Wa Wi Kyan Lorn Fram Di Ting Dem We Jiekob Did Se Bifuo Im Ded​—Paat 2

1. A wa wi a-go luk pan iina da lesn ya?

AAL a Jiekob bwai pikni dem de roun im an a lisn tu wa im did waahn fi tel dem. Iina di lesn bifuo da wan ya, Jiekob did se som tingz tu Ruuben, Simiyan, Liivai, an Juuda we dem neehn ekspek fi ier. So dem mos did a wanda wa im did a-go se tu im ada iet bwai pikni dem. Mek wi luk pan wa wi kyan lorn fram wa Jiekob did se tu Zebyulan, Isakyar, Dan, Gad, Asha, Naftali, Juozif, an Benjamin.a

ZEBYULAN

2. A wa Jiekob did tel Zebyulan, an a ou it did apm fi chuu? (Jenisiz 49:13) (Luk pan di baks tu.)

² Riid Jenisiz 49:13. Jiekob did se Zebyulan chraib wuda liv a di sii-said, we did de a di naat paat a di Lan we Gad did pramis fi gi im piipl dem. An dem did get dem lan muor dan 200 ier afta Jiekob did se wa im did se. Da lan de did de bitwiin di Gyalalii Sii an di Mediterieniyan Sii. Muoziz did se di Zebyulan chraib wuda api. (Dyuu. 33:18) An dis kuda bi kaa dem did liv bitwiin di tuu sii dem, it wuda mek it iizi fi dem fi go bai an sel tingz. Bot eni wie yu tek it, di Zebyulan chraib wuda api.

3. Wa kyan elp wi fi bi api wid wa wi av?

³ Wa wi kyan lorn fram dis? Wi kyan api no mata we wi liv ar ou wi laif tan, bot fi stie api wi afi satisfai wid wa wi av. (Sa. 16:6; 24:5) Som a di taim, it mait-a iizi fi wi tingk bout di ting dem we wi no av raada dan fi a luk pan di gud sitn dem we mek wi api. Bot no mata wa a gwaan wid yu, chrai fi memba di gud sitn dem we a gwaan iina yu laif.​—Gya. 6:4.

ISAKYAR

4. A wa Jiekob did tel Isakyar, an a ou it did apm fi chuu? (Jenisiz 49:14, 15) (Luk pan di baks tu.)

⁴ Riid Jenisiz 49:14, 15. Jiekob did big op Isakyar kaa im a wan man we wok aad, an im se im komiin laik wan chrang dangki we kyan kyari uol iip a evi luod. Jiekob did se Isakyar wuda get wan nais piis a lan tu. Dat did apm fi chuu kaa Isakyar chraib did get wan gud piis a lan nier di Jaadn Riva we dem kuda gruo uol iip a tingz pan. (Jash. 19:22) An wi nuo se di Isakyar chraib did wok aad fi tek kier a dem lan, an dem wok aad fi elp ada piipl tu. (1 Ki. 4:7, 17) Laik wen di joj we niem Barak an di uman prafit we niem Debra did aks di Izrelait dem fi elp fi fait gens Sisera, di Isakyar chraib did a wan a di chraib dem we did redi fi elp. An dem did redi fi elp fi fait iina som ada waar tu.​—Joj. 5:15

5. Wa mek wi fi chrai fi bi sumadi we wok aad?

⁵ Wa wi kyan lorn fram dis? Jos laik ou it did wot nof tu Jeuova wen di Isakyar chraib did wok aad, a siem so wen wi wok aad fi du tingz fi Jeuova it miin nof tu im tu. (Iik. 2:24) Laik tingk bout di breda dem we wok aad fi tek kier a tingz iina di kanggrigieshan. (1 Tim. 3:1) A no laik se dem breda ya afi go a waar go fait, bot dem wok aad fi kip di breda an sista dem sief so dat notn kyaahn mash op we dem an Jeuova av. (1 Kor. 5:1, 5; Juud 17-23) An pan tap a dat, dem wok aad pan di taak dem we dem av fi gi so dat dem kyan bil op di breda an sista dem iina di kanggrigieshan.​—1 Tim. 5:17.

