Jiekob An Iisaa Saat Out Tingz Wid Dem Wan Aneda

Jeuova did mek Jiekob nuo se im wuda tek kier a im jos laik ou im did tek kier a Iebriyam an Aizak. Jiekob did muuv go a wan plies niem Ieran. Wen im de de, im get marid an av wol iip a pikni, an im did get rich bad.

Afta im de a Ieran fi wan gud wail, Jeuova tel Jiekob se: ‘Go bak go liv a di plies we yu kom fram.’ So Jiekob an im fambili pak op dem tingz an lef out fi go bak. Wen dem did de pan di ruod som piipl kom tel Jiekob se: ‘Yu breda Iisaa a kom, an im av 400 ada man a kom wid im!’ Jiekob did fried se Iisaa wuda ort im an im fambili. So im prie tu Jeuova an aks im se: ‘Jeuova, du, no mek mi breda du mi notn.’ Di die afta dat Jiekob sen wol iip a shiip, guot, kou, kyamil, an dangki go gi Iisaa.

Da sed nait de, Jiekob did de bai imself an im si wan ienjel! Jiekob an di ienjel grab aan pan dem wan aneda an di tuu a dem staat fi rasl wid dem wan aneda. An dat did gwaan til die lait. Iivn duo sitn did apm tu Jiekob we mek im fiil nof nof pien, im wudn le’go aafa di ienjel. So di ienjel se tu im se: ‘Le’go aafa mi.’ Bot Jiekob se: ‘Nuo, mi naa le’go aafa yu til yu bles mi.’

So di ienjel bles Jiekob. An nou im did nuo se Jeuova wudn mek Iisaa du im notn.

Da sed maanin de, Jiekob luk out an si Iisaa an di 400 man dem a kom. Jiekob lef im fambili an go tu Iisaa, an a sevn taim im bou dong infronta im. Iisaa ron go tu Jiekob an og im op, an di tuu a dem staat baal. An dem saat out tingz an mek piis wid dem wan aneda. Ou yu tingk Jeuova did fiil bout wa Jiekob du?

Afta dat, Iisaa go baka im yaad an Jiekob go wich paat im did a go. A 12 bwai pikni Jiekob did av. Dem did niem Ruuben, Simiyan, Liivai, Juuda, Dan, Naftalai, Gad, Asha, Isakyaar, Zebyulan, Juozif, an Benjamin. Jeuova did yuuz Jiekob bwai pikni we niem Juozif fi siev im piipl dem. Yu nuo wa did apm? Kom mek wi fain out no.