Gwaan Priich Tu Piipl Kaa Yu Lov Dem!

1. Wa wi did lorn a di speshal miitn we dem did kip iina Aktuoba 2023?

A DI speshal miitn we kip evri Aktuoba fi 2023,a wi get fi ier som tingz we dem chienj op bout wa wi yuus tu biliiv. An wi get fi ier som nais tingz wen it kom aan tu wi priichin wok. Laik wi lorn se piipl mait-a aal get di chaans fi staat sorv Jeuova afta Powaful Babilan get mash dong. An wi ier se fram Novemba 2023, di wan dem uu a priich na’afi rait dong evriting we dem du iina di priichin wok. Bot aalduo dem sitn ya chienj op, dat miin tu se di wok we wi a du fi priich tu piipl no so impuotant agen? Nuo sa!

2. Wa mek wi fi a priich muo an muo evridie? (Maak 13:10)

² Di wok we wi a du fi priich tu piipl a get muo an muo impuotant evridie kaa di taim we wi av fi dwi’it suun don. Luk pan wa Jiizas did se bout di priichin wok we wi a du iina dem taim ya. (Riid Maak 13:10.) Matyu rait se Jiizas se di gud nyuuz bout Gad Kindom afi go priich aal uova di worl bifuo “di worl . . . don.” (Mat. 24:14) Wen Jiizas se ‘bifuo da worl ya don,’ im did a taak bout di taim wen evriting iina Sietan worl mash op an gaan. An Jeuova av da die de an da taim de set aredi. (Mat. 24:36; 25:13; Aks 1:7) Evridie wi get kluosa an kluosa tu da taim de. (Ruo. 13:11) So wi afi gwaan priich til da taim de kom.

3. A wa mek wi priich di gud nyuuz?

³ It wuda nais ef wi sidong an tingk bout di riizn wa mek wi a du di priichin wok. An di riizn wa mek wi dwi’it a kaa wi lov fi priich. Di priichin wok we wi du mek wi kyan shuo umoch wi lov di gud nyuuz, umoch wi lov piipl, an umoch wi lov Jeuova an im niem. Mek wi luk pan dem chrii riizn ya.

WI PRIICH TU PIIPL KAA WI LOV DI GUD NYUUZ

4. Wen wi ier som gud nyuuz, wa wi waahn fi du?

⁴ Yu kyan memba no taim wen yu did ier som gud nyuuz? Laik yu mait-a did ier se wan a yu fambili av wan biebi, ar sumadi tel yu se dem a-go gi yu wan wok we yu did wel waahn. Duohn yu did api fi mek yu fambili an yu fren dem nuo bout it? Afta yu did ier di gud nyuuz bout Gad Kindom govament, we a di bes nyuuz yu kuda eva ier, a dat yu did waahn fi du tu?

5. Ou yu did fiil wen yu did ier di gud nyuuz fi di fos taim? (Luk pan di picha dem tu.)

⁵ Tingk bout ou yu did fiil wen yu ier di gud nyuuz fi di fos taim, wen yu lorn se Jeuova lov yu an im waahn yu fi worship im wid di wol iip a ada piipl dem we a worship im. An wen yu lorn bout wa im pramis bout wan taim we a-go kom wen dem naa go sofa an fiil no muor pien, an se yu kyan get fi si yu piipl dem we ded kom bak alaiv iina di nyuu worl, an nof muor ada tingz. (Maak 10:29, 30; Jan 5:28, 29; Ruo. 8:38, 39; Rev. 21:3, 4) Wen yu did lorn dem sitn de, it did mek yu fiil gud, duohn? (Luuk 24:32) Yu did lov di sitn dem we yu did a lorn, an yu did waahn fi tel ada piipl bout dem sitn de tu.​—Luk pan Jerimaiya 20:9.

6. Wa yu kyan lorn fram wa did gwaan wid Ernest an Rose?

⁶ Tingk bout wa did apm tu wan breda we niem Ernest. Im did a bout ten wen im faada ded. An Ernest se: “Mi aalwiez a wanda ef mi faada gaan a evn ar a jos it dat fi’im. An mi aalwiez groj ada pikni we dem faada stil de de wid dem.” Ernest wuda aalwiez go a di griev wich paat dem beri im faada go niil dong, an im wuda prie tu Gad an se: “Du Gad, mi waahn fi nuo wich paat mi faada de.” Sumadi staat fi stodi di Baibl wid Ernest bout 17 ier afta im faada ded. An im did api fi lorn se wen sumadi ded, dem no nuo notn at aal, it wuda komiin laik se dem a sliip ded. An im did lorn se piipl we ded a-go kom bak alaiv agen. (Iik. 9:5, 10; Aks 24:15) So Ernest get di ansa fi di kwestiyan dem we aalwiez a bada im. So im did api bout di sitn dem we im a lorn. An im waif Rose staat fi stodi di Baibl tu an did lov di sitn dem we shi a lorn bout Gad Kindom tu. So iina 1978, di tuu a dem get baptaiz. An dem aalwiez a tel dem fambili an fren dem an enibadi els we wuda lisn tu dem tu bout di sitn dem we dem did a lorn. An kaaz a dat, di tuu a dem get fi elp muo dan 70 piipl fi get baptaiz.

