Du Laik Jiizas An Shuo Se Yu Wel Waahn Fi Priich

1. Wa a wan sitn we mek Jeuova piipl dem difrant fram di ada piipl dem we se dem a Kristiyan?

KAA Jeuova piipl dem wel waahn fi priich tu piipl, dat a wan ting we mek wi difrant fram di ada piipl dem we se dem a Kristiyan. (Taitos 2:14) Bot som a di taim yu mait-a fiil laik da elda ya we eva a wok aad we se, “Som taim mi jos no fiil laik fi priich.”

2. Wa mait-a mek it aad som a di taim fi wi wel waahn fi priich?

² Som a di taim, wi mait-a wel api fi du di ada wok dem we Jeuova gi wi fi du dan fi go out go priich tu piipl. An dat a kaa it iizi fi si di gud sitn dem we apm laik wen wi bil an fiks op di Kindom Aal an dem plies de, an wen wi elp out di breda an sista dem wen orikien an dem ting de apm, an wen wi tek di taim fi inkorij wi breda an sista dem. Wen wi du dem sitn ya an a wok wid di breda an sista dem, it mek wi fiil api kaa wi an dem a wok tugeda az wan, an wi nuo se dem lov wi an se dem api fi di sitn dem we wi du fi dem. Bot wi mait-a a priich fi wol iip a ier iina di siem ieriya we onggl wan an tuu piipl a lisn tu wi, ar we yu av som piipl we no waahn lisn tu notn we wi av fi se. An wi nuo se di kluosa wi get tu di en a da worl ya, muor an muor piipl naa go waahn fi ier wa wi a se. (Mat. 10:22) Wa kyan elp wi fi aalwiez waahn fi priich tu piipl an waahn fi dwi’it muor an muor?

3. A ou di tuori iina Luuk 13:6-9 elp wi fi si ou Jiizas did wok aad fi priich tu piipl?

³ Wen wi luk pan ou Jiizas did a wok aad fi priich tu piipl, wi kyan lorn wol iip fram im. Laik wen im did a priich, im neva mek notn tap im fram priich. Matarafak, di muor taim paas a di muor im priich, it did komiin laik se wan faiya de iina im we a push im fi priich. (Riid Luuk 13:6-9.) Jos laik di man we wi riid bout we did av wan prangganat chrii, an afta chrii ier im mek im gyaadna nuo se im a luk fi fain prangganat pan it an im kudn fain non, a siem so Jiizas did spen chrii ier a priich tu di Juu piipl dem, an nof a dem neva lisn tu wa im a se. Bot jos laik ou di gyaadna neehn a gi op pan di prangganat chrii, a siem so Jiizas neehn tap chrai fi elp di piipl dem, bot we im du a priich muor so dat im kuda riich dem aat.

4. Wa a fuor tingz we Jiizas did du we wi a-go luk pan?

⁴ Iina da lesn ya, wi a-go luk pan ou Jiizas did wok aad fi priich tu piipl iina di laas siks mont we im did de pan ort fa. Wen wi luk pan ou im did wok aad fi priich tu piipl, it kyan elp wi fi wok aad fi priich tu piipl tu. So wi a-go luk pan fuor tingz we Jiizas did du fi priich tu piipl: (1) Ou im mek wa Jeuova waahn im fi du bi di big ting iina im laif, (2) ou im mek shuor se im nuo di sopm dem we di Baibl se wuda apm an du wa it se, (3) ou im luk tu Jeuova fi elp im, an (4) ou im neehn gi op pan di piipl dem kaa im nuo se som a dem wuda lisn tu im.

IM MEK WA JEUOVA WAAHN IM FI DU BI DI BIG TING IINA IM LAIF

5. Wa Jiizas did du fi shuo se wa Jeuova waahn im fi du a did di big ting iina im laif?

⁵ Jiizas did wok aad fi priich “di gud nyuuz bout Gad kindom” kaa im did nuo se a dis Jeuova did waahn im fi du. (Luuk 4:43) A dis a did di big ting iina Jiizas laif. Aal wen di taim did suun kom fi im tap priich, im go a “di toun an dischrik dem” fi go tiich piipl. (Luuk 13:22) Im did aal tiich som a im ada falara dem fi si ou dem kyan du di priichin wok wid im tu.​—Luuk 10:1.

