Mek Op Yu Main Fi Du Tingz We A-Go Mek Jeuova Api

1. Wa a som di big ting dem we wi afi mek op wi main bout?

AAL a wi afi mek op wi main evridie bout tingz we iizi fi du an tingz we no so iizi fi du. Laik som a di iizi wan dem mait-a bi wa wi fi nyam iina di maanin an wa taim wi fi go a wi bed. Som a di wan dem we no so iizi mait-a av fi du wid di kain-a dakta chriitment we wi a-go tek, ar tingz we wi fi du fi mek wi api, tingz we av fi du wid di piipl dem we wi lov an wid ou wi worship. Aal a wi waahn fi mek shuor se di ting dem we wi mek op wi main fi du wok out gud fi wi an wi fambili. Bot di bigis ting we wi fi a tingk bout a ef wa wi mek op wi main fi du a-go mek Jeuova api.​—Ruo. 12:1, 2.

2. Wa a chrii sitn we wi fi du we kyan elp wi fi nuo di rait wie fi luk pan tingz?

² Wen yu afi mek op yu main bout sopm, yu a-go en op a du di rait ting ef yu (1) nuo evriting bout it bifuo yu du notn, (2) tingk bout ou Jeuova fiil bout wa yu a-go du, an den (3) tingk bout di difrant difrant ting dem we yu mait-a kyan du. Wi a-go luk pan dem chrii sopm ya iina da lesn ya, an dem a-go elp wi fi nuo ou fi luk pan tingz so dat wi kyan mek op wi main fi du di rait ting.​—Pr. 2:11.

CHRAI FI NUO EVRITING WE YU FI NUO BOUT SOPM BIFUO YU DWI’IT

3. Tel wi wa it mait-a komiin laik wen wi mek op wi main fi du sopm.

³ Wen yu afi mek op yu main bout sopm, di fos ting we yu fi du a chrai fi nuo evriting we yu fi nuo bout it bifuo yu du notn. Laik tingk bout dis: Se yu go a dakta kaa yu sik bad, bot bifuo di dakta luk pan yu gud an aks yu no kwestiyan im dis staat tel yu wa rang wid yu an wa yu fi du. Tel mi sopm, yu wuda du di sitn dem we di dakta tel yu fi du? Nuo sa! A siem so ef yu afi mek op yu main bout sopm, yu fi luk pan evriting gud an aks kwestiyan bout it bifuo yu du notn. Mek wi luk pan ou wi kyan du dat.

4. Azkaadn tu Pravorbz 18:13, wa wi fi du bifuo wi mek op wi main fi du sopm? (Luk pan di picha tu.)

⁴ Wen yu aks kwestiyan it kyan elp yu fi nuo nof bout di ting dem we yu plan fi du. Laik se sumadi invait yu fi kom a wan paati, yu kuda aks yuself: ‘A wanda ef mi fi go?’ An ef yu no nuo di sumadi gud we a kip di paati , yu kyan aks im dem kwestiyan ya: ‘A wen dem a-go kip di paati, an a wich paat dem a-go kip it? A umoch piipl a-go de de, an a uu an uu a-go de de? A uu a-go mek shuor se tingz ron gud? Wa a som a di sitn dem we dem a-go du de? A nof lika a-go a ron de?’ Wen yu get di ansa fi dem kwestiyan ya, a dat a-go elp yu fi mek op yu main ef yu fi go a di paati.​—Riid Pravorbz 18:13.

5. Afta yu get aal a di ansa dem we yu waahn, wa yu fi tingk bout?

⁵ Afta yu get di ansa fi aal a di kwestiyan dem we yu av, tingk bout we it a-go miin fi yu. Laik, supuoz yu fain out se di piipl dem we a-go de a di paati naa liv di wie ou di Baibl se wi fi liv, ar se nobadi naa go de de fi mek shuor se piipl naa go jringk til dem jongk? It luk laik se it kuda ton out fi bi wan wail paati we piipl a galang bad? (1 Pii. 4:3) Yu mait-a fain out se notn no rang wid di paati, bot wa ef di taim wen dem a-go kip it a di taim wen yu fi a go a yu miitn an fi go out iina sorvis? Afta yu luk pan aal a dem sopm ya, dat a-go elp yu fi mek op yu main fi du di rait ting. Bot nou dat yu nuo ou yu fiil bout it, tingk bout ou Jeuova fiil bout it.​—Pr. 2:6.

TINGK BOUT OU JEUOVA FIIL BOUT IT

6. Azkaadn tu Jiemz 1:5, wa mek wi fi prie tu Jeuova an aks im fi elp wi?

⁶ Aks Jeuova fi elp yu fi andastan ou im fiil bout tingz. Memba se Jeuova pramis se im a-go mek yu waiz so das yu kyan nuo wa fi du fi mek im api “kaaz Gad naa go uol bak notn [gud] fram [yu].”​—Riid Jiemz 1:5.