7. Wen wi riili lov di sitn dem we wi a lorn fram di Baibl, wa wi a-go waahn fi du? (Luuk 6:45)

⁷ Wen wi riili lov di sitn dem we wi a lorn iina di Baibl, wi kyaahn du no beta dan fi tel ada piipl bout dem. (Riid Luuk 6:45.) Wi fiil siem wie laik ou Jiizas falara dem did fiil wen dem se: “Wi kyaahn tap taak bout di sitn dem we wi did si an ier.” (Aks 4:20) Kaa wi lov di sitn dem we wi lorn fram di Baibl so moch, wi waahn fi tel wol iip a ada piipl bout di sitn dem we wi a lorn.

WI PRIICH TU PIIPL KAA WI LOV DEM

8. Wa mek wi waahn fi priich tu ada piipl bout di gud nyuuz? (Luk pan di paat we niem “Shuo Piipl Lov​—Elp Dem Fi Ton Jiizas Falara.”) (Luk pan di picha tu.)

⁸ Jos laik ou Jeuova an Jiizas lov piipl, a so wi lov dem tu. (Pr. 8:31; Jan 3:16) An wi fiil it fi di piipl dem we ‘no nuo Gad’ an we ‘naa liv fi notn.’ (Ifii. 2:12) It wuda komiin laik se dem a joun iina dem prablem dem an a wi av di gud nyuuz bout Gad Kindom we komiin laik di laif jakit we a-go siev dem. An wen wi lov dem piipl ya an fiil it fi dem, it a-go mek wi du aal a wa wi kyan du fi tel dem bout di gud nyuuz. An wen dem ier di gud nyuuz, it a-go elp dem fi av wan gud laif rait ya nou, an it a-go mek dem kyan get “di laif we Gad pramis”​—dat a fi liv fi eva iina Gad nyuu worl.​—1 Tim. 6:19.

9. Wa wi waahn mek piipl nuo se a-go apm iina di fyuucha, an wa mek? (Iziikel 33:7, 8)

⁹ Kaa wi lov piipl, it mek wi waahn fi mek dem nuo se da wikid worl ya suun don. (Riid Iziikel 33:7, 8.) An wi fiil it fi wi nieba dem an wi fambili dem we naa sorv Jeuova kaa dem no nuo se di taim a-go kom wen “piipl a-go sofa bad bad. Sofarieshan neva so wikid fram di worl a mek til nou, an nobadi naa go eva sofa so agen.” (Mat. 24:21) Wi waahn dem fi nuo wa a-go apm wen dem ting de a gwaan, wen Gad a-go get rid a di rilijan dem we naa du wa im waahn dem fi du. An den iina Aamagedan, Gad a-go get rid a da wikid worl ya. (Rev. 16:14, 16; 17:16, 17; 19:11, 19, 20) An wi prie se uol iip a piipl wi staat lisn tu wi an kom sorv Jeuova wid wi. Bot wa bout wi uona fambili an di ada piipl dem we naa lisn tu wi nou?

10. Wa mek wi fi gwaan tel piipl bout di sitn dem we a-go suun apm?

¹⁰ Jos laik wa wi did lorn iina di lesn bifuo dis, se Jeuova mait-a waahn fi siev di wan dem we si se Powaful Babilan get mash dong an waahn fi sorv im afta dat, ef a dat a-go apm, wi si wa mek a wan big ting fi wi gwaan priich rait ya nou. Kaa memba se ino, wa wi tel dem nou, a dat dem mait-a memba dem taim de. (Luk pan Iziikel 33:33.) Dem mait-a memba di sitn dem we wi did tel dem se a-go apm, an it mait-a push dem fi waahn kom sorv Jeuova wid wi. Jos laik wa did apm tu di prizn waadn iina Filipai we did chienj ou im fiil an staat fi sorv Jeuova afta di “powaful ortkwiek apm,” som piipl we naa kom kom sorv Jeuova wid wi nou, afta dem si ou Powaful Babilan get mash dong, dem mait-a chienj an waahn fi kom sorv Jeuova wid wi.​—Aks 16:25-34.

