Chrai Fi Tingk Bout Tingz Di Wie Ou Jeuova An Jiizas Tingk Bout Tingz

1-2. A wa it miin fi lov Jeuova an a wa Jiizas did mek op im main fi du fi shuo se im lov Jeuova?

JIIZAS did mek wi si wa a di muos impuotant laa we Muoziz did gi wen im se, “Yu fi lov di Laad we a fi yu Gad. Yu fi lov im wid aal a yu aat, lov im wid di uol a yu suol, lov im wid aal a yu chrent an wid di uol a yu main.” (Luuk 10:27) So Jiizas mek wi si se wi fi lov Jeuova wid aal a wi aat, an dis av fi du wid di ting dem we wi waahn, di wie ou wi fiil bout tingz an ou wi yuuz di chrent we wi av. An wen wi lov Jeuova dat miin tu se wi a-go lov im wid aal a wi main tu. Ye, wi nuo se wi naa go nuo wa Jeuova tingk bout evriting, bot wen wi stodi di Baibl ‘wi get fi tingk laik ou Krais Jiizas tingk.’ An memba se Jiizas tingk bout tingz jos laik ou im Faada wuda tingk bout tingz. (1 Kor. 2:16) So wen wi du dat, it a-go elp wi fi tingk bout tingz di wie ou Jeuova tingk bout tingz.

² Jiizas did lov Jeuova wid di uol a im main an dat did miin se im did nuo wa Jeuova waahn im fi du. An Jiizas did mek op im main se im naa go mek notn tap im fram du we im fi du fi shuo se im lov Jeuova aalduo it wuda miin se im wuda afi sofa fi du wa Jeuova waahn im fi du.

3. A wa di apasl Piita did lorn fram Jiizas an wa Piita did elp di Kristiyan dem fi du? (1 Piita 4:1)

³ A did a wan nais ting fi Piita an di ada apasl dem wen dem did get fi spen som taim wid Jiizas an get fi lorn ou im tingk bout tingz. Wen Piita did rait im fos leta fi push di breda an sista dem fi gwaan sorv Jeuova, im tel dem se jos laik ou Krais Jiizas sofa wen im did de pan di ort, a siem wie dem fi get dem main redi fi sofa tu. (Riid 1 Piita 4:1.) So ef wan Kristiyan tingk bout tingz laik ou Jiizas tingk bout tingz, it wuda komiin laik se im av wan powaful wepan we kyan elp im fi fait gens eniting we iina im we mait-a mek im waahn fi du wa rang an eniting we iina di worl we Sietan a kanchuol.​—2 Kor. 10:3-5; Ifii. 6:12.

4. A ou da lesn ya a-go elp wi fi du laik wa Piita se?

⁴ Wi a-go luk pan ou Jiizas did tingk bout tingz an ou wi kyan tingk bout tingz laik im tu. Wi a-go luk pan ou wi kyan (1) tingk bout tingz laik ou Jeuova tingk bout tingz we a-go elp aal a wi fi tingk bout tingz di siem wie, (2) ou wi fi ombl wiself, an (3) ou wi kyan prie tu Jeuova so dat wi kyan tingk chriet.

TINGK BOUT TINGZ LAIK OU JEUOVA TINGK BOUT TINGZ

5. A wa Piita did du we shuo se im neehn a tingk bout tingz di wie ou Jeuova tingk bout tingz?

⁵ Wan a di taim Piita neehn a shuo se im did a tingk bout tingz laik ou Jeuova tingk bout tingz. Jiizas did tel im apasl dem se im wuda afi go a Jeruusilem an di choch liida dem wuda mek im sofa wol iip an den dem wuda kil im. (Mat. 16:21) Piita kudn biliiv se Jeuova wuda mek dem kil Jiizas we a di Mesaiya we im pramis se wuda kom siev piipl. (Mat. 16:16) So im tek Jiizas wan said an se tu im se: “Laad, mi prie se Gad neva mek sitn laka dat apm! Dis mosn apm tu yu!” (Mat. 16:22) Kaa Piita neehn a tingk bout dis di wie ou Jeuova tingk bout it, im neehn a tingk laik ou Jiizas tingk niida.

6. A wa Jiizas did du fi shuo se im did a tingk bout tingz di wie ou Jeuova waahn im fi tingk bout tingz?

⁶ Bot Jiizas did a tingk bout tingz di wie ou Jeuova tingk bout tingz. So im se tu Piita se: “Gu we fram mi Sietan! Yu dis a blak op mi wie so, kaa yu naa tingk bout di sitn dem we Gad waahn; a onggl wa piipl waahn de pan yu main!” (Mat. 16:23) Piita did se wa im a se kaa im neehn waahn notn bad fi apm tu Jiizas, bot Jiizas did nuo se wa Piita did a se a neehn wa Jeuova waahn fi apm tu im, so im neehn lisn wa Piita a se. So da taim ya Piita get fi si se im fi a tingk bout tingz di wie ou Jeuova tingk bout tingz. An wi kyan lorn sitn fram dis.

