‘Unu Afi Go Disaid Uu Unu A-Go Sorv’

1. Ef wi waahn fi riili api, wa wi afi du, an wa mek? (Aizaiya 48:17, 18)

JEUOVA lov aal a wi an im waahn wi fi api nou an fi eva. (Iik. 3:12, 13) An im mek wi so dat wi kyan du som tingz gud. Bot im neehn mek wi fi ruul wiself widout im ar fi mek op wi main bout wa rait ar wa rang fi wiself. (Iik. 8:9; Jer. 10:23) Jeuova nuo se ef wi fi api wi afi liv wi laif an sorv im ou im se wi fi dwi’it.​—Riid Aizaiya 48:17, 18.

2. Wa Sietan waahn wi fi biliiv se, an wa Jeuova du fi shuo se a lai Sietan a tel?

² Sietan mek piipl biliiv se dem no niid Gad iina dem laif fi api an se dem kyan ruul demself widout Gad. (Jen. 3:4, 5) So fi mek dem nuo se notn no go so, Jeuova lou man fi gwaan ruul demself fi wan shaat taim an wi kyan si aal a di prablem dem we apm kaaz a dat. Bot di Baibl mek wi nuo bout som man an uman we du wa Jeuova se dem fi du an dem liv wan api laif. An Jiizas a di mien wan we du dat. Fos, mek wi luk pan som riizn we mek Jiizas did disaid fi sorv Jeuova. Den wi a-go luk pan wa mek a Jeuova wan wi fi worship. An di laas ting wi a-go luk pan a som riizn we mek wi disaid fi sorv Jeuova.

WA MEK JIIZAS DISAID FI SORV JEUOVA?

3. A wa Sietan did tel Jiizas se im wuda gi im, bot a wa Jiizas du?

³ Wen Jiizas did de pan di ort, im did afi mek op im main bout uu im a-go sorv. Kaa likl afta im baptaiz, Sietan shuo im aal a di govament dem we de pan di ort, an se ef im jos worship im wan taim, im a-go gi im aal a dem. Bot Jiizas se tu im se: “Muuv an gu we fram mi Sietan! It rait dong se, ‘Yu fi worship di Laad we a yu Gad, an a im wan yu fi sorv.’” (Mat. 4:8-10) Wi a-go luk pan som a di riizn dem we mek Jiizas did mek op im main fi sorv Jeuova.

4-5. A wa a som a di riizn dem we mek Jiizas sorv Jeuova?

⁴ Di mien riizn we mek Jiizas sorv Jeuova a kaa im lov Im, an nobadi kyaahn go mash op di lov we Jiizas av fi im Faada. (Jan 14:31) An pan tap a dat, im a dwi’it kaaz a di rait ting fi du. (Jan 8:28, 29; Rev. 4:11) Im nuo se a Jeuova gi wi laif, an wi kyan chos Jeuova no mata wa, an im aalwiez a gi wi tingz. (Sa. 33:4; 36:9; Jmz. 1:17) An Jeuova aalwiez tel Jiizas di chuut, an a Im gi im evriting we im av. (Jan 1:14) Bot yu si Sietan, im onggl a kaaz piipl fi a ded. Im a wan laiyad kaa im aalwiez waahn tingz we a no fi im an onggl bizniz wid imself wan. (Jan 8:44) An kaa Jiizas nuo dem sitn ya bout Sietan, im neehn fala Sietan an ton gens Jeuova.​—Fil. 2:5-8.

⁵ Wan neda riizn we mek Jiizas sorv Jeuova a kaa im did a luk faawod fi wa wuda apm wen im du wa Jeuova waahn im fi du. (Iib. 12:2) Im did nuo se ef im did du wa Jeuova waahn im fi du it wuda mek piipl av nof rispek fi Jeuova niem, an im wuda get di chaans fi get rid a aal a di sofarieshan we wi a go chuu kaaz a Sietan.

