No Ich Fi Get Baptaiz

1. Wa a som gud riizn we mek yu fi get baptaiz?

EF YU lov Jeuova we gi yu laif an evriting we gud, yu kyan shuo im se yu lov im wen yu prie tu im an tel im se yu a-go gi yu laif tu im an get baptaiz. Wen yu du dem sopm ya, Jeuova a-go tek yu iina im fambili. An kaaz a dat, Jeuova yu Faada an yu Fren a-go mek shuor se im tek kier a yu an shuo yu ou fi liv yu laif kaa yu a fi im pikni nou. (Sa. 73:24; Aiz. 43:1, 2) An wen yu gi yu laif tu Jeuova an get baptaiz yu kyan get di chaans fi liv fi eva.​—1 Pii. 3:21.

2. Wa wi a-go luk pan iina da lesn ya?

² Ef sitn a tap yu fram get baptaiz, a no yu wan dat apm tu. Uol iip a piipl bifuo yu did afi chienj op som sitn iina dem laif an di wie ou dem tingk so dat dem kyan baptaiz. Dem siem piipl de api fi a sorv Jeuova ya nou an dem no ich fi du di sitn dem we Jeuova waahn dem fi du. Di Kristiyan dem bak iina Baibl taim did go chuu som tingz we kuda mek it aad fi dem mek op dem main fi get baptaiz. So mek wi si wa wi kyan lorn fram dem.

DI SAMARITAN PIIPL DEM GET BAPTAIZ

3. Wa a som a di sitn dem we kuda mek it aad fi som a di Samaritan piipl dem get baptaiz?

³ It neehn iizi fi di Samaritan dem chos iina Jiizas an biliiv se a im a di Mesaiya kaa dem did av dem uona rilijan an dem yuus tu worship iina Shiikem an Samieriya we de iina di naat paat a Judiya. Dem did nuo likl bout Gad bot dem did niid fi nuo muor bout Gad Wod bifuo dem get baptaiz. Yu si di Samaritan dem did onggl biliiv iina di fos faiv buk a di Baibl, dat a fram Jenisiz tu Dyuutaranami. An it luk laik se dem did biliiv iina di buk a Jashwa tu. Bot dem did a luk fi di Mesaiya fi kom kaaz a wa rait dong iina Dyuutaranami 18:18, 19. (Jan 4:25) Bifuo dem baptaiz duo, dem wuda afi chos iina Jiizas se a im a di Mesaiya. An “nof a di Samaritan piipl dem” did biliiv iina Jiizas. (Jan 4:39) Bot it wuda likl aada fi som a dem biliiv iina im kaa di Juu piipl dem an di Samaritan dem neehn miks an minggl.​—Luuk 9:52-54.

4. Azkaadn tu Aks 8:5, 6, 14, a wa som a di Samaritan piipl dem did du afta Filip priich tu dem?

⁴ Wa did elp di Samaritan piipl dem fi get baptaiz? Som a di Samaritan dem did “biliiv an staat fala Gad Wod” afta Filip did “priich tu dem bout Krais Jiizas.” (Riid Aks 8:5, 6, 14.) Filip did a wan Juu bot dat neehn tap di Samaritan piipl dem fram lisn tu wa im a se, ar dem mait-a did memba di paat a Gad Wod we mek dem nuo se Gad no paashal. (Dyuu. 10:17-19) Bot wa wi nuo a dat dem “ier Filip” an biliiv wa im se bout Krais Jiizas an dem kuda si se Gad did di de wid im. Plos Filip did a wok nof mirikl, laik fi mek sik piipl get beta an ron out diiman outa piipl.​—Aks 8:7.

5. Wa an wa yu kyan lorn fram wa di Samaritan piipl dem did du?

⁵ Di Samaritan dem neehn miks an minggl wid di Juu piipl dem, an dem neehn nuo nof bout di Baibl niida. Bot dem neva mek dem ting de tap dem fram du wa dem did niid fi du fi get baptaiz. Afta dem did ier wa Filip did a se, di Baibl se: “Wen dem biliiv di gud nyuuz we Filip did a priich bout Gad kindom an Jiizas Krais, evribadi, man an uman go get baptaiz.” (Aks 8:12) Yu biliiv se wa di Baibl tiich a so it go fi chuu? An yu biliiv se di Jeuova Witnis dem no luk dong pan ada piipl, an a dem a shuo di lov fi dem wan aneda we a shuo se a dem riili a fala Jiizas Krais? (Jan 13:35) Ef yu biliiv dem sopm ya, no bada lie-lie, du wa yu niid fi du fi sorv Jeuova an nuo se im a-go bles yu.