7. Wa Piita did du fi shuo se im did a tingk bout tingz di wie ou Jeuova tingk bout tingz? (Luk pan di picha.)

⁷ Afta dat, Piita shuo se im a tingk bout tingz di wie ou Jeuova tingk bout tingz. Nou Jeuova did waahn di piipl dem we a no Juu fi staat worship im tu. Piita did get di wok fi go priich tu wan man we niem Kaaniiliyos we a di fos sumadi we a neehn Juu fi staat worship Jeuova. Di Juu piipl dem neehn riili yuus tu miks an minggl wid di piipl dem we a no Juu, so it no shak wi fi si se Piita did niid elp fi go priich tu da man ya. Wen Piita get fi si se a dis Jeuova waahn im fi du, im chienj op ou im did a luk pan tingz. An kaa a dat, wen dem sen fi im, im ‘neva aks no kwestiyan, im jos go.’ (Aks 10:28, 29) So im priich di gud nyuuz tu Kaaniiliyos an di piipl dem we liv wid im, an di wol a dem get baptaiz.​—Aks 10:21-23, 34, 35, 44-48.

8. Wa wi kyan du fi shuo se wi a tingk bout tingz di wie ou Jeuova tingk bout tingz? (1 Piita 3:8)

⁸ Wol iip a ier afta dat, Piita did tel di breda an sista dem se dem fi “kom tugeda laik se [dem] a wan sumadi.” (Riid 1 Piita 3:8.) Aal wi we a sorv Jeuova tide fi kom tugeda laik se a wi a wan sumadi​—dat miin se wi a-go tingk bout tingz di wie ou Jeuova waahn wi fi tingk bout tingz an wi fi dwi’it bies pan wa iina Gad Wod. Laik Jiizas tel im falara dem se dem fi mek Gad Kindom govament bi di big ting iina dem laif. (Mat. 6:33, NWT ) So ef wan breda ar sista iina yu kanggrigieshan tel yu se dem waahn fi go paiyanier ar du sopm els fi Jeuova, no bada tel dem se dem fi tek it iizi. Bot wa wi fi du a se tingz fi push dem fi du da nais sitn ya we dem waahn fi du fi Jeuova, an du wa wi kyan du fi elp dem so dat dem kyan dwi’it.

YU FI OMBL YUSELF

9-10. A wa Jiizas did du fi shuo se im riili ombl?

⁹ Di nait bifuo dem kil Jiizas, im tiich Piita an im ada apasl dem ou dem fi ombl demself. Iina di die, Jiizas did sen Piita an Jan fi go get tingz redi fi di laas taim wen dem wuda iit som fuud wid dem wan aneda bifuo im ded. Fi get tingz redi, dem wuda afi get wan biesn an som towil so das sumadi kuda wash dem fut bifuo dem nyam di fuud. Bot a uu wuda du dis ya wok ya?

¹⁰ Jiizas neehn ich fi du sitn fi shuo se im ombl. Wa im du a sitn we wan sliev wuda du an dat did shak im apasl dem. Jiizas tek aaf im ruob an rap wan towil roun im wies den im put som waata iina wan biesn an staat fi wash im falara dem fut. (Jan 13:4, 5) It mos did tek wan lang taim fi im wash aal a im 12 apasl dem fut, an im wash aal Juudas fut we did a-go sel im out. Bot Jiizas ombl imself an dwi’it. Den Jiizas tel dem se: “Unu get we mi dis du tu unu? Unu kaal mi ‘Tiicha’ an unu kaal mi ‘Laad,’ an unu rait, kaa mi a dat fi chuu. Nou, ef mi, we a unu Laad an unu Tiicha, wash unu fut, unu mos wash unu wan aneda fut tu.”​—Jan 13:12-14.

11. A ou Piita did shuo se im did lorn se im fi ombl imself? (1 Piita 5:5) (Luk pan di picha tu.)

¹¹ Di wie ou Piita did du tingz shuo se im did lorn fram Jiizas ou fi ombl imself. Laik afta Jiizas did go baka evn, Piita did iil wan man we kripl fram im baan. (Aks 1:8, 9; 3:2, 6-8) An dis a sitn we wuda jraa kroud. (Aks 3:11) An it wuda mek di piipl dem big op Piita. An memba se di wie ou Piita did gruo, di piipl dem did lov big pozishan an fi get big op. Bot Piita neehn tek di big op fi imself, im ombl imself an mek Jeuova an Jiizas get di big op we dem fi get wen im se: “A Jiizas powa mek da kripl man ya get beta. So wa unu si apm tide, onggl apm kaaz wi biliiv iina Jiizas. Unu kyan si fi unuself se a Jiizas powa mek im beta.” (Aks 3:12-16) An wa Piita did rait iina im leta tu di Kristiyan dem bout ou dem fi ombl demself mek wi memba wa Jiizas did du wen im did put di towil roun im wies an wash im apasl dem fut.​—Riid 1 Piita 5:5.