6. Aalduo wi du ada wok fi Jeuova, wa a di mien wok we im waahn wi fi du? (Luk pan di picha tu.)

⁶ A siem so fi priich di gud nyuuz bout Gad Kindom a di mien wok we Jeuova an Jiizas waahn wi fi a du. (Mat. 24:14; 28:19, 20) Eni ada wok we wi du fi Jeuova av sopm fi du wid di priichin wok we wi a du. Laik wen wi elp fi mek Kindom Aal an dem plies de ar wi a wok a Betel, wi a elp di ada breda an sista dem we a du di priichin wok tu. An wen orikien an dem ting de mash op wi breda an sista dem ous an wi go elp out, wi a elp dem fi staat bak fi priich tu ada piipl kwik kwik tu. So wen wi get fi si se fi priich tu ada piipl a wan big ting we Jeuova waahn wi fi a du, it a-go push wi fi wok aad fi dwi’it. Wan elda we niem János we kom fram Onggari se, “Mi aalwiez chrai fi memba se no mata di ada wok we mi a du fi Jeuova, dat no miin tu se mi no fi wok aad fi priich tu piipl an tiich dem kaa dat a di mien wok we Jeuova waahn wi fi du.”

7. Wa mek Jeuova waahn wi fi gwaan priich tu piipl ya nou? (1 Timoti 2:3, 4)

⁷ Wen wi lov piipl di wie ou Jeuova lov dem, it a-go push wi fi wok aad fi priich tu dem an tiich dem kaa wi a-go waahn wol iip a dem fi ier di gud nyuuz bout Gad Kindom so dat dem kyan kom sorv Jeuova tu. (Riid 1 Timoti 2:3, 4.) So Jeuova elp wi fi si ou wi kyan priich tu dem an tiich dem beta. Laik wi av di pamplet we niem Shuo Piipl Lov​—Elp Dem Fi Ton Jiizas Falara. An iina da pamplet ya, it elp wi fi si ou wi kyan staat fi taak tu piipl so dat wi kyan elp dem fi ton wan a Jiizas falara tu. Aal ef dem no lisn tu wi nou, dem kyan go stil get di chaans fi staat sorv Jeuova bifuo di wos sofarieshan don. Wa wi se tu dem nou mait-a elp dem fi staat sorv Jeuova iina di fyuucha. Bot dat a-go onggl apm ef wi gwaan priich tu dem ya nou.

IM MEK SHUOR SE IM NUO DI SOPM DEM WE DI BAIBL SE WUDA APM BIFUO DEM APM

8. Kaa Jiizas did nuo di ting dem we di Baibl se wuda apm, wa dat did mek im yuuz im taim fi du?

⁸ Jiizas did nuo ou di sopm dem we di Baibl se wuda apm, wuda apm. Im nuo se a onggl chrii an a aaf ier im wuda priich fa. (Dan. 9:26, 27) An im nuo wa di Baibl se bout wen im wuda ded an ou im wuda ded. (Luuk 18:31-34) An kaaz a dat, im wok aad fi du evriting we im kuda du fi priich tu piipl an tiich dem iina di taim we im get fi dwi’it.

9. Wa mek wi fi wel waahn fi priich tu piipl wen wi si di ting dem we di Baibl se a-go apm a apm?

⁹ Kaa wi nuo di ting dem we di Baibl se a-go apm, it elp wi fi wok aad fi du di priichin wok tu. Laik wi nuo se wi no av nof taim lef iina da worl ya. Bot wi nuo se di ting dem we a gwaan iina di worl ya nou an di wie ou di piipl dem iina di worl a gwaan a we di Baibl se dem wudaana du iina di laas die dem. Wi nuo se wa a gwaan wid Britn an Merika an Rosha an di wan dem we a bak Rosha, a wa di Baibl se wuda apm wid di king a di sout an di king a di naat “wen di en de nier.” (Dan. 11:40) An wi nuo se Britn an Merika we a ron tingz iina di worl ya nou a di fut paat a di stachu we Daniyel 2:43-45 taak bout. So wi nuo fi shuor se jos laik wa di Baibl se a-go apm, suun suun Gad Kindom a-go get rid a dem govament ya we a ron tingz tide. Wen wi si se aal a dem sopm ya we di Baibl se wuda apm a apm, it mek wi si se wi a liv iina di taim wen da worl ya suun don. So dat mek wi waahn fi du evriting we wi kyan du fi wok aad fi priich tu piipl an tiich dem.