6. Wa wi kyan lorn fram wa Ruuben did du?

⁶ Ruuben, we kom fram Jormani, fambili a Jeuova Witnis, bot im neehn shuor ef Jeuova riil. Bot im did si se im fiil so kaa im neehn nuo nof bout Jeuova, so im mek op im main fi du sitn bout it. Im se: “Iina mi uona Baibl stodi, mi stodi muor bout di sitn dem we mi neehn shuor bout, laik mi stodi nof bout ef tingz kom bout jos so.” Im riid di buk we niem Is There A Creator Who Cares About You? An dat did elp im. Den im se tu imself se: ‘Ye man, Jeuova riil fi chuu.’ An den wen im go a di worl ed afis, Ruuben get fi si se a riili wan mirikl Jeuova wok fi mek aal a di breda an sista dem aal uova di worl kyan wok tugeda az wan. So wen im go baka Jormani, Ruuben get baptaiz wen im did a 17. So ef yu a if-an-bot an wanda-wanda bout di sitn dem we yu a lorn, du yu uona Baibl stodi an luk op tingz iina di buk an pamplet dem bout it. Wen wi lorn di chuut we di Baibl tiich, it a-go elp wi fi no if-an-bot an wanda-wanda. (Ifii. 4:13, 14) An wen yu ier bout di uol iip a gud ting dem we a gwaan wid Jeuova piipl dem aal uova di worl​—bout ou dem lov dem wan aneda an ou dem a wok tugeda az wan​—an yu si di lov iina fi yu uona kanggrigieshan, dat a-go elp yu fi lov di breda an sista dem muor an muor.

SAAL WE KOM FRAM TAASOS GET BAPTAIZ

7. Wa mek Saal did afi chienj di wie ou im a tingk?

⁷ Mek wi luk pan wa did apm wid Saal we kom fram Taasos. Im did nuo di Juu piipl dem laa dem an di Juu piipl dem did riet im uol iip. (Gya. 1:13, 14; Fil. 3:5) Kaa di Juu piipl dem neehn tingk se di Kristiyan dem did a du wa rait, Saal did fiil se im did a du wa Gad waahn im fi du wen im did a fait gens dem. (Aks 8:3; 9:1, 2; 26:9-11) So ef Saal did a-go get baptaiz an ton wan a Jiizas falara dem, im wuda afi redi fi sofa fi wa im biliiv iina.

8. (a) A wa did elp Saal fi get baptaiz? (b) Azkaadn tu Aks 22:12-16, a ou Ananaiyas did elp Saal? (Luk pan di picha tu.)

⁸ A wa did elp Saal fi get baptaiz? Wen Jiizas did a taak tu Saal fram evn, im si wan brait brait lait we blain im. (Aks 9:3-9) Fi chrii die im no nyam no fuud an im no tap tingk bout wa did gwaan wid im pan di ruod. Ye man! Saal did staat fi biliiv se Jiizas a di Mesaiya we fi kom, an se di wan dem we a fala im did a du wa rait. An im mos did fiil bad fi nuo se im elp dem kil Stiivn. (Aks 22:20) Afta chrii die, wan a Jiizas falara dem we niem Ananaiyas go luk fi Saal an iil im so dat im kuda si agen, an den im mek im nuo se im no fi ich fi get baptaiz. (Riid Aks 22:12-16.) So Saal ombl imself an tek di elp we im did a get an staat du di sitn dem we im did a lorn.​—Aks 9:17, 18.

9. Wa an wa yu kyan lorn fram Saal?

⁹ Wi kyan lorn uol iip a sitn fram wa did apm wid Saal. Saal kuda mek kaa im ful a imself ar kaa im fried a wa piipl mait-a du tu im mek im no get baptaiz, bot im neehn du dat. Kaa im did ombl, im chienj di wie ou im did a liv wen im ier di chuut bout Jiizas. (Aks 26:14, 19) An im did redi fi ton wan Kristiyan aalduo im did nuo se im wuda afi sofa fi wa im biliiv iina. (Aks 9:15, 16; 20:22, 23) Aal afta Paal get baptaiz im did stil dipen pan Jeuova fi elp im fi go chuu im prablem dem. (2 Kor. 4:7-10) Wen yu baptaiz, yu mait-a fain se piipl a-go fait gens yu kaaz a wa yu biliiv iina ar yu mait-a go chuu difrant difrant prablem. Bot yu kyan nuo fi shuor se Jeuova an Jiizas a-go elp yu fi diil wid dem prablem de.​—Fil. 4:13.

