Waar A Wan Torbl Sitn
Waar a wan a di wos ting we sumadi kuda eva go chuu. Di suoja dem we fait iina waar an di piipl dem we liv iina di ieriya dem we waar a gwaan nuo ou torbl it bi. Ier wa som a dem se.
DI SUOJA DEM
“Wen yu de a waar, piipl eva a ded ar a get ort roun yu. Yu neva fiil sief at aal.”—Gary, Britn.
“Mi get shat iina mi bak an iina mi fies, an a uol iip a piipl mi si dem kil, aal pikni an uol piipl tu. Waar mek yu na’av no aat.”—Wilmar, Kolombiya.
“Wen dem shat sumadi infronta yu, a sitn dat we no lef yu main. It komiin laik yu eva a ier da sumadi de a baal, an yu kyaahn eva figet dem.”—Zafirah, Merika.
DI PIIPL DEM WE NAA FAIT IINA DI WAAR
“Mi did tingk se mi wuda neva fiil api agen. Evridie mi did fried se dem wuda kil mi. Bot wos dan dat, mi did fried se dem wuda kil mi fambili an fren dem.”—Olena, Yuukrien.
“Wi did afi tan op iina lain a wiet pan fuud fram tuu aklak iina di maanin til ilevn aklak iina di nait an wi did fried bad, kaa wi nuo se schrie bulit kuda kech wi.”—Daler, Tajiikistan.
“Dem kil mi mada an faada iina wan waar we did gwaan an kaaz a dat, mi neehn av nobadi fi tek kier a mi.”—Marie, Ruwanda.
Iivn wid aal a wa dem piipl ya go chuu siek-a waar, dem get fi av piis iina dem aat an main. Pan tap a dat, dem nuo fi shuor se di taim suun kom wen waar naa go de bout agen. Di Baibl mek wi nuo ou dat a-go apm, an a dat yu a-go fain out iina da Watchtowa ya.