10. Kaaz a di ting dem we di Baibl se a-go apm, a ou dem mek wi wel waahn fi gwaan priich tu piipl?

¹⁰ Di Baibl no onggl tel wi bout di bad sitn dem we wudaana apm iina di laas die dem, bot it tel wi bout som gud sitn we a-go apm we wi wel waahn fi mek piipl nuo bout. Laik wan sista we niem Carrie, we a elp out we dem niid muor piipl fi du di priichin wok iina di Damanikan Ripoblik, se: “Di nais ting dem we Jeuova pramis wi se im a-go gi wi mek mi wel waahn fi priich di gud nyuuz tu ada piipl.” An shi se: “Wen mi si di wol iip a prablem dem we di piipl dem iina di worl a diil wid tide, mi si se di ting dem we Jeuova se im a-go du a no jos fi mi, bot im a-go dwi’it fi dem tu.” Di Baibl mek wi nuo se Jeuova wuda elp wi fi priich tu piipl, so dis mek wi wel waahn fi dwi’it. An Leila we kom fram Onggari se: “Wa Aizaiya 11:6-9 se mek mi wel waahn fi priich tu piipl, aal tu di wan dem we no luk laik se dem waahn fi ier wa mi a se, kaa mi nuo se Jeuova kyan elp enibadi fi chienj.” An wan breda fram Zambia we niem Christopher se: “Jos laik wa Maak 13:10 se, di gud nyuuz a pred aal uova di worl an mi fiil gud fi nuo se mi kyan elp mek wa di Baibl se wuda apm ya-so apm.” A wich wan a di ting dem we di Baibl se wuda apm we mek it komiin laik faiya a bon op iina yu we mek yu wel waahn fi gwaan du di priichin wok?

IM LUK TU JEUOVA FI ELP IM

11. Wa mek Jiizas did niid fi dipen pan Jeuova fi elp im fi gwaan wok aad fi priich tu piipl? (Luuk 12:49, 53)

¹¹ Jiizas did nuo se Jeuova wuda elp im fi gwaan wok aad fi priich tu piipl. Aalduo Jiizas did tek taim wid piipl wen im a priich tu dem, im nuo se tingz wuda get at som a di taim wen im a taak tu piipl kaaz a wa im a priich se, an it wuda mek dem fait gens im tu. (Riid Luuk 12:49, 53.) An kaaz a wa im did a du, aal di choch liida dem chrai fi kil im muor dan wan taim. (Jan 8:59; 10:31, 39) Bot Jiizas neehn mek dat mek im no priich tu piipl kaa im nuo se Jeuova wuda de de wid im. Im se: “A no mi wan a dwi’it. Mi dwi’it wid mi Faada, di wan we sen mi kom ya. . . . Im neehn mek mi tan pan mi uon, kaa mi eva a du wa mek im api.”​—Jan 8:16, 29.

12. A ou Jiizas did elp im falara dem fi gwaan priich aal wen piipl a fait gens dem?

¹² Jiizas did elp im falara dem fi memba se a Jeuova dem fi dipen pan. An muor dan wan taim im mek dem nuo se Jeuova a-go elp dem aal wen ada piipl a mek tingz aad fi dem kaaz a wa dem biliiv iina. (Mat. 10:18-20; Luuk 12:11, 12) An kaaz a dat, im tel dem se dem fi waiz laik siniek. (Mat. 10:16; Luuk 10:3) Im tel dem se dem no fi fuos nobadi fi lisn tu dem. (Luuk 10:10, 11) An im tel dem se dem fi ron ef piipl a chrai fi mek tingz aad fi dem kaaz a wa dem biliiv iina. (Mat. 10:23) Aalduo Jiizas did a wok aad fi priich tu piipl an im nuo se Jeuova wuda di de fi im, im stil neehn du notn we wuda kaaz im fi get ort.​—Jan 11:53, 54.

13. Wa mek yu kyan nuo fi shuor se Jeuova a-go elp yu?

¹³ Kaa wol iip a piipl a fait gens di priichin wok we wi a du, wi niid Jeuova fi elp wi. (Rev. 12:17) Wen wi luk pan wa Jiizas did prie fa iina Jan chapta 17, it mek wi nuo fi shuor se Jeuova a-go elp wi, kaa Jiizas did aks Jeuova fi gyaad im apasl dem an Jeuova du dat. Iina di buk a Aks, it elp wi fi si ou Jeuova elp di apasl dem fi gwaan wok aad an priich tu piipl aalduo piipl did a mek tingz aad fi dem. An wen Jiizas did prie tu Jeuova, im aks Jeuova fi gyaad di wan dem we lisn tu im apasl dem. An dat miin yu tu. An Jeuova stil a ansa da prieya de​—im a-go elp yu jos laik ou im did elp Jiizas apasl dem.​—Jan 17:11, 15, 20.