A WA MEK A JEUOVA WAN WI FI WORSHIP?

6-7. Wa mek nof piipl naa worship Jeuova, bot wa mek wi fi worship im?

⁶ Nof piipl naa sorv Jeuova kaa dem no nuo bout di nais nais wiez dem we im av an bout aal a di sitn dem we im du fi dem. An a dat did gwaan wid di piipl dem we Paal did priich tu iina Atenz.​—Aks 17:19, 20, 30, 34.

⁷ Paal did mek di piipl dem nuo se a Gad “gi evribadi laif an aal di sitn dem we dem niid.” An im tel dem se: “A im mek wi, gi wi laif, an mek wi kyan muuv bout.” Wi de ya kaa Gad “mek wan man fos an aal di ada chraib a piipl iina di worl kom fram da wan man de,” an a das wai wi fi worship im.​—Aks 17:25, 26, 28.

8. Wa wi nuo se Jeuova naa go eva du? Tel wi wa mek yu se so.

⁸ Jeuova, we mek wi an we av di rait fi ruul, no fuos nobadi fi sorv im. Dat a sitn im naa go eva du. Bot wa im du a gi wi nof tingz fi mek wi nuo se im a wan riil sumadi an se im lov wi kyaahn don. Im waahn uol iip a piipl fi bi im fren fi eva. (1 Tim. 2:3, 4) So Jeuova chrien wi ou fi tiich ada piipl bout di gud ting dem we im a-go du fi wi an fi mek dem nuo ou im a-go dwi’it. (Mat. 10:11-13; 28:19, 20) An im mek wi de iina di kanggrigieshan dem we im av di elda dem fi tek kier a wi.​—Aks 20:28.

9. Wa Jeuova du we mek wi si se im riili lov piipl?

⁹ Wi kyan si ou Jeuova lov piipl wen wi luk pan di wie ou im chriit di wan dem we a du dem uona ting. Tingk bout dem sitn ya: Fram wie bak wen, uol iip a piipl a liv dem laif an a disaid fi demself wa rait fram wa rang. Bot Jeuova stil gi dem di sitn dem we dem niid fi liv an we dem kyan yuuz fi enjai dem laif. (Mat. 5:44, 45; Aks 14:16, 17) Jeuova mek dem kyan av fren an fambili we lov dem, an dem kyan av pikni, an kyan wok an enjai di nais sitn dem we dem wok aad fa. (Sa. 127:3; Iik. 2:24) Aal a dis mek wi si se Jeuova lov evribadi. (Ek. 34:6) Mek wi luk pan som riizn fi si wa mek wi did mek op wi main fi sorv Jeuova, an ou im a bles wi kaaz a dat.

WA MEK WI DISAID FI SORV JEUOVA?

10. (a) Wa a di mien riizn wa mek wi sorv Jeuova? (Matyu 22:37) (b)  Kaa Jeuova a tek im taim wid yu, a ou yu si se it a elp yu? (Saam 103:13, 14)

¹⁰ Jos laik Jiizas, a lov a di mien riizn we mek wi sorv Jeuova. (Riid Matyu 22:37.) An wen wi lorn bout Jeuova wiez dem, dem mek wi get kluosa tu im, laik wen wi si se im tek im taim wid wi. Wen di Izrel piipl dem neehn lisn tu wa Gad se, im beg dem fi ‘kom bak kom sorv im.’ (Jer. 3:12,13) An memba se Jeuova nuo se wi no porfek. (Riid Saam 103:13, 14.) Wen wi tingk bout ou Jeuova tek im taim wid piipl, an di ada gud wiez dem we im av, it mek yu wel waahn fi sorv im, no chuu?