DAN

6. A wa kain-a wok di Dan chraib did get fi du? (Jenisiz 49:17, 18) (Luk pan di baks tu.)

⁶ Riid Jenisiz 49:17, 18. Jiekob se Dan komiin laik wan siniek we no fried fi tek aan no animal we biga dan im, iivn ef a wan aas we dem yuuz iina waar. So di Dan chraib wudn fried fi tek aan enibadi we kom fi fait gens Izrel. Wen di Izrelait dem did de pan dem wie fi go a di Lan we Jeuova pramis fi gi dem, di Dan chraib did de a di bak so dat dem kuda kip evribadi sief. (Nom. 10:25) An dis a did wan big wok we dem did get fi du iivn duo di res a di Izrelait dem neva si wa dem did a du.

7. Wen wi du tingz fi Jeuova, ou wi fi fiil bout it?

⁷ Wa wi kyan lorn fram dis? Som a di taim wi mait-a fiil laik se nobadi naa si di wok we wi a du. Laik wi mait-a elp fi kliin an tek kier a di Kindom Aal, elp out wid som wok a wan Sorkit Miitn ar wan kanvenshan, ar elp out wid sitn els. Ef yu du non a dem sitn de wi waahn fi big yu op fi dat, an aalwiez memba se Jeuova si evriting we wi du fi im an it wot nof tu im. An it mek Jeuova api wen im si se aal a wa wi a du fi im, a no kaa wi waahn ada piipl fi big wi op, bot a kaa wi waahn fi shuo se wi riili lov im.​—Mat. 6:1-4.

GAD

8. Wa mek it wuda iizi fi di Izrelait dem enimi dem kom fait gens di Gad chraib an tek we dem tingz? (Jenisiz 49:19) (Luk pan di baks tu.)

⁸ Riid Jenisiz 49:19. Jiekob did tel Gad se piipl wuda kom fi waar gens im chraib an tek we dem tingz. An dis did apm muor dan 200 ier afta Jiekob did se dat. Di Gad chraib did get lan pan di iis said a di Jaadn Riva. An yu did av som enimi we liv nier tu dem, an so we dem did liv wuda mek it iizi fi dem enimi de kom iin pan dem. Bot di Gad chraib did waahn fi tan de-so kaaz a did wan nais piis a lan fi dem riez dem animal pan. (Nom. 32:1, 5) Ye, wi kuda si se di Gad chraib a did som briev piipl. An pan tap a dat, dem did chos iina Jeuova se im wuda elp dem fi fait dem enimi dem kaa a Jeuova did gi dem da lan de iina di fos plies. Dem did aal sen we dem suoja dem fi uol iip a ier fi elp di ada chraib dem fi tek uova di res a di Lan we Jeuova pramis dem we de pan di wes said a di Jaadn Riva. (Nom. 32:16-19) Dem did nuo fi shuor se Jeuova wuda kip dem waif an dem pikni sief wen di man dem did gaan a waar. So Jeuova bles dem fi elp ada piipl iivn duo it neehn iizi, an im bles dem kaa dem briev tu.​—Jash. 22:1-4.

9. Ef wi chos iina Jeuova, a ou wi a-go liv wi laif?

⁹ Wa wi kyan lorn fram dis? Fi sorv Jeuova aal wen tingz aad, wi afi gwaan chos iina im. (Sa. 37:3) Nof a wi breda an sista dem shuo se dem chos iina Jeuova wen dem gi op tingz fi du muor fi im. Laik fi bil Kindom Aal an dem ting de, an fi go priich we dem niid muor elp fi du di priichin wok, an dem du som ada tingz fi Jeuova tu. Fi du dem sitn ya no iizi, bot dem du dat kaa dem nuo fi shuor se Jeuova aalwiez a-go tek kier a dem.​—Sa. 23:1.

