wi laif. (Pr. 2:6, 7; Jmz. 1:5) So wi kyan go yuuz di ting dem we iina di Baibl we wi kyan riizn pan fi elp wi fi si di kain-a wok we wi fi tek, umoch skuulin wi fi du, an di kain-a ting dem we wi fi wach an du fi fon, an ou fi diil wid moni. Wen wi du dem sopm ya di wie ou Gad se wi fi dwi’it, it wi elp fi protek wi. (Pr. 2:10, 11) An it a-go elp wi fi av som gud fren, an it a-go elp wi tu fi av wan api fambili laif.

13. Wa Carmen did du so dat shi kuda liv wan beta laif?

¹³ Carmen, we liv a Muozambiik, did tingk se ef shi du nof skuulin it wuda mek ar av wan beta laif. So shi sain op fi go a yuunivorsiti fi go lorn ou fi jraa ous plan an dem ting de. Shi se: “Mi lov wa mi did a lorn bot it did a tek op tu moch a mi taim an chrent. Mi did de a skuul fram 7:30 iina di maanin til 6 aklak iina di iivn. So it did aad fi mi go a miitn, an mi neva fiil so kluos tu Jeuova agen. Diip dong insaida mi, mi did si se mi kyaahn wok fi tuu baas man.” (Mat. 6:24, NWT ) So shi prie tu Jeuova an luk op tingz iina wi buk an pamplet dem fi si wa fi du. An shi se: “Afta mi taak tu som breda an sista we chrang iina wa dem biliiv iina, an mi mada, mi mek op mi main se mi a-go tap go a yuunivorsiti so dat mi kyan yuuz muos a mi taim fi du Jeuova wok. Dis a di bes ting mi kuda did du wid mi laif. Mi no sari se a dat mi did du.”

14. Wa a di mien ting Muoziz an Dievid did tel di piipl dem we dem did a taak tu?

¹⁴ Muoziz an Dievid did lov Jeuova, an dem did nuo se a wan big ting fi du wa im se dem fi du. Di laas ting dem did tel di piipl dem we dem did a taak tu a se it mek sens se dem du laik dem an stik tu Jeuova an du wa Im se dem fi du. An di tuu a dem mek di wan dem we dem did a taak tu nuo se ef dem lef Jeuova an no du di sitn dem we im se dem fi du, dem naa go get no blesn fram Jeuova. An wa dem tel dem se kyan du wi gud tu. Wol iip a ier afta dat wan neda man we did a sorv Jeuova mek wi si se a wan big ting fi wi du wa Jeuova se wi fi du tu.

“NOTN NO MEK MI API SO”

15. Wa a som a di sitn dem we di apasl Jan did get fi si?

¹⁵ Jiizas did lov di apasl Jan. (Mat. 10:2; Jan 19:26) Jan did de de wid Jiizas wen im did a go chuu an a priich an tiich, an im si di mirikl dem we im wok, an im did de de wid im wen im did a go chuu som rof taim. Im did si wen dem kil Jiizas an im did si im tu afta im kom bak alaiv. An im get fi si ou nof muor piipl ton Kristiyan, an im get fi si ‘piipl pred di gud nyuuz aal uova di worl.’​—Kol. 1:23.

16. Wa Jan did rait, an a uu an uu it elp?

¹⁶ Wen Jan, we did op iina iej, did suun fi ded, im did get wan nais wok fi rait som a di buk dem iina di Baibl. Im rait dong “di sitn dem we Gad shuo Jiizas Krais.” (Rev. 1:1) An im rait di buk a Jan we niem aafa im. An im rait chrii ada buk iina di Baibl. An di laas leta we im rait a tu wan Kristiyan we niem Gaiyos. Jan did luk pan im laik se im a im uona pikni. (3 Jan 1) Bai da taim de, im did av wol iip a breda an sista we im did lov laik ou im wuda lov im uona pikni dem. Wa Jan did rait kyan stil elp wi iina fi wi taim.