14. A ou wi nuo se wi a-go kyan gwaan wok aad fi priich tu piipl an tiich dem? (Luk pan di picha tu.)

¹⁴ Di kluosa wi get tu di taim wen da worl ya a-go don, a di aada it a-go bi fi wi wok aad fi priich di gud nyuuz. Bot wi nuo se Jeuova a-go gi wi di elp fi dwi’it. (Luuk 21:12-15) Jos laik wa Jiizas an im falara dem did du, wi fi mek piipl mek op dem main ef dem waahn fi lisn tu wi ar ef dem no waahn fi lisn tu wi, so wi na’afi aagyu wid dem. Aal wen di wok anda lakdong, wi breda an sista dem stil get fi priich kaa dem dipen pan Jeuova, dem no dipen pan demself. An jos laik ou Jeuova did gi di Kristiyan dem bak iina Baibl taim di chrent fi du di priichin wok, a siem so im a gi wi di chrent so dat wi kyan priich “di uol a im mesij” jos laik ou im waahn wi fi dwi’it. (2 Tim. 4:17) An yu kyan nuo fi shuor se ef a Jeuova yu a dipen pan yu a-go kyan gwaan wok aad fi priich tu piipl an tiich dem.

IM NEEHN GI OP PAN DI PIIPL DEM, IM NUO SE SOM A DEM WUDA LISN TU IM

15. Wa mek wi nuo se Jiizas aalwiez tingk gud bout di priichin wok we im get fi du?

¹⁵ Jiizas did nuo fi shuor se im wuda kyan elp piipl fi lorn di chuut bout Jeuova, an dat did elp im fi aalwiez api bout di priichin wok we im get fi du. Laik iina 30 C.E., im did si se wol iip a piipl did redi fi lisn tu di gud nyuuz. Im did se dem komiin laik wen fuud raip op an redi fi di faama dem riip it. (Jan 4:35) An bout wan ier afta dat, im tel im falara dem se: “A uol iip a fuud out de iina di fiil fi pik.” (Mat. 9:37, 38) An afta dat, im tel dem di siem ting se: “Nof fuud de out de iina di fiil fi pik . . . Aks di Laad we uon di fuud fi sen out piipl fi pik dem.” (Luuk 10:2) So Jiizas did nuo se piipl aalwiez out de fi ier di gud nyuuz, an wen dem lisn it mek im api.​—Luuk 10:21.

16. A ou di tuu tuori dem we Jiizas did tel im falara dem mek wi si se wi fi tingk gud bout di priichin wok we wi a du? (Luuk 13:18-21) (Luk pan di picha tu.)

¹⁶ Jiizas did elp im falara dem fi aalwiez tingk gud bout di Kindom mesij we dem get fi priich an dat wuda elp dem fi wok aad fi dwi’it. Laik luk pan tuu tuori we im did tel dem bout. (Riid Luuk 13:18-21.) Jiizas did yuuz wan tuori bout wan likl likl siid fi mek dem si se di Kindom mesij a-go pred an nobadi ar notn kyaahn go tap it. An im tel dem wan neda tuori bout yiis fi shuo se di Kindom mesij wuda pred faar an kaaz piipl fi chienj aalduo wi mait-a no si’it siem taim. So Jiizas elp im falara dem fi si se di Kindom mesij we dem get fi priich wuda elp nof piipl.

17. Wa a som a di riizn dem we mek wi fi gwaan tingk gud bout di priichin wok we wi a du?

¹⁷ Wen wi tingk bout wa Jeuova piipl a du aal uova di worl wen it kom aan tu di priichin wok, it mek wi waahn fi wok aad fi dwi’it tu. Evri ier, uol iip a miliyan a piipl kom a di Laad Sopa, an wi a get fi stodi di Baibl wid dem. An wol iip a touzn a dem get baptaiz an staat fi priich wid wi. Wi no nuo umoch muor piipl a-go lisn tu wi wen wi priich tu dem, bot wi nuo se Jeuova a gyada op wan big kroud a piipl we a-go go chuu di torbl sofarieshan. (Rev. 7:9, 14) Wi nuo se Jeuova, we inchaaj a di piipl dem we komiin laik fuud we fit an redi fi riip, si se nof piipl out de fi kom lorn di chuut, so wi si wa mek wi fi gwaan wok aad fi priich tu piipl.

18. A wa wi waahn ada piipl fi si se wi a du?

¹⁸ Piipl kyan aalwiez nuo Jiizas falara dem kaaz a ou dem a wok aad fi priich. Wen dem si ou Jiizas apasl dem neehn fried fi taak op, dem si se “dem did nuo Jiizas an did waak wid im fi a gud wail.” (Aks 4:13) Wen piipl si ou wi a wok aad fi du di priichin wok, a siem so wi waahn dem fi si se wi a fala Jiizas tu.