10. Wa yu kyan lorn fram wa Ana did go chuu?

¹⁰ Ana we kom fram di iis paat a Yuurop, afta ar mada get baptaiz, ar faada lou ar fi stodi di Baibl wen shi a 9 ier uol. Bot iina di yaad we Ana mada an faada did liv, dem did av ada fambili we liv de tu, an dem did tingk se kaa shi did a go a wan difrant choch shi did a bring dong shiem an disgries pan di fambili. Wen Ana did a 12 ier uol, shi aks ar faada ef shi kuda baptaiz. Ar faada did waahn fi nuo duo ef a dat shi did riili waahn fi du ar ef a sumadi els did a fuos ar fi dwi’it. Shi tel im se: “Mi lov Jeuova.” An ar faada mek ar baptaiz. Bot afta dat, ar fambili dem did stil a chriit ar bad. Wan a ar fambili dem aal tel ar se: “It wuda did beta yu did outa ruod a sliip wid man we yu no marid tu ar de sumuok dan fi ton wan Jeuova Witnis.” Bot Ana se, “Jeuova elp mi fi eng aan an go chuu, an mi mada an faada did elp mi uol iip tu.” Wa Ana du a rait dong aal a di difrant difrant taim dem wen shi si ou Jeuova did elp ar. Muor taim shi luk pan di sitn dem we shi did rait dong so dat shi no figet wa Jeuova did du fi elp ar. Ef yu fried se piipl a-go fait gens yu kaaz a wa yu biliiv iina, jos memba se Jeuova a-go elp yu tu.​—Iib. 13:6.

KAANIILIYOS GET BAPTAIZ

11. Wa kuda mek Kaaniiliyos no waahn fi baptaiz?

¹¹ Di Baibl tel wi bout Kaaniiliyos tu uu a did ‘di ed fi onjrid suoja’ iina di Ruoman aami. (Aks 10:1) So dis mek wi si se im did a wan tap-a-tap man iina di aami an iina di ieriya we im liv tu. A “nof taim im wuda elp puo piipl.” (Aks 10:2) Jeuova did sen di apasl Piita fi priich tu im bout di gud nyuuz. Yu tingk kaa Kaaniiliyos did a wan tap-a-tap man dat did tap im fram get baptaiz?

12. A wa did elp Kaaniiliyos fi get baptaiz?

¹² Wa did elp Kaaniiliyos fi get baptaiz? Di Baibl tel wi se “im an im uol fambili aalwiez worship Gad” an im aalwiez a prie tu Gad. (Aks 10:2) Wen Piita priich di gud nyuuz tu Kaaniiliyos, im an im fambili biliiv aal a di sitn dem we dem lorn bout Jiizas Krais, an kaaz a dat dem neehn ich fi get baptaiz. (Aks 10:47, 48) Kaaniiliyos did redi fi chienj op eniting we im fi du fi mek shuor se im an im fambili kuda worship Jeuova.​—Jash. 24:15; Aks 10:24, 33.

13. Wa wi kyan lorn fram wa Kaaniiliyos did du?

¹³ Jos laik Saal, Kaaniiliyos neehn mek kaa im a wan tap-a-tap man mek im no get baptaiz. An a siem so ef yu afi chienj op nof tingz iina yu laif jos fi get baptaiz, jos nuo se Jeuova a-go elp yu fi dwi’it. Jeuova a-go bles yu fi aal a wa yu du.

14. A wa wi kyan lorn fram wa Tsuyoshi did du?

¹⁴ Tsuyoshi, we kom fram Japan, did afi chienj sortn tingz we im did a du a im wok so das im kuda get baptaiz. Fi im wok a did fi elp wan edmaasta fi di Ikenuobo skuul we dem fiks op flowaz fi di finaral dem. So ef di edmaasta kyaahn get fi go a wan a di finaral dem, a Tsuyoshi wuda afi go an du di sitn dem we di edmaasta wuda du, we di Budis piipl dem wuda du fi shuo se dem a big op dem sumadi we ded. Bot wen Tsuyoshi lorn di chuut bout wa apm tu sumadi wen dem ded, im get fi si se dem sitn de we im did a du no rait an im kudn get baptaiz ef im did stil a du dem. So im mek op im main se im naa go du dem sitn de. (2 Kor. 6:15, 16) So im mek di edmaasta nuo bout di sitn dem we im a lorn an se im kyaahn go du dem sopm de agen. An kaaz a dat, di edmaasta mek im kip im wok an na’afi du dem sitn de agen. An so wan ier afta im staat fi stodi di Baibl im get baptaiz.a So jos nuo se ef yu afi chienj op tingz we av fi du wid yu wok, Jeuova a-go mek shuor se yu an yu fambili get di sitn dem we unu niid.​—Sa. 127:2; Mat. 6:33, NWT.