17. Azkaadn tu 3 Jan 4, wa a-go mek wi api bad?

¹⁷ A wa Jan did rait? (Riid 3 Jan 4.) Jan did rait se ef yu du wa Gad tel yu fi du, it a-go mek yu api. Bai di taim Jan rait im tord leta, yu did av som piipl we a tiich som tingz we no iina Gad Wod we did a mek di breda an sista dem plit plit op. Bot som a di breda an sista dem did a “liv azkaadn tu di chuut.” Dem did a “du wa Gad tel [dem] fi du.” (2 Jan 4, 6) Dem wan ya no onggl did mek Jan api bot dem did mek Jeuova api tu.​—Pr. 27:11.

18. Wa wi kyan lorn fram wa Jan did rait?

¹⁸ Aal a dis mek wi si se ef wi stik tu Jeuova an du wa im se wi fi du, wi a-go api. (1 Jan 5:3) Laik wi a-go api kaa wi nuo se wi a du tingz fi mek Jeuova api. An im api se wi naa mek di piipl dem iina di worl an di sitn dem iina di worl kaaz wi fi no sorv im di rait wie. Im api se wi a sorv im. (Pr. 23:15) Aal di ienjel dem iina evn api tu. (Luuk 15:10) Wi api tu wen wi wan aneda a sorv Jeuova di rait wie, wos wen piipl a chriit wi bad kaaz a wa wi biliiv iina an wen piipl a temp wi fi du wa rang. (2 Tes. 1:4) An wen da worl ya don, wi a-go api fi nuo se wi did stik tu Jeuova aalduo Sietan did a mek tingz aad fi wi.

19. A wa wan sista we niem Riechel did se bout ou it fiil fi tiich sumadi di chuut? (Luk pan di picha tu.)

¹⁹ Wen wi get fi tiich sumadi di chuut bout Jeuova, wi api bad. Riechel we liv iina di Damanikan Ripoblik, fiil se fi tiich sumadi bout di Gad we wi sorv a wan a di naisis ting eva. Wen shi tingk bout aal a di wan dem we shi elp kom iina di chuut, shi se: “Mi kyaahn iivn tel yu ou api it mek mi fiil wen mi si di wan dem we mi a tiich get fi lov Jeuova muor an muor an dipen pan im an chienj op tingz iina dem laif so dat dem kyan mek im api. Notn we mi gi op no beta dan fi si sumadi we mi tiich di chuut a sorv Jeuova.”

LORN SOPM FRAM DI LAAS TING WE DEM MAN YA WE DID A SORV JEUOVA SE

20. Wa a som a di ting dem we wi du we komiin laik wa Muoziz, Dievid, an Jan yuus tu du?

²⁰ Di taim wen Muoziz, Dievid, an Jan did liv iina did difrant fram fi wi taim. Bot wa a som a di ting dem we wi a du we komiin laik wa Muoziz, Dievid, an Jan yuus tu du? Dem did a sorv di chuu Gad an a dat wi a du tu. An jos laik dem, wi prie tu Jeuova an wi dipen pan im fi mek wi nuo wa fi du. An jos laik dem man de, wi nuo fi shuor se Jeuova a-go bles wi ef wi du wa im se.

21. Wa a som a di blesn dem wi a-go get ef wi du di sitn dem we Muoziz, Dievid, an Jan se wi fi du?

²¹ Nou dat wi luk pan di laas ting dem we dem chrii man ya we did op iina iej did se, mek wi lisn tu wa dem se an du wa Jeuova se wi fi du. A da taim de evriting we wi du a-go wok out gud. An wi a-go kyan “liv lang.” Ye man, wi a-go kyan liv fi eva! (Dyuu. 30:20) An wi a-go api fi nuo se wi a du di ting dem we wi Faada, Jeuova, waahn wi fi du, we a-go du evriting we im pramis wi se im a-go du. Wi kyaahn iivn tingk bout aal a di nais sitn dem we im a-go du fi wi.​—Ifii. 3:20.