11. Wa a som a di ada riizn dem we mek wi mek op wi main fi sorv Jeuova?

¹¹ Wi a sorv Jeuova kaa wi nuo se a di rait ting fi du. (Mat. 4:10) An wen wi stik tu Jeuova no mata wa, wi kyan tingk bout di uol iip a gud sitn dem we wi a-go mek get fi apm. Laik wi ago get fi elp piipl get fi av nof rispek fi Jeuova niem, an fi mek dem nuo se Sietan a wan big laiyad, an wi mek Jeuova api. An ef wi gwaan sorv im, wi a-go get di chaans fi liv eva!​—Jan 17:3.

12-13. A wa wi lorn fram wa did apm tu Jane an Pam?

¹² Aal wen wi a pikni wi kyan get fi lov Jeuova tu. An da lov de kyan get chrangga an chrangga az wi get biga. Laik luk pan wa did apm wid dem tuu sista ya we niem Jane an Pam.a Wen dem jos staat stodi di Baibl, wan a dem did a 11 ier uol an di ada wan a did 10. Iivn duo dem mada an faada neva did waahn fi stodi di Baibl, dem lou dem fi gwaan stodi wid wi bot dem stil wuda afi go a choch wid di fambili pan di wiiken dem. Jane se: “Wa di Jeuova Witnis dem tiich mi fram di Baibl elp mi fi no fala di ada pikni dem an get miks op iina jogz an seks sin.”

¹³ Afta kopl ier, di tuu a dem staat fi priich wid di breda an sista dem iina di kanggrigieshan. An afta dem baptaiz, di tuu a dem staat fi paiyanier an tek kier a dem mada an faada we did op iina iej. Jane se: “Mi si fi miself se Jeuova tek kier a im fren dem, an mi si se wa 2 Timoti 2:19 se a chuu, wen it se, ‘Jeuova nuo di piipl dem we a fi im uon.’” So mi si klier klier se Jeuova aalwiez tek kier a di wan dem we lov im an a sorv im!

14. A ou wi kyan shuo se wi redi fi taak op fi Jeuova? (Luk pan di picha dem tu.)

¹⁴ Ef yu av wan fren we kain tu yu, an aalwiez a gi yu tingz, an we aalwiez redi fi paadn yu, an yu ier sumadi a tel lai pan dem, yu ago redi fi taak op fi dem no chuu? A siem so Sietan an di wan dem we im a kanchuol a tel bie lai pan Jeuova. Siem laik ou wi wuda waahn taak op fi wi fren, a siem so wi fi taak op fi Jeuova an mek piipl nuo se a lai Sietan a tel pan im. (Sa. 34:1; Aiz. 43:10) Wi a-go mek shuor se di sitn dem we wi a du an we wi a se a-go shuo se wi lov Jeuova wid aal a wi aat.

15. Wa a som a di blesn dem we di apasl Paal did get kaa im gi op tingz fi fala Jiizas? (Filipiyan 3:7, 8)

¹⁵ Nof a wi gi op tingz iina laif we wi did waahn fi du kaa wi did waahn fi sorv Jeuova beta an du wa im se wi fi du. Laik di apasl Paal did gi op im tap-a-tap pozishan so im kuda ton wan a Jiizas falara an sorv Jeuova. (Gya. 1:14) An kaaz a dat, im kuda liv wan gud laif an get di chaans fi ruul wid Jiizas iina evn. Im neva sari se im mek op im main fi sorv Jeuova. An a siem so wen wi gi op tingz fi sorv Jeuova wi naa go sari.​—Riid Filipiyan 3:7, 8.

