Wi Kyan Lorn Sopm Fram Di Laas 40 Die Dem We Jiizas Did De Pan Ort Fa

1-2. A wa did apm wen tuu a Jiizas falara dem did a go a Emiyos?

A DlD Naisan 16, 33 C.E. an Jiizas falara dem did fried an sad bad kaa dem did jos kil Jiizas. So tuu a dem lef Jeruusilem fi go a Emiyos, wan plies we did de bout 7 mail fram Jeruusilem. Aal a wa dem did tingk se di Mesaiya wuda du luk laik se it neehn a-go apm kaa im ded. Bot sitn did a-go apm we dem neva ekspek.

² Aal av a sodn sumadi staat fi waak wid dem, an dem staat fi tel di sumadi bout evriting we apm tu Jiizas, an di sumadi staat fi tel dem som tingz we dem naa go figet. Im staat fi tel dem bout som tingz iina di Baibl “fram wa Muoziz did se tu aal a wa di ada prafit dem did se,” an im mek dem nuo wa mek di Mesaiya did afi sofa an ded. Wen di chrii a dem riich a Emiyos, di man we did a taak tu dem mek dem nuo uu im bi​—se im a Jiizas we kom bak alaiv! Dem mos did api bad wen dem riyalaiz se di Mesaiya kom bak alaiv fi chuu!​—Luuk 24:13-35.

3-4. Wa did apm tu Jiizas falara dem, an wa wi a-go lorn iina da lesn ya? (Aks 1:3)

³ Fi di laas 40 die we Jiizas did de pan ort fa, a nof taim im shuo imself tu im apasl dem. (Riid Aks 1:3.) Afta dat, im apasl dem we did fried an sad bad staat fiil api an dem neehn fried agen fi go priich an tiich bout Gad Kindom.a

⁴ Wi kyan lorn nof wen wi stodi bout da taim ya iina Jiizas laif. Iina da lesn ya, wi a-go si ou Jiizas did yuuz da taim ya (1) fi push im apasl dem fi gwaan tan op chrang, (2) fi mek dem andastan di ting dem iina Gad Wod beta, an (3) fi tiich dem ou fi du di wok we dem a-go get fi du. Wen wi luk pan dem chrii sopm ya, wi a-go si ou wi kyan du laik Jiizas.

GWAAN PUSH UNU WAN ANEDA FI GO AAN

5. Wa mek Jiizas falara dem did niid di push fi go aan?

⁵ Som a Jiizas apasl dem did lef dem ous, dem fambili, an dem gud wok fi yuuz muos a dem taim fi fala im. So dem did niid sumadi fi push dem fi go aan. (Mat. 19:27) An piipl did staat fi chriit som a dem bad kaa dem did staat fi fala Jiizas. (Jan 9:22) Dem did gi op dem sopm ya an redi fi sofa kaa dem did biliiv se Jiizas a di wan we did fi kom siev wi. (Mat. 16:16) Das wai wen dem did kil Jiizas dem did so sad kaa dem fiil se nobadi neehn di de fi siev dem nou.

6. Wa Jiizas did du afta im kom bak alaiv?

⁶ Jiizas neehn biliiv se a kaa im falara dem neehn chrang iina wa dem biliiv iina mek dem did so sad, bot im nuo se dem did fiil so kaa dem did kil im. So di siem die wen im kom bak alaiv, im go luk fi dem fi push dem fi go aan. Laik im shuo imself tu Mieri wen shi did de a di tuum a baal. (Jan 20:11, 16) An im did shuo imself tu im tuu falara dem we wi did taak bout iina di fos paragraaf. An afta dat, im shuo imself tu di apasl Piita tu. (Luuk 24:34) Wi a-go luk pan wa wi kyan lorn bout wa did apm wen im shuo imself tu Mieri Magdaliin.

7. Azkaadn tu Jan 20:11-16, wa Jiizas did si Mieri a du orli iina di maanin pan Naisan 16, an wa dat did push im fi du? (Luk pan di picha tu.)