12. A ou wi kyan du laik Piita an gwaan shuo se wi ombl?

¹² Wi kyan ombl wiself laik Piita. Wen wi luk pan wa Piita did du, it mek wi si se wen sumadi ombl dem no jos nuo fi se di rait ting, kaa di wod we Piita yuuz fi shuo se wi fi ombl av fi du wid ou wi tingk bout wiself an ada piipl tu. So wi a-go redi fi du tingz fi ada piipl we nobadi els no waahn fi du fi dem kaa wi lov dem an wi lov Jeuova tu, an wi naa go a dwi’it kaa wi waahn ada piipl fi si an big wi op fi it. Ef wi api fi du we wi kyan du fi Jeuova an wi breda an sista dem iivn ef nobadi no si we wi a du, wi a shuo se wi ombl.​—Mat. 6:1-4, NWT.

CHRAI FI “TINGK CHRIET”

13. Wen di Baibl se wi fi “tingk chriet,” a wa it miin?

¹³ Wen di Baibl se wi fi “tingk chriet,” wa it av fi du wid? (1 Pii. 4:7) Wan Kristiyan we a tingk chriet a-go mek shuor se wen dem afi mek op dem main bout sopm, dem a-go tingk bout ou Jeuova fiil bout it. Im nuo se kaa im an Jeuova a gud fren, notn no beta dan dat. Im naa go fiil se im beta dan ada piipl an im naa go fiil se im no wot notn niida. An im a-go nuo se im no nuo di ansa fi evriting. Wen dem afi mek op dem main bout wa fi du, dem a-go aalwiez a prie tu Jeuova an aks im fi elp dem.

14. Wa Piita did du wan a di taim we shuo se im neehn a luk tu Jeuova fi elp im?

¹⁴ Di nait bifuo Jiizas ded, im tel im apasl dem se: “Tinait, tinait, di uol a unu a-go ron we lef mi siek-a wa a-go apm tu mi.” Bot kaa Piita did fiil se im did so chrang an im wuda neva du dat, im se: “Aal ef di uol a dem ron we gaan siek-a wa a-go apm tu yu, mi naa go no we!” Bot da siem nait de, Jiizas tel dem se: “No sliip. Kip wach an prie.” (Mat. 26:31, 33, 41) Ef Piita did lisn tu wa Jiizas did se den miebi im wuda briev inof fi tan op an se im a wan a Jiizas falara dem. Piita did fiil bad fi nuo se im se im no nuo Jiizas.​—Mat. 26:69-75.

15. Wa did elp Jiizas fi gwaan tingk chriet pan di nait bifuo im ded?

¹⁵ Aalduo Jiizas did porfek, bifuo im du notn im aalwiez prie tu Jeuova. An dat did mek im briev fi aalwiez du wa Jeuova waahn im fi du. (Mat. 26:39, 42, 44; Jan 18:4, 5) Wen Piita luk pan ou Jiizas did aalwiez a prie tu Jeuova, im did memba dat fi di res a im laif.

16. A wa Piita did du fi shuo se im a tingk chriet? (1 Piita 4:7)

¹⁶ Bot afta a taim, Piita staat fi prie tu Jeuova muor an dipen pan im. Afta Jiizas kom bak alaiv, im mek Piita an di ada apasl dem nuo se Jeuova a-go yuuz im uoli spirit fi elp dem so dat dem kyan du di priichin wok we dem get fi du. Bot Jiizas did tel dem se dem afi go wiet iina Jeruusilem til dat apm. (Luuk 24:49; Aks 1:4, 5) Bot miin taim Piita did a wiet, im an di ada breda an sista dem “did eva a miit tugeda fi prie.” (Aks 1:13, 14) An afta dat, iina di fos leta we Piita did rait tu di ada breda an sista dem, im tel dem se dem fi tingk chriet an fi aalwiez a prie tu Jeuova. (Riid 1 Piita 4:7.) So Piita did lorn se im fi aalwiez dipen pan Jeuova kaa im a did wan a dem we did a elp fi push di breda an sista dem fi tan op chrang.​—Gya. 2:9.

17. Aal ef wi kyan du sortn tingz gud, wa wi fi aalwiez a du? (Luk pan di picha tu.)

¹⁷ Ef wi waahn fi tingk chriet, wi fi mek shuor se wi prie tu Jeuova. An dis a sitn we wi fi aalwiez a du, aal ef wi fiil se wi kyan du sortn tingz gud. An wen wi a mek op wi main bout som big tingz iina wi laif, wi fi mek shuor se wi luk tu Jeuova fi elp wi fi nuo wa fi du kaa wi nuo se a im nuo wa a di bes ting fi wi.

18. Wa a som a di sitn dem we wi fi du ef wi waahn fi tingk bout tingz di wie ou Jeuova tingk bout tingz?

¹⁸ Wi api se Jeuova mek wi iina wan wie so dat wi kyan av di siem kain-a wiez dem laik we im av. (Jen. 1:26) Ye, wi nuo se wi naa go du tingz porfek laik Jeuova. (Aiz. 55:9) Bot jos laik Piita, wi kyan chrai aad fi nuo ou Jeuova fiil bout tingz. So mek wi gwaan chrai fi tingk bout tingz di wie ou Jeuova tingk bout tingz, an chrai fi ombl wiself, an gwaan prie tu Jeuova so dat wi kyan tingk chriet.