ASHA

10. A wa di Asha chraib neehn du? (Jenisiz 49:20) (Luk pan di baks tu.)

¹⁰ Riid Jenisiz 49:20. Jiekob did se Asha chraib wuda rich an av nof tingz, an a dis did apm fi chuu. Asha chraib did get wan nais nais piis a lan we dem kuda gruo nof tingz pan. (Dyuu. 33:24) Di Mediterieniyan Sii did de saida fi dem lan. An di rich Foniishan siti we de iina Saidan did de pan fi dem lan tu. A de-so ship wuda kom an piipl wuda bai an sel tingz. Bot di Asha chraib neehn ron di Kienanait dem fram aafa dem lan. (Joj. 1:31, 32) Kaa di Kienanait dem did a bad kompni an kaa di Asha chraib did rich, it mait-a did mek dem no kier bout fi du wa Jeuova waahn dem fi du no muor. Kaa wen di joj we niem Barak did a aks di Izrelait dem fi elp fi fait gens som a di Kienanait dem, di Asha chraib neehn du notn fi elp dem, an so dem neehn get fi bi paat a di mirikl we apm a Megido wen Jeuova did fait fi im piipl dem. (Joj. 5:19-21) Asha chraib mos did shiem wen Barak an Debra did a sing wan sang kaa dem win, an a se Asha jos sidong so a di sii said an naa du notn.​—Joj. 5:17.

11. Wa mek wi no fi mek moni bi di big ting iina wi laif?

¹¹ Wa wi kyan lorn fram dis? Wi waahn fi mek shuor se wa Jeuova waahn wi fi du bi di big ting iina wi laif. So wi naa go chrai fi bi laik di piipl dem iina di worl we tingk se moni an di sitn dem we it kyan bai fi bi di big ting iina laif. (Pr. 18:11) Aalduo wi niid moni, wi no fi fiil se it muor impuotant dan fi sorv Jeuova. (Iik. 7:12; Iib. 13:5) An so wi no waahn fi wies taim a ron dong tingz we wi no niid an a mek dat tap wi fram du wi bes fi sorv Gad. Bot wa wi fi a du a yuuz muos a wi taim fi du tingz fi Jeuova an yuuz wi chrent fi du im wok. An wi nuo se ef wi gwaan du wa Jeuova se wi fi du, im a-go mek wi enjai laif iina di nyuu worl.​—Sa. 4:8.

NAFTALI

12. Ou wa Jiekob se bout Naftali mait-a did apm fi chuu? (Jenisiz 49:21) (Luk pan di baks tu.)

¹² Riid Jenisiz 49:21. Jiekob did se Naftali wuda taak som nais sitn, an dis mait-a did a taak bout di wie ou Jiizas priich tu piipl. Piipl did nuo se Jiizas a sumadi we kuda tiich gud, an a Kyaporniyom we did iina Naftali a did “fi im uona toun.” (Mat. 4:13; 9:1; Jan 7:46) Aizaiya did se Jiizas wuda komiin laik wan brait lait tu di piipl dem fram Zebyulan an Naftali. (Aiz. 9:1, 2) An wi si se Jiizas a did “di riil lait” fi chuu kaaz wa im tiich elp piipl fi nuo di chuut.​—Jan 1:9.

13. Ou wi kyan taak som nais sitn we mek Jeuova api?

¹³ Wa wi kyan lorn fram dis? Jeuova kier bout wa wi se an ou wi se it. So ou wi kyan taak som nais sitn we mek Jeuova api? Di fos ting we wi kyan du a aalwiez taak di chuut. (Sa. 15:1, 2) Wan neda ting we wi kyan du a big op wi breda an sista dem wen dem du sitn gud, an no grombl grombl an taak bout som likl likl tingz we wi no laik bout dem. (Ifii. 4:29) An wi kyan mek op wi main fi du beta wen wi a taak tu piipl fi di fos taim an den tel dem sitn bout Jeuova.

JUOZIF

14. Tel wi ou di sitn dem we Jiekob did se bout Juozif did apm fi chuu. (Jenisiz 49:22, 26) (Luk pan di baks tu.)

¹⁴ Riid Jenisiz 49:22, 26. Jiekob mos did proud a Juozif kaa Jeuova pik im fram mongks im breda dem an yuuz im iina wan speshal wie. Jiekob did se Juozif komiin laik wan branch fram wan chrii we a bier nof fruut. An Jiekob a did da chrii de. Juozif a did Jiekob fos bwai pikni we im get fram im waif Riechel. An Jiekob did se Juozif wuda get di sitn dem we di fos bwai pikni wuda get, so a wudn Ruuben wuda get it, we a did Liya an Jiekob fos bwai pikni. (Jen. 48:5, 6; 1 Kr. 5:1, 2) Wa Jiekob se did apm fi chuu wen Juozif bwai pikni dem, Iifriem an Manase, did get fi bi tuu a di chraib dem iina Izrel an get dem uona lan.​—Jen. 49:25; Jash. 14:4.