DI KORINTIYAN PIIPL DEM GET BAPTAIZ

15. Wa a som a di sopm dem we kuda mek it aad fi di Korintiyan piipl dem get baptaiz?

¹⁵ Uol iip a di piipl dem we did liv iina Korint did a du tingz we Gad no laik. Laik dem did lov moni an dem ting de an a du aal kain-a seks sin, an kaaz a dat, it wuda mek it aad fi piipl kom worship Jeuova. Bot afta Paal go iina di siti go priich bout Jiizas Krais tu dem, “nof a di Korintiyan piipl dem we ier biliiv tu an get baptaiz.” (Aks 18:7-11) Den Jiizas go tu Paal iina wan vijan an tel im se: “Mi av nof piipl iina da siti ya.” So Paal gwaan priich fi wan ier an siks mont.

16. A wa did elp di Korintiyan piipl dem fi tap du di sopm dem we dem did a du so dat dem kuda get baptaiz? (2 Korintiyan 10:4, 5)

¹⁶ Wa did elp di Korintiyan piipl dem fi get baptaiz? (Riid 2 Korintiyan 10:4, 5.) A Gad Wod an im uoli spirit did elp dem fi tap du sortn tingz so dat dem kuda get baptaiz. (Iib. 4:12) So dat miin tu se di wan dem we biliiv iina Jiizas Krais wuda afi tap jringk til dem jongk, tap tiif piipl sitn, an man we did a sliip wid man an uman we did a sliip wid uman wuda afi tap dem sopm de tu.​—1 Kor. 6:9-11.b

17. A wa wi kyan lorn fram di Korintiyan piipl dem?

¹⁷ Aalduo it neehn iizi fi dem piipl de iina Korint fi tap du di sitn dem we dem did a du, dem neehn tingk se dem kudn dwi’it. Dem du aal a wa dem kuda du fi mek shuor se dem go pan di ruod we likl an naro so dat dem kyan get fi liv fi eva. (Mat. 7:13, 14, NWT ) Ef yu a sumadi we a chrai aad fi tap du sitn we yu no fi du so yu kyan get baptaiz, no tap chrai. Beg Jeuova fi im uoli spirit fi elp yu fi no du di bad sitn dem we yu waahn fi du.

18. Wa wi kyan lorn fram wa Monika did du?

¹⁸ Monika, we kom fram wan konchri we niem Jaajiya, did afi wok aad fi tap kos bad wod an wach muuvi an lisn myuuzik an dem ting de we Gad no laik so das shi kuda get baptaiz. Shi se: “Wen mi did a tiinieja, a prie mi did afi prie fi get di chrent fi du wa rait. Jeuova did nuo se mi aalwiez waahn du wa rait, an im aalwiez a elp mi an mek mi nuo wa fi du.” So Monika get baptaiz wen shi did a 16. Ef yu av som sitn we yu a chogl fi tap du so yu kyan get baptaiz, gwaan aks Jeuova fi di chrent fi tap du dem sopm de, an jos nuo se Jeuova a-go gi yu im uoli spirit fi elp yu.​—Jan 3:34.

WEN YU CHOS IINA GAD YU A-GO KYAN MUUV MOUNTN

19. Ef yu a chogl chuu som prablem we komiin laik dem big laik mountn, a wa kyan elp yu fi diil wid dem? (Luk pan di picha tu.)

¹⁹ Jos nuo se no mata wa yu a chogl chuu fi get baptaiz, Jeuova lov yu an im waahn yu fi bi paat a im fambili. Jiizas did tel som a im falara dem se: “Ef unu biliiv, iivn fi likl bit​—likl laik di liklis siid dem, unu wi se tu da moutn ya, ‘Muuv fram ya-so go de-so,’ an it muuv. Notn naa de bout we unu naa go kyan du.” (Mat. 17:20) Dem wan ya we Jiizas did a taak tu did jos ton im falara fi likl bit a ier, so dem did stil afi a lorn fi chos iina Gad. Bot Jiizas did mek dem nuo se iivn ef dem chos iina Jeuova fi likl bit, im wuda elp dem wid eni prablem we dem av aal wen it luk laik it big laik wan mountn, an Jeuova a-go elp yu siem wie tu.

20. Wa yu kyan lorn fram som a di Kristiyan dem bak iina Baibl taim an fram som a dem we de iina fi wi taim tu?

²⁰ Ef yu nuo wa a tap yu fram baptaiz, du wa yu kyan du fi get rid a it so dat yu kyan baptaiz. Tingk bout dem breda an sista de iina Baibl taim an di wan dem we iina fi wi taim we wi jos luk pan an si ou wa dem go chuu kyan elp yu. Fi gi yu laif tu Jeuova an get baptaiz a di bes sitn yu kuda eva mek op yu main fi du!