⁷ Riid Jan 20:11-16. Yu did av som uman we did a fala Jiizas, an orli iina di maanin pan Naisan 16, dem go wich paat dem did put im badi. (Luuk 24:1, 10) Mek wi taak bout wa did apm wid wan a di uman dem we niem Mieri Magdaliin. Wen Mieri did riich wich paat dem put Jiizas badi, shi neehn si notn iin de. So shi ron go tel Piita an Jan an dem ron go a di tuum an shi ron baka dem. Afta dem si se it did emti fi chuu, di man dem go baka dem yaad, bot Mieri tan de an a baal. Bot shi neehn nuo se Jiizas did a wach ar an si se shi a baal an fiil it fi ar. So im mek Mieri nuo se a im, an im du sitn fi ar we did mek shi fiil beta. Im taak tu ar an tel ar se shi fi go tel im ada falara dem se im kom bak alaiv.​—Jan 20:17, 18.

8. Ou wi kyan du laik Jiizas?

⁸ A ou wi kyan du laik Jiizas? Wi kyan du laik Jiizas wen wi si se wan a wi breda ar sista a go chuu som rof taim fi sorv Jeuova an wi taak tu dem iina wan wie we shuo se wi fiil it fi dem so dat wi kyan push dem fi gwaan sorv Jeuova. Luk pan wa did apm wid wan sista we niem Jocelyn we ar sista did ded iina wan bad aksident. Shi se: “Mi did sad bad an fiil laik se mi kudn go aan.” An shi se wan breda an im waif did mek shi kom a dem yaad an dem lisn tu ar an mek ar nuo se dem fiil it fi ar an se shi wot nof tu Jeuova. An shi se: “Mi did fiil laik se mi de outa sii de baks bout wen staam a gwaan, an Jeuova jos yuuz dem fi tek mi outa di waata an put mi iina wan laif buot. Wa dem did du fi mi did mek mi fiil laik se mi fi gwaan sorv Jeuova.” Wen wi breda an sista dem tel wi wa a gwaan diip dong iina dem aat an wi lisn tu dem gud an shuo dem se wi fiil it fi dem, wi a shuo dem se wi waahn fi elp dem fi gwaan sorv Jeuova.​—Ruo. 12:15.

YUUZ GAD WOD FI RIIZN WID PIIPL

9. Wa mek Jiizas falara dem neehn andastan wa a gwaan, an a ou im did elp dem?

⁹ Jiizas apasl dem did biliiv di sitn dem iina Gad Wod, an chrai aad fi du di sitn dem we it se dem fi du. (Jan 17:6) Bot kaa Jiizas did ded laik wan kriminal pan di wudn puos, it mek dem neehn nuo wa fi biliiv se. Jiizas did nuo se a neehn kaa dem aat did bad mek dem fiil so, bot a chuu dem neehn riili andastan wa did a gwaan. (Luuk 9:44, 45; Jan 20:9) So im yuuz di sitn dem iina di Baibl fi elp dem fi andastan wa did gwaan. Luk pan wa im did du wen im did a taak tu tuu a im falara dem wen dem did a waak go a Emiyos.

10. A wa Jiizas did du fi mek im falara dem nuo fi shuor se a im a riili di Mesaiya? (Luuk 24:18-27)

¹⁰ Riid Luuk 24:18-27. Wi si se Jiizas neehn dis tel di man dem a uu im bi, bot im aks dem kwestiyan kaa im did waahn dem fi tel im wa a gwaan iina dem aat an main, an a dat dem du. Dem tel im se dem did tingk se Jiizas wuda siev Izrel fram di Ruoman piipl dem. Afta dem don tel im ou dem fiil, Jiizas yuuz Gad Wod fi elp dem fi andastan wa did apm.b Da siem iivnin de, Jiizas elp di ada falara dem fi andastan wa mek dem sopm ya a apm. (Luuk 24:33-48) Wa wi kyan lorn fram wa Jiizas did du?

11-12. (a) Wa wi lorn fram di wie ou Jiizas did tiich piipl di chuut we iina Gad Wod? (Luk pan di picha dem tu.) (b) Ou di sumadi we did stodi wid Norval did elp im?