WI PRIICH TU PIIPL KAA WI LOV JEUOVA AN IM NIEM

11. A ou wi gi Jeuova di priez, di ana, an di powa? (Revilieshan 4:11) (Luk pan di picha dem tu.)

¹¹ Di bigis riizn wa mek wi priich di gud nyuuz a kaa wi lov Jeuova an im niem. Di priichin wok we wi a du gi wi a chaans fi big op Jeuova, di Gad we wi lov. (Riid Revilieshan 4:11.) An wi biliiv se a Jeuova a di wan we fi get di priez, di ana, an di powa fram evribadi. Wi gi Jeuova di priez an di ana wen wi mek piipl si se a im “mek evriting,” an a im gi wi laif so dat wi kyan de bout. An wi gi Jeuova wi powa wen wi yuuz wi taim, an yuuz di chrent we wi av an wi moni an dem ting de fi du aal we wi kyan du iina di priichin wok. (Mat. 6:33; Luuk 13:24; Kol. 3:23) So wi lov fi taak bout Jeuova an wi fiil laik wi afi tel ada piipl bout im niem an di kain-a sumadi im bi. Bot wa mek?

12. A ou wi shuo se wi av nof rispek fi Jeuova niem wen wi a priich?

¹² Kaa wi lov Jeuova, it a-go mek wi du tingz fi shuo se wi av nof rispek fi im niem. (Mat. 6:9) An wi waahn fi du aal we wi kyan du fi mek piipl nuo se a bie lai Sietan did a tel pan im. (Jen. 3:1-5; Juob 2:4; Jan 8:44) So wen wi a du di priichin wok, wi taak op fi Gad an wi mek evribadi we a lisn tu wi nuo di chuut bout im. An wi waahn evribadi fi nuo se di bigis ting bout im a dat im lov wi, an dat im a di bes sumadi fi ruul uova wi, an im aalwiez du wa rait, an im fier, an se a fi’im Kindom govament a-go get rid a aal a di sofarin we wi a go chuu an mek wi kyan liv iina piis an api wid wi wan aneda. (Sa. 37:10, 11, 29; 1 Jan 4:8) Wen wi de iina di priichin wok an wi taak op fi Jeuova, wi a shuo se wi av nof rispek fi im niem. An wi fiil gud fi nuo se wen wi du dat, wi a liv op tu wi niem az wan Jeuova Witnis. Wa mek wi se dat?

13. Wa mek wi proud se wi a wan Jeuova Witnis? (Aizaiya 43:10-12)

¹³ Jeuova se wi a im “witnis.” (Riid Aizaiya 43:10-12.) Kopl ier a bak, wan leta we kom fram di Govanin Badi did se: “Di bigis ting we kuda apm tu eni wan a wi a dat wi niem Jeuova Witnis.” Wa mek dem se dat? Tingk bout it da wie ya: Ef yu afi go a kuot an yu niid wan witnis fi taak op fi yu, no chuu se yu wuda pik sumadi we yu nuo, we yu kyan chos, an sumadi we piipl nuo se aalwiez taak di chuut? A siem so wen Jeuova pik wi fi bi im witnis, im shuo se im nuo wi gud gud, an im nuo se wi a-go taak op fi im se im a di onggl chuu Gad. So wi api se im pik wi fi bi im witnis we a-go taak op fi im. So evri chaans we wi get, wi mek piipl nuo im niem an mek dem si se a bie lai Sietan an di piipl dem we a fala im a tel pan im. Wen wi du dat wi a shuo se wi proud fi bi wan Jeuova Witnis.​—Sa. 83:18; Ruo. 10:13-15.

WI NAA GO TAP PRIICH TIL DA WORL YA DON

14. Wa a som a di nais sitn dem wi a luk faawod fi si apm?

¹⁴ Wa a som a di nais sitn dem wi a luk faawod fi si apm? Wan a dem a dat wi a luk faawod fi si di taim wen uol iip muor piipl a-go staat fi sorv Jeuova bifuo di wos sofarieshan staat. An wi api fi nuo se aal wen di wos sofarieshan a gwaan, uol iip muor piipl mait-a tap fala Sietan an staat fi sorv Jeuova wid wi.​—Aks 13:48.

15-16. Wa wi a-go gwaan du, an a wen wi a-go tap?

¹⁵ Miinwail wi a wiet fi si dem sitn ya apm, wi av wok fi gwaan du we wi naa go eva du agen​—fi priich an tel piipl di gud nyuuz bout Gad Kindom govament. An wi fi gwaan waan di piipl dem se da wikid worl ya suun don we wid. An wen di taim kom fi Jeuova joj piipl, dem a-go nuo se a Jeuova did gi wi da mesij ya fi priich.​—Izii. 38:23.

¹⁶ So wa wi mek op wi main se wi a-go du? Kaa wi lov di gud nyuuz we wi a priich, an wi lov piipl, an wi lov Jeuova an im niem, wi naa go tap priich. Wi a-go du aal we wi kyan du fi priich tu piipl no mata wa til Jeuova se, “A it dat!”