16. A wa wi lorn fram wa did apm wid Julia? (Luk pan di picha dem tu.)

¹⁶ Ef wi mek wa Jeuova waahn wi fi du bi di big ting iina wi laif, wi kyan av wan api laif nou an iina di fyuucha. Luk pan wa did gwaan wid wan sista we niem Julia. Bifuo shi lorn di chuut shi yuus tu sing pan wan choch kwaiya wen shi a did likl pikni. Tu ou shi kuda sing gud, wan a dem big taim apra singga de tek ar an tiich ar ou fi sing beta. An afta a wail, piipl staat fi si se shi kyan sing gud an shi staat fi sing iina som tap-a-tap plies tu. Wen shi a go a wan a dem tap-a-tap myuuzik skuul de, wan a di sumadi dem we did de iina ar klaas staat fi tel ar bout Gad an se im niem Jeuova. No tuu lang afta dat, Julia staat fi stodi di Baibl tuu taim fi di wiik. An kaaz a di sitn dem we shi did a lorn, shi mek op ar main se shi a-go mek Jeuova ting bi di big ting iina ar laif insted-a fi ton wan big taim singga. Bot dis a neehn sitn we iizi fi shi mek op ar main fi du kaa shi se: “Nof piipl did mek mi fiil se mi na’av no sens kaa mi mek op mi main se mi a-go tap du wa mi a du so dat mi kyan sorv Jeuova.” A ou yu tingk Julia fiil bout wa shi did mek op ar main fi du muor dan 30 ier ago? Shi se: “Mi av piis iina mi aat an main an mi nuo fi shuor se Jeuova a-go gi mi evriting we mi waahn iina di fyuucha.”​—Sa. 145:16.

NO TAP SORV JEUOVA

17. Kaa wi nuo se da worl ya suun don, we di wan dem we a sorv Jeuova an di wan dem we naa sorv im fi du?

¹⁷ Wi liv iina wan taim wen da worl ya suun don. An kaaz a dat, di apasl Paal did se: “Tuu tuuz, ‘Di wan we a kom a-go riich​—im naa go lie-lie.’” (Iib. 10:37) So dat mek wi si se a no nof taim lef fi piipl kom sorv Jeuova. (1 Kor. 7:29) An ef wi a sorv Jeuova aredi an wi a go chuu uol iip a prablem, wi kyan nuo fi shuor se “tuu tuuz” di prablem dem we wi a go chuu a-go don.

18. Wa Jiizas an Jeuova waahn wi fi du?

¹⁸ Jiizas neva onggl tel im falara dem se dem fi staat fala im, bot im tel dem se dem no fi tap fala im. (Mat. 16:24) So ef wi a sorv Jeuova fi uol iip a ier nou, wi fi mek op wi main fi no tap. So mek wi gwaan wok aad fi sorv Jeuova. It mait-a no iizi bot tingk bout di nais nais blesn dem we wi a-go kyan get nou kaa wi a sorv Jeuova!​—Sa. 35:27.

19. Wa wi lorn fram wa did apm tu Gene?

¹⁹ Som piipl fiil se dem afi gi op tu moch sitn fi sorv Jeuova. Ef yu a wan yong sumadi, a so yu mait-a fiil tu. An a so wan breda we niem Gene did fiil. Im se: “Mi did a wan Jeuova Witnis, bot mi did fiil laik se mi de iina prizn. Tu mi, it did luk laik di ada pikni dem we mi gruo op wid jos a av bie fon an a enjai demself. Laik dem kuda go a paati, av gorlfren an bwaifren, an plie giem we ful op a uol iip a kilin an dem ting de, wen mi onggl a go a miitn an fiil sorvis.” An so Gene se: “Afta a wail, anda di kwaiyat, mi staat fi du som a di siem sitn dem we dem pikni de a du. An ye, mi did av som nais taim, bot dat neehn laas lang. So mi staat fi tingk bout som a di sitn dem we mi did lorn fram di Baibl an mi mek op mi main se mi a-go sorv Jeuova wid aal a mi aat. An fram da taim de til nou, it komiin laik Jeuova ansa evri wan a mi prieya dem.”

20. A wa aal a wi fi mek op wi main fi du?

²⁰ Wan a di man dem we did rait wan a di Saamz dem mek wi nuo se di wan we Jeuova pik an we im kya iina im ous a-go api. (Sa. 65:4) So mek wi mek op wi main fi du laik we Jashwa se, wen im se: “Yu si mi an aal a uu iina fi mi ous, a Jeuova wi a-go sorv.”​—Jash. 24:15.