¹¹ A ou wi kyan du laik Jiizas? Wan a di ting dem we yu kyan du a dat wen yu a stodi di Baibl wid sumadi yu kyan aks dem kwestiyan we mek yu fain out wa a gwaan iina dem aat an main. (Pr. 20:5) Wen wi andastan ou dem fiil bout tingz, wi kyan shuo dem ou fi fain som skripcha we kyan elp dem. Bot mek shuor se yu no tel dem wa fi du. Insted-a dat, elp dem fi si ou dem kyan riizn pan di sitn dem iina di Baibl fi nuo wa Jeuova waahn dem fi du. Luk pan wa did apm wid wan breda we liv iina Gaana we niem Norval.c

¹² Norval did staat stodi di Baibl wen im did a 16 ier uol. Likl afta dat, im fambili staat fait gens im kaa a wa im biliiv iina. So di sumadi we did a stodi di Baibl wid im yuuz Matyu chapta 10 fi mek im si se piipl a-go fait gens di wan dem we a sorv Gad di rait wie an mek tingz aad fi dem. Norval se, “So wen dem staat fait gens mi, mi did nuo fi shuor se mi did fain di chuut.” An di sumadi we did a stodi di Baibl wid im elp im fi riizn pan Matyu 10:16 fi mek im si ou im kyan waiz an mek im fambili si se im rispek dem wen im a taak bout di difrant difrant ting dem we im biliiv iina. Afta Norval baptaiz, im did waahn fi paiyanier. Bot im faada did waahn im fi go a yuunivorsiti. So insted-a tel Norval wa fi du, di sumadi we a stodi wid im aks im som kwestiyan fi fain out wa a gwaan iina im aat an main, an fi elp im fi yuuz di ting dem we de iina Gad Wod fi riizn pan tingz. Kaaz a dat, Norval mek op im main fi yuuz muos a im taim fi priich an tiich. An kaa im du dis, Norval faada ron im outa di yaad. Bot ou yu tingk dis did mek Norval fiil bout wa im du? Im se, “Mi did nuo fi shuor se mi du di rait ting.” Wen wi tek di taim fi elp di piipl dem we wi a tiich di Baibl fi riizn pan wa Gad Wod se, wi a elp dem fi ton wan chrang Kristiyan.​—Ifii. 3:16-19.

ELP FI CHRIEN DI BREDA DEM FI BI “WAN GIF TU DI PIIPL DEM”

13. Wa Jiizas did du fi mek shuor se yu did stil av man a du di wok we Jeuova did gi im fi du? (Ifiijan 4:8, NWT )

¹³ Wen Jiizas did de pan ort, im du di ting dem we im Faada gi im fi du iina wan porfek wie. (Jan 17:4) Bot Jiizas neehn gwaan laik se ‘ef yu waahn sitn fi du gud yu afi du it yuself.’ Fi di chrii an a aaf ier we im did a priich an tiich fa, im chrien im falara dem fi du di wok we im did a du. So bifuo im go a evn, im gi im falara dem di wok fi du. An som a dem man ya we did get di wok fi tek kier a Jeuova shiip dem we wot nof tu im an fi liid di breda an sista dem iina di priichin wok, mait-a neehn riich 30 yet wen dem get di wok fi du. (Riid Ifiijan 4:8, NWT.) Bot a ou Jiizas did yuuz di laas 40 die dem we im did av pan di ort fi tiich dem man ya we did stik tu im an a wok aad fi bi “wan gif tu di piipl dem”?

14. Fi di laas 40 die dem wen Jiizas did de pan di ort, a ou im did elp im falara dem fi get chrang iina wa dem biliiv iina? (Luk pan di picha tu.)

¹⁴ Wen Jiizas did a taak tu im falara dem, im did taak tu dem chriet op, bot im dwi’it iina wan nais wie. Laik im did si se som a dem neehn biliiv se im did riili ded an kom bak alaiv. So im did afi jraa dem op iina wan nais wie. (Luuk 24:25-27; Jan 20:27) An im did mek dem nuo se a no di wok we dem a du fi tek kier a demself an dem fambili fi bi di big ting iina dem laif, bot a di wok fi tek kier a Jeuova shiip dem. (Jan 21:15) Im did mek dem memba tu se dem no fi bizniz tu moch bout di speshal wok we ada piipl mait-a get fi du fi Jeuova. (Jan 21:20-22) An wen dem did a tingk se Gad Kindom did a-go kom an mek di Izrel piipl dem ruul agen, Jiizas karek dem an mek dem si se a di priichin wok dem fi a tingk bout an a wok aad fi du. (Aks 1:6-8) Wa di elda dem kyan lorn fram wa Jiizas did du?