7. Tel wi ou wi kyan get fi nuo ou Jeuova fiil bout sopm, an wa it mait-a komiin laik.

⁷ Afta yu prie tu Jeuova an aks im fi mek yu nuo wa fi du, chrai an luk out fi ou im a ansa yu. Ar tingk bout it da wie ya: Ef yu a go somwe an yu laas an yu aks sumadi we nuo di ieriya fi elp yu, yu a-go wiet an lisn tu wa im a se, no chuu? A siem so afta wi aks Jeuova fi mek wi waiz, wi fi wiet fi di ansa an chrai fi luk out fi si ou im a ansa wi. An wi du dat wen wi fain out wa di Baibl av fi se bout wa wi a go chuu. Laik wen yu a mek op yu main ef yu fi go a di paati, yu kyan tingk bout wa di Baibl se bout wail paati, an we it se bout wikid piipl, an wa wi kyan du fi mek Gad Kindom bi di big ting iina wi laif.​—Mat. 6:33; Ruo. 13:13; 1 Kor. 15:33.

8. Wa yu fi du ef yu waahn fi fain out muor bout di ting dem we yu mek op yu main fi du? (Luk pan di picha tu.)

⁸ Bot yu stil mait-a niid fi fain out muor bout di ting dem we yu a mek op yu main fi du. Ye, yu mait-a aks ada breda an sista we chrang iina wa dem biliiv iina fi elp yu. Bot yu a-go niid fi nuo ou fi luk op tingz fi yuself tu. Wi av wol iip a tingz we yu kyan yuuz fi luk op tingz laik di Sitn We Di Jeuova Witnis Dem Kyan Yuuz Fi Luk Op Tingz. Memba se wa yu riili waahn fi du a mek shuor se eniting yu mek op yu main fi du it a-go mek Jeuova api.

9. Wa wi fi du fi mek shuor se wa wi mek op wi main fi du a-go mek Jeuova api? (Ifiijan 5:17)

⁹ Fi nuo ef sopm we wi a-go du a-go mek Jeuova api, di fos ting we wi afi du a chrai fi nuo Jeuova gud gud. Di Baibl se “wen yu get fi nuo di Gad we a di Muos Uoli Wan, a dat a-go mek yu kyan andastan tingz.” (Pr. 9:10) Wen wi get fi nuo di wiez dem we Jeuova av, an wa im plan fi du, an wi get fi nuo di ting dem we im lov an di ting dem we im iet, a da taim de wi riili andastan tingz. So aks yuself da kwestiyan ya, ‘Bies pan wa mi nuo bout Jeuova, wa mi mek op main fi du a-go mek im api?’​—Riid Ifiijan 5:17.

10. Wa mek di bigis ting we wi fi waahn fi du a fi mek Jeuova api?

¹⁰ Som a di taim ef wi fi du di ting dem we a-go mek Jeuova api, it naa go mek wi fambili an wi fren dem api wid wi. Laik di mada an faada dem mait-a waahn dem daata fi marid tu wan man we av wol iip a moni aalduo im mait no chrang iina di sitn dem we im biliiv iina. Ye, a chuu se dem waahn dem daata fi aarait, bot da man de kyaahn go elp ar fi get chrang iina di sitn dem we shi biliiv iina. Wen wi luk pan Matyu 6:33 (NWT) wi si ou Jeuova fiil bout it, kaa de-so im tel wi se wi fi “mek Gad govament . . . bi di big ting iina [wi] laif.” Aalduo wi fi rispek wi mada an faada an di piipl dem we de iina wi ieriya, di bigis ting we wi waahn fi mek shuor se wi a du a mek Jeuova api.

TINGK BOUT DI DIFRANT DIFRANT TING DEM WE YU MAIT-A KYAN DU

11. Wa Pravorbz 2:11 se we kyan elp wi fi tingk bout di difrant difrant ting dem we wi mait-a kyan du?

¹¹ Afta yu get fi si ou Jeuova fiil bout tingz, yu fi luk pan di difrant difrant ting dem we yu mait-a kyan du. (Riid Pravorbz 2:11) Wen yu nuo ou fi luk pan tingz, dat a-go elp yu fi si wa kuda apm ef yu du sortn tingz. Som a di taim it a-go iizi fi yu mek op yu main fi du sitn bot a no aal a di taim it a-go iizi. An a da taim de yu a-go niid fi nuo ou fi luk pan tingz so dat yu kyan du di rait ting.

12-13. Wen yu nuo ou fi luk pan tingz, ou dat a-go elp yu fi mek op yu main bout di kain-a wok we yu a-go du?