15. A wa Juozif did du wen im breda dem did a chriit im bad?

¹⁵ Jiekob did se piipl we iet Juozif wuda tek dem buo an aro an shuut aafa im. (Jen. 49:23) Dem piipl de a did Juozif breda dem we did bad main im an chriit im bad an mek im sofa. Bot Juozif neva mek dis kaaz im fi iet im breda dem, an im neehn bliem Jeuova fi aal a wa apm tu im niida. Jos laik we Jiekob se, Juozif neehn tek op no buo an aro an se im a-go fait gens dem. (Jen. 49:24) Wen Juozif did a go chuu dem rof taim de, im dipen pan Jeuova, an im paadn im breda dem fi wa dem did du tu im, an im chriit dem gud tu. (Jen. 47:11, 12) Juozif did mek di sitn dem we im go chuu elp im fi bi wan beta sumadi. (Sa. 105:17-19) An a das wai Jeuova kuda yuuz im fi du uol iip a impuotant sitn.

16. Wen wi a go chuu aad taim, ou wi kyan du laik Juozif?

¹⁶ Wa wi kyan lorn fram dis? Wi no fi mek di sitn dem we wi a go chuu mek wi no lov Jeuova an wi breda an sista dem no muor. Memba se wen wi a go chuu som aad taim an wi gwaan sorv Jeuova, im kyan yuuz dem taim de fi chrien wi fi bi wan beta sumadi. (Iib. 12:7) An dat kyan elp wi fi av som gud wiez, laik fi bi gud an kain tu ada piipl an fi paadn dem tu. (Iib. 12:11) An jos laik ou Jeuova did bles Juozif, wi nuo fi shuor se im a-go bles wi tu ef wi eng aan an no gi op.

BENJAMIN

17. A ou wa Jiekob did se bout Benjamin did apm fi chuu? (Jenisiz 49:27) (Luk pan di baks tu.)

¹⁷ Riid Jenisiz 49:27. Jiekob did se di piipl dem we kom fram di Benjamin chraib wuda komiin laik wulf kaa dem wuda kyan fait gud gud. (Joj. 20:15, 16; 1 Kr. 12:2) An wi kuda si dis kaa di fos king fi di Izrelait dem a did Saal an im did kom fram di Benjamin chraib. An wen im did a fait gens di Filistiin dem, im neehn fried fi ron iin pan dem. (1 Sam. 9:15-17, 21) Uol iip a ier afta dat, Kwiin Esta an Maadikai uu weehn kom fram di Benjamin chraib did siev di Izrelait dem wen di piipl dem fram Porja did waahn fi kil dem aaf.​—Esta 2:5-7; 8:3; 10:3.

18. Ou wi kyan du laik di Benjamin chraib?

¹⁸ Wa wi kyan lorn fram dis? Di piipl dem we kom fram di Benjamin chraib mos did api wen dem si se Saal we kom fram fi dem chraib ton king. Bot afta Saal, Jeuova neehn pik di neks king fram da chraib de. Im did pik Dievid we kom fram di Juuda chraib fi ton king. An a no evribadi fram di Benjamin chraib did api wid dat. Bot afta a wail, dem shuo se dem a bak di wan we Jeuova pik. (2 Sam. 3:17-19) An uol iip a ier afta dat, wen di ada chraib dem did a fait gens di Juuda chraib an uu Jeuova did pik fi ton king, di Benjamin chraib neva fala dem. (1 Ki. 11:31, 32; 12:19, 21) So mek wi du laik di Benjamin chraib an stik tu di wan dem we Jeuova pik fi liid wi.​—1 Tes. 5:12.

19. Ou wa Jiekob did se bifuo im ded kyan elp wi?

¹⁹ Wi kyan lorn nof fram di ting dem we Jiekob did se bifuo im ded. Wen wi luk pan wa im did se a-go apm an ou it apm fi chuu, dat kyan elp wi fi nuo fi shuor se di ada sopm dem we Jeuova se a-go apm we de iina im Wod a-go apm fi chuu. An wen wi tingk bout ou Jeuova did bles Jiekob bwai pikni dem, it kyan elp wi fi nuo wa wi niid fi du fi mek Jeuova api tu.