15-16. (a) Wa a som sitn di elda dem kyan du fi shuo se dem a fala Jiizas? Tel wi wa mek yu se so. (b) A ou it did elp Patrick kaa di elda dem jraa im op iina wan nais wie?

¹⁵ A ou di elda dem kyan du laik Jiizas? Dem fi chrien an elp di man dem iina di kanggrigieshan so das dem kyan get muor wok fi du, aal di wan dem we yong tu.d An di elda dem no fi fiil se di breda dem we dem a chrien a-go du tingz porfek, bot wa dem fi du a elp dem iina wan nais wie. Wen dem du dat, it a-go elp di breda dem fi nuo ou fi du tingz gud, an si se dem fi ombl, an fi du tingz so dat ada piipl kyan chos dem, an se dem fi redi fi du tingz fi ada piipl tu.​—1 Tim. 3:1; 2 Tim. 2:2; 1 Pii. 5:5.

¹⁶ Luk pan ou it did elp wan breda we niem Patrick wen wan elda did jraa im op iina wan nais wie. Wen im did yongga, im yuus tu taak tu piipl rof an chriit dem bad, aal di sista dem tu. So wan elda we chrang iina wa im biliiv iina did si se Patrick av wan prablem, im taak tu im chriet bot iina wan nais wie, an mek im nuo se wa im a du no rait. Patrick se, “Mi did glad se im did taak tu mi, kaa mi yuus tu fiil a wie wen mi si som ada breda a get som speshal wok fi du iina di kanggrigieshan we mi wuda waahn fi du. Bot di elda mek mi si se wa mi fi a chrai fi du a fi ombl miself an tek kier a di breda an sista dem insted-a fi a chrai fi get speshal wok iina di kanggrigieshan fi du.” Kaaz a di elp we Patrick get, im get fi ton wan elda wen im did a 20 likl bit.​—Pr. 27:9.

17. A ou Jiizas did shuo se im nuo se im falara dem kuda du di wok we im gi dem fi du?

¹⁷ Jiizas neehn onggl gi im falara dem di wok fi priich, bot im gi dem di wok fi tiich piipl tu. Aalduo im falara dem mait-a did fiil se dem kudn du di wok gud, Jiizas did nuo se dem kuda dwi’it an im did mek dem nuo se dem kuda dwi’it tu. Jiizas se: “Siem laka ou di Faada sen mi iina di worl, a siem wie so mi a sen unu iin de.”​—Jan 20:21.

18. A ou di elda dem kyan du laik Jiizas?

¹⁸ A ou di elda dem kyan du laik Jiizas? Di elda dem we nuo ou fi du di wok we dem get fi du iina di kanggrigieshan gud aalwiez a chrai fi si ou dem kyan get som ada breda fi elp dem wid di wok. (Fil. 2:19-22) Laik dem kyan yuuz di yong breda dem fi elp wen dem a kliin an fiks op di Kindom Aal. An afta dem aks wan breda fi du sitn, dem a-go mek im nuo se dem nuo se im kyan dwi’it wen dem chrien im gud. An dem a-go lou di breda an nuo se im a-go du wa dem get fi du gud. Matyu, we no tuu lang ton wan elda, se im riili api se afta wan elda tiich im fi du sitn gud, im lou im an jos nuo se im a-go dwi’it gud. Im se, “It riili elp mi wen dem luk pan di sitn dem we mi no du gud an se a jos paat a laif, it a-go elp mi fi du beta.”e

19. A wa aal a wi fi mek op wi main fi du?

¹⁹ Jiizas yuuz di laas 40 die dem wen im did de pan ort fi push im falara dem fi go aan, an im tiich dem di chuut, an chrien dem fi du di wok we im gi dem fi du. Aal a wi fi mek op wi main fi chrai wi bes fi du tingz laik ou Jiizas did dwi’it. (1 Pii. 2:21) An im a-go elp wi fi dwi’it kaa im did pramis wi se, “Mi no lef unu non at aal, mi de wich paat unu de til taim don.”​—Mat. 28:20.