¹² Tingk bout dis: Se yu a luk fi wan wok fi tek kier a yu fambili an yu av tuu difrant kain-a wok fi pik fram an yu nuo evriting we yu fi nuo bout dem. Laik di mount a taim we yu afi wok fa, ou lang it a-go tek yu fi riich de an fi go bak uom an dem ting de. Ye, notn mait no rang wid di tuu a dem, an yu mait-a laik wan muor dan di ada wan kaa a di kain-a wok we yu a-go du ar kaa yu mait-a a-go get muor moni. Bot bifuo yu mek op yu main, ada tingz de we yu fi tingk bout tu.

¹³ Laik tingk bout dis: Non a di wok dem a-go mek it aad fi yu go a yu miitn dem ar mek yu na’av no taim fi tek kier a yu fambili fi mek shuor se dem fiil sief an a du di ting dem we fi kip dem kluos tu Jeuova? Wen yu aks dem kwestiyan ya, it a-go elp yu fi mek shuor se yu a “fain out di sitn dem we rait,” an dat a-go elp yu fi mek shuor se yu an yu fambili a mek wa Jeuova waahn unu fi du bi di big ting iina unu laif, insted-a fi a ron dong moni an dem ting de. (Fil. 1:10) Den afta yu du aal a dat, yu a-go pik di wok we a-go mek Jeuova api.

14. Kaa wi nuo ou fi luk pan tingz an wi lov wi nieba dem, a ou dat a-go elp wi fi no du notn we a-go mek nobadi paint no fingga pan wi?

¹⁴ Wen wi nuo ou fi luk pan tingz, wi naa go du notn we mek nobadi kyan paint no fingga pan wi. (Fil. 1:10) An dis a sitn we wi fi tingk bout speshali wen wi afi mek op wi main bout di ting dem we wi a-go wier an ou wi a-go fiks op wiself. Laik wi mait-a laik fi wier sortn stail, bot wa ef wi breda an sista dem an di piipl dem outa ruod fiil a wie bout ou wi jres an fiil se wi no fi wier sortn tingz? Wen wi nuo ou fi luk pan tingz dat a-go elp wi fi tingk bout ou dem fiil. An lov a-go mek wi luk out fi wi nieba dem an it a-go elp wi fi jres prapa. (1 Kor. 10:23, 24, 32; 1 Tim. 2:9, 10) Dat a-go elp wi fi du tingz we a-go shuo se wi lov an rispek ada piipl.

15. Bifuo yu du sopm big, wa yu fi tingk bout?

¹⁵ Ef yu av sopm big fi du, sidong an tingk gud bout wa yu a-go du bifuo yu du notn. Memba Jiizas mek wi nuo se bifuo wi du notn wi fi “sidong fos an chek out umoch it a-go kaas” wi. (Luuk 14:28) So tingk bout di mount a taim an wa it a-go tek fi mek wa yu plan fi du wok out gud. Som a di taim yu mait-a afi go aks yu fambili fi elp yu so dat wa yu plan fi du kyan wok out gud. An dis mek sens kaa yu mait-a si se yu mait-a afi chienj op wa yu plan fi du. An wen yu aks yu fambili fi elp yu an yu lisn tu wa dem se, dem a-go kwika fi elp yu so dat wa yu plan fi du wok out gud.​—Pr. 15:22.

PLAN FI DU SOPM WE A-GO WOK OUT GUD

16. Wa a som a di sopm dem we yu fi du fi mek wa yu plan fi du wok out gud? (Luk pan di paat we niem “Chrii Sopm We Wi Kyan Du Fi Mek Wa Wi Plan Fi Du Wok Out Gud.”)

¹⁶ Ef wi du di sitn dem we wi taak bout iina da lesn ya, dat a fi nuo evriting we yu fi nuo bout sitn bifuo yu dwi’it an fain out wa di Baibl av fi se bout we yu plan fi du, den dat a-go elp yu fi du di rait ting we a-go mek Jeuova api. An den yu kyan go aks Jeuova fi mek we yu plan fi du wok out gud.

17. Wa a som a di big ting we wi fi a tingk bout wen wi a mek op wi main fi du sopm?

¹⁷ Iivn ef yu du tingz aredi iina yu laif we wok out gud, wen yu a mek op yu main fi du sitn, di big ting a dat yu fi dipen pan Jeuova fi elp yu fi si we yu fi du no we yu waahn fi du. No mata ou brait yu bi ar umoch yu nuo, a onggl Jeuova kyan mek yu nuo nof tingz an ou fi luk pan tingz di rait wie, an wen yu du dem sopm ya, it a-go mek yu waiz. (Pr. 2:1-5) Jeuova kyan elp yu fi du di sopm dem we im waahn yu fi du.​—Sa. 23:2, 3.